ມະ­ຫາ​ປະ­ຕິ­ວັດ​ເດືອນ​ຕຸ­ລາ ຣັດ​ເຊຍ

07.11.2019 9:45     

(ເນື່ອງ​ໃນ​ໂອກາດ​ການ​ປະຕິວັດ​ຣັດ​ເຊຍ 7/11/1917- 7/11/2019)

ໂດຍ: ຜ.ຜົນ​ບຸນ

   ປີ 1917 ພາຍ​ໃຕ້​ການ​ນຳພາ​ຂອງ​ພັກ​ໂບນ​ເຊ​ວິກ ໂດຍ​ແມ່ນ ທ່ານ ເລ​ນິນ ເປັນ​ຜູ້ນຳ​ພາ, ຊົນ​ຊັ້ນ​ກຳມະກອນ ແລະ ຊາວ​ຜູ້​ອອກແຮງ​ງານ​ຣັດ​ເຊຍ ໄດ້​ລຸກ​ຮື້​ຂຶ້ນ​ຢຶດ​ອຳນາດ ແລະ ສ້າງຕັ້ງ​ສະຫະພາບ​ໂຊ​ວຽດ ຊຶ່ງ​ເປັນ​ລັດ​ຂອງ​ຊົນ​ຊັ້ນ​ກຳມະກອນ ແລະ ຊາວ​ຜູ້​ອອກແຮງ​ງານ​ລັດ​ທຳອິດ​ຂອງ​ມວນ​ມະ​ນຸດ. ການ​ປະຕິວັດ​ເດືອນ​ຕຸລາ​ຣັດ​ເຊຍ ປີ 1917 ບໍ່​ແມ່ນ​ເຫດການ​ເກີດ​ຂຶ້ນ​ແບບ​ບັງເອີນ, ແຕ່​ແມ່ນ​ກົດເກນ​ທີ່​ຕ້ອງ​ເປັນ​ໄປ ຂອງ​ສັງຄົມ​ມະ​ນຸດ. ຍ້ອນ​ວ່າ​ປະເທດ​ຣັດ​ເຊຍ ໃນ​ຊຸມຕົ້ນ​ປີ​ ຂອງ​ສະຕະວັດ​ທີ 20 ເປັນ​ປະເທດ​ທຶນ​ນິຍົມ ທີ່​ຂະຫຍາຍຕົວ​ຊ້າ, ຫຼ້າ​ຫຼັງ. ແຕ່​ຊົນ​ຊັ້ນ​ນາຍທຶນ ແລະ ເຈົ້າ​ຊາ​ຊ້ຳພັດ​ກົດ​ຂີ່​ຂູດ​ຮີດ​ກຳມະກອນ ແລະ ປະຊາຊົນ​ຜູ້​ອອກແຮງ​ງານ​ຢ່າງ​ໜັກ​​ໜ່ວງ, ສະພາບ​ຊີວິດ​ການ​ເປັນ​ຢູ່​ຂອງ​ປະຊາຊົນ​ທຸກ​ຍາກ​ລຳບາກ, ບວກ​ກັບ​ສະພາບ​ສົງຄາມ​ໂລກ ຄັ້ງ​ທີ I (1914 - 1917) ຍິ່ງ​ເຮັດ​ໃຫ້ ຣັດ​ເຊຍ ຕົກ​ເຂົ້າ​ສູ່​ສະພາບ​ວິ​ກິດ​ການ​ຢ່າງ​ຮ້າຍ​ແຮງ. ຢ່າງໃດ​ກໍ​ຕາມ, ທ່ານ ເລ​ນິນ ແລະ ພັກ​ໂບນ​ເຊ​ວິກ ກໍໄດ້​ສຶກສາ​ອົບຮົມ ປຸກລະດົມ, ຊົນ​ຊັ້ນ​ກຳມະກອນ, ປະຊາຊົນ​ຊາວ​ຜູ້​ອອກແຮງ​ງານ ແລະ ກອງ​ທະຫານ​ລຸກ​ຮື້​ຂຶ້ນ​ເຮັດ​ການ​ປະຕິ​ວັດ.

