ທ່ານ ມູນແຈອິນ ຊົມເຊີຍບົດບາດອາຊຽນແນວຄິດສ້າງສັນຕິພາບ

25.11.2019 9:43     

    ຂ່າວສານຫວຽດນາມ ລາຍງານວ່າ: ກ່ອນດໍາເນີນກອງປະຊຸມສຸດຍອດພິເສດ ສ.ເກົາຫຼີ- ອາຊຽນ, ທ່ານ ມູນແຈອິນ ປະທານາທິບໍດີ ສ.ເກົາຫຼີ, ຕີລາຄາທິດທາງການສ້າງສັນຕິພາບຢູ່ແຫຼມເກົາຫຼີ ຍັງມີຄວາມຫຍຸ້ງຍາກຫຼາຍຢ່າງ. ທ່ານ ມູນແຈອິນ ຢືນຢັນເຖິງກອງປະຊຸມສຸດຍອດລະ ຫວ່າງ ອາເມຣິກາ ແລະ ສປປ.ເກົາຫຼີ ສອງຄັ້ງຜ່ານມາ ຢູ່ຫວຽດ ນາມ ແລະ ສິງກະໂປ ເປັນ ການເປີດໂອກາດໃຫ້ແກ່ການສ້າງສັນຕິພາບຢູ່ແຫຼມເກົາຫຼີ. ພ້ອມກັນນັ້ນ, ທ່ານ ມູນແຈອິນ ກໍໄດ້ສະແດງຄວາມຫວັງວ່າ: ກອງປະຊຸມສຸດຍອດພິເສດ ລະຫວ່າງ ສ.ເກົາຫຼີ - ອາຊຽນ ຊຶ່ງຈະຈັດຂຶ້ນຢູ່ນະຄອນປູຊານຂອງ ສ.ເກົາຫຼີ ໃນວັນທີ 25 ພະຈິກນີ້, ບັນດາການນໍາທັງສອງຝ່າຍຈະລົງເລິກປຶກສາຫາລືກັນກ່ຽວກັບບັນດາບັນຫາ ທີ່ແນໃສ່ສ້າງພື້ນຖານແຫ່ງສັນຕິພາບຢູ່ແຫຼມເກົາຫຼີ ເວົ້າສະເພາະ ແລະ ພາກພື້ນອາຊີເວົ້າລວມ. ຂ່າວລະບຸວ່າ: ໃນບົດລາຍງານຜ່ານແຫຼ່ງຂ່າວ Asia News Network - ANN, ວັນທີ 18 ພະຈິກຜ່ານມາ, ກ່ອນດໍາເນີນກອງປະຊຸມສຸດຍອດພິເສດ ສ.ເກົາຫຼີ - ອາຊຽນ, ທ່ານ ມູນແຈອິນ ປະທານາທິບໍດີ ສ.ເກົາຫຼີ ຕີລາຄາທິດທາງການສ້າງສັນຕິພາບຢູ່ແຫຼມເກົາຫຼີ ຍັງມີຄວາມຫຍຸ້ງຍາກຫຼາຍຢ່າງ. ທ່ານ ມູນແຈອິນ ເນັ້ນໜັກວ່າ: ສັນຕິພາບຢູ່ແຫຼມເກົາຫຼີ ມີສ່ວນພົວພັນກັບຄວາມສະຫງົບປອດໄພຂອງທົ່ວພາກພື້ນອາຊີຕາເວັນອອກ. ທ່ານ ຢືນຢັນວ່າ: ບັນດາປະເທດອາຊຽນ ລ້ວນແຕ່ແມ່ນເພື່ອນຮ່ວມອຸດົມການ, ເປັນທີ່ປຶກສາທີ່ໜ້າເຊື່ອຖືໃນວຽກງານສ້າງສັນຕິພາບອັນຍາວນານຢູ່ແຫຼມເກົາຫຼີ. ນອກຈາກນີ້, ທ່ານ ມູນແຈອິນ ຢືນຢັນອີກວ່າ: ໂລກພວມປະເຊີນໜ້າກັບບັນດາສິ່ງທ້າທາຍໃໝ່ ເປັນຕົ້ນແມ່ນລັດທິປົກປ້ອງແຕ່ຝ່າຍດຽວ ພວມແຜ່ລາມອອກສູ່ວົງກວ້າງ, ການປະຕິວັດອຸດສາຫະກໍາຄັ້ງທີ 4, ລວມທັງໄພຂົ່ມຂູ່ຄວາມປອດໄພນັບມື້ເພີ່ມຂຶ້ນ. ໃນນັ້ນ, ລວມທັງອາຊະຍາກໍາຂ້າມຊາດ. ໃນກອງປະຊຸມຄັ້ງນີ້, ບັນດາການນໍາປະເທດຕ່າງໆ ຈະຮ່ວມກັນປຶກສາຫາລື ເພື່ອກ້າວໄປສູ່ອະນາຄົດແຫ່ງສັນຕິພາບ ແລະ ວັດທະນາຖາວອນຂອງພາກພື້ນ. ຂະນະດຽວກັນນັ້ນ, ທ່ານ ປະທານາທິບໍດີ ສ.ເກົາຫຼີ ກໍໄດ້ສະເໜີທິດທາງການຮ່ວມມືລະອຽດ. ພ້ອມກັນນັ້ນ, ສ.ເກົາຫຼີ ໄດ້ໃຫ້ສັນຍາວ່າ: ຈະຮ່ວມກັບບັນດາປະເທດອາຊຽນ ເພີ່ມທະວີອອກແຮງປ່ຽນແປງໃໝ່, ເພີ່ມການຮ່ວມມືໃນຂົງເຂດທີ່ ສ.ເກົາຫຼີ ມີທ່າແຮງເຊັ່ນ: ພື້ນຖານໂຄງລ່າງຄົມມະນາຄົມ, ຕົວເມືອງອັດສະລິຍະ, ເຕັກໂນໂລຊີວິ ທະຍາສາດກ້າວໜ້າ. ນອກນັ້ນ, ສອງຝ່າຍຈະເປີດກວ້າງແລກປ່ຽນການຄ້າ ໂດຍຜ່ານກົນໄກການຄ້າເສລີ, ພັດທະນາບັນດາວິສາຫະກິດຂະໜາດນ້ອຍ ແລະ ຂະໜາດກາງ. ທ່ານ ມູນແຈອິນ ໄດ້ຕີ ລາຄາການພົວພັນທີ່ສະໜິດ ສະໜົມ ລະຫວ່າງ ສ. ເກົາຫຼີ - ອາຊຽນ ທີ່ໄດ້ມີການ ພັດທະນາຢ່າງໝັ້ນຄົງຕະ ຫຼອດ 30 ປີຜ່ານມາ. ໃນເດືອນມິຖຸນາ ຜ່ານມາ, ທ່ານ ຢັ້ງຢືນທັດສະນະກ່ຽວກັບອາຊີ-ປາຊີຟິກ ໂດຍໄດ້ຮັບການເຫັນດີຈາກບັນດາປະເທດອາຊຽນ ວ່າດ້ວຍ; "ວິໄສທັດສັນຕິ ພາບ ແລະ ວັດທະນາຖາວອນຂອງພາກພື້ນ", ແທດເໝາະກັບນະໂຍບາຍຫັນໄປສູ່ທິດໃຕ້ໃໝ່ຂອງເຊອູນ.