ກອງ​ປະ­ຊຸມ​ສຸດ​ຍອດ​ອາ​ຊຽນ + 3 ຮັບ­ຮອງ​ຖະ­ແຫຼງ­ການ

06.11.2019 9:29     

     ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ໂດຍ​ສືບຕໍ່​ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງ​ທີ 35  ແລະ ບັນດາ​ກອງ​ປະຊຸມ​ຂັ້ນ​ສູງ​ທີ່​ກ່ຽວຂ້ອງ, ວັນທີ 4 ພະຈິກ​ນີ້, ຢູ່​ນະຄອນຫຼວງ​ບາງກອກ ປະເທດ​ໄທ, ໄດ້​ມີ​ກອງ​ປະຊຸມ​ສຸດ​ຍອດ​ອາ​ຊຽນ  + 3 (ອາ​ຊຽນ ກັບ ຈີນ, ຍີ່ປຸ່ນ ແລະ  ສ.ເກົາຫຼີ).

   ຂ່າວ​ລາຍ​ງານ​ວ່າ: ໃນ​ກອງ​ປະຊຸມ ອາ​ຊຽນ + 3, ບັນດາ​ຜູ້​ນໍາ​ທີ່​ເຂົ້າ​ຮ່ວມ​ປະຊຸມ ໄດ້​ຕີ​ລາຄາ​ສູງ​ຂອບ​ເຂດ​ການ​ຮ່ວມ​ມື​ຢ່າງ​ຂະຫຍັນ​ຂັນ​ເຄື່ອນ​ທີ່​ສຸດ ລະຫວ່າງ ອາ​ຊຽນ ກັບ ບັນດາ​ຄູ່​ຮ່ວມ​ມື, ກໍາ​ລັງ​ໜູນ​ສໍາ​ຄັນ​ໃຫ້​ແກ່​ການ​ເຕີບ​ໂຕ​ເສດຖະກິດ​ຂອງ​ພາກ​ພື້ນ ແລະ ທົ່ວ​ໂລກ. ເຖິງ​ວ່າ​ສະພາບ​ການ​ຂອງ​ໂລກ ແລະ ພາກ​ພື້ນ ພວມ​ມີ​ຄວາມ​ສັບສົນ, ແຕ່​ບັນດາ​ປະເທດ ອາ​ຊຽນ + 3 ກໍ​ຢືນ​ຢູ່​ຕໍ່ໜ້າ​ສິ່ງ​ທ້າ​ທາຍ​ຫຼາຍ​ຢ່າງ ດັ່ງນັ້ນ, ຕ້ອງ​ຮ່ວມ​ມື​ກັນ​ຮັກສາ ແລະ ຊຸກຍູ້​ບັນດາ​ການ​ຮ່ວມ​ມື​ຫຼາຍ​ຝ່າຍ, ຫັນ​ເປັນ​ການ​ຄ້າ​ເສລີ, ເຊື່ອມ​ຕໍ່ ແລະ ຍົກ​ສູງ​ກໍາ​ລັງ​ຄວາມ​ສາມາດ, ສ້າງ​ຄວາມ​ເຂັ້ມແຂງ​ດ້ວຍ​ຕົນ​ເອງ ຕໍ່ໜ້າ​ບັນດາ​ຜົນ​ກະທົບ​ຈາກ​ພາຍ​ນອກ.

