ຈີນ ຈະ​ບັນ­ລຸ​ຄວາມ​ໃຝ່­ຝັນ​ໃນ​ການ​ຟື້ນ​ຟູ​ຄວາມ​ຈະ­ເລີນ​ຮຸ່ງ­ເຮືອງຂອງ​ຕົນ​ແນ່­ນອນ

03.10.2019 9:26     

( ເນື່ອງ​ໃນ​ໂອກາດ​ວັນຊາດ ສ​ປ ຈີນ ຄົບ​ຮອບ​ 70 ປີ)

   ວັນ​ທີ 1 ຕຸລາ 2019, ເປັນ​ວັນ​ສະຖາປະນາ ​ສາທາລະນະ​ລັດ ປະຊາຊົນ​ຈີນ ຄົບ ຮອບ 70 ປີ, ຜູ້​ຂຽນ​ບົດ​ນີ້ ໂຊກ​ດີ​ທີ່​ໄດ້​ມາ​ເຮັດ​ວຽກ ແລະ ໃຊ້​ຊີວິດ​ຢູ່​ ປັກ​ກິ່ງ​ເປັນ​ເວລາ​ປີ​ປາຍ, ໄດ້​ສຳ​ພັດ​ກັບ​ຊີວິດ​ຕົວ​ຈິງ​ຂອງ​ຄົນ​ຈີນ​ໃນ​ຍຸກ​ໃໝ່.

   ໃນ​ໄລຍະ​ຕົ້ນ​ຂອງ​ການ​ສະຖາປະນາ ສປ ຈີນ, ຕອນນັ້ນ ຈີນ ຍັງ​ມີ​ປະຊາກອນ​ກືກ​ໜັງ ສື​ກວມເຖິງ 80%, ບໍ່ທັນ​ມີ ເຕັກໂນ​ໂລ​ຊີ ທີ່​ກ້າວໜ້າ​ທັນ​ສະໄໝ ແລະ ຂາດແຄນ​ກົນ​ຈັກໜັກ​ຈຶ່ງ​ໃຊ້​ແຮງ​ງານ​ຄົນຈຳ ນວນ​ຫຼວງຫຼາຍ​ໃນ​ການ​ສ້າງສາ​ ພັດທະນາ​ປະເທດ​ຊາດ​ເຊັ່ນ: ການ​ສ້າງ​ເຂື່ອນ​ໄຟຟ້າ, ການ​ສ້າງ​ທາງ​ລົດໄຟທີ່​ໃຊ້​ແຮງ​ງານ​ຄົນ​ນັບ​ເປັນ​ແສນ​ຄົນ. ຕົວຢ່າງ: ໃນ​ວັນ​ທີ 13 ມິຖຸນາ 1952, ຈີນ ໄດ້​ນຳ​ໃຊ້​ແຮງ​ງານ​ປະຊາຊົນ ນັບ​ເປັນ​ແສນ​ກວ່າ​ຄົນ ແລະ ທະຫານ​ອີກ 3 ໝື່ນ​ກວ່າ​ຄົນ ເພື່ອ​ສ້າງ​ທາງ​ລົດໄຟ​ສາຍ​ທຳ ອິດທີ່​ສ້າງ​ດ້ວຍ​ຕົນ​ເອງ​ສາຍ​ເຊິ່ງ​ຕູ​-​ຈຸ​ງ​ກິ່ງ ໃຊ້​ເວລາ 2 ປີຈຶ່ງ​ ສ້າງ​ສຳ​ເລັດ. ຈາກ​ນັ້ນ​ມາຈີນ ກໍ​ໄດ້​ພັດທະນາ​ເຕັກ​ໂນ​ໂລ​ຊີ​ຂອງ​ຕົນ​ເອງ​ເປັນ​ກ້າວໆ ໂດຍ​ສະເພາະ​ໃນ​ໄລຍະ​ທີ່​ມີ​ການ​ປະຕິ​ຮູບ ແລະ ເປີດ​ປະຕູ​ສູ່​ພາຍນອກ ໄດ້​ພັດທະນາ​ແບບ​ ກ້າວ​ກະໂດດ​ຂັ້ນ. ໃນ​ປີ 2017 ຂະບວນ​ລົດໄຟຟູ້​ຊີງ ຊຶ່ງ​ເປັນ ​ລົດໄຟ​ຄວາມ​ໄວ​ສູງ​ຕາມ​ມາດ ຕະຖານ​ຈີນ ທີ່​ມີ​ຊັບ​ສິນ​ທາງ​ປັນຍາ​ຄົບ​ຖ້ວນ​ທັງ​ໝົດ​ໄດ້​ເປີດບໍລິການ ແລະ ກາຍເປັນ​ສັນຍາລັກ​ທີ່​ສະແດງ​ໃຫ້​ເຫັນ​ວ່າ: ຈີນ ໄດ້​ນຳ​ໜ້າ​ໂລກ​ໃນ​ດ້ານ​ອຸປະກອນ​ເຕັກ ນິກ​ລົດໄຟ​ຄວາມ​ໄວ​ສູງ.

   ເມື່ອ​ບໍ​ດົນ​ມາ​ນີ້, ຈີນ ໄດ້​ຈັດການ​ແຂ່ງຂັນ​ຫຸ່ນ​ຍົນ​ຈີນ 2019 ຢູ່​ເມືອງ​ຊີ​ໂມ້​ນະຄອນ​ຊີງ​ຕາວ ແຂວງ​ຊານ​ຕຸງ ສປ​ຈີນ ໂດຍ​ມີ 1.109 ທິມ ທີ່​ມີ​ຈຳນວນ​ພົນ​ຫຼາຍ​ກວ່າ 3.800 ຄົນ, ຈາກ​ມະຫາວິທະຍາໄລ ແລະ ວິທະຍາໄລ 207 ແຫ່ງ​ທົ່ວ​ປະເທດ​ຈີນ​ເຂົ້າ​ຮ່ວມ. ນີ້​ເປັນ​ການ​ແຂ່ງຂັນ​ທາງ​ວິທະຍາ​ສາດ​ຫຸຸ່ນ​ຍົນ​ທີ່​ມີ​ລະດັບ​ເຕັກ​ໂນ​ໂລ​ຊີ​ສູງ​ສຸດ​ໃນ​ຈີນ ຊຶ່ງ​ໄດ້​ຈັດ​ຂຶ້ນ​ເປັນ​ຄັ້ງ​ທີ 20. ຫຸ່ນ​ຍົນ​ໄດ້​ເຂົ້າ​ມາ​ມີ​ບົດບາດ​ໃນ​ການ​ພັດທະນາ​ປະເທດ​ຈີນ ນັບ​ມື້​ນັບ​ຫຼາຍ. ໃນ​ວຽກ​ງານ​ປ້ອງ​ກັນ​ຄວາມ​ສະຫງົບ, ຈີນ​ເລີ່ມ​ນຳ​ໃຊ້​ຫຸ່ນ​ຍົນ​ຕຳຫຼວດ 5G ເຄື່ອງ​ທຳອິດ​ຊຶ່ງ​ໄດ້​ລາດຕະເວນ​ຢູ່​ນະຄອນ​ຊຽງ​ໄຮ້ ແລະ ເຄື່ອນ​ໄຫວ​ໄປ​ຕາມ​ຖະໜົນ​ໜານ​ກິ່ງ. ຫຸ່ນ​ຍົນ​ນີ້ ໄດ້​ຕິດ​ຕັ້ງ​ກ້ອງ​ທຸກ​ທິດ​ທາງ​ອ້ອມ​ໂຕ, ມີ​ຄວາມ​ສາມາດ​ສົ່ງ​ສຽງ​ໂຄສະນາ​ປະຊາສຳພັນ, ສາມາດ​ເກັບ​ກຳ​ຂໍ້​ມູນ​ຜ່ານ​ບິ​ກ​ດາ​ຕາ ເພື່ອ​ຄົ້ນ​ຫາ​ຜູ້​ຖືກ​ສົງໄສ ແລະ ອື່ນໆ​ໄດ້​ຢ່າງ​ວ່ອງ​ໄວ. ຈີນ ມີ​ຄວາມ​ສາມາດ​ສູງ​ກ່ຽວ​ກັບ AI ຫຼື ປັນຍາ​ປະ​ດິດ. ຫຼາຍ​ບໍລິສັດ​ໄດ້​ນໍາ​ໃຊ້ AI ໃນ​ຂະແໜງ​ທຸລະ​ກິດ​ຂອງ​ຕົນ. ຂ່າວ China Plus ລາຍ​ງານ​ເມື່ອ​ຕົ້ນ​ເດືອນ​ກັນຍາ​ວ່າ: ມີ 11 ບໍລິສັດ​ຊັ້ນ​ນຳ​ຂອງ​ຈີນ ໄດ້​ນຳ​ໃຊ້ AI ເຂົ້າ​ໃນ​ການ​ດຳເນີນ​ທຸລະ​ກິດ​ຂອງ​ຕົນ. ບໍລິສັດ​ດັ່ງກ່າວ ໄດ້​ເນັ້ນ​ໄປ​ໃສ່​ການ​ພັດທະນາ​ຊິບ, ການ​ໃຫ້​ບໍລິການ​ດ້ານ​ສຸຂະພາບ​ແບບ​ອັດ​ສະ​ລິ​ຍະ ແລະ ອື່ນໆ.

   ຖ້າ​ມີ​ມະນຸດ​ຕ່າງ​ດາວ​ຈິງ, ຄິດ​ວ່າ: ຈີນຈະ​ເປັນ​ຊາດ​ທຳອິດ​ທີ່​ຮັບ​ຮູ້​ກ່ຽວ​ກັບ​ມະນຸດ​ຕ່າງ​ດາວ ເພາະ​ເມື່ອ​ບໍ່ດົນ​ມາ​ນີ້ ກ້ອງ​ຊ່ອງ​ທາງໄກ​ຮູບ​ຈານ​ຂອງ​ຈີນ ຫຼື FAST ສາມາດ​ກວດ​ພົບ​ສັນຍານ​ເລິກ​ລັບ​ ຊຶ່ງ​ແຫຼ່ງ​ຂອງ​ສັນຍານ​ໄກ​ຈາກ​ໂລກ​ເຮົາ 3 ຕື້​ປີ​ແສງ. ນີ້​ສະແດງ​ໃຫ້​ເຫັນ​ຄວາມ​ກ້າວໜ້າ​ຂອງ​ຈີນ. ວັນ​ທີ 7 ກັນຍາ​ຜ່ານ​ມາ​ນີ້, ຊິນ​ຮວາ​ລາຍ​ງານ​ວ່າ: ຍານ​ສໍາ​ຫຼວດ​ດວງ​ຈັນ​ຂອງ​ຈີນ YUTU2 ໄດ້​ແລ່ນ​ສຳຫຼວດ​ຢູ່​ຜິວ​ໜ້າ​ດວງ​ຈັນ​ດ້ວຍ​ໄລຍະ​ທາງ 284,66 ແມັດ ເພື່ອ​ສຳຫຼວດ​ທາງ​ວິທະຍາສາດ ບ່ອນ​ທີ່​ມະນຸດ​ບໍ​ເຄີຍ​ໄປ.

