ທິດ​ທາງ ແລະ ນະ­ໂຍ­ບາຍ​ເສດ­ຖະ­ກິດ​ຂອງ ສ.ເກົາ­ຫຼີ

 

 

04.10.2019 9:05     

( ເນື່ອງ​ໃນ​ໂອກາດ​ວັນຊາດ ສ. ເກົາຫຼີ 3 ຕຸ​ລາ)

ຮຽບຮຽງ​ໂດຍ​​ : ລຸ້ງ​ດາວ

   ສາທາລະນະ​ລັດ ເກົາຫຼີ ຕັ້ງ​ຢູ່​ສ່ວນ​ໃຕ້​ຂອງ​ແຫຼມ​ເກົາຫຼີ ໃນ​ອາຊີ​ຕາເວັນ​ອອກ, ມີ​ເນື້ອທີ່​ທັງ​ໝົດ 100.210 ກິໂລ​ຕາ​ແມັດ, ມີ​ຊາຍ​ແດນ​ຕິດ​ກັບ ສປ.ຈີນ ທາງ​ດ້ານ​ຕາເວັນຕົກ, ຕິດ​ກັບ​ຍີ່ປຸ່ນ ທາງ​ດ້ານ ຕາເວັນ​ອອກ, ຕິດ​ກັບ ສປປ.ເກົາຫຼີ ທາງ​ດ້ານ​ເໜືອ, ສ່ວນ​ທາງ​ທິດໃຕ້​ຕິດ​ກັບ​ທະເລ​ຈີນ​ຕາເວັນ​ອອກ ແລະ ແຄວ​້ນ​ໄຕ້​ຫວັນ (ສປ ຈີນ). ມີ​ພົນລະເມືອງ​ທັງ​ໝົດ 51.181.290 ກວ່າ​ຄົນ (ຂໍ້​ມູນ​ປີ 2017), ອັດຕາ​ການ​ເຕີບ​ໂຕ​ຂອງ​ພົນລະເມືອງ 0,5%. ນະຄອນຫຼວງ​ແມ່ນ ເຊ​ອູ​ນ.

   ໃນ​ວັນ​ທີ 20 ທັນວາ ປີ 2018, ກະຊວງ​ເສດຖະກິດ ແລະ ການ​ເງິນ​ຂອງ ສ.ເກົາຫຼີ ໄດ້​ເຜີຍແຜ່​ເອກະສານ​ກ່ຽວ​ກັບ​ທິດ​ທາງ​ການ​ດຳເນີນ​ນະໂຍບາຍ​ເສດຖະກິດ​ຂອງ​ລັດຖະບານ​ໃນ​ ປີ 2019 ຊຶ່ງ​ຈະ​ສຸມ​ໃສ່ການ ​ດຳເນີນ​ງານ​ໃນ 4 ຂົງເຂດ​ຕົ້ນ ຕໍ​ຄື:

   I. ການ​ກະ​ຕຸ້ນ​ເສດຖະກິດ: ໜຶ່ງ, ການ​ສົ່ງເສີມ​ການ​ລົງ​ທຶນ​ຂອງ​ພາກ​ລັດ ແລະ ເອກະ​ຊົນ ໂດຍ​ຈະ​ຫຼຸດຜ່ອນ​ກົດ​ລະບຽບ​ການ​ລົງທຶນ, ປັບປຸງ​ສະພາບ​ແວດ​ລ້ອມ​ການ​ລົງທຶນ, ຈັດ​ສັນ​ງົບປະມານ​ສຳລັບ​ການພັດ ທະນາ​ພື້ນຖານ​ໂຄງ​ລ່າງ​ຂະ ໜາດ​ໃຫຍ່, ຊຸກຍູ້​ໃຫ້​ພາກເອກະ​ ຊົນ​ມີ​ສ່ວນ​ຮ່ວມ​ໃນການ​ພັດ ທະນາ​ພື້ນຖານ​ໂຄງ​ລ່າງ ແລະ ໃຫ້​ສິດທິ​ປະໂຫຍດ​ແກ່​ຜູ້​ປະ ກອບ​ທຸລະ​ກິດ​ຈຸນ​ລະ​ຂະໜາດ​ນ້ອຍ (SMEs) ເພື່ອ​ຊັກ​ຈູງ​ການ​ລົງ​ທຶນ. ສອງ, ການ​ເສີມ​ສ້າງ​ຄວາມ​ເຂັ້ມແຂງ​ໃຫ້​ຜູ້​ປະກອບ​ທຸລະ​ກິດ ໂດຍ​ຈະ​ອອກ​ມາດ​ຕະການ​ເພື່ອ​ສະໜັບສະໜູນ​ແກ່​ຜູ້​ປະກອບ​ທຸລະ​ກິດ​ໃນ​ແຕ່​ລະ​ລະດັບ​ຂອງ​ການ​ພັດທະນາ​ທຸລະ​ກິດ​ເຊັ່ນ: startup, ການໃຫ້​ ສິດທິ​ປະໂຫຍດ​ທາງ​ພາສີ​ແກ່​ຜູ້​ປະກອບ​ທຸ​ລະກິດ​ໃນ​ຂັ້ນ​ເລີ່ມ ​ຕົ້ນ; ຂັ້ນຂະຫ​ຍາຍ​ທຸລະ​ກິດ (scale up) ການ​ສະໜັບສະໜູນ​ກົນ​ໄກ​ການ​ລະດົມ​ທຶນ​ເຊັ່ນ: ຂະໜາດ​ນ້ອຍ (Small Scale IPO) ແລະ ລະດົມ​ທຶນ​ຊຸມ​ຊົນ (crowd funding), ການ​ສະໜັບສະໜູນ​ເງິນ​ກູ້, ຈັດ​ຕັ້ງ​ກອງ​ທຶນ​ອຸດ​ໜູນ​ໃນ​ພື້ນຖານ​ຂອງ​ຊັບ​ສິນ​ທາງ​ປັນຍາ ແລະ ເຕັກ​ໂນ​ໂລ​ຊີ, ທຸລະ​ກິດ ການ​ຫຼຸດຜ່ອນ​ພາສີ​ຄວບ​ຄູ່​ກັບ​ການ​ໂອນ​ກິດຈະການ​ສຳລັບ​ບໍລິສັດ​ທີ່​ຊື້​ເຕັກ​ໂນ​ໂລ​ຊີ​ຈາກ SMEs ແລະ ຂັ້ນ​ຟື້ນ​ຟູ (re-bound) ການ​ຂະຫຍາຍ​ໄລຍະ​ເວລາ​ຜ່ອນຜັນ​ຊຳລະ​ໜີ້ (grace period) ສຳລັບ​ຜູ້​ປະກອບ​ທຸລະ​ກິດ​ທີ່​ຕ້ອງການ​ທົດ​ລອງ​ເລີ່ມ​ຕົ້ນ​ທຸລະ​ກິດ​ສາຂາ​ໃໝ່ ຫຼັງ​ຈາກ​ປະສົບ​ກັບ​ການ​ລົ້ມ​ເຫຼວ. ສາມ, ກະ​ຕຸ້ນ​ການ​ບໍລິໂພກ ແລະ ການ ທ່ອງທ່ຽວ ໂດຍ​ຈະ​ອອກ​ມາດ​ຕະການ​ຫຼຸດ​ພາສີ​ສຳລັບ​ຜູ້​ຊື້​ລົດ​ໃຫຍ່​ຊຸກຍູ້​ການ​ຈັດ​ໂຄງການ ທ່ອງ​ທ່ຽວ, ລວມ​ທັງ​ການ​ເຂົ້າ​ຮ່ວມ​ໃນ​ງານ Korea Sales Festa (ເທດສະການ​ຊື້​ເຄື່ອງ​ປະຈຳ​ປີ​ຂອງ ສ.