ນະ­ຄອນ​ແຟຣງ​ເຟິດ ຕັ້ງ​ເປົ້າ​ໝາຍ​ເປັນ​ສູນ​ກາງດ້ານ​ຟິນ​ເທັກ​ຂອງ​ເອີ​ຣົບ

04.10.2019 9:05     

( ເນື່ອງ​ໃນ​ໂອກາດ​ວັນຊາດ ເຢຍ​ລະ​ມັນ 3 ຕຸ​ລາ)

ຮຽບຮຽງ​ໂດຍ​​ : ລຸ້ງ​ດາວ

   ລັດ​ເຮ​ນ​ເຊິນ ມີ​ເປົ້າ​ໝາຍ​ພັດທະນາ​ເຕັກ​ໂນ​ໂລ​ຊີ​ທາງ​ການ​ເງິນ​ໃຫ້​ເຕີບ​ໃຫຍ່ ໂດຍ​ມີ​ຈຸດປະສົງ​ໃຫ້​ນະຄອນ​ແຟຣງ​ເຟິດ ແລະ ເຂດ​ໄຣ​-​ເມນ (Rhine-Main) ຂອງ​ເຢຍ​ລະ​ມັນ ເປັນ​ສູນ​ກາງ​ດ້ານ​ການ​ເງິນ​ຂອງ​ທະວີບ​ເອີ​ຣົບ ພາຍ​ໃນ​ເວລາ 5 ປີ. ການ​ເຂົ້າ​ຕະຫຼາດ​ຫຼັກ​ຊັບ DAX Inex ຂອງ​ບໍລິສັດ wirecard ຊຶ່ງ​ເປັນ​ບໍລິສັດ​ທີ່​ດຳເນີນ​ທຸລະ​ກິດ​ດ້ານ​ການ​ເງິນ ໃນ​ປີ​ທີ່​ຜ່ານ​ມາ​ເປັນ​ສິ່ງ​ສະແດງ​ໃຫ້​ເຫັນ​ເຖິງ​ບົດບາດ​ທີ່​ສຳຄັນ​ຂອງ​ເຕັກ​ໂນ​ໂລ​ຊີ​ທາງ​ການ​ເງິນ, ທີ່​ເຕີບ​ໃຫຍ່​ຂຶ້ນ​ມາ​ຢູ່​ໃນ​ລະດັບ​ດຽວ​ກັບ​ທຸລະ​ກິດ​ດ້ານ​ການ​ເງິນ​ສາຂາ​ອື່ນໆ​ໄດ້​ຢ່າງ​ວ່ອງ​ໄວ. ອະນາຄົດ​ຂອງ​ທຸລະ​ກິດ​ດ້ານ​ການ​ເງິນ​ຈຶ່ງ​ມີ​ທ່າ​ອ່ຽງ​ປັບ​ປ່ຽນ​ຮູບ​ແບບ​ເປັນ​ດີ​ຈິີ​ຕອນ. ສະນັ້ນ, ຜູ້​ນໍາ​ລັດ​ເຮ​ນ​ເຊິນ ຈຶ່ງ​ຕັ້ງໃຈ​ທີ່​ຈະ​ເຮັດ​ໃຫ້​ນະຄອນ​ແຟຣງ​ເຟິດ ໃນ​ຖານະ​ທີ່​ເປັນ​ເມືອງ​ສູນ​ກາງ​ດ້ານ​ການ​ເງິນ ໃຫ້​ເປັນ​ຜູ້ນຳ​ໃນ​ການ​ພັດທະນາ​ທຸລະ​ກິດ​ສາຂາ​ນີ້ ຊຶ່ງ​ຈະ​ມີ​ຜົນ​ໃນ​ທາງ​ບວກ​ໃຫ້​ກັບ​ເສດຖະກິດ​ຂອງ​ລັດ​ເຮ​ນ​ເຊິ​ນ​ເວົ້າ​ສະເພາະ, ເວົ້າ​ລວມ​ກໍ່​ຄື​ເຢຍ​ລະ​ມັນ.

   ການ​ເປັນ​ສູນ​ກາງ​ທາງ​ດ້ານ​ການ​ເງິນ​ຂອງ​ໂລກ ຈຳເປັນ​ຕ້ອງ​ພັດທະນາ​ຄວາມ​ເປັນ​ເລີດ​ດ້ານ​ນະ​ວັດຕະ​ກຳ​ເຕັກ​ໂນ​ໂລ​ຊີ​ທາງ​ດ້ານ​ການ​ເງິນ ແລະ ການ​ໃຫ້​ບໍລິການ. ດັ່ງນັ້ນ, ນະຄອນ​ແຟຣງ​ເຟິດ ຈຶ່ງເໝາະ​ສົມ​ທີ່​ສຸດ ໂດຍ​ສະເພາະ​ການເປັນ​ສູນ​ກາງ​ດ້ານ​ການ​ທະນາຄານ​ຂອງ​ເອີ​ຣົບ ທີ່​ມີ​ລະບົບ​ເຕັກ​ໂນ​ໂລ​ຊີ ຂໍ້​ມູນ​ຂ່າວສານ ແລະ ການ​ສື່ສານ​ທີ່​ກ້າວໜ້າ ເພື່ອ​ຮອງ​ຮັບ​ການ​ພັດທະນາ​ດັ່ງກ່າວ ຊຶ່ງ​ການ​ພັດທະນາ​ດ້ານ​ການ​ເງິນ ຂອງ​ນະຄອນ​ແຟຣງ​ເຟິດ ແລະ ເຂດ​ໄຮ​-​ເມນ ໄດ້​ເຕີບ​ໃຫຍ່​ຂະຫຍາຍຕົວ​ຢ່າງ​ຕໍ່​ເນື່ອງ ແລະ ສາມາດ​ດຶງ​ດູດ​ກຸ່ມ Startup ໃໝ່ໆ​ເຂົ້າ​ມາ​ຫຼາຍ​ຂຶ້ນ.