   ຈີນ ພວມ​ສືບຕໍ່​ນະໂຍບາຍ ​ການ​ປະຕິ​ຮູບ ແລະ ເປີດ​ປະຕູ​ສູ່​ພາຍ​ນອກ​ຮອບ​ໃໝ່ ຊຶ່ງ​ແມ່ນ​ບາດກ້າວ​ຍ່າງ​ສຳຄັນ​ໃນ​ການ​ພັດທະນາ​ເສດຖະກິດ​ດ້ວຍ​ຄຸນ​ນະ​ພາບ​ສູງ. ໃນ​ຂະນະ​ທີ່​ຈີນ ກຳລັງ​ເນັ້ນ​ໄປ​ໃສ່​ການ​ລົງທຶນ​ໃນ​ຂະແໜງ​ເຕັກນິກ​ຂັ້ນ​ສູງ, ຈີນ​​ມີ​ຊັບພະຍາກອນ​ມະນຸດ​ທີ່​ມີ​ຄວາມ​ຮູ້​ສູງ​ຢ່າງ​ພຽງພໍ​ໃນ​ການ​ພັດທະນາ​ຊາດ ເພາະ​ແຕ່​ລະ​ປີ​ມີ​ນັກ​ສຶກສາ​ຮຽນ​ຈົບ 8 ລ້ານ​ຄົນ. ໃນ​ປີ 2018, ຈີນ ມີ​ນັກສຶກສາ​ທີ່​ຮຽນ​ທຸກ​ວິຊາ ແລະ ທຸກ​ລະດັບ​ປະລິ​ນຍາ 276 ລ້ານ​ຄົນ. ຈີນ ຈຶ່ງ​ກາຍເປັນ​ປະເທດ​ທີ່​ມີແຮງ​ງານ​ຄວາມ​ຮູ້​ສູງ​ຢືນ​ຢູ່​ແຖວ​ໜ້າ​ຂອງ​ໂລກ.

   ເມື່ອ​ຫວນ​ຄືນ​ປະຫວັດ ສາດ ຈະ​ເຫັນ​ໄດ້​ວ່າ: ຈີນແມ່ນ ​ຊົນ​ຊາດ​ທີ່​ເຄີຍ​ສ້າງ​ສິ່ງ​ມະຫັດ ສະຈັນ​ຢ່າງ​ຫຼວງຫຼາຍ​ເຊັ່ນ: ກຳ ແພງ​ເມືອງ​ຈີນ​ຖືກ​ຂະໜານ​ນາມ​ວ່າ, ເປັນ​ສິ່ງ​ມະຫັດສະຈັນ​ຂອງ​ໂລກ. ໃນ​ຍຸກ​ຈີນ​ໃໝ່, ຈີນ​ໄດ້​ສ້າງ​ຄວາມ​ມະຫັດສະຈັນ​ເຊັ່ນ​ດຽວ​ກັນ​ຄື: ໃຊ້​ເວລາ​ສັ້ນໆ​ພຽງ 40 ປີ ໃນ​ການ​ປະຕິ​ຮູບ ແລະ ເປີດ​ປະຕູ​ສູ່​ພາຍ​ນອກ ໄດ້​ສ້າງ​ຄວາມ​ຈະເລີນ​ຮຸ່ງເຮືອງ​ໃນ​ດ້ານ​ຕ່າງ​ໆຂຶ້ນ​ມາ​ຢ່າງ​ວ່ອງ​ໄວ. ພວກ​ເຮົາ​ຈະ​ໄດ້​ເຫັນ​ຫຼາຍໆ​ຕົວ​ເມືອງ ທີ່​ເຄີຍ​ມີ​ເຮືອນ​ຕູບ​ຫຼ້າຫຼັງ ໄດ້​ຖືກ​ເນລະມິດ​ໃຫ້​ກາຍເປັນ​ເມືອງ​ທັນ​ສະໄໝ ໂດຍ​ສະເພາະເມືອງ ​ທີ່​ເປັນ​ເຂດ​ການ​ຄ້າ​ເສລີ​ເຊັ່ນ: ນະຄອນ​ຊຽງ​ໄຮ້ ທີ່​ໂລກ​ຕາເວັນຕົກຍັງ​ ຍອມຮັບ​ວ່າ: ເປັນ​ເມືອງ​ທັນ​ ສະໄໝ​ຂອງ​ແທ້. ຄວາມ​ກ້າວ ໜ້າ​ທັນ​ສະໄໝໄດ້​ປົກ​ຄຸມໄປ​ ຫຼາຍ​ຂົງເຂດ.ຂ່າວ​ຫຼ້າ​ສຸດ​ຂອງ CRI ລາຍ​ງານ​ວ່າ: ສະໜາມ ​ບິນ​ແຫ່ງ​ໃໝ່​ຕ້າ​ຊີງ​ເປັນ​ສະ ໜາມ​ບິນ​ທີ່​ທັນ​ສະໄໝ ໄດ້​ຕິດ​ຕັ້ງ​ອຸປະກອນ​ກວດ​ຄົນ​ເຂົ້າ​-​ອອກ​ເມືອງ ລວມ​ທັງ​ອຸປະກອນ​ກວດ​ພະຍາດ ແລະ ກັກ​ກັນ​ພືດ​ແບບ​ອັດ​ສະ​ລິ​ຍະ ແລະ ອັດຕະ ໂນມັດ ເພື່ອ​ເພີ່ມ​ຄວາມ​ວ່ອງ ໄວ ແລະ ສະດວກ​ສະບາຍ​ໃຫ້​ກັບ​ຜູ້ໂດຍສານ ແລະ ໄດ້​ເປີດ​ໃຫ້​ບໍລິການ​ເລີ່ມ​ແຕ່​ວັນ​ທີ 25 ກັນຍາ​ຜ່ານ​ມາ​ນີ້​ເປັນຕົ້ນ​ໄປ.

   ໄດ້​ມາ​ຊ່ວຍ​ກວດແກ້​ຂ່າວ- ​ບົດ ຢູ່ CRI ປັກ​ກິ່ງ ທີ່​ເປັນ​ສູນ​ລວມ​ຂ່າວ​ຮອບດ້ານ ກໍ​ໄດ້​ຮັບ​ຮູ້​ຂະບວນ​ວິວັດ​ຂອງ​ການ​ພັດທະນາ​ປະເທດ​ຈີນ ເປັນ​ກ້າວໆ​ທັງ​ໄດ້​ເຫັນ​ກັບ​ຕາ ແລະ ຜ່ານ​ຂ່າວ, ຂໍ້​ມູນ​ທີ່​ນຳ​ມາ​ຂຽນ​ລ້ວນ​ແຕ່​ມາ​ຈາກ​ຂ່າວ CRI. ຂ້າພະເຈົ້າ​ມີ​ຄວາມ​ຊື່ນ​ຊົມ​ຕໍ່​ຜົນ​ສໍາ​ເລັດ​ຫຼາຍ​ສິ່ງ​ຫຼາຍ​ຢ່າງ​ຂອງ​ຈີນ​ໂດຍ​ສະເພາະ​ຄວາມ​ມະຫັດສະຈັນ​ໃນ​ການ​ລຶບ​ລ້າງ​ຄວາມທຸກ​ຍາກ​ໃຫ້​ປະຊາຊົນ​ໄດ້​ຫຼາຍ​ກວ່າ 700 ລ້ານ​ຄົນ. ຊີວິດ​ການ​ເປັນ​ຢູ່​ຂອງ​ປະຊາຊົນ​ມີ​ຄວາມ​ອີ່ມ​ໜຳ​ສຳລານ, ຢູ່​ເຢັນ​ເປັນ​ສຸກ. ປັດຈຸບັນ, ຈະ​ໄປ​ແຫ່ງ​ຫົນ​ໃດ​ໃນ​ປັກ​ກິ່ງ ກໍ​ມີ​ຄວາມ​ສະດວກ​ສະບາຍ ດ້ວຍ​ການ​ໃຊ້​ໂທລະສັບ​ມື​ຖື​ໜ່ວຍ​ດຽວ​ສ້າງ​ຄວາມ​ສະດວກ​ໄດ້ ຫຼາຍ​ຢ່າງ​ຫຼາຍ​ແນວ​ເຊັ່ນ: ການ​ຊື້​ເຄື່ອງ, ການ​ຈ່າຍ​ຄ່າ​ອາຫານ, ການ​ໂດຍສານ, ການ​ຈອງປີ້​ຕ່າງໆ ແລະ ອື່ນໆ. ໃນ​ປະເທດ​ຈີນ ມີ​ຄົນ​ໃຊ້​ອິນ​ເຕີ​ເນັດ​ເຖິງ 854 ລ້ານ​ຄົນ.

   ຂະນະ​ທີ່​ນັ່ງ​ຂຽນ​ບົດ​ນີ້, ຂ້າພະເຈົ້າ​ມີ​ຄວາມ​ຮູ້ສຶກ​ວ່າ: ໄດ້​ສຳ​ພັດ​ກັບ​ສ່ວນ​ໜຶ່ງ​ຂອງ​ສັງຄົມ​ນິຍົມ​ທີ່​ມີ​ສີສັນ​ພິເສດ​ຂອງ​ຈີນ​ໃນ​ຍຸກ​ໃໝ່. ເປົ້າ​ໝາຍ​ສູ້​ຊົນ ໃນ​ການ​ພັດທະນາ​ຂອງ​ຈີນ ​ເພື່ອ​ບັນລຸ​ຄວາມ​ໃຝ່​ຝັນ​ຂອງ​ຕົນ​ໃນ​ການ​ຟື້ນ​ຟູ​ຄວາມ​ຈະເລີນ​ຮຸ່ງ​ເຮື່ອ​ງ​ຂອງ​ຊົນ​ຊາດ​ຈີນ. ຈີນ ມີ​ຄວາມ​ພ້ອມ​ທຸກ​ຢ່າງ, ມີ​ນະໂຍບາຍ​ທີ່​ຖືກຕ້ອງ​ເປັນ​ທຳ​ຂອງ​ພັກ​ກອມ​ມູ​ນິດ​ຈີນ, ມີ​ຊັບພະຍາກອນ​ມະນຸດ​ທີ່​ມີ​ຄວາມ​ຮູ້​ສູງ​ທີ່​ເຕັມ​ໄປ​ດ້ວຍ​ພະລັງ​ຄວາມ​ກະຕືລືລົ້ນ​ແບບ​ຄົນ​ຈີນ ດ້ວຍ​ການ​ພັດທະນາ​ເຕັກ​ໂນ​ໂລ​ຊີ​ກ້າວໜ້າ​ແບບ​ກ້າວ​ກະໂດດ​ຂັ້ນ, ເຊື່ອ​ວ່າ: ເປົ້າ​ໝາຍ​ທີ່​ຈີນ ກຳນົດ​ໄວ້​ນັ້ນ​ຕ້ອງ​ສຳເລັດ​ຜົນ​ເປັນ​ຈິງ​ຢ່າງ​ແນ່​ນອນ. ຜ່ານ​ບົດ​ຂຽນ​ນີ້, ຂໍ​ອວຍພອນ​ໃຫ້​ປະຊາຊົນ​ຈີນ 1,4 ຕື້​ກວ່າ​ຄົນ ຈົ່ງ​ມີ​ສຸຂະພາບ​ແຂງແຮງ, ມີ​ຄວາມສຸກ ແລະ ປະສົບ​ຄວາມ​ສຳເລັດ​ໃນ​ການ​ຟື້ນ​ຟູ​ຄວາມ​ຈະເລີນ​ຮຸ່ງເຮືອງ​ຂອງ​ຈີນ. ມິດຕະພາບ​ລາວ​-​ຈີນ​ໝັ້ນຍືນ.