ເກົາຫຼີ ຊຶ່ງ​ຈັດ​ຂຶ້ນ​ໃນ​ໄລຍະ​ລະດູ​ໃບ​ໄມ້​ຫຼົ່ນ) ແລະ ການສະແດງ​ຂອງ​ນັກ​ສິລະ​ປິນ ເຄ​ປ໊ອບ (K-Pop), ໄດ້​ພັດທະນາ​ສະຖານທີ່​ທຳ​ມະ​ຊາດ ໃຫ້​ກາຍເປັນ​ແຫຼ່ງ​ທ່ອງ​ທ່ຽວ​ທາງ​ວັດທະນະ​ທຳ. ລວມ​ທັງ​ປັບປຸງ​ກົດ​ລະບຽບ​ການ​ຕ່າງໆ ເພື່ອ​ອະນຸຍາດ, ຜ່ອນຜັນ​ໃຫ້​ສາມາດ​ຕັ້ງ​ຮ້ານ​ຄ້າ​ຈຳໜ່າຍ​ສິນຄ້າ​ປອດ​ພາສີ​ໃນ​ໃຈກາງ​ນະຄອນຫຼວງ​ເຊ​​ອູນ ໄດ້​ຫຼາຍ​ຂຶ້ນ. ສີ່, ການ​ກະ​ຕຸ້ນ​ການ​ສົ່ງ​ອອກ ໂດຍ​ຈະ​ຈັດ​ສັນ​ເງິນ​ທຶນ​ເພື່ອ​ສະໜັບສະໜູນ​ການ​ກໍ່ສ້າງ​ພື້ນຖານ​ໂຄງ​ລ່າງ​ໃນ​ຕ່າງປະເທດ, ຂະຫຍາຍ​ວົງ​ເງິນ​ສິນ​ເຊື່ອ​ເພື່ອ​ການ​ສົ່ງ​ອອກ, ສົ່ງເສີມ​ການ​ຂະຫຍາຍ​ຕະຫຼາດ​ສົ່ງ​ອອກ​ໄປ​ປະເທດ​ອາຊີ​ຕາເວັນ​ອອກ​ສ່ຽງ​ໃຕ້ ແລະ ປະເທດ​ໃນ​ອາຊີ​ກາງ ລວມ​ທັງ​ຈະ​ສະໜັບສະໜູນ​ງົບປະມານ​ສຳລັບ​ການ​ຄວບ​ກິດຈະການ ແລະ ການ​ກໍ່ສ້າງ​ໂຮງງານ​ຜະລິດ, ສູນ​ຈຳໜ່າຍ​ສິນຄ້າ​ໃນ​ພື້ນ​ທີ່​ດັ່ງກ່າວ ແລະ ຫ້າ, ການ​ເຝົ້າ​ລະວັງ, ການ​ບໍລິຫານ​ຈັດການ​ຄວາມ​ສ່ຽງ​ຂອງ​ເສດຖະກິດ​ລະດັບ​ມະຫາ​ພາກ ໂດຍ​ຈະ​ລະດົມ​ທຶນ​ເພື່ອ​ກະ​ຕຸ້ນ​ການ​ຈ້າງ​ງານ ແລະ ການ​ເຕີບ​ໂຕ​ທາງ​ດ້ານ​ເສດຖະກິດ ໃນ 6 ເດືອນ​ຕົ້ນ​ປີ 2019, ເຝົ້າ​ລະວັງ, ບໍລິຫານ​ຈັດເອົາຄວາມ​ສ່ຽງ​ທີ່​ອາດ​ຈະ​ເກີດ​ຂຶ້ນ​ຈາກ​ປັດ​ໄຈ​ພາຍ​ນອກ ໂດຍ​ສະເພາະ​ສົງຄາມ​ການ​ຄ້າ ລະຫວ່າງ​ສະ ຫະລັດ ກັບ ຈີນ ລວມ​ທັງ​ການ​ຕິດຕາມ​ຜົນ​ກະທົບ​ຂອງ​ການ​ປັບ​ຂຶ້ນ​ອັດຕາ​ດອກ​ເບ້ຍ​ທີ່​ອາດ​ຈະ​ມີ​ຜົນ​ກະທົບ​ຕໍ່​ໜີ້​ສິນ​ຂອງ​ຄົວ​ເຮືອນ ແລະ ໜີ້​ພາກ​ເອກະ​ຊົນ.

   ການ​ປັບ​ໂຄງ​ສ້າງ​ອຸດສາ ຫະກຳ​ມີ ໜຶ່ງ, ການ​ດັດແກ້​ກົດ​ລະບຽບ​ທີ່​ເປັນ​ອຸປະສັກ ຕໍ່​ການ​ບໍລິການ​ປະເພດ​ໃໝ່ ໂດຍ​ຈະ​ຊຸກຍູ້​ການ​ຂະຫຍາຍ​ຂອບ​ເຂດ​ທຸລະ​ກິດ​ປະເພດ​ການ​ແບ່ງປັນ​ທີ່ຢູ່​ອາ​​ໄສ. ສອງ, ສ້າງ​ຄວາມ​ເຂັ້ມແຂງ​ໃຫ້​ແກ່​ອຸດສາຫະກຳ​ຫຼັກ, ອຸດ​ສາ​ຫະ​ກໍາ​ແບບ​ດັ້ງເດີມ ໂດຍ​ອອກ​ມາດ​ຕະການ​ເພື່ອ​ເສີມ​ສ້າງ​ຂີດ​ຄວາມ​ສາມາດ​ດ້ານ​ນະ​ວັດຕະ​ກຳ​ໃຫ້​ກັບອຸດ ສາຫະກຳ​ທີ່​ສຳ​ຄັນ. ອອກມາດ ​ຕະການ​ສະໜັບສະໜູນ​ບໍລິ ສັດ​ຜູ້​ຜະລິດ​ຊິ້ນ​ສ່ວນ​ລົດ​ໃຫຍ່, ສະໜັບສະໜູນ​ການ​ພັດທະນາ​ເຕັກ​ໂນ​ໂລ​ຊີ​ຍານ ພາຫະນະ​ແຫ່ງ​ອະນາຄົດເຊັ່ນ: ລົດໄຟ​ຟ້າ, ລົດ​ບໍ່​ມີ​ຄົນ​ຂັບ ລວມ​ທັງ​ປັບປຸງ​ກົດໝາຍການ ​ສົ່ງເສີມ​ການປັບສ້າງບໍລິສັດ. ສາມ, ການ​ພັດທະນາ​ອຸດສາ ຫະກຳ​ໃໝ່ ໂດຍ​ຈະ​ອອກມາດ​ ຕະການ, ສິດທິ​ພິເສດທີ່ສົ່ງເສີມ​ການ​ພັດທະນາ​ອຸດສາຫະກຳ​ໃໝ່ໆ. ສີ່, ການ​ພັດທະນາອຸດ ສາຫະກຳ​ພາກ​ບໍລິການໂດຍ ​ຈະ​ຊຸກຍູ້​ການ​ຜ່ານຮ່າງ​ກົດ ໝາຍ​ວ່າ​ດ້ວຍ​ການພັດທະນາ​ຂະແໜງການ​ບໍລິການໃນ​ໄຕ​ມາດ​ທຳອິດ​ຂອງ​ປີ 2019, ສົ່ງ ເສີມ​ການ​ນຳ​ນະວັດຕະ​ກຳມາ​ພັດທະນາ​ທຸລະ​ກິດ​ບໍລິການທີ່ ສ.ເກົາຫຼີ ມີ​ຄວາມ​ເຂັ້ມແຂງ​ເຊັ່ນ: ການທ່ອງທ່ຽວ, ການ​ບໍ ລິການ​ສຸຂະພາບ, ຄອນ​ເທັນ, ໂລ​ຈິ​ສ​ຕິກ, ສະໜັບສະໜູນການ ​ເຕີບ​ໂຕ​ຂອງ​ອຸດສາຫະກຳ​ຊ໋ອບ​ແວ ແລະ ເກ​ມ. ສົ່ງເສີມ​ການ​ສ້າງ​ວຽກ​ເຮັດ​ງານ​ທຳ​ໃນ​ສາຂາ​ໃໝ່ໆ. ຫ້າ, ການ​ສົ່ງເສີມ​ການ​ຈ້າງ​ງານ​ແບບ​ຍືນ​ຍົງໂດຍ​ພັດ ທະນາ​ຮູບ​ແບບ​ການ​ຈ້າງ​ງານ​ທີ່​ຍຸຕິ​ທຳ, ເທົ່າ​ທຽມ​ກັນ ແລະ ມີ​ຜົນ​ປະໂຫຍດ​ໃຫ້​ທັງ​ຂະແໜງ​ອຸດ​ສາຫະ​ກຳ ແລະ ແຮງ​ງານ. ເພີ່ມ​ສະຫວັດດີ​ການ​ຂອງ​ແຮງ​ງານ SMEs ແລະ ຫຼຸດຜ່ອນພາ ສີ​ໃຫ້​ແກ່​ບໍລິສັດ​ທີ່​ບໍລິຈາກ​ເງິນ​ໃຫ້​ກອງ​ທຶນ​ສະຫວັດດີ​ການ SMEs.