   ແຜນການ​ຊຸກຍູ້​ໃຫ້​ນະ ຄອນ​ແຟຣງ​ເຟິດ ແລະ ເຂດ​ໄຮ​-​ເມນ ເປັນ​ສູນ​ກາງ​ດ້ານ​ການ​ເງິນ ຫຼັກໆ ມີ​ທັງ​ການ​ອອກ​ນະໂຍບາຍ​ສະໜັບສະໜູນ​ຜູ້​ເປັນ​ອັດ​ສະ​ລິ​ຍະ ແລະ ຜູ້​ມີ​ຄວາມ​ຄິດ​ສ້າງສັນ, ການ​ສ້າງ​ເຄືອ​ຂ່າຍ, ການ​ສະໜັບສະໜູນ​ທາງ​ການ​ເງິນ ແລະ ເຮັດ​ໃຫ້​ແນວ​ຄິດ​ທີ່​ມີ​ຄວາມ​ໂດດ​ເດັ່ນ​ຕ່າງໆ ສາມາດ​ປັບ​ປ່ຽນ​ເປັນ​ການ​ດຳເນີນ​ທຸລະ​ກິດ​ທາງ​ການ​ຄ້າ​ໄດ້. ແນວທາງ​ທັງ​ໝົດ​ດັ່ງກ່າວ ຈະ​ຊ່ວຍ​ສ້າງ​ຄວາມ​ເຂັ້ມແຂງ​ໃຫ້​ນະຄອນ​ແຟຣງ​ເຟິດ ແລະ ເຂດ​ໄຮ​-​ເມນ ຊຶ່ງ​ຝ່າຍ​ການເມືອງ, ພາກ​ທຸລະ​ກິດ ແລະ ວິຊາ​ການຈຳເປັນ​ຕ້ອງ ​ຮ່ວມ​ມື​ກັນ​ຢ່າງ​ໃກ້​ຊິດ ເພື່ອ​ໃຫ້​ ບັນລຸ​ເປົ້າ​ໝາຍ. ແນວທາງ​ດັ່ງ ກ່າວເປັນ​ຂະບວນ​ການ​ແບບ​ເປີດ​ກວ້າງ ຊຶ່ງ​ຜູ້​ສົນໃຈ​ສາມາດ​ເຂົ້າ​ຮ່ວມ​ກິດຈະກຳ​ຕ່າງໆ​ໄດ້. ດັ່ງນັ້ນ, ການ​ເພີ່ມ​ຂີດ​ຄວາມ​ສາມາດ​ທາງ​ການ​ແຂ່ງຂັນ​ໃນ​ອະນາຄົດ​ຈຶ່ງ​ເປັນ​ສິ່ງ​ຈຳ​ເປັນ.

   ການ​ພັດທະນາ​ດ້ວຍ​ເຕັກ​ໂນ​ໂລ​ຊີ​ທີ່​ທັນ​ສະ​ໄໝ ສຳລັບ​ໃຫ້​ບໍລິການ​ກຸ່ມ Startup ໃນ​ເລື່ອງ​ຂອງ​ພື້ນ​ທີ່​ເຮັດ​ວຽກ​ທີ່​ໜ້າ​ສົນໃຈ ແລະ ລາຄາ​ບໍ່​ແພງ, ໂປຣແກ​ຣມ​ທີ່​ຫຼາກ​ຫຼາຍໂອ ກາດ​ການ​ສ້າງ​ເຄືອ​ຂ່າຍ ແລະ ການ​ແລກປ່ຽນ​ຂໍ້​ມູນ, ການ​ເຂົ້າ​ເຖິງ​ກຸ່ມ​ຜູ້​ລົງທຶນ ແລະ ການ​ໃຫ້​ຄຳ​ແນະນຳ​ປຶກສາ ຖື​ເປັນ​ບາດກ້າວ​ທຳອິດ​ທີ່​ສຳຄັນ​ຂອງ​ເສັ້ນທາງ​ໄປ​ສູ່​ການ​ເປັນ​ສູນ​ກາງ​ດ້ານ​ການ​ເງິນ ທີ່​ສຳຄັນ​ໃນ​ລະດັບ​ສາກົນ ແລະ ສິ່ງ​ທີ່​ສຳຄັນ ແມ່ນ​ເຮັດ​ໃຫ້ການ​ພັດທະນາ​ດ້ວຍ​ເຕັກ​ໂນ​ໂລ​ຊີ ແຕກ​ຕ່າງ​ຈາກ​ສູນ​ທຸລະ​ກິດ​ອື່ນໆ​ຄື: ການ​ເຮັດ​ໜ້າທີ່​ເປັນ​ເວທີ (The platform) ໃຫ້​ສະ​ຖາ​ບັນທຸ​ລະ​ກິດ​ການ​ເງິນ ສາຂາ​ເຕັກ​ໂນ​ໂລ​ຊີ ອື່ນໆ​ທີ່​ກ່ຽວຂ້ອງ ແລະ ສະ​ຖາ​ບັນ​ວິຊາ​ການ​ໃນ​ເຂດ​ສາມາດ​ເຮັດ​ວຽກ​ຮ່ວມ​ກັນ​ໄດ້.

