ອິນ​ເດຍ ຫຼຸດ​ພາ­ສີ​ທຸ­ລະ​ກິດ ເພື່ອ​ດຶງ​ດູດ​ທຶນ​ຕ່າງ­ປະ­ເທດ

21.11.2019 9:21    

ຮຽບຮຽງໂດຍ: ລຸ້ງ​ດາວ ບຸນ​ມີ 

   ອິນ​ເດຍ ເປັນ​ອີກ​ປະເທດ​ໜຶ່ງ​ທີ່​ກຳລັງ​ປະສົບ​ກັບ​ສະພາບ​ເສດຖະກິດ​ບໍ່​ຂະຫຍາຍຕົວ ຢ່າງ​ຕໍ່​ເນື່ອງ ໂດຍ​ອັດຕາ​ການ​ເຕີບ​ໂຕ​ໃນ​ໄຕ​ມາດ​ທີ 2 ຂອງ​ປີ​ນີ້​ຢູ່​ທີ່ 5,0%, ເຕີບ​ໂຕ​ຕໍ່າ​ທີ່​ສຸດ​ໃນ​ຮອບ 6 ປີ. ໃນ​ຂະນະ​ທີ່​ອັດຕາ​ວ່າງ​ງານ​ເພີ່ມ​ສູງ​ສຸດ​ໃນ​ຮອບ 45 ປີ, ສົ່ງ​ຜົນ​ໃຫ້​ລັດ ຖະບານ​ອິນ​ເດຍ ຊອກ​ຫາ​ມາດ​ຕະການ​ກະ​ຕຸ້ນ​ເສດ​ຖະ​ກິດ. ໜຶ່ງ​ໃນ​ນັ້ນ ແມ່ນ​ການ​ອີງໃສ່​ຄວາມ​ສາມາດ​ໃນ​ການ​ແຂ່ງຂັນ​ຂອງ​ພາກ​ເອກະ​ຊົນ​ໂດຍ​ການ​ຫຼຸດ​ອັດຕາ​ພາ​ສີ.

   ບີ​ບີ​ຊີ ລາຍ​ງານ​ວ່າ: ທ່ານ ນິ​ຣ​ມາລາ ສີ​ທາ​ຣາ​ມານ ລັດຖະ ມົນຕີ​ກະຊວງ​ການ​ເງິນ​ຂອງ​ອິນ​ເດຍ ປະກາດ​ຫຼຸດ​ອັດຕາ​ພາສີ​ລາຍ​ໄດ້​ນິຕິບຸກຄົນ ຈາກ 30% ລົງ​ມາ​ຢູ່​ທີ່ 22% ແລະ ເມື່ອ​ລວມ​ພາສີ​ອື່ນໆ ເຮັດ​ໃຫ້​ພາກ​ທຸລະ​ກິດ​ຈະ​ຕ້ອງ​ເສຍ​ພາສີ​ພຽງ 25,2%, ຈາກ​ເມື່ອ​ກ່ອນ​ຕ້ອງ​ເສຍ​ພາສີ​ເຖິງ 34,9% ໂດຍ​ເລີ່ມ​ມີ​ຜົນ​ບັງຄັບ​ໃຊ້​ໃນ​ປີ​ງົບປະມານ 2019 ນີ້ ຊຶ່ງ​ເລີ່ມ​ແຕ່​ວັນ​ທີ 1 ເມສາ​ທີ່​ຜ່ານ​ມາ. ສຳລັບ​ອຸດ​ສາຫະ​ກຳ​ການ​ຜະລິດ​ທີ່​ລົງທຶນ ແລະ ຈົດ​ທະບຽນ​ໃໝ່ ຫຼັງ​ຈາກ​ວັນ​ທີ 1 ຕຸລາ​ເປັນຕົ້ນ​ໄປ ຈະ​ໄດ້​ຮັບ​ສິດທິ​ພິເສດ​ດ້ານ​ພາສີ 17% ດ້ວຍ​ເງື່ອນໄຂ ຕ້ອງ​ເລີ່ມ​ດຳເນີນ​ຜະລິດ​ພາຍ​ໃນ​ເດືອນ​ມີນາ ປີ 2023.