   ການ​ສ້າງ​ການ​ເຕີບ​ໂຕ​ໃຫ້​ສົມບູນ​ແບບ​: ໜຶ່ງ, ການໃຫ້​ ຄວາມ​ຊ່ວຍເຫຼືອ​ແກ່​ກຸ່ມ​ຜູ້​ໃຊ້ ແຮງ​ງານ ແລະ ເຈົ້າ​ຂອງ​ທຸລະ​ກິດຂະໜາດນ້ອຍໂດຍຈະອອກ ​ມາດ​ຕະການ​ເພື່ອ​ປົກປ້ອງ ແລະ ຫຼຸດ​ພາລະ​ໃນ​ການ​ດຳ ເນີນ​ທຸລະ​ກິດ​ຂະໜາດ​ນ້ອຍ (SME) ເຊັ່ນ:ການ​ຫຼຸດຄ່າ​ທຳ ນຽມ​ສຳລັບ​ການ​ເຮັດ​ທຸລະ​ກຳ, ການຊຳລະເງິນ​ທາງອິນເຕີ​ເນັດ. ກໍາ​ນົດ​ໃຫ້​ທຸລະ​ກິດ​ບາງ​ປະເພດ​ຖືກ​ສະຫງວນ​ໄວ້​ສຳລັບ​ຜູ້​ ປະກອບ​ທຸລະ​ກິດ SME ແລະ ໃຫ້ການ​ຊ່ວຍເຫຼືອ​ທາງດ້ານ​ການ​ເງິນ​ແກ່​ເຈົ້າ​ຂອງ​ທຸລະ​ກິດ​ທີ່​ປະສົບ​ກັບ​ພາວະ​ໜີ້​ສິນ. ສອງ, ການ​ໃຫ້​ຄວາມ​ຊ່ວຍເຫຼືອ​ແກ່​ກຸ່ມ​ສ່ຽງ ໂດຍ​ຈະ​ສົ່ງເສີມ​ການ​ຈ້າງ​ງານ ແລະ ການ​ອຸດ​ໜູນ​ຈ້າງ​ງານ​ແກ່​ກຸ່ມ​ທີ່​ມີ​ຄວາມ​ສ່ຽງ​ສະໜັບສະໜູນ​ກຸ່ມ​ສ່ຽງ, ເຍົາວະ​ຊົນ​ຈາກ​ຄອບຄົວ​ທີ່​ມີ​ລາຍ​ໄດ້​ຕໍ່າ ໃຫ້​ໄດ້​ຮັບ​ໂອກາດ​ດ້ານ​ການ​ສຶກສາ​ເຊັ່ນ: ການ​ໃຫ້​ໂຄ​ຕ້າ ສຳລັບ​ນັກຮຽນ​ແພດ ແລະ ນັກ​ສຶກສາ​ວິຊາ​ກົດໝາຍ​ສຳລັບ​ກຸ່ມ​ຄວາມ​ສ່ຽງ, ເພີ່ມ​ການ​ຈ້າງ​ງານ​ຂອງ​ແຮງ​ງານ​ເພດ​ຍິງ ກຸ່ມ​ໄວ​ກາງຄົນ ແລະ ຜູ້​ອາຍຸ​ສູງ, ເພີ່ມ​ເງິນ​ຊ່ວຍເຫຼືອ, ມາດ​ຕະການ​ແກ້​ໄຂ​ສຳລັບ SMEs ທີ່​ໄດ້​ຮັບ​ຜົນ​ກະທົບ​ຈາກ​ນະໂຍບາຍ​ຂຶ້ນ​ຄ່າ​ແຮງ​ງານ​ຂັ້ນ​ຕ່ຳ ແລະ ນະໂຍບາຍ​ກຳນົດ​ຊົ່ວໂມງ​ເຮັດ​ວຽກ​ບໍ່​ເກີນ 52 ຊົ່ວໂມງ ລວມ​ທັງ​ສະໜັບສະໜູນ​ການ​ເຕີບ​ໂຕ​ຂອງ​ວິ​ສາ​ຫະ​ກິດ​ຊຸມ​ຊົນ. ສາມ, ການ​ຍົກ​ລະດັບ​ຄຸນ​ນະ​ພາບ​ຂອງ​ຊີວິດ ໂດຍ​ຈະ​ເພີ່ມ​ຈຳນວນ​ເຮືອນ​ເຊົ່າ, ປັບປຸງ, ເພີ່ມ​ເຄືອ​ຂ່າຍ​ທາງ​ຫຼວງ​ໃນ​ນະຄອນຫຼວງ​ເຊ​ອູນ, ຂະຫຍາຍ​ຂອບ​ເຂດ​ຂອງ​ລະບົບ​ປະກັນ​ສຸຂະພາບ​ແຫ່ງ​ຊາດ, ເພີ່ມ​ການ​ອຸດ​ໜູນ​ຄ່າ​ຮຽນ ແລະ ອອກ​ມາດ​ຕະການ​ເພື່ອ​ແກ້​ໄຂ​ບັນຫາ​ຝຸ່ນ​ມົນ​ລະ​ພິດ​ໃນ​ອາກາດ (fine dust)ເຊັ່ນ: ເພີ່ມ​ອັດຕາ​ສ່ວນ​ຂອງ​ລົດເມ​ໄຟຟ້າ ແລະ ເພີ່ມ​ມາດ​ຕະການ​ສຳລັບ​ການ​ໃຊ້​ລົດ​ກວາດ, ທຳ​ຄວາມ​ສະອາດ​ທາງ. ສີ່, ການ​ສ້າງ​ຄວາມ​ເຂັ້ມແຂງ​ຂອງ​ເຄືອ​ຂ່າຍ​ຄວາມ​ປອດ​ໄພ​ທາງ​ດ້ານ​ສັງຄົມ ໂດຍ​ຈະ​ຂະຫຍາຍ​ເພດານ, ປັບປຸງ​ເງື່ອນໄຂ​ເງິນ​ຄືນ​ພາສີ​ສຳລັບ​ບຸກຄົນ​ທີ່​ມີ​ລາຍ​ໄດ້​ຕ່ຳ ຫຼື ລາຍ​ໄດ້​ປານ​ກາງ, ຊ່ວຍ​ຂະຫຍາຍ​ຄວາມ​ຊ່ວຍເຫຼືອ​ແກ່​ຜູ້​ວ່າງ​ງານ​ທີ່​ມີ​ລາຍ​ໄດ້​ສິດທິ ຕາມ​ໂຄງການ​ປະກັນ​ການ​ວ່າງ​ງານ, ຂະຫຍາຍ, ເພີ່ມ​ສິດທິ​ຕ່າງໆ​ສຳລັບ​ຜູ້​ອອກແຮງ​ງານ​ເຊັ່ນ: ປະກັນ​ສັງຄົມ, ເງິນ​ບຳນານ, ສະຫວັດດີ​ການ​ທີ່ຢູ່​ອາ​ໄສ ແລະ ປັບປຸງ​ກອງ​ທຶນ​ບຳ​ເນັດ​ບຳນານ. ຫ້າ, ການ​ສ້າງ​ເສດຖະກິດ​ທີ່​ຍຸຕິ​ທຳ ໂດຍ​ຈະ​ແກ້​ໄຂ​ກົດ​ລະບຽບ​ທາງ​ເສດຖະກິດ​ທີ່​ບໍ່​ຍຸຕິ​ທຳ​ເຊັ່ນ: ການ​ກຳນົດ​ໃຫ້​ບໍລິສັດ​ຂະໜາດ​ໃຫຍ່​ຕ້ອງ​ເປີດເຜີຍ​ຂໍ້​ມູນ​ການ​ຈ່າຍ​ເງິນ​ໃຫ້​ກັບ​ບໍລິສັດ​ຜູ້​ຮັບ​ເໝົາ, ເພີ່ມ​ບົດ​ລົງໂທດ​ບໍລິສັດ​ຂະໜາດ​ໃຫຍ່​ທີ່​ລັກ​ເຕັກ​ໂນ​ໂລ​ຊີ​ຂອງ​ບໍລິສັດ SMEs ປັບປຸງ​ໂຄງ​ສ້າງ​ການ​ບໍລິຫານ​ງານ,ການ​ປົກຄອງ​ຂອງ​ບໍລິສັດ​ໃຫຍ່ ແລະ ສົ່ງເສີມ​ການ​ຮ່ວມ​ມື​ລະຫວ່າງ​ບໍລິສັດ​ຂະໜາດ​ໃຫຍ່​ກັບ SMEs.

