ສ.ເກົາ­ຫຼີ ຫວັງ​ຈະ​ກາຍ­ເປັນ​ນັກ​ລົງ­ທຶນ ອັນ​ດັບ 3 ໃນ​ມຽນ​ມາ

23.10.2019 9:13     

ຮຽບຮຽງ​ໂດຍ​​ : ລຸ້ງ​ດາວ

   ການ​ເດີນທາງ​ໄປ​ຢ້ຽມ ຢາມ​ປະເທດ​ມຽນ​ມາ ຂອງ ທ່ານ ມູນ​ແຈ​ອິນ ປະທານາທິບໍດີ ສ.ເກົາຫຼີ ໃນ​ຕົ້ນ​ເດືອນ​ກັນຍາ​ທີ່​ຜ່ານ​ມາ, ມີ​ການ​ລົງ​ນາມ​ໃນ​ບົດ​ບັນທຶກ​ຄວາມ​ເຂົ້າໃຈ (MOU) ຈຳນວນ 5 ສະບັບ, ໃນ​ນັ້ນ​ມີ 2 ໂຄງການ​ໃຫຍ່​ຄື: ໂຄງການ​ກໍ່ສ້າງ​ຂົວ Dala ຫຼື ຂົວ​ມິດຕະພາບ ສ.ເກົາຫຼີ - ມຽນ​ມາ ແລະ ເຂດ​ອຸດສາຫະກຳ ສ.ເກົາຫຼີ - ມຽນ​ມາ (KMIC: Korea-Myanmar Industrial Complex) ໃນ​ນະຄອນ​ຢາງ​ກຸ້ງ.
ທ່ານ ຄິມ​ຈຸນ​ອູ ຜູ້​ຈັດການ​ອາວຸໂສ ບໍລິສັດ Korea Land and Housing (KLH) ໃຫ້​ສຳພາດ​ກັບ​ໜັງສືພິມ ມຽນ​ມາ​ທາມ ວ່າ: ໂຄງການ​ທຳອິດ​ທີ່​ຈະ​ເລີ່ມ​ກໍ່ສ້າງ​ຄື: ນິຄົມ​ອຸດສາຫະກຳ ສ.ເກົາຫຼີ - ມຽນ​ມາ (KMIC) ຊຶ່ງ​ຄາດ​ວ່າ: ຈະ​ເລີ່ມ​ລົງມື​ກໍ່ສ້າງ​ໃນ​ກາງ​ປີ 2020 ແລະ ສຳເລັດ​ໃນ​ປີ 2024, ມີ​ເນື້ອທີ່ 224 ເຮັກຕາ, ດ້ວຍ​ມູນ​ຄ່າ 110 ລ້ານ​ໂດ​ລາ ຊຶ່ງ​ເປັນ​ໂຄງການ​ຮ່ວມ​ທຶນ​ລະຫວ່າງ 2 ປະເທດ ໃນ​ອັດຕາ​ສ່ວນ 60-40 ໂດຍ​ທາງ​ບໍລິສັດ​ລັດ​ວິ​ສາ​ຫະ​ກິດ ສ.ເກົາຫຼີ ເປັນ​ຜູ້​ລົງທຶນ​ຫຼັກ. ກະຊວງ​ກໍ່ສ້າງ​ຂອງ​ມຽນ​ມາ​ເປີດເຜີຍ​ວ່າ: ໄດ້​ຈັດ​ສັນ​ງົບປະມານ 60 ລ້ານ​ໂດ​ລາ ສຳລັບ​ການ​ຟື້ນ​ຟູ​ລະບົບ​ສາ​ທາ​ລະ​ນຸ​ປະ​ໂພ​ກ​ຕ່າງໆ ພາຍ​ໃນ​ນິຄົມ KMIC ລວມ​ທັງ​ການ​ພັດທະນາ​ຖະໜົນ​ຫົນທາງ ເພື່ອ​ເຊື່ອມ​ຕໍ່​ກັບ​ນະຄອນ​ຢາງ​ກຸ້ງ ຊຶ່ງ​ຫ່າງ​ອອກ​ໄປ​ປະມານ 10 ກິໂລ​ແມັດ. ສິ່ງ​ທີ່​ໜ້າ​ສົນໃຈ​ຂອງ​ນິຄົມ​ອຸດສາຫະກຳ KMIC, ທ່ານ ຄິມ​ຈຸນ​ອູ ກ່າວ​ວ່າ: ຈະ​ຊ່ວຍ​ເປີດ​ກວ້າງ​ທ່າແຮງ​ຂອງ​ມຽນ​ມາ ຊຶ່ງ​ຄາດ​ວ່າ: ຈະ​ມີ​ນັກ​ລົງທຶນ​ຈາກ​ຫຼາຍ​ປະເທດ​ໃຫ້​ຄວາມ​ສົນ​ໃຈ. ບໍ່​ສະເພາະ​ແຕ່​ນັກທຸລະກິດ ສ.ເກົ​າຫຼີ ເທົ່າ​ນັ້ນ. ປັດຈຸບັນ, ມີ​ນັກ​ລົງທຶນ​ຈາກ​ປະເທດ​ອາ​ຊຽນ, ຈີນ ແລະ ອິນ​ເດຍ ໄດ້​ເລີ່ມ​ສະແດງ​ຄວາມ​ສົນໃຈ​ຕໍ່​ໂຄງການ​ນີ້.

