ສິງ­ກະ­ໂປ ມີ​ຄວາມ​ສາ­ມາດ​ແຂ່ງ­ຂັນສູງ​ທີ່​ສຸດ​ໃນ​ອາ­ຊີ

21.11.2019 9:24    

   ຂ່າວ​ຕ່າງປະເທດ​ລາຍ​ງານ​ວ່າ: ວັນ​ທີ 19 ພະຈິກ​ຜ່ານ​ມາ, ສະ​ຖາ​ບັນ​ເພື່ອ​ການ​ພັດ ທະ​ນາ​ດ້ານ​ການ​ບໍ​ລິ​​ຫານ​ລະ ຫວ່າງ​ປະເທດ ຫຼື IMD ຊຶ່ງ​ຕັ້ງ​ຢູ່​ປະເທດ​ສະ​ວິດ ໄດ້​ເຜີຍແຜ່​ບົດ​ລາຍ​ງານ​ການ​ຈັດ​ອັນ​ດັບ​ຂອງ​ບັນດາ​ປະເທດ ທີ່​ມີ​ຄວາມ​ສາມາດ​ໃນ​ການ​ແຂ່ງຂັນ​ລະດັບ​ໂລກ​ປະຈຳ​ປີ 2019 ສະແດງ​ໃຫ້​ເຫັນ​ວ່າ: ສິງກະໂປ ຕິດ​ອັນ​ດັບ 1 ປະເທດ​ທີ່​ມີ​ຄວາມ​ສາມາດ​ສູງ​ທີ່​ສຸດ​ໃນ​ພາກ​ພື້ນ ອາ​ຊີ​-​ປາ​ຊີ​ຟິກ ແລະ ຕິດ​ອັນ​ດັບ 10 ໃນ​ຖານະ​ປະເທດ​ທີ່​ມີ​ຄວາມ​ສາມາດ​ສູງ​ທີ່​ສຸດ​ໃນ​ໂລກ ດ້ວຍ​ເຫດຜົນ​ທີ່​ວ່າ: ສິງກະໂປ ເປັນ​ປະເທດ​ທີ່​ມີ​ຄຸນ​ນະ​ພາບ​ດ້ານ​ການ​ສຶກສາ.

   ສ່ວນ​ເຂດ​ບໍລິຫານ​ພິເສດ​ຮົງ​ກົງ ຕິດ​ອັນ​ດັບ 2 ໃນ​ພາກ​ພື້ນ​ອາ​ຊີ​-​ປາ​ຊີ​ຟິກ ແລະ ໃນ​ລະດັບ​ໂລກ ​ຮົງ​ກົງ ມີ​ອັນ​ດັບ​ດີ​ຂຶ້ນ​ມາ​ຢູ່​ທີ່​ອັນ​ດັບ 15. ອັນ​ດັບ 3 ອົສ​ຕຣາ​ລີ, ອັນ​ດັບ 4 ແມ່ນ​ນູ​ແວນ​ເຊ​ລັງ ແລະ ອັນ​ດັບ 5 ແຄ້ວ​ນ​ໄຕ້​ຫວັນ.

   ລາຍ​ງານ​ລະບຸ​ວ່າ: ການ​ຈັດ​ອັນ​ດັບ​ໃນ​ປີ​ນີ້​ພົບ​ວ່າ: ຍີ່ປຸ່ນ​ມີ​ຄະແນນ​ຫຼຸດ​ລົງ​ຕາມ​ຫຼັງ ສ. ເກົາຫຼີ ໂດຍ​ຍີ່ປຸ່ນ ຢູ່​ໃນ​ອັນ​ດັບທີ 8 ໃນ​ພາກ​ພື້ນ​ອາ​ຊີ​-​ປາ​ຊີ​ຟິກ ແລະ ໃນ​ລະດັບ​ໂລກ​ຢູ່​ອັນ​ດັບ​ທີ 35 ຫຼຸດ​ລົງ 6 ອັນ​ດັບ​ຈາກ​ປີ 2018 ແມ່ນ​ຢູ່​ອັນ​ດັບ 29. ໃນ​ຂະນະ​ທີ່ ສ.ເກົາຫຼີ ຢູ່​ອັນ​ດັບ​ທີ 7 ໃນ​ອາຊີ - ປາ​ຊີ​ຟິກ ແລະ ໃນ​ລະດັບ​ໂລກ ສ.ເກົາຫຼີ ຕິດ​ອັນ​ດັບ​ທີ 33 ບໍ່​ປ່ຽນແປງ​ຈາກ​ເມື່ອ​ປີ 2018.