ອິນ​ໂດ​ເນ​ເຊຍ ຮຽກ­ຮ້ອງ​ໃຫ້​ລົງ­ທຶນ​ເຂົ້າ​ໂຄງ­ການ​ເດີນ​ທະ­ເລ

22.10.2019 10:10     

ຮຽບຮຽງ​ໂດຍ​​ : ສີ​ວັນ

  ທ່ານ ຣິດ​ວານ ຈາ​ມາ​ ລຸ​ດດິນ ຮອງ​ລັດຖະມົນຕີ​ຈັດ ການ​ພື້ນຖານ​ໂຄງ​ລ່າງ​ການ​ເດີນ​ທະເລ ໃຫ້​ຮູ້​ວ່າ: ບັນດາ​ໂຄງການ​ເດີນ​ທະເລ​ໄດ້​ກຽມ ພ້ອມ​ເປີດ​ໂອກາດ​ໃຫ້​ແກ່​ບັນ ດາ​ນັກ​ລົງ ທຶນ ທັງ​ພາຍ​ໃນ ແລະ ຕ່າງປະເທດ​ເຂົ້າ​ມາ​ລົງ​ທຶນ.

  ຕາມ​ແຫຼ່ງ​ຂ່າວສານ ຫວຽດ ນາມ, ປີ 2020, ອິນ​ໂດ​ເນເຊຍ ຈະ​ຮຽກຮ້ອງ​ໃຫ້​ລົງທຶນ​ເຂົ້າ​ບັນ ດາ​ໂຄງການ​ເດີນ​ທະເລ ດ້ວຍ​ມູນ​ຄ່າ​ຫຼາຍ​ກວ່າ 91 ຕື້​ໂດ​ລາ, ແນໃສ່​ສະໜັບສະໜູນ ອໍາ​ນາດ​ການ​ປົກຄອງ​ຂອງ ທ່ານ ໂຈ​ໂກ ວິ​ໂດ​ໂດ ປະທານາທິບໍດີ ອິນ​ໂດ​ເນ​ເຊຍ ປະຕິບັດ​ເປົ້າ​ໝາຍ​ການ​ຫັນ​ປະເທດ​ເປັນ​ຈຸດ​ໃຈກາງ​ການ​ເດີນ​ທະເລ​ຂອງ​ໂລກ.

  ໃນ​ກອງ​ປະຊຸມ​ປຶກສາ​ຫາລື​ກ່ຽວ​ກັບ​ນະໂຍບາຍ​ໂຄງ​ລ່າງ​ແຫ່ງ​ຊາດ ຮອດ​ປີ 2024, ທີ່​ຈັດ​ຂຶ້ນ​ຢູ່​ນະຄອນຫຼວງ​ຈາ​ກາ​ຕາ ຫວ່າງແລ້ວນີ້, ທ່ານ ຣິດ​ວານ ຈາ​ມາ​ລຸ​ດ​ດິນ ໃຫ້​ຮູ້​ວ່າ: ບັນດາ​ໂຄງການ​ທີ່​ກ່າວ​ມາ​ນັ້ນ, ໄດ້​ກຽມພ້ອມ​ເປີດ​ປະຕູ​ໃຫ້​ແກ່​ບັນດາ​ນັກ​ລົງທຶນ​ທັງ​ພາຍ​ໃນ ແລະ ຕ່າງປະເທດ ເຂົ້າ​ມາ​ລົງ​ທຶນ. ອິນ​ໂດ​ເນ​ເຊຍ ກຽມພ້ອມ​ໃຫ້ການ​ສະໜອງ​ບັນດາ​ໂຄງການ​ທີ່​ມີ​ມູນ​ຄ່າ 91,1 ຕື້​ໂດ​ລາ ຊຶ່ງ​ບໍ່​ສະເພາະ​ແຕ່​ນັກ​ລົງທຶນ​ຈາກ​ຈີນ​ເທົ່າ​ນັ້ນ, ບັນດາ​ໂຄງການ​ດັ່ງກ່າວ ຍັງ​ເປີດ​ປະຕູ​ໃຫ້​ແກ່​ນັກ​ລົງທຶນ​ຈາກ​ບັນດາ​ປະເທດ​ອື່ນໆ​ເຊັ່ນ: ຍີ່ປຸ່ນ ແລະ ສ.ເກົາຫຼີ ກໍ​ຄື​ບັນດາ​ນັກ​ລົງ​ຢູ່​ພາຍ​ໃນ​ປະເທດ​ອີກ​ດ້ວຍ.