   ໃນ​ຂະນະ​ດຽວ​ກັນ,ທ່ານ ຢຸນ​ຊາງ​ຮິມ ປະທານ​ບໍລິສັດ KLH ຄາດ​ຄະເນ​ວ່າ: ໂຄງ ການ KMIC ຈະ​ສາມາດ​ດຶງ​ດູດ​ບໍລິສັດ 200 ກວ່າ​ແຫ່ງ​ຈາກ​ທົ່ວ​ໂລກ​ເຂົ້າ​ມາ​ລົງທຶນ ແລະ ສິ່ງ​ທີ່​ສຳຄັນ, ຈະ​ສ້າງ​ວຽກເຮັດງານ​ທຳ​ໃຫ້​ກັບ​ຄົນ​ມຽນ​ມາ ໄດ້​ຫຼາຍ​ເຖິງ 100.000 ຕຳແໜ່ງ ແລະ ຈະ​ມີ​ສ່ວນ​ຊ່ວຍ​ໃນ​ການ​ພັດທະນາ​ເສດຖະກິດ​ຂອງ​ມຽນ​ມາ. ນິຄົມ​ແຫ່ງ​ນີ້, ຈະ​ມີ​ອຸດສາຫະກຳ​ແຜ່ນແພ, ເຄື່ອງນຸ່ງ​ສຳເລັດ​ຮູບ, ການ​ປຸງ​ແຕ່ງອາຫານ ແລະ ເຄື່ອງ​ດື່ມ, ໂລ​ຈິ​ສ​ຕິກ ແລະ ວັດ​ສະ​ດຸ​ກໍ່ສ້າງ​ຕ່າງໆ. ທ່ານ ຢຸນ​ຊາງ​ຮິມ ກ່າວ​ວ່າ: ປັດຈຸບັນ, ພຶດຕິ​ກຳ​ຂອງ​ຜູ້​ບໍລິໂພກ​ໃນ​ປະເທດ​ມຽນ​ມາ, ເລີ່ມ​ຮັບ​ຮູ້ ແລະ ໃຫ້​ຄວາມ​ສົນໃຈ​ໃນ​ສິນຄ້າ​ຂອງ ສ.ເກົາຫຼີ (South korea brand) ຈາກ​ຮູບເງົາ ແລະ ຊີ​ຣີ​ເກົາຫຼີ ທີ່​ກຳລັງ​ຂະຫຍາຍ​ຫຼາຍ​ຂຶ້ນ. ສະນັ້ນ, ພາຍ​ໃນ​ນິຄົມ​ອຸດສາຫະກຳ KMIC ຈະ​ມີ​ພື້ນ​ທີ່​ບາງ​ສ່ວນ​ທີ່​ຈັດ​ສັນ​ໄວ້​ສຳລັບ​ສິນຄ້າ​ອຸປະ​ໂພ​ກ-​ບໍລິໂພກ ຂອງ ສ.ເກົາຫຼີ ເຊັ່ນ​ກັນ.
ປັດຈຸບັນ, ສ.ເກົາຫຼີ ກາຍ ເປັນ​ນັກ​ລົງທຶນ​ອັນ​ດັບ 6 ໃນ​ມຽນ​ມາ. ປະເທດ​ທີ່​ເຂົ້າ​ມາ​ລົງທຶນ​ຢູ່​ມຽນ​ມາ​ຫຼາຍ​ທີ່​ສຸດ​ແມ່ນ ສິງກະໂປ, ຈີນ ແລະ ຍີ່ປຸ່ນ ຊຶ່ງ​ຈະ​ເຫັນ​ວ່າ: ສ.ເກົາຫຼີ ເຂົ້າ​ສູ່​ຕະຫຼາດ​ມຽນ​ມາ ຊ້າ​ກວ່າ​ຖ້າ​ທຽບໃສ່​ຫຼາຍ​ປະເທດ​ໃນ​ອາ​ຊີ. ຈາກ​ຂໍ້​ມູນ​ຂອງ​ກະຊວງ​ການ​ລົງທຶນ ແລະ ການ​ບໍລິຫານ​ຂອງ​ມຽນ​ມາ ລະບຸ​ວ່າ: ຕັ້ງແຕ່​ປີ 1988 ເຖິງ​ເດືອນ​ສິງຫາ​ປີ​ນີ້, ສ.ເກົາຫຼີ ໄດ້​ລົງທຶນ​ທັງ​ໝົດ 3.900 ລ້ານ​ໂດ​ລາ, ໃນ 178 ໂຄງການ, ສ່ວນ​ໃຫຍ່​ຈະ​ເປັນ​ໂຄງການ​ກ່ຽວ​ກັບ​ນ້ຳມັນ ແລະ ແ​ກັສ​ທຳ​ມະ​ຊາດ, ພະລັງງານ​ທົດ​ແທນ ແລະ ອຸດສາຫະກຳ​ການ​ຜະລິດ​ອື່ນໆ. ທ່ານ ຢຸນ​ຊາງ​ຮິມ ກ່າວ​ວ່າ: ການ​ຮ່ວມ​ມື​ທະວີ​ພາຄີ ລະຫວ່າງ ສອງ​ປະເທດ​ຈະ​ເຮັດ​ໃຫ້ ສ.ເກົາຫຼີ ກາຍເປັນ​ໜຶ່ງ​ໃນ​ບັນດາ​ນັກ​ລົງທຶນ​ໃຫຍ່​ຂອງ ມຽນ​ມາ. ທ່ານ ຢຸນ​ຊາງ​ຮິມ ຍັງ​ໄດ້​ອ້າງ​ຄຳ​ເວົ້າ​ຂອງ​ປະທານາທິບໍດີ ສ.ເກົາຫຼີ ທ່ານ ມູນ ແຈ ອິນ ໃນ​ການ​ພົບ​ ປະ​ກັບ​ທ່ານ ອູ ວິນ ມິນ ປະ ທານາທິບໍດີ​ມຽນ​ມາ ແລະ ທ່ານ ນາງ ອອງ​ຊານ​ຊູ​ຈີ ທີ່​ປຶກສາ​ແຫ່ງ​ລັດ ທີ່​ເນັ້ນ​ໜັກ​ວ່າ: ມີ​ເປົ້າ ໝາຍ​ເພື່ອ​ເພີ່ມ​ທະວີ​ການ​ຮ່ວມ​ມື​ໃນ​ທຸກ​ຂົງເຂດ ລະຫວ່າງ ກັນ ແລະ ຍັງ​ຕ້ອງການ​ມີ​ສ່ວນ​ເຮັດ​ໃຫ້​ເສດຖະກິດ​ຂອງ​ມຽນ​ມາ ຂະຫຍາຍຕົວ ໂດຍ​ລະບຸ​ວ່າ: ຈໍາ​ນວນ​ເງິນ​​ລົງທຶນ​ໃນ​ມຽນ​ມາ ທີ່​ເພີ່ມ​ຂຶ້ນ​ຈະ​ເຮັດ​ໃຫ້ ສ.ເກົາຫຼີ ສາມາດ​ເປັນ​ອັນ​ດັບ 3 ຂອງ​ນັກ​ລົງທຶນ​ໃນ​ມຽນ​ມາ​ໃນ​ອະ​ນາ​ຄົດ.