   ການ​ຮັບ​ມື​ກັບ​ສິ່ງ​ທ້າ​ທາຍ​ດ້ານ​ເສດຖະກິດ​ໄລຍະ​ກາງ ແລະ ໄລຍະ​ຍາວ. ໜຶ່ງ, ການ​ກຽມ​ຄວາມ​ພ້ອມ​ສຳລັບ​ຍຸກ​ການ​ປະຕິວັດ​ອຸດສາຫະກຳ​ຄັ້ງ​ທີ 4 ໂດຍ​ຈະ​ສົ່ງເສີມ​ການ​ລົງທຶນ ແລະ ປັບປຸງ​ງົບປະມານ, ສ້າງຕັ້ງ​ກອງ​ທຶນ​ສະໜັບສະໜູນ​ເພີ່ມ​ເຕີມ, ພັດທະນາ​ເວທີ​ເສດ ຖະກິດ, ສົ່ງເສີມ​ການ​ຫັນ​ເປັນ​ອຸດສາຫະກຳ ລວມ​ທັງ​ສົ່ງເສີມ​ການ​ພັດທະນາ​ປະສິດທິພາບ​ແຮງ​ງານ. ປັບປຸງ​ຫຼັກສູດ​ການ​ສຶກສາ ແລະ ເພີ່ມ​ການ​ຝຶກ​ອົບ ຮົມ, ພັດທະນາ​ສີມື​ແຮງ​ງານ. ສອງ, ກຽມ​ຄວາມ​ພ້ອມ​ສຳ ລັບການ​ເຂົ້າ​ສູ່​ສັງຄົມ​ຜູ້​ອາຍຸ​ສູງ ແລະ ການ​ແກ້​ໄຂ​ບັນຫາ​ອັດຕາ​ການ​ເກີດ​ຕາໍ່ ໂດຍ​ຈະ​ປັບປຸງ​ແຜນການ, ຍຸດທະສາດ​ການ​ພັດທະນາ​ປະເທດ​ໃຫ້​ສອດ ຄ່ອງ​ກັບ​ການ​ປ່ຽນແປງ​ຂອງ​ໂຄງ​ສ້າງ​ປະຊາກອນປັບປຸງສະ ຫວັດດີ​ການ, ການ​ປົກ​ປ້ອງສິດ ຜົນປະໂຫຍດ​ຂອງ​ແມ່, ເພີ່ມ ​ຄ່າ​ແຮງ​ງານ, ເງິນ​ລ່ວງ​ເວລາ ສຳລັບ​ແຮງ​ງານ​ເພດ​ຍິງທີ່​ມີ​ພາລະ​ໃນ​ການ​ເບິ່ງແຍງ​ລູກ, ສະ ໜັບສະໜູນ​ການ​ເປີດ​ສູນ​ລ້ຽງ​ ເດັກ​ໃນ​ບ່ອນ​ເຮັດ​ວຽກ ແລະ ໃຫ້​ສະຫວັດດີ​ການ​ໃຫ້​ແກ່​ແຮງ​ງານ​ທີ່​ເປັນ​ພໍ່. ສາມ, ກຽມ​ຄວາມ​ພ້ອມ​ສຳລັບ​ການ​ຮ່ວມ​ມື​ທາງ​ເສດຖະກິດ​ກັບ ສປປ.ເກົາ​ຫຼີ.

   ສປປ ລາວ ແລະ ສ.ເກົາຫຼີ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ ໃນ​ວັນ​ທີ 25 ຕຸລາ 1995.