   ທ່ານ ໂມ​ດີ ກ່າວ​ໃນ Twitter ສ່ວນ​ຕົວ​ວ່າ: ມາດ​ຕະການ​ປັບ​ຫຼຸດ​ອັດຕາ​ພາສີ​ດັ່ງກ່າວ ເປັນ​ສ່ວນ​ໜຶ່ງ​ຂອງ​ແຜນການ​ກະ​ຕຸ້ນ​ເສດ​ຖະກິດ​ພາຍ​ໃນ​ປະເທດ​ຂອງ​ນາຍົກລັດຖະມົນຕີ ທ່ານ ນາ​ເຣນ​ດຣາ ໂມ​ດີ ທີ່​ເອີ້ນ​ວ່າ: "ແຜນການ Make in India" ໂດຍ​ເນັ້ນ​ໄປ​ທີ່​ການ​ດຶງ​ດູດ​ນັກ​ລົງທຶນ​ຈາກ​ພາຍ​ນອກ. ການ​ປັບ​ຫຼຸດ​ອັດຕາ​ພາສີ​ນິຕິ​ບຸກຄົນ ຖື​ເປັນ​ບາດກ້າວ​ປະຫວັດສາດ ຊຶ່ງ​ຈະ​ມີ​ຜົນ​ດີ​ອັນ​ໃຫຍ່​ຫຼວງ​ຕໍ່​ແຜນການ Make In India ໃນ​ການ​ດຶງ​ດູດ​ນັກ​ລົງທຶນ​ຈາກ​ພາກ​ເອກະ​ຊົນ​ທົ່ວ​ໂລກ, ເພີ່ມ​ຄວາມ​ສາມາດ​ໃນ​ການ​ແຂ່ງຂັນ​ຂອງ​ພາກ​ເອກະ​ຊົນ, ສ້າງ​ຕໍາ​ແໜ່​ງ​ງານ ແລະ ສ້າງ​ປະໂຫຍດ​ໃຫ້​ກັບ​ປະຊາຊົນ​ອິນ​ເດຍ 1.300 ລ້ານ​ຄົນ.

   ໃນ​ຂະນະ​ທີ່​ຣອຍ​ເຕີ​ລາຍ​ ງານ​ວ່າ: ການ​ເດີນທາງ​ຢ້ຽມ ຢາມອາ​ເມ​ຣິ​ກາ ຄັ້ງ​ຫຼ້າ​ສຸດ ຂອງ ທ່ານ ນາ​ເຣນ​ດຣາ ໂມ​ດີ ນາຍົກລັດຖະມົນຕີ​ອິນ​ເດຍ ໄດ້​ພົບ​ປະ​ກັບ​ຊາວ​ອາ​ເມ​ຣິ​ກາ ເຊື້ອສາຍ​ອິນ​ເດຍ ລວມ​ເຖິງ​ນັກທຸລະກິດ​ເອກະ​ຊົນ​ລາຍ​ໃຫຍ່​ຂອງ​ອາ​ເມ​ຣິ​ກາ​ເຊັ່ນ: ເຈ​ພີ​ມໍ​ແກນ​ຊາສ (JP Morgan Chase) ຜູ້​ໃຫ້​ບໍລິການ​ດ້ານ​ການ​ເງິນ ແລະ ການ​ລົງທຶນ, ລ໊ອກ​ຮີດ ມາ​ຕິນ (Lockheed Martin), ຜູ້​ຜະລິດ​ເຮືອບິນ​ອະວະ​ກາດ ແລະ ການ​ປ້ອງ​ກັນ​ປະເທດ, ມາ​ສ​ເຕີ​ກາດ (MasterCard), ບໍລິສັດ​ໃຫ້​ບໍລິການ​ລະບົບ​ຊຳລະ​ເງິນ ແລະ ວາລ ​ມາກ (Walmart) ບໍລິສັດ​ຍັກ​ໃຫຍ່​ຂາຍຍ່ອຍ ໂດຍ​ໄດ້​ສົນທະນາ​ແລກປ່ຽນ​ເພື່ອ​ເພີ່ມ​ໂອກາດ​ໃນ​ການ​ລົງທຶນ​ໃນ​ອິນ​ເດ​ຍ.

