ອິນ​ໂດ​ເນ​ເຊຍ ໂຄ­ສະ­ນາ​ສະ­ຖານ­ທີ່​ທ່ອງ​ທ່ຽວ​ແຫ່ງ​ໃໝ່

 

 

14.10.2019 10:08     

ຮຽບຮຽງ​ໂດຍ​​ : ສີ​ວັນ

   ສະຖານທີ່​ທ່ອງ​ທ່ຽວ​ແຫ່ງ​ໃໝ່ 10 ແຫ່ງ ຫຼື ຍັງ​ເອີ້ນ​ວ່າ "10 New Bali" ຊຶ່ງ​ລັດຖະບານ ອິນ​ໂດ​ເນ​ເຊຍ ຈັດ​ຕັ້ງ​ຂຶ້ນ ເພື່ອ​ແນໃສ່​ຊຸກຍູ້​ການທ່ອງທ່ຽວ​ໄປ​ເຖິງ​ບັນດາ​ສະຖານທີ່​ທ່ອງ​ທ່ຽວ​ທີ່​ມີ​ທ່າແຮງ​ບົ່ມ​ຊ້ອນ​ຂອງ​ອິນ​ໂດ​ເນ​ເຊຍ. ນີ້​ແມ່ນ​ລະບົບ​ການເຄື່ອນໄຫວ ເພື່ອ​ແນໃສ່​ໂຄສະນາ​ບັນດາ​ສະຖານທີ່​ທ່ອງ​ທ່ຽວ​ແຫ່ງ ໃໝ່. ຕົ້ນ​ເດືອນ​ກັນຍາ​ຜ່ານ​ມາ, ສະຖານທູດ ອິນ​ໂດ​ເນ​ເຊຍ ປະຈຳ​ນະຄອນຫຼວງ​ຮ່າ​ໂນ້ຍ ສສ ຫວຽດນາມ ໄດ້​ສົມທົບ​ກັບ​ກະຊວງ​ທ່ອງ​ທ່ຽວ ອິນ​ໂດ​ເນ​ເຊຍ ຈັດ​ເວທີ​ປາ​ໄສ​ທີ່​ມີ​ຫົວຂໍ້​ວ່າ; "ພາລະ​ກຳ​ດ້ານ​ການ​ຄ້າ - ໂຄສະນາ​ສະຖານທີ່​ທ່ອງ​ທ່ຽວ​ໃໝ່ 10 ແຫ່ງ ຂອງ​ອິນ​ໂດ​ເນ​ເຊຍ​ຢູ່​ຮ່າ​ໂນ້ຍ". ນີ້​ແມ່ນ​ໂອກາດ​ເພື່ອ​ໃຫ້​ບັນດາ​ວິ​ສາ​ຫະ​ກິດ​ທ່ອງ​ທ່ຽວ ອິນ​ໂດ​ເນ​ເຊຍ ໄດ້​ແນະນຳ​ການທ່ອງທ່ຽວ ແລະ ຊອກ​ຮູ້​ຄູ່​ຮ່ວມ​ມື​ຈາກ​ຫວຽດນາມ.

   ອີງ​ຕາມ​ແຫຼ່ງ​ຂ່າວ​ຈາກ​ວິທະຍຸ​ກະຈາຍສຽງ​ຫວຽດນາມ, ທ່ານ ໂມ​ນາສ ຈາ​ໂຈ​ໂນ ເ​ຈົ້ນ​ ໜ້າທີ່​ສະຫະ​ສະມາຄົມ​ການ ທ່ອງທ່ຽວ ອິນ​ໂດ​ເນ​ເຊຍ (ASITA) ແຂວງ​ຊາ​ວາ ຕາເວັນ​ອອກ ໄດ້​ແນະ​ນໍາ​ສະຖານທີ່​ທ່ອງ​ທ່ຽວ​ທີ່​ມີ​ຊື​ສຽງ​ຂອງ ອິນ​ໂດ​ເນ​ເຊຍ ໂດຍ​ສະເພາະ​ແມ່ນ​ເກາະ​ບາ​ຫຼີ. ຈຸດ​ພົ້ນ​ເດັ່ນ​ຂອງ​ແຂວງ​ຊາ​ວາ ຕາເວັນ​ອອກ ແມ່ນ​ພູເຂົາ​ໄຟ ໂບຣ​ໂມ. ຢູ່​ທີ່​ນັ້ນ, ແຂກ​ທ່ອງ​ທ່ຽວ​ສາມາດ​ຮັບ​ຊົມ​ອາ​ລຸນ​ວັນ​ໃໝ່ ແລະ ທັດສະນີ​ຍະ​ພາບ​ທີ່​ໃຫຍ່​ໂຕ​ມະ​ໂຫ​ຖານ. ນອກຈາກ​ນັ້ນ, ຫ່າງ​ຈາກ​ພູເຂົາ​ໄຟ ໂບຣ​ໂມ ຍັງ​ມີ​ປາກ​ພູເຂົາ​ໄຟ Ijen ຊຶ່ງ​ແມ່ນ​ສະຖານ​ທີ່ທ່ອງ​ທ່ຽວ​ແຫ່ງ​ໜຶ່ງ​ທີ່​ລື​ຊື່, ບັນດາ​ແຂກ​ທ່ອງ​ທ່ຽວ ສາມາດ​ຮັບ​ຊົມ​ຖ່ານ​ໄຟ​ສີຟ້າ ຊຶ່ງ​ແມ່ນ​ໜຶ່ງ​ໃນ​ປາກ​ພູເຂົາ​ໄຟ​ສອງ​ແຫ່ງ​ໃນ​ໂລກ ທີ່​ມີ​ຖ່ານ​ໄຟ​ສີ​ຟ້າ.

