ນຳ້​ມັນ ແລະ ອາຍ​ແ​ກັສ ມີ​ຄວາມ​ສຳ­ຄັນ​ຕໍ່​ເສດ­ຖະ­ກິດ​ຂອງ​ປະ­ເທດ

01.11.2019 10:29     

(ເນື່ອງ​ໃນ​ໂອ​ກາດ​ວັນ​ຊາດ ອານ​ເຊ​ຣີ 1 ພະ​ຈິກ)

ຮຽບຮຽງ​ໂດຍ​​ : ລຸ້ງ​ດາວ

   ອານ​ເຊ​ຣີ ມີ​ຊື່​ທາງ​ການ ​ວ່າ: ສາທາລະນະ​ລັດ ປະຊາ ທິປະໄຕ ປະຊາຊົນ ອານ​ເຊ​ຣີ ຕັ້ງ​ຢູ່​ທະວີບ​ອາ​ຟຣິ​ກາ​ເໜືອ ແລະ ເປັນ​ປະເທດ​ໃຫຍ່​ທີ່​ສຸດ​ໃນ​ເຂດ​ທະເລ​ເມ​ດີ​ເຕ​ຣາ​ນຽນ, ເປັນ​ປະເທດ​ໃຫຍ່​ທີ່​ສຸດ​ໃນ​ທະວີບ​ອາ​ຟຣິ​ກາ ແລະ ໃຫຍ່​ອັນ​ດັບ 10 ຂອງ​ໂລກ. ມີ​ຊາຍ​ແດນ​ທາງ​ດ້ານ​ເໜືອ​ຕິດ​ກັບ ຕຸຍ​ນີ​ຊີ, ທາງ​ດ້ານ​ຕາເວັນ​ອອກ​ຕິດ​ກັບ ລີ​ບີ, ທາງ​ດ້ານ​ຕາເວັນຕົກ​ຕິດ​ກັບ ປະເທດ​ມາ​ຣົກ, ສ່ວນ​ທາງ​ດ້ານ​ຕາເວັນຕົກ​ສ່ຽງ​ໃຕ້​ຕິດ​ກັບ ທະເລຊາຍ​ຊາ​ຮາ​ຣາ, ປະເທດ​ມໍ​ຣິ​ຕາ​ເນຍ ແລະ ມາລີ, ທາງ​ດ້ານ​ຕາເວັນ​ອອກ​ສ່ຽງ​ໃຕ້​ຕິດ​ກັບ ໄນ​ຈີ​ເຣຍ ແລະ ດ້ານ​ເໜືອ​ຕິດ​ກັບ ທະເລ​ເມ​ດີ​ເຕ​ຣາ​ນຽນ. ມີ​ເນື້ອທີ່​ທັງ​ໝົດ 2.381.741 ກິໂລ​ຕາ​ແມັດ, ມີ​ພົນລະເມືອງ​ທັງ​ໝົດ​ປະມານ 41,32 ລ້ານ​ຄົນ (ຂໍ້​ມູນ​ປີ 2017), ມີ​ນະຄອນຫຼວງ​ແມ່ນ ອານ​ເຊ.

