ຈີນ - ເນ​ປານ ສ້າງ​ສາຍ​ພົວ­ພັນ​ຄູ່​ຮ່ວມ​ມື​ຍຸດ­ທະ­ສາດ

 

 

17.10.2019 9:40     

  ຂ່າວສານ CRI ລາຍ​ງານ​ວ່າ: ວັນ​ທີ 12 ຕຸລາ​ຜ່ານ​ມາ, ທ່ານ ສີ​ຈິ້ນ​ຜິງ ປະທານ​ປະເທດ​ຈີນ ໄດ້​ພົບ​ປະ​ກັບ​ທ່ານ ນາງ ບິດ​ຢາ ເດ​ວີ ບານ​ດາ​ຣີ ປະທານາທິບໍດີ​ເນ​ປານ ຢູ່​ນະ ຄອນຫຼວງ​ກັດ​ມັນ​ດຸ​ຂອງ​ເນ​ປານ. ປະມຸກ​ລັດ​ສອງ​ປະເທດ​ໄດ້​ປະກາດ​ຮ່ວມ​ກັນ​ວ່າ, ສອງ​ຝ່າຍ​ຈະ​ຢຶດ​ຖືນ້ຳ​ໃຈ​ທີ່​ຮ່ວມ​ຈິດ​ຮ່ວມ​ໃຈ, ຮ່ວມ​ມື​ກັນ ແລະ ໄດ້​ຮັບ​ຜົນ​ປະໂຫຍດ​ຮ່ວມ​ກັນ, ເພື່ອ​ສ້າງ​ສາຍ​ພົວພັນ​ຄູ່​ຮ່ວມ​ມື​ຍຸດທະສາດ​ທີ່​ມີ​ມິດຕະພາບ​ທຸກ​ເຊັ່ນ​ຄົນ ທີ່​ມຸ່ງ​ໜ້າ​ສູ່​ການ​ພັດທະນາ ແລະ ຄວາມ​ຈະເລີນ​ຮຸ່ງເຮືອງ ລະຫວ່າງ ຈີນ​-​ເນ​ປານ.

  ທ່ານ ສີ​ຈິ້ນ​ຜິງ ກ່າວ​ເນັ້ນ​ວ່າ: ສອງ​ຝ່າຍ​ຕ້ອງ​ປັບປຸງ​ພື້ນຖານ​ການເມືອງ​ຂອງ​ການ​ພົວພັນ ລະຫວ່າງ ຈີນ​-​ເນ​ປານ ໃຫ້​ໜັກ​ແໜ້ນ, ຖື​ການ​ສ້າງ​ຄູ່​ຮ່ວມ​ຊາຕາກຳ​ເປັນ​ເປົ້າ​ໝາຍ​ໄລຍະ​ຍາວ​ໃນ​ການ​ພັດທະນາ​ການ​ພົວພັນ ລະຫວ່າງ ຈີນ ກັບ ເນ​ປານ. ພ້ອມ​ກັນ​ນັ້ນ, ທ່ານ ສີ​ຈິ້ນ​ຜິງ ກໍ​ໄດ່​ສະແດງ​ຄວາມ​ຂອບໃຈ​ເນ​ປານ ທີ່​ໄດ້​ຢຶດ​ໝັ້ນ​ນະໂຍບາຍ​ປະເທດ​ຈີນ​ດຽວ ແລະ ໃຫ້ການ​ສະໜັບສະໜູນ​ຢ່າງ​ໜັກ​ແໜ້ນ​ແກ່​ຈີນ ໃນ​ໄລຍະ​ທີ່​ຜ່ານ​ມາ. ຈີນ ຈະ​ເຮັດ​ຄື​ທີ່​ຜ່ານ​ມາ ເພື່ອ​ສະໜັບສະໜູນ​ເນ​ປານ ໃນ​ການ​ປົກ​ປັກ​ຮັກສາ​ເອກະລາດ,ອະທິປະ​ໄຕ ແລະ ຜືນ​ແຜ່ນດິນ​ອັນ​ຄົບ​ຖ້ວນ​ຂອງ​ເນ​ປານ ຢ່າງ​ສະເໝີ​ຕົ້ນ​ສະເໝີ​ປາຍ, ໃຫ້ການ​ສະໜັບສະໜູນ ແລະ ການ​ຊ່ວຍເຫຼືອ​ຕາມ​ຄວາມ​ສາມາດ​ແກ່​ການ​ພັດທະ ນາ​ເສດຖະກິດ-​ສັງຄົມຂອງ​ ເນ​ປານ. ສອງ​ຝ່າຍ​ຕ້ອງສ້າງ​ ສະຖານະ​ພາບ​ທີ່​ຮ່ວມ​ມື​ຢ່າງ ຮອບດ້ານ, ດຳເນີນ​ການ​ສ້າງ​ຕາໜ່າງ​ເຊື່ອມ​ຈອດ​ກັນ​ຢູ່​ເຂດ​ພູ​ຫິມະ​ໄລ, ເປີດ​ກວ້າງ​ການ​ຮ່ວມ​ມື​ດ້ານ​ການ​ແລກປ່ຽນ​ໃນ​ແຕ່​ລະ​ຂົງເຂດ.