   ຂະນະ​ດຽວ​ກັນ, ທ່ານ ຫ​ງວຽນ​ຊວັນ​ຟຸກ ນາຍົກລັດ ຖະມົນຕີ​ຫວຽດນາມ, ໄດ້​ສະເໜີ​ໃຫ້​ຍູ້​ແຮງ​ການ​ຮ່ວມ​ມື​ດ້ານ​ເສດ​ຖະ​ກິດ​-​ການ​ເງິນ, ເພີ່ມ​ທະວີ​ປະສິດ​ທິ​ຜົນ ແລະ ກຽມພ້ອມ​ຫັນ​ບັນດາ​ບົດ​ບັນທຶກ​ຊ່ວຍ​ຈໍາ​ຫຼາຍ​ຝ່າຍ ເປັນ​ຂໍ້​ລິ​ເລີ່ມ​ຊຽງ​ໃໝ່ (CMIM) ສໍາ​ລັບ​ບັນດາ​ກໍລະນີ​ເກີດ​ວິ​ກິດ​ການ ແລະ ສະກັດ​ກັ້ນ​ສະພາບ​ວິ​ກິດ​ການ; ຍົກ​ສູງ​ກໍາ​ລັງ​ຄວາມ​ສາມາດ​ໃຫ້​ແກ່​ຫ້ອງການ​ຄົ້ນຄວ້າ​ເສດຖະກິດ​ມະຫາ​ພາກ (AMRO) ເພື່ອ​ນໍາ​ບັນດາ​ຂໍ້​ສະເໜີ​ແນະ​ກ່ຽວ​ກັບ​ນະໂຍບາຍ​ທີ່​ຈໍາ​ເປັນ.

   ໃນ​ວາລະ​ສິ້ນ​ສຸດ​ກອງ​ປະ ຊຸມ, ບັນດາ​ປະເທດ ໄດ້​ເຫັນ​ດີ​ຮັບຮອງ​ເອົາ​ຖະແຫຼງການ​ຂອງ​ບັນດາ​ການ​ນໍາ ອາ​ຊຽນ + 3 ກ່ຽວ​ກັບ ຂໍ້​ລິ​ເລີ່ມ​ເຊື່ອມຕໍ່; ສ້າງ ຕັ້ງ​ເວັບ​ໄຊ​ກ່ຽວ​ກັບອາ​ຊຽນ + 3 ເພື່ອ​ເພີ່ມ​ທະວີ​ຄວາມເຂົ້າໃຈ ແລະ ຊຸກຍູ້​ໄມຕີ​ຈິດ​ມິດຕະ ພາບ ລະຫວ່າງ ປະຊາຊົນບັນດາ ​ປະເທດ​ໃນ​ພາກ​ພື້ນ. 

   ຂ່າວ​ລາຍ​ງານ​ວ່າ: ໃນ​ມື້​ດຽວ​ກັນ, ກໍ​ໄດ້​ຈັດ​ກອງ​ປະຊຸມ​ສຸດ​ຍອດ ອາ​ຊຽນ - ອາ​ເມ​ຣິ ກາ ຄັ້ງ​ທີ 7ໂດຍ​ປຶກສາ​ຫາລື​ດ້ານ​ຄວາມ​ໝັ້ນຄົງ. ອາ​ຊຽນ ໄດ້​ສະແດງ​ຄວາມ​ຊົມເຊີຍ​ບັນ​ດາ​ຄໍາ​ໝັ້ນ​ໝາຍ​ຂອງ​ອາ​ເມ​ຣິ​ກາ​ກັບ​ອາ​ຊຽນ ແລະ ຫວັງ​ວ່າ: ອາ​ເມ​ຣິ​ກາ ສະແດງ​ຄວາມ​ຮັບຜິດຊອບ, ສະໜັບສະໜູນ​ບົດບາດ​ເປັນໃຈ​ກາງຂອງ​ອາ​ຊຽນ ໃນ​ການ​ສ້າງ​ໂຄງ​ປະກອບ​ພາກ​ພື້ນ​ໃຫ້​ເປັນ​ຮູບ​ປະ​ທຳ ອີງໃສ່​ກົດໝາຍ​ສາ​ກົນ.      