   ແນວ​ຄວາມ​ຄິດ​ດ້ານເຕັກ​ ໂນ​ໂລ​ຊີ ໄດ້​ຮັບ​ຄວາມ​ສົນໃຈ ແລະ ປັດຈຸບັນ ໄດ້​ຮັບ​ການສະ ໜັບສະໜູນ​ຫຼັກ ຈາກ​ພາກ​ທຸລະ​ກິດ​ການ​ເງິນ​ທີ່​ມີ​ຊື່​ສຽງ ແລະ ກຸ່ມ​ບໍລິສັດ ທີ່​ໃຫ້​ຄຳ​ປຶກສາ​ແນະນຳ​ດ້ານ​ທຸລະ​ກິດ​ໃນ​ນະຄອນ​ແຟຣງ​ເຟິດ ແລະ Startup ຫຼາຍ​ກວ່າ 150 ບໍ​ລ​ິສັດ ໂດຍ​ສະເພາະ Startup ດ້ານ ການ​ເງິນ ທີ່​ໃຊ້​ບໍລິການ​ດ້ານ​ເຕັກ​ໂນ​ໂລ​ຊີ​ທີ່​ທັນ​ສະ​​ໄໝ ເປັນ​ຈຳນວນ​ຫຼວງ​ຫຼາຍ.

   ທັງ​ນີ້, ສາມາດ​ສັງເກດ​ໄດ້​ວ່າ: ນະຄອນ​ແຟຣງ​ເຟິດ ໄດ້​ຊື່ວ່າ ເປັນ​ສູນ​ກາງຂອງ​ຂະແໜງ​ທະນາຄານ​ເອີ​ຣົບ​ແຫ່ງ​ໜຶ່ງ ໂດຍ​ສະເພາະ​ຄວາມ​ມຸ່ງ​ຫວັງ​ທີ່​ຈະ​ຂຶ້ນ​ມາ​ແທນ​ທີ່ ນະຄອນຫຼວງ​ລອນ​ດອນ (ປະເທດ​ອັງກິດ) ພາຍຫຼັງ ອັງກິດ​ຖອນ​ອອກ​ຈາກ​ສະຫະພາບ​ເອີ​ຣົບ (Brexit) ຊຶ່ງ​ພື້ນຖານ​ທີ່​ສຳຄັນ​ຂອງ​ໂລກ​ໃນ​ດ້ານ​ພາກ​ການ​ເງິນ ແລະ ການ​ທະນາຄານ​ແຫ່ງ​ອະນາຄົດ ຄື​ການ​ພັດທະນາ​ນະ​ວັດຕະ​ກຳ​ເຕັກ​ໂນ​ໂລ​ຊີ​ທາງ​ການ​ເງິນ. ດັ່ງນັ້ນ, ການ​ທີ່​ລັດ​ເຮ​ນ​ເຊິນ ມີ​ເປົ້າ​ໝາຍ​ໃນ​ການ​ຊຸກຍູ້​ໃຫ້​ນະຄອນ​ແຟຣງ​ເຟິດ ແລະ ເຂດ​ໄຮ​-​ເມນ ເປັນ​ສູນ​ກາງ​ດ້ານ​ການ​ເງິນ ໃນ​ທະວີບ​ເອີ​ຣົບ ພາຍ​ໃນ​ໄລຍະ​ເວລາ 5 ປີ, ຈຶ່ງ​ຖື​ວ່າ​ເປັນ​ເປົ້າ​ໝາຍ​ສຳຄັນ​ໃນ​ການ​ສ້າງ​ພື້ນຖານ​ໃຫ້​ນະຄອນ​ແຟຣງ​ເຟິດ ກ້າວ​ໄປ​ສູ່​ການ​ເປັນ​ສູນ​ກາງ​ທາງ​ການ​ເງິນ​ຂອງ​ເອີ​ຣົບ​ໄດ້​ຢ່າງ​ແທ້​ຈິງ.

   ສປປ ລາວ ແລະ ສ.ເຢຍ​ລະ​ມັນ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນໍາ​ກັນ ໃນ​ວັນ​ທີ 11/1/ 1958.