  ຂະນະ​ດຽວ​ກັນ​ນັ້ນ, ທ່ານ ນາງ ບິດ​ຢາ ເດ​ວີ ບານ​ດາ​ຣີ ກ່າວ​ວ່າ: ເນ​ປານ ຍິນດີ​ຮ່ຳຮຽນ ແລະ ຖອດ​ຖອນ​ບົດຮຽນ​ທີ່​ສຳເລັດ​ຜົນ​ດ້ານ​ການ​ພັດທະນາ​ຂອງ​ຈີນ, ເຊື່ອ​ວ່າ: ພາຍ​ໃຕ້​ການ​ນຳພາ​ຂອງ​ພັກ​ກອມ​ມູ​ນິດ​ຈີນ ປະຊາຊົນ​ຈີນ ຈະ​ບັນລຸ​ຄວາມ​ໄຝ່​ຝັນ​ຂອງ​ຕົນ​ທີ່​ສ້າງ​ປະຊາຊາດ​ຈີນ​ໃຫ້​ມີ​ຄວາມ​ຈະ ເລີນ​ຮຸ່ງເຮືອງ​ຄືນໃໝ່​ຢ່າງ​ຍິ່ງ​ໃຫຍ່, ຈະ​ນຳ​ເອົາ​ຜົນງານ​ອັນ​ດີ​ມາ​ຍັງ​ເນ​ປານ ກໍຄື​ສັນຕິພາບ, ການ​ພັດທະນາ ແລະ ຄວາມ​ຈະເລີນ​ຮຸ່ງເຮືອງ​ຂອງ​ພາກ​ພື້ນ.

  ທ່ານ ນາງ​ບິດ​ຢາ ເດ​ວີ ບານ​ດາ​ຣີ ກ່າວ​ຢໍ້າ​ວ່າ: ເນ​ປານ ກັບ ຈີນ ປະກາດ​ສ້າງ​ສາຍ​ພົວພັນ​ຄູ່​ຮ່ວມ​ມື​ຍຸດທະສາດ, ຈະ​ປັບປຸງ​ມິດຕະພາບ​ອັນ​ເປັນ​ມູນເຊື້ອ ລະຫວ່າງ ສອງ​ປະເທດ​ໃຫ້​ໝັ້ນຄົງ​ກ່​ວາ​ເກົ່າ, ເຮັດ​ໃຫ້ການ​ພົວພັນ ລະຫວ່າງ ສອງ​ປະເທດ​ມີ​ເນື້ອ​ໃນ​ອຸດົມສົມບູນ​ກວ່າ​ເກົ່າ, ຊຸກຍູ້​ໃຫ້ການ​ພົວພັນ ເນ​ປານ​-​ຈີນ ກ້າວ​ເຂົ້າ​ສູ່​ຍຸກ​ໃໝ່. ເນ​ປານ ເຄົາລົບ​ອະທິປະ​ໄຕ ແລະ ຜືນ​ແຜ່ນດິນ​ອັນ​ຄົບ​ຖ້ວນ​ຂອງ​ຈີນ, ເດັດດ່ຽວ​ບໍ່​ອະນຸຍາດ​ໃຫ້​ອິດ​ທິ​ກຳລັງ​ຕໍ່ຕ້ານ​ຈີນ​ໃດໆ​ດຳເນີນ​ການເຄື່ອນໄຫວ​ຕ້ານ​ຈີນ​ຢູ່​ບົນ​ດິນແດນ​ເນ​ປານ.