   ພ້ອມ​ກັນ​ນີ້, ໃນ​ຂະບວນ​ການ​ວິວັດ​ການ​ເຈລະຈາ​ກ່ຽວ​ກັບ ສັນຍາ​ຄູ່​ຮ່ວມ​ມື​ເສດຖະກິດ​ຮອບດ້ານ​ພາກ​ພື້ນ (RCEP) ໄດ້​ບັນລຸ​ບາດກ້າວ​ບຸກ​ທະລຸ​ອັນ​ໃຫຍ່​ຫຼວງ. ໃນ​ກອງ​ປະຊຸມ, ທ່ານ ຫຼີ​ເຄີ້​ສຽງ ນາຍົກລັດຖະມົນຕີ ຈີນ ຊີ້​ແຈງວ່າ:  15 ປະເທດ​ສະມາຊິກ​ຂອງ​ສັນຍາ RCEP ໄດ້​ສໍາ​ເລັດ​ຂະບວນ​ວິວັດການ​ ເຈລະຈາ​ດ້ວຍ​ລາຍ​ລັກ​ອັກ ສອນ, ກໍ​ຄື​ສໍາ​ເລັດ​ບັນດາ​ການ​ເຈລະຈາ​ກ່ຽວ​ກັບ​ບັນຫາ​ການ​ເຂົ້າ​ເຖິງ​ຕະຫຼາດ​ໂດຍ​ພື້ນ​ຖານ. ທ່ານ ຫຼີ​ເຄີ້ສຽງ ຊີ້​ແຈງວ່າ: ໂດຍ​ພື້ນຖານ​ແລ້ວ, ພວກ​ຂ້າພະເຈົ້າ​ພ້ອມ​ແລ້ວ​ທີ່​ຈະ​ຍູ້​ໄວ​ການ​ດໍາ​ເນີນ​ການ​ເຈລະຈາ​ກ່ຽວ​ກັບ​ເຂດ​ການ​ຄ້າ​ເສລີ ລະຫວ່າງ ຈີນ, ຍີ່ປຸ່ນ ແລະ ສ.ເກົາຫຼີ, ກໍ​ຄື​ຕັ້ງໜ້າ​ກ້າວ​ໄປ​ສູ່​ເປົ້າ​ໝາຍ​ກໍ່ສ້າງ​ປະຊາ​ຄົມ​ເສດ​ຖະກິດ ອາຊີ​ຕາເວັນ​ອອກ.

   ການ​ນໍາ​ບັນດາ​ປະເທດ ທີ່​ເຂົ້າ​ຮ່ວມ​ກອງ​ປະຊຸມ​ສຸດ​ຍອດ ອາ​ຊຽນ + 3 ໄດ້​ຕີ​ລາຄາ​ສູງ​ຕໍ່​ບາດກ້າວ​ບຸກ​ທະລຸ​ໃນ​ຂະບວນ​ວິວັດທະນາ​ການ​ເຈລະຈາ​ສັນຍາ RCEP ພ້ອມ​ທັງ​ໃຫ້​ຄໍາ​ໝັ້ນ​ສັນຍາ​ວ່າ: ຈະ​ລົງ​ນາມ​ໃນ​ເອກະສານ​ສະບັບ​ດັ່ງກ່າວ ໃນ​ປີ 2020 ເພື່ອ​ຊຸກຍູ້​ການ​ແລກປ່ຽນ​ການ​ຄ້າ​ໃນ​ພາກ​ພື້ນ, ສ້າງ​ເງື່ອນໄຂ​ສະດວກ ແລະ ຫັນ​ບັນດາ​ການເຄື່ອນໄຫວ​ລົງທຶນ​ເປັນ​ເສ​ລີ.

   ໃນ​ກອງ​ປະຊຸມ​ຂັ້ນ​ສູງ​ອາ​ຊຽນ - ສປຊ ຄັ້ງ​ທີ 10, ບັນດາ​ການ​ນໍາ​ໄດ້​ຕີ​ລາຄາ​ສູງ​ຕໍ່​ຄວາມ​ສໍາ​ຄັນ​ຂອງ ສປຊ ແລະ ອາ​ຊຽນ ໃນ​ການ​ຮ່ວມ​ມື​ແກ້​ໄຂ​ບັນດາ​ສິ່ງ​ທ້າ​ທາຍ​ໃນ​ປັດ​ຈຸ​ບັນ. ໃນ​ສະພາບ​ການ​ໂລກ​ມີ​ການ​ຜັນ​ແປ​ຢ່າງ​ໄວວາ ແລະ ສັບສົນ, ສິ່ງ​ທ້າ​ທາຍ​ຕໍ່​ຄວາມ​ໝັ້ນຄົງ​ແບບ​ໃໝ່, ອາ​ຊະ​ຍາ​ກໍາ​ທາງ​ເຄືອ​ຂ່າຍ​ອິນ​ເຕີ​ແນັດ, ໂຣກ​ລະບາດ, ການ​ປ່ຽນແປງ​ຂອງ​ດິນ​ຟ້າ​ອາກາດ, ການ​ຜັນ​ແປ​ຢູ່​ທະເລ​ຕາເວັນ​ອອກ, ການ​ນໍາ​ບັນດາ​ປະເທດ ກໍ​ໄດ້​ເນັ້ນ​ໜັກ​ເຖິງ​ຄວາມ​ຕ້ອງການ​ໃນ​ການ​ຮັບ​ມື​ກັບ​ບັນດາ​ສິ່ງ​ທ້າ​ທາຍ​ໃນ​ປັດ​ຈຸ​ບັນ.

