ອາ​ເມ​ຣິ​ກາ​-​ຍີ່­ປຸ່ນ ລົງ​ນາມ​ໃນ​ຂໍ້​ຕົກ­ລົງການ​ຄ້າ​ເສ­ລີ

 

 

11.10.2019 9:11     

   ສຳນັກ​ຂ່າວ​ກຽວ​ໂດ​ຂອງ​ຍີ່​ຢຸ່ນ​ລາຍ​ງານ ຕາມ​ການ​ເປີດ ເຜີຍ​ຂອງ​ກະຊວງ​ກະສິກຳ​ອາ​ເມ​ຣິ​ກາ​ວ່າ: ຂໍ້​ຕົກລົງ​ຫຼັງ​ສຸດ​ລະບຸ​ວ່າ; ຍີ່ປຸ່ນ ຈະ​ຍົກເລີກ ຫຼື ຫຼຸດ​ພາສີ​ນຳ​ເຂົ້າ​ສິນຄ້າ​ປະເພດ​ອາຫານ ແລະ ສິນຄ້າ​ກະສິກຳ ຈາກ​ອາ​ເມ​ຣິ​ກາ ໃນ​ວົງ​ເງິນ 7,2 ຕື້​ໂດ​ລາ. ໃນ​ຂະນະ​ທີ່ ອາ​ເມ​ຣິ​ກາ ຍັງ​ຈະ​ເກັບ​ພາສີ​ນຳ​ເຂົ້າ​ລົດ​ຈາກ​ຍີ່ປຸ່ນ​ໃນ​ລະດັບ​ເກົ່າ​ຄື 2,5%, ອາ​ເມ​ຣິ​ກາ ໄດ້​ຕັດສິນ​ໃຈ​ທີ່​ຈະ​ບໍ່​ຂຶ້ນ​ພາສີ​ນຳ​ເຂົ້າ​ລົດ​ຈາກ​ຍີ່ປຸ່ນ​ຍ້ອນ​ເຫດຜົນ​ດ້ານ​ຄວາມ​ໝັ້ນຄົງ ເຖິງ​ວ່າ​ອາ​ເມ​ຣິ​ກາ ເຄີຍ​ຂູ່​ວ່າ​ຈະ​ຂຶ້ນ​ພາສີ​ດັ່ງກ່າວ​ກໍ​ຕາມ.

   ທ່ານ ໂຕ​ຊິ​ມິ​ສຶ ໂມ​ເຕ​ກິ ລັດຖະມົນຕີ​ຕ່າງປະເທດ​ຍີ່ປຸ່ນ​ກ່າວ​ວ່າ: ຂໍ້​ຕົກລົງ​ການ​ຄ້າ​ເສລີ ຈະ​ມີ​ຜົນ​ບັງຄັບ​ໃຊ້​ໂດຍ​ໄວ​ທີ່​ສຸດ​ເທົ່າ​ທີ່​ຈະ​ເປັນ​ໄປ​ໄດ້.

   ລາຍ​ງານ​ລະບຸ​ວ່າ: ທ່ານ ໂດ​ໂນ ທຣຳ ປະທານາທິບໍດີ​ອາ​ເມ​ຣິ​ກາ ແລະ ທ່ານ ຊິນ​ໂຊ ອາ​ເບະ ນາຍົກລັດຖະມົນຕີ​ຍີ່​ປຸ່ນ ໄດ້​ຮ່ວມ​ລົງ​ນາມ​ໃນ​ຂໍ້​ຕົກລົງ​ການ​ຄ້າ​ເບື້ອງ​ຕົ້ນ ລະຫວ່າງ ອາ​ເມ​ຣິ​ກາ ແລະ ຍີ່ປຸ່ນ ຊຶ່ງ​ຈັດ​ຂຶ້ນ​ທີ່​ຕຶກ​ສະຫະ​ປະຊາຊາດ​ໃນ​ນະຄອນ​ນິວ​ຢອກ​ເມື່ອ​ເດືອນ​ກັນຍາ​ຜ່ານ​ມາ. ທ່ານ ທຣຳ ກ່າວ​ວ່າ: ຂໍ້​ຕົກລົງ​ດັ່ງກ່າວ ຈະ​ນຳໄປ​ສູ່​ການ​ເຮັດ​ຂໍ້​ຕົກລົງ​ການ​ຄ້າ​ທີ່​ມີ​ຄວາມ​ເປັນ​ທຳ ແລະ ໃຫ້​ຜົນ​ປະໂຫຍດ​ທັງ​ສອງ​ຝ່າຍ. ໃນ​ປີ 2018, ຍີ່ປຸ່ນ ກາຍເປັນ​ປະເທດ​ຄູ່​ການ​ຄ້າ​ໃຫຍ່​ອັນ​ດັບ 4 ຂອງ​ອາ​ເມ​ຣິ​ກາ.