ກອງ​ປະ­ຊຸມ​ລັດ­ຖະ­ມົນ­ຕີ​ຄົມ­ມະ­ນາ­ຄົມ​ຂົນ­ສົ່ງ ອາ​ຊຽນ ຄັ້ງ​ທີ 25

18.11.2019 9:13     

   ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ກອງ​ປະຊຸມ​ລັດຖະມົນຕີ​ຄົມມະນາຄົມ​ຂົນສົ່ງ ບັນດາ​ປະເທດ​ອາ​ຊຽນ ຄັ້ງ​ທີ 25 (ATM-25) ໄດ້​ດໍາ​ເນີນ​ໃນ​ວັນ​ທີ 14 ພະຈິກ​ຜ່ານ​ມາ, ຢູ່​ນະຄອນຫຼວງ​ຮ່າ​ໂນ້ຍ ປະເທດ​ຫວຽດນາມ ດ້ວຍ​ການ​ເຂົ້າ​ຮ່ວມ​ຂອງ​ລັດຖະມົນຕີ​ກະຊວງ​ຄົມມະນາຄົມ​ຂົນ​ສົ່ງ  10 ປະເທດ ອາ​ຊຽນ.

   ຂ່າວ​ລາຍ​ງານ​ວ່າ: ກອງ​ປະຊຸມ ໄດ້​ສຸມ​ໃສ່​ປຶກສາ​ຫາລື 4 ບັນຫາ​ຕົ້ນຕໍ​ຄື: ປະຕິ​ບັດ​ສໍາ​ເລັດ​ລະບຽບ​ການ​ຕ່າງໆ ເພື່ອ​ລົງ​ນາມ​ໃນ​ບັນດາ​ເອກະສານ​ຫຼາຍ​ຝ່າຍ​ຂັ້ນ​ລັດຖະບານ ແນໃສ່​ເພີ່ມ​ທະວີ​ການ​ເຊື່ອມ​ຕໍ່​ດ້ານ​ຄົມມະນາຄົມ​ຂົນສົ່ງ​ໃນອາ​ຊຽນ ແລະ ລະຫວ່າງ ອາ​ຊຽນ ກັບ ບັນດາ​ປະເທດ​ຄູ່​ຮ່ວມ​ມື; ຮັບ​ຟັງ​ບົດ​ລາຍ​ງານ​ກ່ຽວ​ກັບ​ສະ ພາບ​ການ​ຜັນ​ຂະຫຍາຍ​ບັນດາ​ລາຍການ, ໂຄງການ​ນອນ​ໃນ​ຂອບ​ເຂດ​ແຜນ​ຍຸດທະສາດ​ຄົມມະນາຄົມ​ຂົນສົ່ງ ກວາ​ລາ​ລໍາ​ເປີ ປີ 2015-2016; ຮັບ ຮອງ​ເອົາ​ບັນດາ​ໂຄງການ, ແຜນ ການເຄື່ອນໄຫວ​ໃນ​ຂອບ​ເຂດ​ການ​ຮ່ວມ​ມື​ຄົມມະນາຄົມ​ຂົນສົ່ງ ອາ​ຊຽນ ໃນ​ປີ 2020; ພົວພັນ​ແລກປ່ຽນ, ຊຸກຍູ້​ການ​ຮ່ວມ​ມື​ຄົມມະນາຄົມ​ຂົນສົ່ງ​ກັບ​ບັນດາ​ຄູ່​ເຈລະຈາ ຊຶ່ງ​ລວມ​ມີ ຈີນ, ຍີ່ປຸ່ນ, ສ.ເກົາຫຼີ ແລະ ບັນດາ​ຄູ່​ຮ່ວມ​ມື​ອື່ນໆ.

   ໃນ​ວາ​ລະ​ດໍາ​ເນີນ​ກອງ​ປະຊຸມ, ທ່ານ ຈິ້ງ​ດິ່ງ​ຢຸງ ຮອງ​ນາຍົກລັດຖະມົນຕີ​ຫວຽດນາມ ເນັ້ນ​ໜັກ​ວ່າ: ໂດຍ​ເປັນ​ສະມາ ຊິກ​ທີ່​ຕັ້ງໜ້າ​ຂອງ ອາ​ຊຽນ, ໃນ​ຖານະ​ເປັນ​ປະທານ ອາ​ຊຽນ ປີ 2020, ຫວຽດນາມ ໃຫ້​ຄໍາ​ໝັ້ນ​ສັນຍາຈະ​ພະຍາຍາມ​ຮ່ວມ​ມື​ກັບ​ບັນດາ​ປະເທດ​ສະມາຊິກ ຢ່າງແໜ້ນ​ແຟ້ນ, ຕັ້ງໜ້າ​ຜັນ​ຂະຫຍາຍ​ບັນ​ດາ​ຄໍາ​ໝັ້ນ​ສັນ ຍາ, ບັນດາ​ຂໍ້​ຕົກລົງ ເພື່ອໃຫ້ ອາ​ຊຽນ ຢັ້ງຢືນ​ບົດບາດເປັນ ໃຈກາງຂອງ​ພາກພື້ນ ພ້ອມ ກັບບັນດາ​ຄູ່​ຮ່ວມ​ມື​ຮັກສາ​ສັນ ຕິພາບ, ສະຖຽນ​ລະ​ພາບ, ຮັບ ປະກັນ​ສິດ​ເສລີ​ໃນ​ການ​ຂົນສົ່ງ​ສິນຄ້າ​ທາງ​ອາກາດ, ທາງບົກ ແລະ ທາງ​ທະເລ ເພື່ອ​ອາ​ຊຽນ ວັດທະນາ​ຖາ​ວອນ.