ໜຶ່ງ​ແລວ​ໜຶ່ງ​ເສັ້ນ­ທາງ​ເວ­ທີ​ແຫ່ງ​ການ​ຮ່ວມ​ມື​ພັດ­ທະ­ນາ

 

 

09.10.2019 8:55     

   ງານ​ວາ​ງ​ສະແດງ​ສິນຄ້າ ຈີນ - ອາ​ຊຽນ ຄັ້ງ​ທີ 16 (CAEXPO-16) ແລະ ກອງ​ປະຊຸມ​ສຸດ​ຍອດ​ການ​ຄ້າ ແລະ ການ​ລົງທຶນ​ຈີນ-ອາ​ຊຽນ ຄັ້ງ​ທີ 16 (CABIS-16), ທີ່​ນະຄອນ​ໜານ​ໜິງ ເຂດ​ປົກຄອງ​ຕົນ​ເອງ​ເຜົ່າ​ຈ້​ວາງ​ແຂວງ​ກວາງຊີ ແຫ່ງ ສປ ຈີນ, ໃນ​ລະຫວ່າງ ວັນ​ທີ 21-24 ກັນຍາ 2019, ປະສົບ​ຜົນ​ສໍາ​ເລັດ​ດ້ວຍ​ໄມຕີ​ຈິດ​ມິດຕະພາບ​ແຫ່ງ​ການ​ຮ່ວມ​ມື ຢ່າງ​ຈົບ​ງາມ.

   ຫົວຂໍ້​ງານ CAEXPO-16 ແລະ CABIS-16 ວ່າ​ດ້ວຍ ການ; "ສ້າງ​ໜຶ່ງ​ແລວ​ໜຶ່ງ​ເສັ້ນ ທາງ ແລະ ​ສ້າງ​ວິໄສ​ທັດ​ການ ຮ່ວມມື​ຮ່ວມ​ກັນ", ປີ​ນີ້​ແມ່ນປີ​ທຳ ອິດ​ໃນ​ການຈັດຕັ້ງ​ປະຕິບັດ "ວິໄສ​ທັດ​ສາຍ​ພົວພັນ​ຄູ່​ຮ່ວມ​ຍຸດທະສາດ ຈີນ​-​ອາ​ຊຽນ ຮອດ​ປີ 2030" ແລະ ເປັນ​ປີ​ແລກປ່ຽນ ລະຫວ່າງ ສື່​ມວນ​ຊົນ​ຈີນ​-​ອາ​ຊຽນ ໃນ​ການ​ແລກ ປ່ຽນ​ຂໍ້​ມູນ​ຂ່າວສານ ແລະ ການ ຮ່ວມມື​ດ້ານ​ສື່ ກ່ຽວ​ກັບ​ວຽກ​ງານ ​ໂຄສະ ນາ ໜຶ່ງ​ແລວ​ໜຶ່ງເສັ້ນທາງ. ນອກ​ນັ້ນ, ງານ​ວາງສະແດງ ແລະ ກອງ​ປະຊຸມ​ສຸດຍອດ ​ຄັ້ງນີ້, ໄດ້​ວາງສະແດງສິນຄ້າ, ເວທີປຶກ ສາ​ຫາລື ແລະກິດ ຈະກຳ​ຕ່າງໆ ເພື່ອ​ລົງ​ເລິກ​ການຮ່ວມ​ມື​ໃນ​ຂົງເຂດ​ເສດຖະກິດ​-​ການ​ຄ້າ, ການ​ເຊື່ອມ​ໂຍງ, ເຊື່ອມ​ຈອດ​ກັນ, ການ​ທະນາຄານ, ການ​ຄົມມະນາຄົມ​ຕົວ​ເມືອງ​ອັດ​ສະ​ ລິ​ຍາ ແລະ ອື່ນໆ, ຊຸກຍູ້​ມິດຕະ ພາບ ແລະ ການ​ຮ່ວມ​ມື​ຮອບ ດ້ານ​ລະຫວ່າງຈີນ ແລະ ອາ​ຊຽນຂຶ້ນ​ສູ່​ລະດັບ​ໃໝ່. ພ້ອມ​ກັນ​ນັ້ນ, ໃນ​ງານ​ດັ່ງກ່າວຍັງໄດ້​ ຈັດ​ພິທີ​ເປີດ "ສັບປະດາ​ໂທລະ ພາບ ຈີນ​-​ອາ​ຊຽນ ໃນ​ປີແລກ ປ່ຽນ​ລະຫວ່າງ​ສື່​ມວນ​ຊົນ​ຈີນ​-​ອາ​ຊຽນ.