  ທ່ານ ຣິດ​ວານ ຈາ​ມາ​ລຸ​ດ​ດິນ ໃຫ້​ຮູ້​ຕື່ມ​ວ່າ: ນະໂຍບາຍ​ພັດທະນາ​ພື້ນຖານ​ໂຄງ​ລ່າງ ຈະ​ສືບຕໍ່​ໄດ້​ຮັບ​ການ​ຊຸກຍູ້​ຢ່າງ​ຕັ້ງໜ້າ ແນໃສ່​ການ​ເຊື່ຶອມ​ຈອດ​ບັນດາ​ຂົງເຂດ​ການ​ຜະລິດ, ເຂດ​ອຸດ​ສາ​ຫະ​ກໍາ​ຂະໜາດ​ນ້ອຍ, ບັນດາ​ເຂດ​ເສດຖະກິດ ແລະ ບັນດາ​ເຂດ​ທ່ອງ​ທ່ຽວ. ເພື່ອ​ປະຕິບັດ​ບັນດາ​ໂຄງການ​ດັ່ງກ່າວ, ລັດຖະບານ ອິນ​ໂດ​ເນ​ເຊຍ ໄດ້​ເຊື້ອ​ເຊີນ​ບັນດາ​ນັກ​ລົງທຶນ, ພິເສດ​ແມ່ນ​ລົງທຶນ​ເຂົ້າ​ໃນ​ຂົງເຂດ​ເດີນ​ທະ​ເລ. ອິນ​ໂດ​ເນ​ເຊຍ ໃຫ້​ຄໍາ​ໝັ້ນ​ສັນຍາ​ວ່າ: ຈະ​ບໍ່​ມີ​ສິ່ງ​ກີດຂວາງ​ໃດໆ​ໃນ​ການ​ລົງທຶນ ເພາະ​ນີ້​ແມ່ນ​ຂໍ​ກຸນ​ແຈ​ສໍາ​ຄັນ ໃນ​ການ​ຊ່ວຍ​ແກ້​ໄຂ​ການສ້າງວຽກ​ເຮັດ​ງານ​ທໍາ.

  ນອກຈາກ​ນັ້ນ, ລັດຖະ ບານ ອິນ​ໂດ​ເນ​ເຊຍ ຍັງ​ໄດ້​ສືບຕໍ່​ຊຸກຍູ້​ປັບປຸງ​ວຽກ​ງານ​ບໍລິຫານ, ໃນ​ນັ້ນ ສຸມ​ໃສ່​ວຽກ​ງານ​ຈັດ​ຕັ້ງ​ແບບ​ກະທັດ​ຮັດ, ຍູ້​ແຮງ​ລະດັບ​ການ​ບໍລິການ​ໂດຍ​ໄວ, ອອກ​ໃບ​ອະນຸມັດ​ການ​ລົງທຶນ ແລະ ເຮັດ​ທຸລະ​ກິດ ແບບ​ງ່າຍ​ດາຍ. ທ່ານ ຈາ​ມາ​ລຸ​ດ​ດິນ ກ່າວ​ວ່າ: ຂົງເຂດ​ເດີນ​ທະເລ ຍັງ​ແມ່ນ​ແຜນການ​ຕົ້ນຕໍ​ຂອງ​ລັດຖະບານ​ໃນ 5 ປີ​ຕໍ່ໜ້າ ໂດຍ​ໃຫ້​ສໍາ​ເລັດ​ໂຄງການ​ພັດທະນາ​ແຫຼ່ງ​ທ່ອງ​ທ່ຽວ 10 ແຫ່ງ ແລະ 4 ເຂດ​ທ່ອງ​ທ່ຽວ​ບຸລິມະສິດ ກໍ​ຄື​ການ​ກໍ່ສ້າງ​ຕື່ມ 14 ເຂດ​ອຸດ​ສາ​ຫະ​ກໍາ​ໃນ​ເກາະ​ຊາ​ວາ.