   ທ່ານ ໂມ​ນາສ ຈາ​ໂຈ​ໂນ ກ່າວ​ວ່າ: ພູເຂົາ​ໄຟ ໂບຣ​ໂມ ແມ່ນ​ສະຖານທີ່​ທ່ອງ​ທ່ຽວ​ແຫ່ງ​ໜຶ່ງ​ນອນ​ໃນ​ບັນຊີ "10 New Bali". ໂບຣ​ໂມ ແມ່ນ 1 ໃນ​ຈຳ ນວນ 5 ພູເຂົາ​ໄຟ ທີ່​ຍັງ​ມີ​ຖ່ານ​ໄຟ​ຮ້ອນ​ງາມ​ທີ່​ສຸດ​ໃນ​ໂລກ. ສິ່ງ​ທີ່​ດຶງ​ດູດ​ໃຈ​ຂອງ​ພູເຂົາ​ໄຟ ໂບຣ​ໂມ ແມ່ນ​ຄວາມ​ງາມ​ທາງ​ທຳ​ມະ​ຊາດ​ແບບ​ປະຖົມ​ປະ​ຖານ ແລະ ບໍລິສຸດ. ຄິດ​ສະເລ່ຍ​ແຕ່​ລະ​ມື້, ໂບຣ​ໂມ ດຶງ​ດູດ​ແຂກ​ທ່ອງ​ທ່ຽວ​ປະມານ 1.500 ເທື່ອ​ຄົນ​ມາ​ຢ້ຽມ​ຊົມ, ສະເພາະ​ມື້​ວັນ​ເສົາ ແລະ ວັນ​ອາທິດ ບັນລຸ​ເຖິງ 3.000 ເທື່ອ​ຄົນ. ທ່ານ ນາງ ຫ​ງວຽນ​ຫວຽດ​ທິດາ​ນ​ເຟືອງ​ຜູ້ອຳນວຍການ​ບໍລິສັດ​ຫຸ້ນ​ສ່ວນ​ການ​ຄ້າ ແລະ ການທ່ອງທ່ຽວ Zentour ຊຶ່ງ​ແມ່ນ​ໜຶ່ງ​ໃນ​ບັນດາ​ບໍລິສັດ​ບໍລິການ​ນໍາ​ພາ​ແຂກ​ທ່ອງ​ທ່ຽວ​ຫວຽດນາມ ໄປ​ທ່ຽວ​ຢູ່​ຕ່າງປະເທດ​ເປັນ​ປະຈຳ, ໃນ​ນັ້ນ​ມີ ອິນ​ໂດ​ເນ​ເຊຍ ໃຫ້​ຮູ້​ວ່າ: "ຕະຫຼາດ ອິນ​ໂດ​ເນ​ເຊຍ ແມ່ນ​ຕະຫຼາດ​ແຫ່ງ​ໜຶ່ງ​ທີ່​ພວກ​ຂ້າພະເຈົ້າ​ພັດທະນາ​ແຕ່​ດົນ​ແລ້ວ ແລະ ສ່ວນ​ຫຼາຍ​ແມ່ນ​ຢູ່ ບາ​ຫຼີ. ໃນ​ນັ້ນ, ມີ​ພູເຂົາ​ໄຟ ໂບຣ​ໂມ ຊຶ່ງ​ມີ​ທັດສະນີ​ຍະ​ພາບ​ທີ່​ສວຍ​ງາມ ແລະ ໃຫຍ່​ໂຕ​ມະ​ໂຫ​ຖານ, ເປັນ​ສະຖານທີ່​ທ່ອງ​ທ່ຽວ​ທີ່​​ໜ້າ​ສົນ​ໃຈ ແລະ ບໍລິສັດ​ຕ່າງໆ​ລ້ວນ​ແຕ່​ມີ​ຄວາມ​ປາຖະໜາ​ຢາກ​ພັດ​ທະ​ນາ.