   ງານ​ວາງສະແດງ​ຄັ້ງ​ນີ້, ມີ​ວິ​ສາ​ຫະ​ກິດ 2.848 ຫົວໜ່ວຍ​ທຸລະ​ກິດ ຈາກ 30 ກວ່າ​ປະເທດ ແລະ ເຂດ​ແຄ້ວ​ນ​ເຂົ້າ​ຮ່ວມ, ເພີ່ມ​ຂຶ້ນ 2,4% ເມື່ອ​ທຽບໃສ່​ປີ 2018, ເນື້ອທີ່​ຂອງ​ເຂດ​ວາງສະແດງ​ສາກົນ "ໜຶ່ງ​ແລວ​ໜຶ່ງ​ເສັ້ນທາງ" ເພີ່ມ​ຂຶ້ນ 59% ເມື່ອ​ທຽບໃສ່​ປີ 2018. ສໍາ​ລັບ ສປປ ລາວ ເຂົ້າ​ຮ່ວມ​ງານ​ວາງສະແດງ​ຄັ້ງ​ນີ້, ມີ​ທັງ​ໝົດ​ຫຼາຍ​ກວ່າ 120 ຮ້ານ, ໃນ​ນັ້ນ ຫົວໜ່ວຍ​ທຸລະ​ກິດ 69 ຮ້ານ ຊຶ່ງ​ສ່ວນ​ຫຼາຍ​ແມ່ນ​ເຄື່ອງ​ເຟີ​ນີ​ເຈີ ແລະ ຫັດ​ຖະ​ກໍາ​ໄມ້​ແກະ​ສະ​ລັກ, ເຄື່ອງ​ປະດັບ​ອັນຍະ​ມະ​ນີ​-​ເຄື່ອງ​ເງິນ, ສິນຄ້າ​ຫັດ​ຖະ​ກໍາ, ຜະລິດ​ຕະ​ພັນ​ອາຫານ ແລະ ເຄື່ອງ​ດື່ມ, ໂຄສະນາ​ວຽກ​ງານ​ທ່ອງ​ທ່ຽວ ແລະ ສິນຄ້າ ໜຶ່ງ​ເມືອງ​ໜຶ່ງ​ຜະລິດ​ຕະ​ພັນ (ODOP). ປີ 2020 ສປປ ລາວ ໄດ້​ຮັບ​ກຽດ​ເປັນ​ປະເທດ​ກິດ​ຕິ​ມະ​ສັກ​ໃນ​ງານ CAEXPO ຄັ້ງ​ທີ 17 ຊຶ່ງ​ມີ​ກໍາ​ນົດ​ຈະ​ຈັດ​ຂຶ້ນ ລະຫວ່າງ ວັນ​ທີ 18-21 ກັນຍາ ປີ 2020 ໂດຍ​ຈະ​ປິ່ນ​ອ້ອມ 5 ຫົວຂໍ້​ໃຫຍ່ ຄື:  ການ​ຄ້າ​ສິນຄ້າ, ການ​ຮ່ວມ​ມື​ດ້ານ​ການ​ລົງທຶນ, ການ​ຄ້າ​ການ​ບໍລິການ, ເຕັກ​ໂນ​ໂລ​ຊີ ທີ່​ກ້າວໜ້າ​ທັນ​ສະໄໝ ແລະ ເມືອງ​ສະ​ເໜ່.