   ທ່ານ ມູ​ເກສ ອາ​ຄິ ປະທານ ​ກອງ​ປະຊຸມ​ຫຸ້ນ​ສ່ວນ​ຍຸດທະ ສາດ ອາ​ເມ​ຣິ​ກາ-ອິນ​ເດ​ຍ​ລະບຸ​ວ່າ: ການ​ຫຼຸດ​ພາສີ​ຄັ້ງ​ນີ້, ຈະ​ເຮັດ​ໃຫ້​ບໍລິສັດ​ຂອງ​ອິນ​ເດຍ ມີ​ຄວາມ​ສາມາດ​ໃນ​ການ​ແຂ່ງຂັນ​ ລະດັບ​ໂລກ. ຂະນະ​ດຽວ​ກັນກໍ​ ເຮັດ​ໃຫ້​ອິນ​ເດຍ ກາຍເປັນ​ທາງ​ ເລືອກ​ທີ່​ໜ້າ​ສົນໃຈ​ໃຫ້​ກັບບໍລິ ສັດ​ຕ່າງປະເທດ ໄດ້​ເຂົ້າ​ໄປ​ຂະ ຫຍາຍ​ຖານ​ການ​ຜະລິດ​ໃນ​ອິນ​ເດ​ຍ​ຫຼາຍ​ຂຶ້ນ, ອັດຕາ​ພາສີ​ທີ່​ຕໍ່າ​ລົງ​ຈະ​ເຮັດ​ໃຫ້​ອິນ​ເດຍ ມີ​ຄວາມ​ສາມາດ​ໃນ​ການ​ແຂ່ງຂັນ​ສູງ​ກວ່າ​ປະເທດ​ເພື່ອນ​ບ້ານ​ເຊັ່ນ: ບັງ​ກລາ​ເດັດ ແລະ ອາດ​ກ້າວ​ຂຶ້ນ​ມາ​ເປັນ​ທາງ​ເລືອກ​ທີ່​ດີ​ທຽບ​ເທົ່າ​ກັບ​ຫວຽດນາມ ແລະ ໄທ. ສຳລັບ​ນັກທຸລະກິດ​ຕ່າງ​ຊາດ​ທີ່​ຕ້ອງການ​ຫາ​ຖານ​ການ​ຜະລິດ​ແຫ່ງ​ໃໝ່ ເພື່ອ​ຫຼີກ​ລ່ຽງ​ຜົນ​ກະທົບ​ຈາກ​ສົງຄາມ​ການ​ຄ້າ ລະຫວ່າງ​ຈີນ ກັບ ອາ​ເມ​ຣິ​ກາ.

   ນອກຈາກ​ນັ້ນ, ຄວາມ​ສຳພັນ​ທີ່​ດີ ລະຫວ່າງ ອາ​ເມ​ຣິ​ກາ ແລະ ອິນ​ເດຍ ທີ່​ສະແດງ​ໃຫ້​ເຫັນ​ໃນ​ການ​ພົບ​ປະ ລະຫວ່າງ ທ່ານ ໂດ​ໂນ ທຣໍາ ປະທານາທິບໍດີ​ອາ​ເມ​ຣິ​ກາ ກັບ ທ່ານ ນາ​ເຣນ​ດຣາ ໂມ​ດີ ນາຍົກລັດຖະມົນຕີອິນ​ ເດຍ ທີ່​ເມືອງ​ຮິ​ວຕັນ ຂອງອາ​ເມ​ຣິ​ກາ ຊຶ່ງ​ເປັນ​ການ​ຊ່ວຍ​ໃຫ້​ບໍລິສັດ​ຕ່າງ​ຊາດ​ເຫັນ​ໂອກາດ​ການ​ລົງທຶນ​ໃນ​ອິນ​ເດ​ຍ​ຫຼາຍ​ຂຶ້ນ.