   ດ້ານ​ອຸດສາຫະກຳ​ທີ່​ເປັນ​ທ່າແຮງ​ໃຫ້​ກັບ​ປະເທດ​ແມ່ນ ປິ​ໂຕ​ຣ​ລຽມ, ແ​ກັສ​ທຳ​ມະ​ຊາດ, ແຮ່​ເຫຼັກ, ອຸດສາຫະກຳ​ເບົາ, ເໝືອງ​ແຮ່, ໄຟຟ້າ ແລະ ອາຫານ​ແປ​ຮູບ. ສິນ​ຄ້າ​ນໍາ​ເຂົ້າ​ທີ່​ສໍາ​ຄັນ​ຂອງ​ປະເທດ​ແມ່ນ ສິນຄ້າ​ທີ່​ໃຊ້​ເປັນ​ທຶນ, ອາຫານ, ສິນຄ້າ​ອຸປະ​ໂພ​ກ-​ບໍລິໂພກ, ສິນຄ້າ​ສົ່ງ​ອອກ​ທີ່​ສຳຄັນ​ຂອງ​ປະເທດ​ແມ່ນ ນໍ້າ​ມັນ​ດິບ, ແກັສ​ ທຳ​ມະ​ຊາດ ແລະ ຜະລິດ​ຕະ​ ພັນ​ປິ​ໂຕ​ຣ​ລຽມ, ຕະຫຼາດ​ສົ່ງ​ ອອກ​ຫຼັກ​ແມ່ນ ອາ​ເມ​ຣິ​ກາ, ອີ​ ຕາ​ລີ, ແ​ອັສ​ປາຍ, ກາ​ນາ​ດາ, ຝຣັ່ງ ແລະ ນູ​ແວນ​ເຊ​ລັງ. ສ່ວນ​ຕະ​ຫຼາດ​ນໍາ​ເຂົ້າ​ແມ່ນຝຣັ່ງ, ອີ​ຕາ​ລີ, ຈີນ, ແ​ອັສ​ປາຍ, ເຢຍ​ລະ​ມັນ ແລະ ອາ​ເມ​ຣິ​ກາ.
ອານ​ເຊ​ຣີ ຄົ້ນ​ພົບ​ນ້ຳມັນ​ໃນ​ປີ 1950 ແລະ ນໍ້າ​ມັນ​ຈຶ່ງ​ແມ່ນ​ກະດູກ​ສັນຫຼັງ​ຂອງ​ຊາດ. ອານ​ເຊ​ຣີ​ເປັນ​ສະມາຊິກ​ຂອງ​ກຸ່ມ​ປະເທດ​ຜູ້​ຜະລິດ​ນ້ຳມັນ ຫຼື OPEC ໃນ​ປີ 1969. ເສດຖະ ກິດ​ຂອງ​ປະເທດ​ຕົ້ນຕໍ​ແມ່ນ​ອາ​ໄສ​ນ້ຳມັນ ແລະ ແ​ກັສ, ທີ່​ມີ​ການ​ຜະລິດ​ນ້ຳມັນ​ປະມານ 1,1 ລ້ານ​ບາ​ເຣນ​ຕໍ່​ມື້. ອານ​ເຊ​ຣີ ເປັນ​ຜູ້​ຜະລິດ ແລະ ສົ່ງ​ອອກ​ອາຍ​ແ​ກັສ​ໄປ​ຍັງ​ບັນດາ​ປະເທດ​ໃນ​ທະວີບ​ເອີ​ຣົບ. ລາຍ​ຮັບ​ຈາກ​ການ​ເກັບ​ພາສີ 60% ແມ່ນ​ມາ​ຈາກ​ພາກ​ພະລັງ​ງານ. ປະກອບສ່ວນ​ໃຫ້​ກັບ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ປະມານ 30% ແລະ ກວມ 95% ການ​ສົ່ງ​ອອກ​ຂອງ​ປະ​ເທດ. ອານ​ເຊ​ຣີ ມີ​ນໍ້າ​ມັນ​ສຳຮອງ​ໃຫຍ່​ເປັນ​ອັນ​ດັບ 14 ຂອງ​ໂລກ ຊຶ່ງ​ຄາດ​ວ່າ​ມີ​ເຖິງ 11,8 ຕື້​ບາ​ເຣນ ແລະ ມີ​ອາຍ​ແ​ກັສ​ທຳ​ມະ​ຊາດ ໃຫຍ່​ເປັນ​ອັນ​ດັບ 8 ຂອງ​ໂລກ. ໃນ​ເດືອນ​ຕຸລາ ປີ 2013, ອານ​ເຊ​ຣີ ໄດ້​ຄົ້ນ​ພົບ​ແຫຼ່ງ​ນ້ຳມັນ​ແຫ່ງ​ໃໝ່ ແລະ ຄາດ​ວ່າ​ຈະ​ມີ​ນ້ຳມັນ​ເຖິງ 1,3 ຕື້​ບາ​ເຣນ.

   ແຫຼ່ງ​ນ້ຳມັນ​ດັ່ງກ່າວ ແມ່ນ​ຕັ້ງ​ຢູ່​ໃນ​ເຂດ Tamquid Messaoud ໃກ້​ກັບ​ເມືອງ​ອົວ​ເກ​ລດ ຊຶ່ງ​ເປັນ​ການ​ຄົ້ນ​ພົບ​ຄັ້ງ​ໃຫຍ່​ສຸດ​ໃນ​ຮອບ 20 ປີ​ຜ່ານ​ມາ. ເຖິງ​ວ່າ​ນ້ຳມັນ ແລະ ອາຍ​ແ​ກັສ ຈະ​ມີ​ຄວາມ​ສຳຄັນ​ຕໍ່​ເສດຖະກິດ​ຂອງ​ປະເທດ, ແຕ່​ລັດຖະບານ​ອານ​ເຊ​ຣີ ກໍຊອກ​ຫາ​ການ​ລົງທຶນ​ຈາກ​ພາຍ​ໃນ ແລະ ຕ່າງປະເທດ​ເຂົ້າ​ໃນ​ຂະແໜງການ​ອື່ນ ເພື່ອ​ຫຼຸດຜ່ອນ​ອັດຕາ​ວ່າງ​ງານ ແລະ ປັບປຸງ​ມາດຕະຖານ​ການ​ດຳລົງ​ຊີວິດ​ຂອງ​ປະຊາຊົນ​ໃຫ້​ດີ​ຂຶ້ນ ໂດຍ​ສະເພາະ ແມ່ນ​ລົງທຶນ​ເພື່ອ​ພັດທະນາ​ຊັບພະຍາກອນ​ມະນຸດ, ການ​ສຶກສາ, ການ​ຮັກ ສາ​ສຸຂະພາບ, ບ່ອນຢູ່​ອາໄສ ແລະ ຂົງເຂດ​ອື່ນໆ. ລວມ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ ບັນລຸ 170,4 ຕື້​ໂດ​ລາ, ອັດຕາ​ການ​ເຕີບ​ໂຕ​ຂອງ GDP ກວມ 1,7%, ລາຍ​ໄດ້​ສະເລ່ຍ​ຕໍ່​ຫົວ​ຄົນ​ບັນລຸ 4.123 ກວ່າ​ໂດ​ລາ (ຂໍ້​ມູນ​ປີ 2017). ອົງການ​ສະຫະ​ປະຊາຊາດ ໄດ້​ຍົກ​ໃຫ້ ອານ​ເຊ​ຣີ ເປັນ​ປະເທດ​ທີ່​ມີ​ລາຍ​ຮັບ​ສູງ​ກວ່າ​ລະດັບ​ປານ​ກາງ.

   ສປປ ລາວ ແລະ ອານ​ເຊ​ຣີ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ ໃນ​ວັນ​ທີ 15 ພຶດສະພາ ປີ 1973