   ໃນ​ບັນຊີ "10 New Bali", ແຂວງ​ຊາ​ວາຕາ​ເວັນ​ອອກ ມີ​ສະຖານທີ່​ທ່ອງ​ທ່ຽວ 4 ແຫ່ງ​ທີ່​ລື​ຊື່ ແລະ ສວຍ​ງາມ. ນອກຈາກ ພູເຂົາ​ໄຟ Bromo ແລ້ວ, ຍັງ​ມີ​ສະຖານທີ່​ທ່ອງ​ທ່ຽວ 3 ແຫ່ງ​ຄື: ໝູ່​ເກາະ ເຊ​ຣິ​ບູ, ຫາດ​ທະເລ ຕານ​ຈຸງ ເລ​ຊຸງ ແລະ ເຂດ​ທ່ອງ​ທ່ຽວ​ ຢ້ຽມ​ຊົມ​ວິຫານ​ໂບ​ໂຣ​ບູ​ເດີ ຊຶ່ງ​ເປັນ​ສິ່ງ​ມະຫັດສະຈັນ​ທາງ​ສາສະໜາ​ໃຫຍ່​ທີ່​ສຸດ​ໃນ​ໂລກ ໂດຍ​ອົງການ​ອຸຍ​ແ​ນັສ​ໂກ (Unessco) ຮັບຮອງ​ວ່າ; "ເປັນ​ມໍລະດົກ​ວັດທະນະທຳ​ຂອງ​ມວນ​ມະນຸດ". ສ່ວນ​ສະຖານທີ່ 6 ແຫ່ງ​ຂອງ "10 New Bali" ແມ່ນ​ຕັ້ງ​ຢູ່​ກະ​ແຈກ​ກະຈາຍ​ຄື: ໜອງ​ໂຕ​ບາ ຢູ່​ທາງ​ທິດເໜືອ​ເກາະ​ສຸ​ມາດ​ຕຣາ, ຫາດ​ທະເລ​ຕານ​ຈຸງ ເຄ​ລາ​ຢັງ ຢູ່ ເຂດ​ບັງ​ກາ ເບ​ລີ​ຕຸງ, ເກາະ​ບາ​ຄາ​ໂຕ​ບີ ຢູ່​ທິດຕາເວັນອອກ​ສຸລາ​ເວ​ສີ, ບັນດາ​ສະຖານທີ່​ທັງ​ໝົດ​ນັ້ນ, ລ້ວນ​ແຕ່​ໄດ້​ເຊື່ອມ​ຕໍ່​ກັບ​ບັນດາ​ສາຍ​ການບິນ​ສາກົນ ຫຼື ພາຍ​ໃນ​ປະ​ເທດ. ທ່ານ ໂມ​ນາສ ຈາ​ໂຈ​ໂນ ໃຫ້​ຮູ້​ຕື່ມ​ອີກ​ວ່າ: ສຳລັບ​ພື້ນຖານ​ໂຄງ​ລ່າງ, ໂຮງແຮມ, ສະໜາມ​ບິນ ຫຼື ພາຫະ​ນະ​ນໍາ​ທ່ຽວ​ທີ່​ສະດວກ​ສະບາຍ​ໃນ​ການ​ເດີນທາງ​ໄປ​ມາ. ນອກ​ນັ້ນ, ຍັງ​ມີ​ພັດ​ຕະ​ຄານ, ຮ້ານ​ອາຫານ​ຫຼາຍ​ແຫ່ງ​ໃຫ້ການ​ບໍລິການ​ອາຫານ​ຕ່າງໆ​ຊຶ່ງ​ມີ​ລົດ​ຊາດ​ເໝາະ​ກັບ​ແຂກ​ທ່ອງ​ທ່ຽວ.

   ໃນ​ຈຳນວນ 30 ບໍລິສັດ​ທີ່​ເຂົ້າ​ຮ່ວມ​ລາຍການ​ດັ່ງກ່າວ, ມີ​ຫຼາຍ​ບໍລິສັດ​ໄດ້​ໃຫ້​ຄຳ​ໝັ້ນ​ສັນຍາ​ວ່າ: ຈະ​ຮ່ວມ​ມື​ກັບ​ບັນດາ​ບໍລິສັດ​ທ່ອງ​ທ່ຽວ​ຂອງ ອິນ​ໂດ​ເນ​ເຊຍ ແລະ ສ່ວນ​ຫຼາຍ​ເຂົາເຈົ້າ​ລ້ວນ​ແຕ່​ຮູ້ສຶກ​ເພິ່ງ​ພໍໃຈ ໂດຍ​ສະເພາະ​ບໍລິສັດ​ນໍາ​ທ່ຽວ​ຈາກ​ຫວຽດນາມ​ເຊັ່ນ: ບໍລິສັດ​ຫຸ້ນ​ສ່ວນ​ການ​ຄ້າ - ການທ່ອງທ່ຽວ Zentour  ແລະ ບໍລິສັດ ລົງທຶນ Dolphintour ຈຳກັດ ຕ່າງ​ກໍ ປາຖະໜາ​ຢາກ​ພັດທະນາ​ບໍ ລິການ​ທ່ອງທ່ຽວ ໄປ​ຍັງ​ອິນ​ໂດ​ເນ​ເຊຍ.
"ໃນ​ອະນາຄົດ ພວກ​ຂ້າ ພະເຈົ້າ​ຈະ​ພະຍາຍາມ ເພື່ອ​ແນະນຳ​ໃຫ້​ຊາວ​ຫວຽດນາມຮູ້ ຈັກ​ເຖິງ​ຜະລິດ​ຕະ​ພັນ ອິນ​ໂດ​ເນ​ເຊຍ ຫຼາຍ​ກວ່າ​ເກົ່າ ເພາະວ່າ ສະຖານທີ່​ທ່ອງ​ທ່ຽວ​ຂອງ ອິນ​ໂດ​ເນ​ເຊຍ​ແມ່ນ​ມີ​ເອກະລັກ​ພິເສດ​ທີ່​ສຸດ. ພາຍຫຼັງ​ເຂົ້າ​ຮ່ວມ​ເຫດການ​ດັ່ງກ່າວ, ພວກ​ຂ້າພະເຈົ້າ​ມີ​ຄູ່​ຮ່ວມ​ມື​ໃໝ່ ແລະ ບັນດາ​ແນວ​ຄວາມ​ຄິດ​ໃໝ່​ເພື່ອ​ພັດທະນາ​ການທ່ອງທ່ຽວ​ຢູ່ ອິນ​ໂດ​ເນ​ເຊຍ".