   ນອກຈາກ​ນີ້, ສ.ເກົາຫຼີ ຍັງ​ໃຫ້ການ​ຊ່ວຍເຫຼືອ​ດ້ານ​ອື່ນໆ​ແກ່​ມຽນ​ມາ​ເຊັ່ນ: ການ​ຂະຫຍາຍ​ວົງ​ເງິນ​ກູ້​ຢືມ​ເປັນ 1.000 ລ້ານ​ໂດ​ລາ ສຳລັບ​ການ​ພັດທະນາ​ເສດຖະກິດ​ຂອງ​ມຽນ​ມາ ໃນ​ໄລຍະ 5 ປີ (2020-2024) ແລະ ການ​ຮ່ວມ​ມື​ລະຫວ່າງ​ທະນາຄານ KB Kookmin ຂອງ ສ.ເກົາຫຼີ ກັບ ລັດຖະບານ​ມຽນ​ມາ ໃນ​ເມືອງ​ຢາງ​ກຸ້ງ ສຳລັບ​ການ​ກໍ່ສ້າງ​ທີ່ຢູ່​ອາ​ໄສ ເພື່ອ​ຜູ້​ທີ່​ມີ​ລາຍ​ໄດ້​ຕ່ຳ​ໃນ​ປະເທດ​ມຽນ​ມາ​ເປັນ​ຕົ້ນ.