   ທ່ານ ອັນໂຕ​ນີ​ໂອ ກູ​ເຕີ​ເ​ຣັສ ເລຂາທິການ​ໃຫຍ່ ສປຊ ຢັ້ງຢືນ​ວ່າ: ສປຊ ພ້ອມ​ແລ້ວ​ທີ່​ຈະ​ໜູນ​ຊ່ວຍ​ອາ​ຊຽນ ແລະ ຫວັງ​ວ່າ: ອາ​ຊຽນ ຈະ​ສືບຕໍ່​ປະ ຕິບັດ​ເປົ້າ​ໝາຍ​ພັດທະນາ​ແບບ​ ຍືນ​ຍົງ. 

   ກ່ຽວ​ກັບ​ກອງ​ປະຊຸມ​ສຸດ​ຍອດ​ອາ​ຊຽນ - ອິນ​ເດຍ ຄັ້ງ​ທີ 16, ການ​ນຳ​ບັນດາ​ປະເທດ ໄດ້​ຮັບ​ຮູ້​ການ​ພົວພັນ​ທາງດ້ານ ​ເສດຖະກິດ ​ລະຫວ່າງ ອາຊຽນ ແລະ ອິນ​ເດຍ ພວມ​ພັດທະນາ​ ຢ່າງ​ຕັ້ງໜ້າ​ໃນ​ຊຸມ​ປີ ຜ່ານມາ ດ້ວຍ​ວົງ​ເງິນ 2 ສົ້ນ​ປີ 2018, ບັນລຸ 81 ຕື້​ໂດ​ລາ. ການຮ່ວມ​ ມື​ໄດ້​ຮັບ​ການ​ຍູ້​ແຮງ​ຢ່າງຮອບ ດ້ານ​ໃນ​ທຸກ​ຂົງເຂດ, ໄດ້​ນຳ​ ເອົາ​ຜົນ​ປະໂຫຍດ​ໃຫ້​ແກ່​ປະ ຊາຊົນ ແລະ ວິ​ສາ​ຫະ​ກິດ​ຂອງ 2 ຝ່າຍ. ຜູ້​ນໍາ​ບັນດາ​ປະເທດ​ອາ​ຊຽນ ໄດ້​ຕີ​ລາຄາ​ສູງ​ຕໍ່​ການ​ປະກອບສ່ວນ​ຂອງ​ອິນ​ເດຍ ໃນ​ການ​ຮັກສາ​ສັນຕິພາບ ແລະ ສະຖຽນ​ລະ​ພາບ​ຢູ່​ພາກ​ພື້ນ ອາຊີ​ຕາເວັນ​ອອກ​ສ່ຽງ​ໃຕ້. ພ້ອມ​ທັງ​ສະແດງ​ໃຫ້​ເຫັນ​ວ່າ: ອິນ​ເດຍ ເປັນ​ເພື່ອນ​ທີ່​ຍາວ​ນານ, ເປັນ​ຄູ່​ຮ່ວມ​ມື​ທີ່​ຂະຫຍັນ​ຂັນ​ເຄື່ອນ ແລະ ຮັບ​ຮູ້​ການ​ປະກອບສ່ວນ​ຂອງ​ອິນ​ເດຍ ໃນ​ພາກ​ພື້ນ ເພື່ອ​ສັນຕິພາບ ແລະ ສະຖຽນ​ລະ​ພາບ.