   ໃນ​ພິທີ​ເປີດ​ງານ​ວາງສະ ແດງ​ຄັ້ງ​ນີ້, ທ່ານ ສອນ​ ໄຊ ສີ​ພັນ​ດອນ ຮອງ​ນາຍົກ ລັດຖະມົນຕີ ແຫ່ງ ສປປ ລາວ ກ່າວ​ວ່າ: ຕະ ຫຼອດ​ໄລຍະ 16 ປີຜ່ານມາ, ງານ CAEXPO ຈີນ-ອາ​ຊຽນ ບໍ່​ພຽງ​ແຕ່​ສະແດງ​ໃຫ້​ເຫັນ​ເຖິງ​ຜົນ​ສໍາ​ເລັດ​ຂອງ​ການ​ຮັດ​ແໜ້ນ​ການ​ຮ່ວມ​ມື​ທາງ​ດ້ານ​ການ​ຄ້າ ແລະ ການ​ລົງທຶນ​ເທົ່າ​ນັ້ນ ແຕ່​ຫາກ​ຍັງ​ສົ່ງເສີມ​ການ​ຮ່ວມ​ມື​ທາງ​ດ້ານ​ວັດ​ທະ​ນະ​ທໍາ, ການ​ສ້າງ​ຄວາມ​ເຂົ້າໃຈ ແລະ ການ​ໄປມາຫາສູ່​ກັນ ລະຫວ່າງ ປະຊາຊົນ​ຈີນ ແລະ ອາ​ຊຽນ. ພິເສດ, ງານ CAEXPO ຈີນ - ອາ​ຊຽນ​ຄັ້ງ​ນີ້, ໄດ້​ດໍາ​ເນີນ​ໄປ​ຄວບ​ຄູ່​ກັບ​ການ​ຜັນ​ຂະຫຍາຍ​ປີ​ທ່ອງ​ທ່ຽວ ລາວ - ຈີນ. ດັ່ງ​ນັ້ນ, ທ່ານ ສອນ​ໄຊ ສີ​ພັນ​ດອນ ໄດ້​ຖື​ໂອກາດ​ ນີ້ ເຊື້ອ​ເຊີນ​ບັນດາ​ການ​ນໍາ, ແຂກ​ທ່ອງ​ທ່ຽວ​ອາ​ຊຽນ ກໍ​ຄື​ຊາວ ຈີນ​ມາ​ຢ້ຽມຢາມ ແລະ ທ່ອງ ​ທ່ຽວ​ສະຖານທີ່​ທ່ອງ​ທ່ຽວປະ ຫວັດສາດ, ວັດ​ທະ​ນະ​ທໍາ ແລະ ທໍາ​ມະ​ຊາດ​ອັນ​ສວຍ​ງາມ​ຂອງ​ລາວ ແລະ ຈີນ ອີກ​ດ້ວຍ.

   ນັບ​ຕັ້ງແຕ່ ທ່ານ ສີ​ ຈິ້ນຜິງ ປະທານ​ປະເທດ​ຈີນ ປະກາດ​ຂໍ້​ລິ​ເລີ່ມ; "ໜຶ່ງ​ແລວ​ໜຶ່ງ​ເສັ້ນທາງ" ໃນ​ປີ 2013 ເປັນຕົ້ນ​ມາ. ຂໍ້​ລິ​ເລີ່ມ​ດັ່ງກ່າວ ໄດ້​ມີ​ການ​ຮັບ​ຮູ້ ແລະ ຕອບ​ຮັບ​ຢ່າງ​ກວ້າງ​ຂວາງ​ຢູ່​ເວທີ​ພາກ​ພື້ນ ແລະ ສາກົນ ຊຶ່ງ​ກວມ​ເອົາ 60 ກ່​ວາ​ປະເທດ ແລະ ເຂດ​ແຄ້ວນ ລຽບ​ຕາມ ໜຶ່ງ​ແລວ​ໜຶ່ງ​ເສັ້ນ​ທາງ. ວັນ​ທີ 26 ເມສາ ປີ 2016, ທ່ານ ບຸນ​ຍັງ ວໍລະ​ຈິດ ປະທານ​ປະເທດ ແຫ່ງ ສປປ ລາວ ກໍ​ໄດ້​ນໍາ​ພາຄະ​ນະ​ຜູ້​ແທນ​ຂັ້ນ​ສູງ​ຂອງ​ລາວ ເຂົ້າ​ຮ່ວມ​ກອງ​ປະຊຸມ​ລະດັບ​ສູງ​ຂອງ​ກອງ​ປະຊຸມ ໜຶ່ງ​ແລວ​ໜຶ່ງ​ເສັ້ນທາງ ເພື່ອ​ການ​ຮ່ວມ​ມື​ສາກົນ ຄັ້ງ​ທີ 2 ແລະ ກອງ​ປະຊຸມ​ປິ່ນ​ອ້ອມ​ກ່ຽວ​ຂ້ອງ. ນີ້​ສະແດງ​ໃຫ້​ເຫັນ​ຜົນ​ສໍາ​ເລັດ​ທີ່​ເປັນ​ຮູບ​ປະ​ທໍາຕົວ ​ຈິງ​ໃນ​ເບື້ອງ​ຕົ້ນ ແລະ ໄດ້​ເປີດ​ສັງກາດ​ໃໝ່​ໃຫ້​ແກ່​ການ​ເປີດ​ກ້​ວາງ ແລະ ເພີ່ມ​ທະວີ​ການ​ຮ່ວມ​ມື ເພື່ອ​ການ​ພັດທະນາ​ເສດຖະກິດ - ສັງ​ຄົມ. ການສ້າງ​ ແລວ​ເສດຖະກິດ ແລະ ພັດ​ທະ ​ນາ​ພື້ນຖານ​ໂຄງ​ລ່າງຕາມ​ທ່າແຮງ ແລະ ຈຸດ​ພິ ເສດ​ຂອງ​ບັນດາ​ປະເທດ​ລຽບ​ຕາມ ໜຶ່ງ​ແລວ​ໜຶ່ງ​ເສັ້ນ​ທາງ. ບົນ​ພື້ນຖານ​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະໂຫຍດ ແລະ ເຄົາລົບ​ຊຶ່ງ​ກັນ ແລະ ກັນ.

