ຫວຽດ­ນາມ​-​ຣັດ​ເຊຍ ເພີ່ມ​ທະ­ວີ​ການ​ຮ່ວມ​ມື​ດ້ານເສດ­ຖະ­ກິດ

05.11.2019 9:22     

     ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ໃນ​ການ​ໂອ້​ລົມ​ສົນທະນາລະຫວ່າງວິ​ສາ​ຫະ​ກິດ​ຫວຽດນາມ - ຣັດ​ເຊຍ ຮ່ວມ​ກັບ​ທ່ານ ຈິ້ງ​ດິ່ງ​ຢຸງ ຮອງ​ນາຍົກລັດຖະມົນຕີ​ຫວຽດນາມ ແລະ ທ່ານ ແມັກ​ຊິມ ອາຄີມ​ອັບ ຮອງ​ນາຍົກລັດຖະມົນຕີ​ຣັດ​ເຊຍ ຢູ່​ນະຄອນຫຼວງ​ຮ່າ​ໂນ້ຍ ສສ ຫວຽດນາມ, ເມື່ອ​ທ້າຍ​ເດືອນ​ຕຸລາ​ຜ່ານ​ມາ. ທ່ານ ຈິ້ງ​ດິ່ງ​ຢຸງ ຢືນຢັນ​ວ່າ: ຍາມ​ໃດ​ລັດຖະບານ​ຫວຽດນາມ ກໍແມ່ນ​ຄູ່​ຮ່ວມ​ມື ແລະ ສະໜັບສະໜູນ ສ້າງ​ເງື່ອນໄຂ​ສະດວກ​ໃຫ້​ແກ່​ ວິ​ສາ​ຫະ​ກິດ​ຣັດ​ເຊຍ ເປີດ​ກວ້າງ​ການ​ຮ່ວມ​ມື, ລົງທຶນ​ດຳເນີນ​ທຸລະ​ກິດ​ຢູ່​ຫວຽດນາມ.
ຂ່າວ​ລະບຸ​ວ່າ: ໃນ​ເວລາ​ໂອ້​ລົມ​ສົນທະນາ​ນັ້ນ, ທ່ານ ຈິ້ງ​ດິ່ງ​ຢຸງ ຢືນຢັນ​ວ່າ: ສະຫະພັນ​ ຣັດ​ເຊຍ ແມ່ນ​ປະເທດ​ທີ່​ມີ​ ຄວາມ​ສາມາດ​ບົ່ມ​ຊ້ອນ​ທາງ​ດ້ານ​ເສດຖະກິດ, ການ​ເງິນ ແລະ ເຕັກ​ໂນ​ໂລ​ຊີ​ໃຫຍ່. ໃນ​ຂະ ນະ​ນັ້ນ, ຫວຽດນາມ ກໍ​ມີ​ທ່າແຮງ​ຫຼາຍ​ຢ່າງ ໂດຍ​ສະເພາະ ແຫຼ່ງ​ຊັບພະຍາກອນ​ມະນຸດ, ແຫຼ່ງ​ຊັບພະຍາກອນ​ທຳ​ມະ​ຊາດ ​ທີ່​ອຸດົມສົມບູນ, ທີ່​ຕັ້ງ​ພູມ​ສາດ​ມີ​ຄວາມ​ສະດວກ ແລະ ແມ່ນ​ປະເທດ​ມີ​ສະພາບ​ການເມືອງ - ເສດຖະກິດ - ສັງຄົມ ມີ​ສະຖຽນ​ລະ​ພາບ ດ້ວຍ​ເຫດ​ນີ້,  ຖ້າ​ຫາກ 2 ປະເທດ​ມີ​ການ​ສົມທົບ​ກັນ​ຢ່າງ​ແໜ້ນ​ແຟ້ນ ຈະ​ສ້າງ​ຜົນ​ປະໂຫຍດ​ຢ່າງ​ໃຫຍ່​ຫຼວງ ເພື່ອ​ປະກອບສ່ວນ​ປັບປຸງ​ການ​ພົວພັນ​ຄູ່​ຮ່ວມ​ມື​ຍຸດທະສາດ​ຮອບດ້ານ ລະຫວ່າງ ຫວຽດນາມ ແລະ ສະຫະພັນ​ຣັດ​ເຊຍ ໃຫ້​ຫຼາຍ​ກ່​ວາ​ເກົ່າ. ທ່ານ ຈິ້ງ​ດິ່ງ​ຢຸງ ເນັ້ນ​ໜັກ​ຕື່ມ​ວ່າ: ພວກ​ເຮົາ ​ຄວນ​ປະຕິບັດ​ບັນດາ​ຄຳ​ໝັ້ນ ​ສັນຍາ, ຂໍ້​ຕົກລົງ​ທີ່​ໄດ້​ລົງນາມ​ ຢ່າງ​ເດັດດ່ຽວ ເພື່ອ​ບັນລຸ​ຜົນງານ​ໃໝ່​ໃນ​ການ​ພົວພັນ ລະຫວ່າງ 2 ປະ​ເທດ. ພ້ອມ​ກັນ​ນັ້ນ ປະຊາຊົນ 2 ປະເທດ ກໍຕ້ອງ​ຕັ້ງໜ້າ, ເປັນ​ເຈົ້າ​ການ​ກວ່າ​ເກົ່າ ເພື່ອ​ນຳ​ໃຊ້​ບັນດາ​ກາລະ​ໂອກາດ ສ້າງ​ບັນດາ​ບາດກ້າວ​ບຸກ​ທະລຸໃໝ່ ລະຫວ່າງ 2 ປະ​ເທດ.
ທ່ານ ຈິ້ງ​ດິ່ງ​ຢຸງ ກ່າວ​ຢືນຢັນ​ວ່າ: ຍາມ​ໃດ​ລັດຖະບານ​ຫວຽດນາມ ກໍແມ່ນ​ຄູ່​ຮ່ວມມື ແລະ ສະໜັບສະໜູນສ້າງ​ເງື່ອນໄຂ​ສະດວກ​ໃຫ້​ແກ່​ວິ​ສາ​ຫະ​ກິດ​ຣັດ​ເຊຍ ເປີດ​ກວ້າງ​ການ​ຮ່ວມ​ມື, ລົງທຶນ​ດຳເນີນ​ທຸລະ​ກິດ​ຢູ່​ຫວຽດນາມ.