ທ່ານ ວິ​ໂດ​ໂດ ສັນ­ຍາ​ຈະ​ພັດ­ທະ­ນາ​ພື້ນ­ຖານ​ໂຄງ​ລ່າງ​ໃຫ້​ດີ

23.10.2019 9:15     

   ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ວັນທີ 20 ຕຸລາ​ຜ່ານ​ມາ, ຢູ່​ນະຄອນຫຼວງ​ຈາ​ກາ​ຕາ ປະ​ເທ​ດອິນ​ໂດ​ເນ ເຊຍ, ທ່ານ ໂຈ​ໂກ ວິ​ໂດ​ໂດ ໄດ້​ສາບານ​ຕົວ​ເຂົ້າ​ຮັບ​ດຳລົງ​ຕຳແໜ່ງ​ປະທານາທິບໍດີ ອິນ​ໂດ​ເນ​ເຊຍ ຊຶ່ງ​ເປັນ​ການ​ເລີ່ມ​ຕົ້ນ​ດຳລົງ​ຕຳແໜ່ງ​ປະທານາທິບໍດີ​ສະໄໝ​ທີ 2 ຢ່າງ​ເປັນ​ທາງ​ການ, ໃນ​ອາຍຸ​ການ 5 ປີ.

   ຂ່າວ​ລະບຸ​ວ່າ: ທ່ານ ວິ​ໂດ​ໂດ ພາຍຫຼັງ​ໄດ້​ຮັບ​ການ​ເລືອກ​ຕັ້ງ​ຄືນໃໝ່ ໄດ້​ໃຫ້​ຄຳ​ໝັ້ນ​ສັນຍາ​ວ່າ: ຈະ​ສືບຕໍ່​ຍູ້​ແຮງ​ການ​ພັດທະນາ​ພື້ນຖານ​ໂຄງ​ລ່າງ, ເພີ່ມ​ທະວີ​ຜັນ​ຂະຫຍາຍ​ບັນດາ​ໂຄງການ​ທີ່​ເຊື່ອມ​ຕໍ່​ບັນດາ​ທ່າ​ກ່ຳ​ປັ່ນ ແລະ ສະໜາມ​ບິນ​ໃນ​ທົ່ວ​ປະເທດ ກາຍເປັນ​ບັນດາ​ສູນ​ກະສິກຳ ແລະ ທ່ອງ​ທ່ຽວ. ຈະ​ຖື​ເອົາ​ການ​ພັດທະນາ​ຊັບ ພະຍາກອນ​ມະນຸດ ແລະ ສ້າງ​ໂອກາດ​ຫາ​ວຽກ​ເຮັດ​ງານ​ທຳ​ເປັນ​ວຽກ​ງານ​ຈຸດ​ສຸມ.

   ທ່ານ ວິໂດ​ໂດ ຍັງ​ໄດ້​ກ່າວ​ເຖິງ​ເປົ້າ​ໝາຍ​ທີ່​ຍິ່ງ​ໃຫຍ່​ຄື: ອິນ​ໂດ​ເນ​ເຊຍ ຕ້ອງ​ພັດທະນາ​ໃຫ້​ເປັນ​ກຸ່ມ​ເສດຖະກິດ​ໃຫຍ່ 1 ໃນ 5 ຂອງ​ໂລກ, ໃນ​ໂອກາດ​ຄົບຮອບ 100 ປີ​ຂອງ​ການ​ສະຖາປະນາ​ປະ​ເທດ. ເມື່ອ​ຮອດ​ປີ 2045 ຊຶ່ງ​ເປັນ​ປີ​ຄົບຮອບ 100 ປີ​ຂອງ​ການ​ສະຖາປະນາ​ປະເທດ, ລວມ​ຍອດ​ມູນ​ຄ່າ​ຜະລິດ​ຕະ​ພັນ​ພາຍ​ໃນ​ປະເທດ ຫຼື GDP ຂອງ​ອິນ​ໂດ​ເນ​ເຊຍ ຈະ​ບັນລຸ​ເຖິງ 7.000 ຕື້​ໂດ​ລາ. ທ່ານ ເຊື່ອ​ວ່າ: ເປົ້າ​ໝາຍ​ດັ່ງກ່າວ, ຈະ​ສາມາດ​ບັນລຸ​ຜົນ​ເປັນ​ຈິງ​ໄດ້ ແຕ່​ກໍ​ຕ້ອງ​ພະຍາຍາມ​ຢ່າງ​ອົດທົນ ແລະ ຕ້ອງ​ຍົກ​ປະສິດ ທິພາ​ບ​ຂອງ​ການ​ເຮັດ​ວຽກ​ໃຫ້​ສູງ​ກວ່າ​ເກົ່າ ພ້ອມ​ກັນ​ນັ້ນ, ທ່ານ ວິ​ໂດ​ໂດ ກ່າວ​ຢໍ້າ​ວ່າ: ຈະ​ນຳພາ​ຄະນະ​ລັດຖະ​ບານ​ສຸມ​ໃສ່​ຮັບປະກັນ​ການ​ບັນລຸ​ເປົ້າ​ໝາຍ​ການ​ພັດທະນາ​ໃນ​ອາຍຸ​ການ​ດຳລົງ​ຕຳແໜ່ງ​ໄລຍະ 5 ປີ​ຕໍ່ໜ້າ​ນີ້.

   ພ້ອມ​ກັນ​ນີ້, ລັດຖະບານ ອິນ​ໂດ​ເນ​ເຊຍ ຈະ​ລົງທຶນ​ເຂົ້າ​ບັນດາ​ໂຮງຮຽນ​ສອນ​ວິຊາ​ຊີບ, ສ້າງຕັ້ງ​ຮາກ​ຖານ​ບຳລຸງ​ສ້າງ, ຝຶກ​ອົບຮົມ​ບັນດາ​ຜູ້​ທີ່​ມີ​ຄວາມ​ສາມາດ ກໍຄື​ໝູນ​ໃຊ້​ກຳລັງ​ຄວາມ​ສາມາດ​ຂອງ​ຊາວ ອິນ​ໂດ​ເນ​ເຊຍ ທີ່​ອາໄສ​ຢູ່​ຕ່າງປະເທດ​ໃຫ້​ໄດ້​ຫຼາຍ​ທີ່​ສຸດ.