   ສປປ ລາວ ໄດ້​ຕີ​ລາ ຄາ​ ສູງ​ໝາກຜົນ​ການ​ຮ່ວມ​ມື​ພາຍ​ໃຕ້​ຂໍ້​ລິ​ເລີ່ມ ໜຶ່ງ​ແລວ​ໜຶ່ງ​ເສັ້ນທາງ ແລະ ໄດ້​ປະກອບສ່ວນ​ຢ່າງ​ຕັ້ງ ໜ້າ​ຕາມ​ພາລະ​ບົດບາດ ແລະ ຄວາມ​ສາມາດ​ຂອງ​ຕົນເຂົ້າ​ໃນ​ການຈັດຕັ້ງ​ປະຕິບັດ​ຂໍ້​ລິ​ເລີ່ມ​ດັ່ງ​ກ່າວ. ໝາກຜົນຕົວຈິງ​ທີ່ ສປປ ລາວ ໄດ້​ຮັບ​ແມ່ນການພັດ ທະນາ​ພື້ນຖານ​ໂຄງ​ລ່າງເຮັດ​ໃຫ້ ສປປ ລາວ ຈາກ​ປະເທດ​ບໍ່​ມີ​ຊາຍ​ແດນ​ຕິດ​ກັບ​ທະເລ (Landlock) ກາຍເປັນ​ປະເທດ​ທີ່​ສາມາດ​ເຊື່ອມ​ຈອດ​ເຂົ້າ​ກັບ​ປະເທດ​ໃນ​ອະ​ນຸ​ພາກ​ພື້ນ, ພາກ​ພື້ນ ແລະ ສາ​ກົນ. ອັນ​ທີ່​ພົ້ນ​ເດັ່ນ ແມ່ນ​ເສັ້ນທາງ​ລົດໄຟ​ລາວ - ຈີນ ທີ່​ເປັນ​ໜຶ່ງ​ໃນ​ໂຄງການ​ຮ່ວມ​ມື​ທີ່​ໃຫຍ່​ທີ່​ສຸດ ສໍາ​ລັບ ສປປ ລາວ ພາຍ​ໃຕ້​ຂໍ້​ລິ​ເລີ່ມ "ໜຶ່ງ​ແລວ​ໜຶ່ງ​ເສັ້ນທາງ".
ນອກ​ນີ້, ລາວ - ຈີນ ຍັງ​ໄດ້​ຮ່ວມ​ກັນ​ຫັນ​ແລວ​ທາງ​ຂົນສົ່ງ​ທາງ​ລົດໄຟ ລາວ - ຈີນ ໃຫ້​ກາຍເປັນ​ແລວ​ເສດຖະກິດ​ໃໝ່ ແລະ ຮອບດ້ານ ແນໃສ່​ສົ່ງເສີມ​ການ​ຄ້າ​-​ການ​ລົງທຶນ ແລະ ການ​ທ່ອງ​ທ່ຽວ. ສໍາ​ລັບ ສປປ ລາວ ໄດ້​ເຂົ້າ​ຮ່ວມ​ກົນ​ໄກ​ຮ່ວມ​ມື 8 ຂະແໜງການ​ຈາກ​ທັງ​ໝົດ 11 ກົນ​ໄກ​ຮ່ວມ​ມື​ຂອງ​ຂໍ້​ລິ​ເລີ່ມ ໜຶ່ງ​ແລວ​ໜຶ່ງ​ເສັ້ນ​ທາງ. ຕະຫຼອດ​ໄລຍະ 6 ປີ​ແຫ່ງ​ການຈັດຕັ້ງ​ປະຕິບັດ​ເຫັນ​ວ່າ: ຂໍ້​ລິ​ເລີ່ມ "ໜຶ່ງ​ແລວ​ໜຶ່ງ​ເສັ້ນທາງ" ສາມາດ​ພິສູດ​ໃຫ້​ເຫັນ ເຖິງ​ຜົນ​ສໍາ​ເລັດ​ເປັນ​ທີ່​ເພິ່ງ​ພໍໃຈ​ໃນ​ເບື້ອງ​ຕົ້ນ. ຢ່າງໃດ​ກໍ​ຕາມ ເພື່ອ​ຮັບປະກັນ​ໝາກຜົນ​ສູງ​ສຸດ​ຂອງ​ການ​ຮ່ວມ​ມື​ໃນ​ຂອບ​ດັ່ງກ່າວ, ພວກ​ເຮົາ​ຕ້ອງ​ໄດ້​ເອົາໃຈໃສ່​ຂອດ​ການ​ເຊື່ອມ​ສານ ລະຫວ່າງ ຂໍ້​ລິ​ເລີ່ມ ໜຶ່ງ​ແລວ​ໜຶ່ງ​ເສັ້ນທາງ ກັບ​ບັນດາ​ຂໍ້​ລິ​ເລີ່ມ​ດ້ານ​ການ​ເຊື່ອມ​ຈອດ​ຢູ່​ລະດັບ​ພາກ​ພື້ນ ແລະ ສາກົນ​ເຊັ່ນ: ແຜນ​ແມ່​ບົດ​ວ່າ​ດ້ວຍ​ການ​ເຊື່ອມ​ຈອດ​ອາ​ຊຽນ 2025, ເຄືອ​ຂ່າຍ​ຕົວ​ເມືອງ​ອັດ​ສະ​ລິ​ຍະ​ອາ​ຊຽນ ແລະ ອື່ນໆ. ຫັນ​ເອົາ​ການ​ກໍ່ສ້າງ​ໜຶ່ງ​ແລວ​ທາງ ໃຫ້​ກາຍເປັນ​ແລວ​ເສດຖະກິດ​ຮອບດ້ານ ແລະ ເຕັມ​ສ່ວນ ຊຶ່ງ​ລວມ​ທັງ​ການ​ຄ້າ, ການ​ລົງທຶນ, ການທ່ອງທ່ຽວ, ອຸດ​ສາ​ຫະ​ກໍາ-​ກະ​ສິ​ກໍາ​ປຸງ​ແຕ່ງ ແລະ ເຂດ​ເສດຖະກິດ​ພິເສດ. ຂໍ້​ລິ​ເລີ່ມ "ໜຶ່ງ​ແລວ​ໜຶ່ງ​ເສັ້ນທາງ" ຈະ​ສືບ​ຕໍ່​ນໍາ​ຜົນ​ປະໂຫຍດ​ມາສູ່​ປະເທດ​ລາວ​ເຮົາ ໂດຍ​ສະເພາະ​ປະເທດ​ດ້ອຍ​ພັດທະນາ ແລະ ກໍາ​ລັງ​ພັດທະນາ ກໍ​ຄື​ພາກ​ພື້ນ ແລະ ສາ​ກົນ.

   ສໍາ​ລັບ​ການ​ຄ້າ, ນັບ​ແຕ່​ປີ 2009 ເປັນຕົ້ນ​ມາ, ສປ ຈີນ ກາຍເປັນ​ຄູ່​ຄ້າ​ອັນ​ດັບ​ໜຶ່ງ​ຂອງ​ອາ​ຊຽນ, ປີ 2018 ມູນ​ຄ່າ​ການ​ຄ້າ​ສອງ​ຝ່າຍ​ບັນລຸ​ເຖິງ 588 ຕື້​ໂດ​ລາ ແລະ ຮອດ​ປີ 2020 ຈະ​ສາມາດ​ໃຫ້​ບັນລຸ 1.000 ຕື້​ໂດ​ລາ. ສປ ຈີນ ຖືກ​ຈັດ​ເປັນ​ອັນ​ດັບ 3 ດ້ານ​ການ​ລົງທຶນ​ການ​ຕ່າງປະເທດ​ເຂົ້າ​ໃນ​ອາ​ຊຽນ.