ເຈົ້າ​ໜ້າ­ທີ່​ການ​ທູດ ສ.ເກົາ​ຫຼີ- ອາ​ເມ​ຣິ​ກາ ດຳ­ເນີນ​ການ​ເຈ­ລະ­ຈາ

06.11.2019 9:27     

     ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ອາ​ເມ​ຣິ​ກາ ແລະ ສ.ເກົາຫຼີ ໄດ້​ຢືນຢັນ​ຄືນໃໝ່​ການ​ຮ່ວມ​ສຳພັນ​ທະ​ມິດ ລະຫວ່າງ ສອງ​ປະເທດ ພ້ອມ​ທັງ​ເຫັນ​ດີ​ຮັກສາ​ການ​ສົມທົບ​ກັນ​ຢ່າງ​ແໜ້ນ​ແຟ້ນ ​ເພື່ອ​ແນໃສ່​ຮັບປະກັນ​ໃຫ້​ແກ່​ການ​ປອດ ​ ນິວ​ເຄ​ຣຍ​ຢ່າງ​ສິ້ນ​ເຊີງ.

   ຂ່າວ​ລາຍ​ງານ​ວ່າ: ວັນ​ທີ 3 ພະຈິກ​ນີ້, ກະຊວງ​ການ​ຕ່າງ ປະເທດ ສ.ເກົາຫຼີ ແລະ ອາ​ເມ​ຣິ​ກາ ແຈ້ງ​ໃຫ້​​ຮູ້​ວ່າ: ທ່ານ ຢູນ​ຊູນ​ກູ່ ຮອງ​ລັດຖະມົນຕີ​ກະຊວງ​ການ​ຕ່າງປະເທດ ສ.ເກົາຫຼີ ທີ່​ຮັບຜິດຊອບ​ບັນດາ​ບັນຫາ​ການເມືອງ ໄດ້​ມີ​ການ​ພົບ​ປະ​ກັບ ທ່ານ ດາ​ວິດ ສະ​ຕິນ ​ແວວ ຜູ້​ຊ່ວຍ​ວຽກ​ລັດຖະມົນຕີ​ການ​ຕ່າງປະເທດ​ອາ​ເມ​ຣິ​ກາ ທີ່​ຮັບຜິດຊອບ​ພາກ​ພື້ນ​ອາຊີ ແລະ ປາ​ຊີ​ຟິກ ຢູ່​ນອກ​ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງ​ທີ 35, ຢູ່​ນະຄອນຫຼວງ​ບາງກອກ ປະເທດ​ໄທ.

   ຂ່າວ​ລະບຸ​ວ່າ: ໃນ​ການ​ພົບ​ປະ 2 ຝ່າຍ​ໄດ້​ຢືນຢັນ​ຄືນ ໃໝ່​ການ​ຮ່ວມ​ສຳພັນ​ທະ​ມິດ ລະຫວ່າງ​ອາ​ເມ​ຣິ​ກາ ແລະ ສ.ເກົາຫຼີ ພ້ອມ​ທັງ​ເຫັນ​ດີ​ຮັກສາ​ການ​ສົມທົບ​ກັນ​ຢ່າງ​ແໜ້ນ​ແຟ້ນ ເພື່ອ​ແນໃສ່​ຮັບປະກັນ​ໃຫ້​ແກ່​ການ​ປອດ​ນິວ​ເຄ​ຣຍ​ຢ່າງ​ສິ້ນ​ເຊີງ, ຮອບດ້ານ ແລະ ໄດ້​ຮັບ​ການ​ຢັ້ງຢືນ ຂອງ ສປປ.ເກົາ​ຫຼີ. ເຈົ້າ​ໜ້າທີ່ 2 ທ່ານ, ກໍໃຫ້​ຄຳ​ໝັ້ນ​ສັນຍາ​ຮ່ວມ​ມື​ຢ່າງ​ຕໍ່​ເນື່ອງ​ໃນ​ຍຸດທະສາດ​ມະຫາ​ສະ​ໝຸດ​ອິນ​ເດຍ - ປາ​ຊີ​ຟິກ ຂອງ​ອາ​ເມ​ຣິ​ກາ ແລະ ນະໂຍບາຍ​ກ້າວ​ໄປ​ເຖິງ​ທິດໃຕ້​ໃໝ່​ຂອງ ສ.ເກົາຫຼີ, ຄໍາ​ນຶງ​ເຖິງ​ຜົນ​ປະໂຫຍດ​ຂອງ​ຝ່າຍ​ຕ່າງໆ, ຈະແຈ້ງ, ເຄົາລົບ​ກົດໝາຍ​ສາກົນ ແລະ ບົດບາດ​ໃຈກາງ​ຂອງ​ອາ​ຊຽນ.