   ປັດຈຸບັນ, ຈຳນວນ​ແຂກ​ທ່ອງ​ທ່ຽວ​ຫວຽດນາມ ໄປ​ທ່ອງ​ທ່ຽວ ອິນ​ໂດ​ເນ​ເຊຍ ສືບຕໍ່​ເພີ່ມ ​ຂຶ້ນ. ຕາມ​ໂຕ​ເລກ​ສະຖິຕິ​ຂອງ​ອິນ​ໂດ​ເນ​ເຊຍ ລາຍ​ງານ​ວ່າ: ປີ 2018, ຈຳນວນ​ແຂກ​ທ່ອງ​ທ່ຽວ​ຫວຽດນາມ ໄປ​ທ່ຽວ​ຢູ່ອິນ​ໂດ​ເນ​ເຊຍ ​ບັນ​ລຸ​ເກືອບ 76.000 ເທື່ອ​ຄົນ. ນັບ​ແຕ່​ເດືອນ​ມັງ ກອນ ຫາ ເດືອນ​ກໍລະກົດ​ປີ 2019, ຈຳນວນ​ແຂກ​ທ່ອງ​ທ່ຽວ​ຫວຽດນາມ ໄປ​ທ່ຽວ​ຢູ່​ອິນ​ໂດ​ເນ​ເຊຍ​ບັນລຸ 53.000 ເທື່ອ​ຄົນ, ເພີ່ມ​ຂຶ້ນ 18% ເມື່ອ​ທຽບໃສ່​ໄລຍະ​ດຽວ​ກັນ​ຂອງ​ປີ 2018. ເຖິງ​ຢ່າງໃດ​ກໍ​ຕາມ ບາ​ຫຼີ ຍັງ​ແມ່ນ​ສະຖານທີ່​ທ່ອງ​ທ່ຽວ​ທີ່​ໂດດ​ເດັ່ນ ຊຶ່ງ​ແຂກ​ທ່ອງ​ທ່ຽວ​ຫວຽດນາມ ມັກ​ໄປ​ທ່ຽວ​ຫຼາຍ​ກວ່າ​ໝູ່. ກ່ຽວ​ກັບ​ເປົ້າ​ໝາຍ​ຂອງ​ການເຄື່ອນໄຫວ​ໂຄສະນາ​ສະຖານທີ່​ທ່ອງ​ທ່ຽວ​ໃໝ່​ຂອງ ອິນ​ໂດ​ເນ​ເຊຍ, ທ່ານ ແອວ​ນູ ຮາ​ດີ ເອກ​ອັກ​ຄະ​ລັດ​ຖະ​ທູດ ອິນ​ໂດ​ເນ​ເຊຍ ປະຈຳ ຮ່າ​ໂນ້ຍ ໃຫ້​ຮູ້​ວ່າ: ພວກ​ຂ້າພະເຈົ້າ​ຢາກ​ສົ່ງເສີມ​ການທ່ອງທ່ຽວ​ຫຼາຍ​ກວ່າ ແລະ ມີ​ການ​ແລກປ່ຽນ​ແຂກ​ທ່ອງ​ທ່ຽວ ລະຫວ່າງ ສອງ​ປະເທດ ອິນ​ໂດ​ເນ​ເຊຍ ແລະ ຫວຽດນາມ. ໃນ​ຕະຫຼອດ​ປີ 2019 ນີ້, ທາງ​ສະຖານທູດ​ກໍ​ໄດ້​ໃຫ້ການ​ໜູນ​ຊ່ວຍ​ຫຼາຍ​ຢ່າງ​ໃນ​ການ​ຈັດ​ກິດ​ຈະ​ກໍາ ແລະ ການເຄື່ອນໄຫວ​ເພື່ອ​ໂຄສະນາ​ການ​ທ່ອງ​ທຽວ. ຍິ່ງ​ໄປ​ກວ່າ​ນັ້ນ, ສະຖານທູດ​ກໍ່​ໄດ້​ເຂົ້າ​ຮ່ວມ​ງານ​ຕະຫຼາດນັດ​ການທ່ອງທ່ຽວ​ສາກົນ​ຫວຽດນາມ, ເຊີນ​ສື່​ມວນ​ຊົນ​ຫວຽດນາມ, ວາລະສານ​ທ່ອງ​ທ່ຽວ ແລະ Blogger  ເຂົ້າ​ຮ່ວມ​ບັນດາ​ລາຍການ​ຄື "ທ່ອງ​ທ່ຽວ" ໄປ​ຍັງ ອິນ​ໂດ​ເນ​ເຊຍ ກໍ​ຄື​ໃຫ້ການ​ໜູນ​ຊ່ວຍ​ການ​ເຊື່ອມ​ໂຍງ​ຕິດຕໍ່​ພົວພັນ.

   ໃນ​ເດືອນ​ກັນຍາ​ຜ່ານ​ມາ, ສະຖານທູດ ອິນ​ໂດ​ເນ​ເຊຍ ປະ ຈຳ​ຫວຽດນາມ ໄດ້​ຈັດ​ຕັ້ງ​ບັນດາ​ກິດ​ຈະ​ກໍາ​ຄ້າຍຄື​ກັນ​ຢູ່​ນະຄອນ ໂຮ່​ຈິ​ມິນ ແລະ 2 ແຂວງ​ຄື: ຮ່າ​ລອງ ແລະ ເ​ຫງະ​ອານ ຂອງ​ຫວຽດນາມ ເພື່ອ​ໂຄສະນາ​ພາບ​ພົດ​ຂອງ ອິນ​ໂດ​ເນ​ເຊຍ ເວົ້າ​ລວມ ແລະ ການທ່ອງທ່ຽວ ອິນ​ໂດ​ເນ​ເຊຍ ເວົ້າ​ສະເພາະເປົ້າ​ໝາຍ​ຕ້ອນຮັບ​ແຂກ​ທ່ອງ​ທ່ຽວ​ຫວຽດນາມ​ໃຫ້​ບັນລຸ 123.000 ເທື່ອ​ຄົນ ໃນ​ປີ 2019 ຂອງ​ລັດຖະບານ ອິນ​ໂດ​ເນ​ເຊຍ ແມ່ນ​ມີ​ຄວາມ​ເປັນ​ໄປ​ໄດ້​ສູງ.