ປີ 2025 ຜູ້​ໃຊ້ 5 Gຂອງ​ຈີນ​ຈະ​ກວມ 1/3 ຂອງ​ໂລກ

06.11.2019 9:26     

     ຂ່າວສານ​ຊິນ​ຮວາ​ລາຍ​ງານ​ວ່າ: ທ້າຍ​ເດືອນ​ຕຸລາ​ຜ່ານ​ມາ, ຈີນ ໄດ້​ປະກາດ​ໃຊ້​ເຕັກນິກ  5G ໃນ​ທຸລະ​ກິດ ໂດຍ​ສະແດງ​ໃຫ້​ເຫັນ​ວ່າ: ຈີນ ໄດ້​ກ້າວ​ເຂົ້າ​ສູ່​ຍຸກ 5G ຢ່າງ​ສົມບູນ​ແລ້ວ. ໃນ​ກອງ​ປະຊຸມ​ເວທີ​ປຶກສາ​ຫາລື​ການ​ປະຕິ​ຮູບ ແລະ ການ​ພັດທະນາ​ຂອງ​ວິ​ສາ​ຫະ​ກິດ​ຈີນ ຄັ້ງ​ທີ 3, ຢູ່​ເມືອງ​ຈີ​ນານ ແຂວງ​ຊານ​ຕູ​ງ​ຂອງ​ຈີນ, ໃນ​ວັນ​ທີ 3 ພະຈິກ​ນີ້, ເຕັກນິກ  5G ກໍ​ໄດ້​ກາຍເປັນ​ຈຸດ​ສຸມ​ຂອງ​ກອງ​ປະ​ຊຸມ.

   ນັກວິຊາການ​ກ່າວ​ວ່າ: ຄວາມ​ໄວ​ຂອງ​ການ​ພັດທະນາ​ເຕັກນິກ  5G ແມ່ນ​ໄວ​ກວ່າ​ການ​ພັດທະນາເຕັກນິກ 4G, ຄຽງ​ຄູ່​ກັບ​ຄວາມ​ຕ້ອງການ​ດ້ານ​ເຕັກນິກ​ເພີ່ມ​ຂຶ້ນ, ການ​ນຳ​ໃຊ້​ເຕັກນິກ  5G ໃນ​ທາງ​ທຸລະ ​ກິດ​ໄດ້​ມີ​ກຳລັງ​ບົ່ມ​ຊ້ອນ​ຢ່າງ​ມະຫາ​ສານ.

   ທ່ານ ຈ້າວ​ຕ້າ​ຊຸນ ຮອງ​ຜູ້ອຳນວຍການ​ໃຫຍ່​ກຸ່ມ​ບໍລິສັດ ໄຊ​ນາ​ໂມ​ບາຍ (CHINA MOBILE) ກ່າວ​ວ່າ: ຄາດ​ວ່າ​ຮອດ​ປີ 2025, ທົ່ວ​ໂລກ​ຈະ​ມີ 409 ບໍລິສັດ​ເຮັດ​ທຸລະ​ກິດ​ກ່ຽວ​ກັບ​ເຄືອ​ຂ່າຍ  5G ຢູ່ 117 ປະເທດ ແລະ ເຂດ​ແຄວ້ນ. ຮອດ​ເວລາ​ນັ້ນ, ທົ່ວ​ໂລກ ຈະ​ມີ​ລູກ​ຄ້າ​ທີ່​ນຳ​ໃຊ້​ເຕັກນິກ  5G ຈະ​ບັນລຸ 1 ຕື້ 600 ລ້ານ​ຄົນ, ໃນ​ນັ້ນ ລູກ​ຄ້າ​ຈີນ​ຈະ​ກວມ​ຫຼາຍ​ກວ່າ 1/3 ຂອງ​ໂລກ.

   ນັກວິຊາການ​ເຫັນ​ວ່າ: ໃນ​ອະນາຄົດ, ເຕັກນິກ  5G ຈະ​ສ້າງ​ຄວາມ​ສະດວກ​ໃຫ້​ແກ່​ ຂະແໜງການ​ຕ່າງໆ​ຢ່າງ​ຫຼວງ ຫຼາຍ ໂດຍ​ຈະ​ກາຍເປັນ​ເຕັກນິກ​ທີ່​ຊຸກຍູ້​ໃຫ້​ຂະແໜງການ​ຕ່າງໆ ຍົກ​ລະດັບ​ຄຸນ​ນະ​ພາບ​ໃຫ້​ສູງ​ຂຶ້ນ, ເຮັດ​ໃຫ້​ຂະແໜງການ​ດັ້ງເດີມ​ສາມາດ​ເຊື່ອມ​ຕໍ່​ກັບ​ເຕັກນິກ​ອິນ​ເຕີ​ເນັດ ແລະ ຈະ​ເຮັດ​ໃຫ້​ອິນ​ເຕີ​ເນັດ​ໄດ້​ຖືກ​ນຳ​ໃຊ້​ເຂົ້າ​ໃນ​ຂະແໜງ​ເສດຖະກິດ​ຕົວ​ຈິງ​ນັບ​ມື້​ນັບ​ຫຼາຍ.