ກອງ​ປະ­ຊຸມ​ສຸດ​ຍອດ​ຂະ­ບວນ​ການ​ບໍ່​ຮ່ວມ​ກຸ່ມ​ຜ່ານ​ຖະ­ແຫຼງ­ການ​ບາ​ກູ

 

 

29.10.2019 8:31     

   ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ວັນ​ທີ 27 ຕຸລາ​​ຜ່ານມາ, ກອງ​ປະຊຸມ​ສຸດ​ຍອດ​ຂະບວນ​ການ​ບໍ່​ຮ່ວມ​ກຸ່ມ ໄດ້​​ປິດ​ລົງ ຢູ່​ນະຄອນຫຼວງ​ບາ​ກູ ປະເທດ ອາ​ແ​ຊັກ​ໄບ​ຊານ, ພາຍ​ຫຼັງ​ດໍາ​ເນີນ​ມາ​ເປັນ​ເວລາ 2 ວັນ.  ກອງ​ປະຊຸມ ໄດ້​ຮັບຮອງ "ຖະແຫຼງການ​ບາ​ກູ" ທີ່​ຊີ້​ນຳ​ການ​ພັດທະນາ​ຂອງ​ຂະບວນ​ການ​ບໍ່​ຮ່ວມ​ກຸ່ມ​ໃນ​ອະນາຄົດ ໂດຍ​ເນັ້ນ​ຈະ​ເພີ່ມ​ທະວີ​ຄວາມ​ມີ​ຊີວິດ​ຊີວາ ແລະ ປະສິດ​​ທິິ​ພາບ ຂອງ​ອົງການ​ຕົນ​ຕື່ມ​ອີກ, ຊຸກຍູ້​ລັດທິ​ຫຼາຍ​ຝ່າຍ ແລະ ຊຸກຍູ້​ສັນຕິພາບ, ການ​ພັດທະນາ​ຂອງ​ພາກ​ພື້ນ.

   ຂ່າວ​ລະບຸ​ວ່າ: ໃນ​ກອງ​ປະຊຸມ, ການ​ນຳ​ຂັ້ນ​ສູງ​ບັນດາ​ປະເທດ​ສະມາຊິກ ຂອງ​ຂະບວນ​ການ​ດັ່ງກ່າວ ໄດ້​ຮັບຮອງ​ເອົາ​ບັນດາ​ເອກະສານ​ສຳຄັນ, ໃນ​ນັ້ນ ມີ​ເອກະສານ​ສະບັບ​ສຸດ​ທ້າຍ​ຂອງ​ກອງ​ປະຊຸມ​ສຸດ​ຍອດ, ຖະແຫຼງການ​ບາ​ກູ ວ່າ​ດ້ວຍ​ບັນຫາ ປາ​ແ​ລັສ​ຕິນ ແລະ ສານ​ຂອບໃຈ, ຄວາມ​ສາມັກຄີ ສໍາ​ລັບ​ລັດຖະບານ ແລະ ປະຊາຊົນ ອາ​ແ​ຊັກ​ໄບ​ຊານ. ບັນດາ​ເອກະ ສານ ຂອງ​ກອງ​ປະຊຸມ ໄດ້​ຢັ້ງ ຢືນ​ຄືນ​ຄຸນຄ່າ ແລະ ຄວາມ​ສຳຄັນ​ຂອງ​ບັນດາ​ຫຼັກການ ບັນ​ດຸງ ຄວາມ​ພະຍາຍາມ​ເພີ່ມ​ທະວີ​ຄວາມ​ສາມັກຄີ​ຂະບວນ​ການ ເພື່ອ​ປະກອບສ່ວນ​ເຂົ້າ​ໃນ​ຄວາມ​ພະຍາຍາມ​ລວມ​ໃນ​ການ​ຮັກສາ​ສັນຕິພາບ ແລະ ຄວາມ​ໝັ້ນຄົງ​ສາກົນ, ເພີ່ມ​ທະວີ​ການ​ຮ່ວມ​ມື​ເສດຖະກິດ, ຊຸກຍູ້​ການ​ຫຼຸດຜ່ອນ​ອາວຸດ, ປະຕິ​ຮູບ ສະຫະ​ປະຊາ​ຊາດ.

   ບັນດາ​ປະເທດ​ສະມາຊິກ ຈະ​ສືບຕໍ່​ຢຶດ​ໝັ້ນ​ວັດຖຸ​ປະສົງ​ຂອງ​ຂະບວນ​ການ​ບໍ່​ຮ່ວມ​ກຸ່ມ, ພະຍາຍາມ​ສອດຄ່ອງ​ກັບ​ພູມ​ສາດ​ການເມືອງ​ຂອງ​ໂລກ​ປັດ ຈຸບັນ, ເພີ່ມ​ທະວີ​ຄວາມ​ມີ​ຊີວິດ​ຊີວາ​ຂອງ​ຂະບວນ​ການ​ບໍ່​ຮ່ວມ​ກຸ່ມ. ບັນດາ​ປະເທດ​ສະມາຊິກ ຕັດສິນ​ໃຈ​ຈະ​ສາມັກຄີ​ເຂົ້າ​ເປັນ ເອກະ​ພາບ​ກັນ ເພື່ອ​ຮ່ວມ​ກັນ​ ປົກ​ປັກ​ຮັກສາ​ຜົນ​ປະໂຫຍດ​ຂອງ​ປະເທດ​ທີ່​ພວມ​ພັດທະນາ, ສຸມ​ໃສ່​ການ​ສ້າງ​ກົນ​ໄກ​ບໍລິຫານ​ທົ່ວ​ໂລກ​ທີ່​ຍຸຕິ​ທຳ ໂອບເອື້ອ​ອາລີ, ປອດ​ໄສ ແລະ ມີ​ປະສິດ ທິພາບ​ສູງ. ຖະແຫຼງການຍັງ ​ກ່າວ​ວ່າ: ບັນດາ​ປະເທດສະມາ ຊິກ​ຈະ​ພະຍາຍາມ​ຕື່ມ​ອີກ ​ເພື່ອ​ຮ່ວມ​ກັນ​ໂຈມ​ຕີ​ລັດທິ​ກໍ່​ການ​ຮ້າຍ​ດ້ວຍ​ທຸກ​ຮູບ​ແບບ.