  ພ້ອມ​ກັນ​ນັ້ນ, ລັດຖະບານ ອິນ​ໂດ​ເນ​ເຊຍ ກໍາ​ລັງ​ອອກແຮງ​ເພີ່ມ​ມູນ​ຄ່າ​ຊັບພະຍາກອນ​ແຮ່​ທາດ​ຢູ່​ເຂດ​ອຸດ​ສາ​ຫະ​ກໍາ ໂມ​ໂຣ​ວາລີ ຊຶ່ງ​ເປັນ​ໂຮງງານ​ປຸງ​ແຕ່ງ ນີ​ແກ່ນ (niken) ໃຫຍ່​ອັນ​ດັບ​ໜຶ່ງ​ຂອງ​ປະເທດ ດ້ວຍ​ຈໍາ​ນວນ​ເງິນ​ລົງທຶນ 7,5 ຕື້​ໂດ​ລາ. ໃນ​ໄລຍະ​ປີ 2013-2017, ເຂດ​ອຸດ​ສາ​ຫະ​ກໍາ ໂມ​ໂຣ​ວາລີ ໄດ້​ປະກອບສ່ວນ​ເຂົ້າ​ງົບປະມານ​ລັດ 1.700 ຕື້​ຣູ​ເປຍ (120,5 ຕື້​ໂດ​ລາ) ແລະ ບັນລຸ​ມູນ​ຄ່າ​ສົ່ງ​ອອກ​ຫຼາຍ​ກວ່າ 1 ຕື້​ໂດ​ລາ. ຄາດ​ວ່າ: ຍອດ​ປະລິມານ​ຜະລິດ​ຕະ​ພັນ​ເຫຼັກ​ບໍ່​ເປັນ​ໝ້ຽງ ແລະ ເຫຼັກ carbon ຈາກ 4-5 ລ້ານ​ໂຕນ ຈະ​ເພີ່ມ​ຂຶ້ນ​ເປັນ 10 ລ້ານ​ໂຕນ ໃນ​ຊຸມ​ປີ​ຕໍ່ໜ້າ, ຕົ້ນຕໍ​ແມ່ນ​ແນໃສ່​ຕອບ​ສະໜອງ​ໃຫ້​ແກ່​ຂະແໜງ​ອຸດ​ສາ​ຫະ​ກໍາ​ພາຍ​ໃນ​ປະເທດ ເພື່ອ​ຫຼຸດຜ່ອນ​ການ​ນໍາ​ເຂົ້າ​ເຫຼັກ​ຈາກ​ຕ່າງ​ປະ​ເທດ.

  ໃນ​ກອງ​ປະຊຸມ​ປຶກສາ ຫາລື​ຄັ້ງ​ນີ້, ທ່ານ ດາ​ມິນ ນາ​ຊິ​ເຊິນ ລັດຖະມົນຕີ​ຈັດການ​ເສດຖະກິດ ໃຫ້​ຮູ້​ຕື່ມ​ວ່າ: ລັດ ຖະບານ ອິນ​ໂດ​ເນ​ເຊຍ ຈະ​ສືບ ຕໍ່​ຊຸກຍູ້ 223 ໂຄງການ ແລະ 3 ແຜນ​ຍຸດທະສາດ​ແຫ່ງ​ຊາດ ດ້ວຍ​ມູນ​ຄ່າ​ການ​ລົງທຶນ​ຫຼາຍ​ກວ່າ 296 ລ້ານ​ໂດ​ລາ. ໃນ​ຈໍາ​ນວນ 223 ໂຄງການ​ຍຸດທະສາດ​ນັ້ນ, ລັດຖະບານ ອິນ​ໂດ​ເນ​ເຊຍ ໄດ້​ໃຫ້​ບຸລິມະສິດ 37 ໂຄງການ ດ້ວຍ​ຍອດ​ມູນ​ຄ່າ​ການ​ລົງທຶນ​ຫຼາຍ​ກວ່າ 2.500 ພັນ​ຕື້​ຣູ​ເປຍ (ສະກຸນ​ເງິນ​ອິນ​ໂດ​ເນ​ເຊຍ) ໂດຍ​ພາຍ​ໃຕ້​ການ​ຄຸ້ມ​ຄອງ​ຂອງ ຄະ​ນະ​ກໍາ​ມະ​ການ​ຊຸກຍູ້​ບັນດາ​ຮາກ​ຖານ​ໂຄງ​ລ່າງ​ບຸລິ​ມະ​ສິດ. ການ​ຜັນ​ຂະຫຍາຍ​ບັນດາ​ໂຄງການ​ກໍ່ສ້າງ​ພື້ນຖານ​ໂຄງ​ລ່າງ​ດັ່ງກ່າວ ໄດ້​ສະທ້ອນ​ຢ່າງ​ຕັ້ງໜ້າ​ຕໍ່​ພື້ນຖານ​ເສດຖະກິດ ອິນ​ໂດ​ເນ​ເຊຍ.

  ຕາມ​​ສະຖິຕິ, ຂະແໜງ​ ກໍ່ສ້າງ ແມ່ນ 1 ໃນ 5 ຂົງ ເຂດ ໄດ້​ປະກອບສ່ວນ​ຫຼາຍ​ທີ່​ສຸດ​ເຂົ້າ​ໃນ​ຍອດ​ຜະລິດ​ຕະ​ພັນ​ພາຍ​ໃນ (GDP) ຂອງ​ອິນ​ໂດ​ເນ​ເຊຍ.