ພັກ ຣັດເຊຍ ເອກະພາບກຽມເລືອກຕັ້ງ ສະພາຕໍ່າ ປີ 2021

27.11.2019 10:29     

    ວິທະຍຸກະຈາຍສຽງ ຫວຽດນາມລາຍງານວ່າ: ພັກຣັດເຊຍ ເອກະພາບ ໄດ້ດຳເນີນ ກອງປະຊຸມໃຫຍ່ຄັ້ງທີ 19 ແລະ ຮັບຮອງເອົາການກະກຽມໂຄງ ການເຄື່ອນໄຫວໃໝ່ ໃນອາທິດຜ່ານມາ, ທີ່ນະຄອນຫຼວງ ມົສກູ ປະເທດຣັດເຊຍ ເພື່ອກ້າວໄປເຖິງການເລືອກຕັ້ງສະພາຕ່ຳ ດູມາ ປີ 2021. ຂ່າວລະບຸວ່າ: ກ່າວຄຳ ເຫັນທີ່ກອງປະຊຸມໃຫຍ່, ທ່ານ ວາລາດີເມຍ ປູຕິນ ປະທານາ ທິບໍດີຣັດເຊຍ ເນັ້ນໜັກວ່າ: ພັກຣັດເຊຍເອກະພາບ ຄວນສຸມໃສ່ຮັບຟັງຄຳເຫັນຂອງ ປະຊາຊົນກ່ຽວກັບສະພາບການໃນປັດຈຸບັນກໍ່ຄືກ່ຽວກັບບັນດາໂຕເລກດັດຊະນີທີ່ກ່ຽວຂ້ອງເຖິງຄຸນນະພາບການດຳລົງ ຊີວິດຂອງປະຊາຊົນ. ປະຊາຊົນ ຍາມໃດກໍປາຖະໜາຢາກໃຫ້ບັນດາພັກການເມືອງ, ພິເສດແມ່ນພັກ ຣັດເຊຍ ເອກະພາບ ຕັ້ງໜ້າເຂົ້າຮ່ວມວຽກງານຂອງຕົນຫຼາຍກວ່າເກົ່າ. ຂະນະດຽວກັນ, ທ່ານ ດິມິດຕຣີ ເມດເວເດບ ປະທານພັກຣັດເຊຍເອກະພາບ ຢັ້ງຢືນວ່າ: ພັກຣັດເຊຍເອກະພາບ ຈະຕັ້ງໜ້າດຶງດູດບັນດາສະມາຊິກໜຸ່ມເຂົ້າຮ່ວມການເຄື່ອນໄຫວດ້ານການເມືອງ ແລະ ສ້າງກາລະໂອກາດໃຫ້ແກ່ເຂົາເຈົ້າໃນວຽກງານຕ່າງໆຂອງພັກ. ຄະນະການນຳພັກຈະສືບຕໍ່ຈັດຕັ້ງບັນດາການຄັດເລືອກ ແລະ ໜູນຊ່ວຍບັນດາໂຄງການດີເດັ່ນ ໃນບັນດາຂົງເຂດຄື: ສາທາລະນະສຸກ, ກິລາ ແລະ ບັນດາຂົງເຂດອື່ນໆທີ່ກ່ຽວຂ້ອງເຖິງປະຊາຊົນ.