   ການ​ປະຕິວັດ​ເດືອນ​ຕຸລາ ມັນ​ໄດ້​ບົ່ມ​ເຜາະ ແລະ ເຄື່ອນ​ໄຫວ​ມາ​ຕັ້ງແຕ່ ປີ 1905, ຍ້ອນ​ການ​ຕໍ່ສູ້ ລະຫວ່າງ ຊົນ​ຊັ້ນ​ສັກ​ດີ​ນາ, ນາຍທຶນ​ກັບ​ກຳລັງ​ປະຕິວັດ ໄດ້ແກ່​ຍາວ​ຫຼາຍ​ປີ, ຈົນ​ຮອດ​ວັນ​ທີ 25 ເດືອນ​ຕຸລາ (ຕາມ​ປະຕິທິນ​ຣັດ​ເຊຍ) ໃນ​ເວລາ 7 ໂມງ ຂອງ​ວັນ​ທີ 7|11|1917 (ຕາມ​ປະຕິທິນ​ສາກົນ) ການ​ລຸກ​ຮື້​ຂຶ້ນ​ຢ່າງ​ແຂງແຮງ​ຂອງ​ຊົນ​ຊັ້ນ​ກຳມະກອນ, ປະຊາຊົນ​ຊາວ​ຜູ້​ອອກແຮງ​ງານ ແລະ ຖັນ​ແຖວ​ກອງທັບ​ທີ່​ກ້າວໜ້າ​ໄດ້​ແຜ່​ລາມ​ໄປ​ທົ່ວ​ປະ​ເທດ. ໃນ​ມື້​ດຽວ​ກັນ​ນັ້ນ, ກຳ​ປັ່ນ​ຮົບ "ອາ​ວາ​ໂຣ​ຣາ" (ຮຸ່ງ​ອາ​ລຸນ) ໄດ້​ຍິງ​ປືນ​ໃຫຍ່​ໃສ່​ລາດ​ຊະ​ວັງ​ລະດູ​ໜາວ ທີ່ ເປ​ໂຕກ​ຣາດ ຊຶ່ງ​ເປັນ​ເຮືອນ​ຫຼັງ​ສຸດ​ທ້າຍ ຂອງ​ລັດຖະບານ​ນາຍທຶນ, ຈາກ​ນັ້ນ​ປະຊາຊົນ ແລະ ທະຫານ​ບຸກ​ເຂົ້າ​ມ້າງ​ປະຕູ​ເຫຼັກ ໂຄ່ນ​ລົ້ມ​ລັດຖະບານ​ນາຍທຶນ​ຢ່າງ​ສິ້ນ​ເຊີງ.

   ກອງ​ປະຊຸມ​ໃຫຍ່​ສະພາ​ໂຊ​ວຽດ ໄດ້​ເປີດຂຶ້ນ​ຢູ່​ຫໍ​ປະຊຸມ​ສະ​ໂມນ​ນີ ແຫ່ງ​ນະຄອນ​ເປ​ໂຕກ​ຣາດ ໄດ້​ປະກາດ​ຢຶດ​ອຳນາດ​ການ​ປົກຄອງ​ມາ​ໃຫ້​ອຳນາດ​ໂຊ​ວຽດ​ທັງ​ໝົດ. ໃນ​ກອງ​ປະຊຸມ​ໃຫຍ່​ຄັ້ງ​ນີ້ ໄດ້​ປະກາດ​ດຳລັດ​ທຳອິດ - ນັ້ນ​ແມ່ນ​ດຳລັດ​ກ່ຽວ​ກັບ​ສັນຕິພາບ ແລະ ທີ່​ດິນ. ກອງ​ປະຊຸມ​ໃຫຍ່​ສະພາ​ໂຊ​ວຽດ ໄດ້​ສ້າງຕັ້ງ​ລັດຖະບານ ຂອງ​ຊົນ​ຊັ້ນ​ກຳມະກອນ​ຊາວນາ​ຄັ້ງ​ທຳອິດ​ຂຶ້ນ​ຢູ່​ຣັດ​ເຊຍ ກໍ​ຄື​ໃນ​ໂລກ. ການ​ປະຕິວັດ ເດືອນ​ຕຸລາ ຫາກໍ​ສຳເລັດ, ພວກ​ນາຍທຶນ​ປະຕິ​ການ​ພາຍ​ໃນ​ປະເທດ​ສົມຮູ້​ຮ່ວມ​ຄິດ​ກັບ 14 ປະເທດ ນາຍທຶນ ໄດ້​ບຸກໂຈມຕີ​ຣັດ​ເຊຍ (ໂຊ​ວຽດ) ໃນ ປີ 1918 - 1922, ຫວັງ​ບີບຄັ້ນ​ອຳນາດ​ໂຊ​ວຽດ ໃຫ້​ຕາຍ​ແຕ່​ຫົວທີ, ແຕ່​ທ່ານ ເລ​ນິນ ແລະ ພັກ​ໂບນ​ເຊ​ວິກ ໄດ້​ນຳພາ​ປະຊາຊົນ ຕໍ່ສູ້​ຕ້ານ​ສັດຕູ ແລະ ໄດ້​ຮັບ​ໄຊຊະນະ​ອັນ​ຍິ່ງ​ໃຫຍ່, ປົກ​ປັກ​ຮັກສາ​ອຳນາດ​ໂຊ​ວຽດ​ໄວ້​ໄດ້. ການ​ປະຕິວັດ​ເດືອນ​ຕຸລາ​ຣັດ​ເຊຍ ໄດ້​ມີ​ຄວາມ​ໝາຍ​ອັນ​ຍິ່ງ​ໃຫຍ່​ໃນ​ປະຫວັດສາດ ຊຶ່ງ​ເປັນ​ການ​ເປີດ​ສັງກາດ​ໃໝ່​ໃຫ້​ແກ່​ມວນ​ມະນຸດ ໃນ​ການ​ຂ້າມ​ຜ່ານ​ໄປ​ສູ່​ລະບອບ​ໃໝ່, ລະບອບ​ສັງຄົມ​ນິຍົມ, ເຮັດ​ໃຫ້​ໂລກ​ທີ່​ປົກ​ຄຸມ​ດ້ວຍ​ລະບອບ​ທຶນ​ນິຍົມ ຖືກ​ແຕກ​ສະຫຼາຍ ກາຍເປັນ​ລະບົບ​ສັງຄົມ​ນິຍົມ​ໃນ​ຂອບ​ເຂດ​ທົ່ວ​ໂລກ. ໂລກ​ໄດ້​ມີ 2 ລະບອບ​ສັງຄົມ​ທີ່​ຕໍ່ສູ້​ກັນ, ທັງ​ແຂ່ງຂັນ ແລະ ທັງ​ຮ່ວມ​ມື​ກັນ. ການ​ປະຕິວັດ​ເດືອນ​ຕຸລາ ສຳເລັດ​ຜົນ ໄດ້​ເກີດ​ມີ​ລັດ​ຂອງ​ຊົນ​ຊັ້ນ​ກຳມະກອນ ແລະ ຊາວນາ ເປັນ​ຄັ້ງ​ທຳອິດ​ໃນ​ໂລກ, ແມ່ນ​ລັດ​ຂອງ​ປະຊາຊົນ, ໂດຍ​ປະຊາຊົນ ແລະ ເພື່ອ​ປະຊາຊົນ​ຢ່າງ​ແທ້​ຈິງ. ລະບອບ​ຄົນ​ກົດ​ຂີ່​ຂູດ​ຮີດ​ຄົນ ໄດ້​ຖືກ​​ລຶບ​ລ້າງ​ຢ່າງ​ເປັນ​ທາງ​ການ, ປະຊາຊົນ​ທຸກ​ຊົນ​ຊັ້ນ​ໄດ້​ມີ​ສິດ​ເສລີພາບ ປະຊາທິປະໄຕ ຢ່າງ​ເຕັມ​ປ່ຽມ, ປະຊາຊົນ​ໄດ້​ມີ​ສ່ວນ​ຮ່ວມ​ເປັນ​ເຈົ້າ​ການ ໃນ​ການ​ສ້າງສາ​ພັດທະນາ​ປະເທດ​ຊາດ​ຂອງ​ຕົນ. ການ​ປະຕິວັດ​ເດືອນ​ຕຸລາ​ໄດ້​ຮັບ​ໄຊຊະນະ, ແມ່ນ​ໄຊຊະນະ​ຂອງ​ລັດທິ​ມາກ - ເລ​ນິນ ຈາກ​ທິດ​ສະ​ດີ​ໄດ້​ກາຍເປັນ​ພຶດຕິ​ກຳ​ຕົວ​ຈິງ, ພັກ​ກອມ​ມູ​ນິດ ໄດ້​ກາຍເປັນ​ພັກ​ກຳ​ອຳນາດ ນຳພາ​ທົ່ວ​ປະເທດ​ຄັ້ງ​ທຳ​ອິດ. ພັກ​ໄດ້​ກາຍເປັນ​ແກນ​ນຳ​ໃນ​ ລະບົບ​ການເມືອງ ຂອງ​ລະບອບ ​ສັງຄົມ​ນິຍົມ, ເປັນ​ຫຼັກ​ແຫຼ່ງ​ໃນ​ການ​ຮັດ​ແໜ້ນ​ຄວາມ​ສາມັກຄີ​ເປັນ​ປຶກ​ແຜ່ນ​ພາຍ​ໃນ, ສຶກສາ​ອົບ​ຮົມ ແລະ ປຸກລະດົມ​ປະ ຊາຊົນ​ຕໍ່ສູ້​ປົກ​ປັກ​ຮັກສາ ແລະ ສ້າງສາ​ປະເທດ​ຊາດ.

   ພາຍ​ໃຕ້​ການ​ນຳພາ​ຂອງ​ພັກ​ກອມ​ມູ​ນິດ​ໂຊວຽດ, ເປັນ​ເວລາ 70 ກວ່າ​ປີ, ສະຫະ ພາບ​ ໂຊ​ວຽດ ໄດ້​ມີ​ການ​ຟື້ນ​ຟູ ແລະ ພັດທະນາ​ຢ່າງ​ແຂງແຮງ, ພື້ນ ຖານໂຄງ​ລ່າງ ຖະໜົນຫົນ ທາງ, ຂົວ, ລົດໄຟ, ທ່າ​ກຳ​ປັ່ນ, ເດີ່ນ​ບິນ ໄດ້​ຂະຫຍາຍຕົວໜັກ ​ແໜ້ນ, ບັນດາ​ຕົວ​ເມືອງ, ໂຮງ​ຈັກ, ໂຮງງານ​ໃໝ່ ໄດ້​ຮັບ​ການ​ພັດທະນາ; ວິທະຍາສາດ​ເຕັກ​ໂນ​ໂລ​ຊີກ້າວໜ້າ​ໄວ. ໂຊວຽດ ເປັນ​ປະເທດ​ທີ່​ສົ່ງ​ຄົນ​ຂຶ້ນ​ອາ​ວະກາດ​ຜູ້​ທຳອິດ​ໃນ​ໂລກ ແລະ ມີ​ພະລັງປ້ອງ​ກັນ​ຊາດ​ເຂັ້ມ ແຂງ, ເມື່ອ​ໂຊ​ວຽດ​ໄດ້​ສົ່ງດາວ​ທຽມ​ຂຶ້ນ​ອະ​ວະ​ກາດ, ມີ​ອາວຸດ ​ນິວເຄ​ຣຍ ​ເຮັດ​ໃຫ້​ອາ​ເມຣິກາ ສູນ​ເສຍ​ການ​ຜູກຂາດ​ອາວຸດ ​ນິວ​ເຄ​ຣຍ​ຜູ້​ດຽວ​ໃນ​ໂລກ, ເຮັດ ​ໃຫ້ການຊັ່ງຊາ​ກຳລັງລະຫວ່າງ ໂຊ​ວຽດ ແລະ ອາ​ເມຣິ​ກາກຳ້​ເກິ່ງ​ກັນ. ຈາກ​ການປະຕິວັດ​ເດືອນຕຸລາ​ຣັດ​ເຊຍ, ໂຊ​ວຽດ ໄດ້​ປະກາດ​ດຳລັດກ່ຽວ​ກັບສັນ ຕິພາບ​ທຳອິດ, ຈາກ​ນັ້ນ​ໂຊ​ ວຽດ ໄດ້​ຕັ້ງໜ້າ​ອຸທິດ​ຕົນປະ ກອບສ່ວນ​ເຂົ້າ​ໃນ​ການ​ປົກ​ປັກ​ຮັກສາ​ສັນຕິພາບໂລກ, ປະ ກອບສ່ວນ​ເຮັດ​ໃຫ້​ສົງຄາມໂລກ​ ຄັ້ງ​ທີ I ສິ້ນ​ສຸດ​ລົງ. ສະໄໝ​ສົງຄາມ​ໂລກ​ຄັ້ງ​ທີ II, ສະຫະ ພາບ​ໂຊ​ວຽດ ບໍ່​ພຽງ​ແຕ່​ດຳເນີນ​ ສົງຄາມ​ປ້ອງ​ກັນ​ປິ​ຕິ​ພູມ​ທີ່ຍິ່ງ ​ໃຫຍ່​ເທົ່າ​ນັ້ນ, ແຕ່​ຍັງ​ເຮັດພັນ ທະ​ຊ່ວຍ​ປົດ​ປ່ອຍ​ບັນດາ​ປະຊາ ຊາດ​ຢູ່​ເອີ​ຣົບ ແລະ ອາຊີ ອອກ​ຈາກ​ແອກ​ປົກຄອງ​ຟາດ​ຊິດ ແລະ ລັດທິ​ຂຸນ​ເສິກ, ຊາວ​ໂຊ​ວຽດ 20 ລ້ານ​ຄົນ ໄດ້​ເສຍ​ສະຫຼະ​ເພື່ອ​ກອບ​ກູ້​ເອົາ​ມວນ​ມະນຸດ​ອອກ​ຈາກ​ແປວໄຟ​ແຫ່ງ​ສົງຄາມ​ໂລກ, ສະຫະພາບ​ໂຊ​ວຽດ ເປັນ​ແກນ​ນຳ​ພັນທະ​ມິດ​ໃນ​ການ​ດັບ​ມອດ​ໄຟ​ສົງຄາມ, ເຮັດ​ໃຫ້​ສົງຄາມ​ໂລກ​ຄັ້ງ​ທີ II ຢຸດຕິ​ລົງ, ສັນຕິພາບ ໄດ້​ກັບ​ຄືນ​ສູ່​ມວນ​ມະ​ນຸດ.

   ພາຍຫຼັງ​ສົງຄາມ​ໂລກ​ຄັ້ງ​ທີ II ຢຸດຕິ​ລົງ, ຂະບວນ​ການ​ຕໍ່ສູ້​ປົດ​ປ່ອຍ​ຊາດ ໄດ້​ຟົດຟື້ນ​ຂຶ້ນ​ທົ່ວ​ໂລກ. ຫຼາຍ​ປະເທດ, ພາຍຫຼັງ​ໄດ້​ຮັບ​ການ​ປົດ​ປ່ອຍ ກໍໄດ້​ກ້າວ​ເດີນ​ໄປ​ຕາມ​ເສັ້ນທາງ​ສັງຄົມ​ນິຍົມ ອັນ​ໄດ້​ເຮັດ​ໃຫ້​ສັງຄົມ​ນິຍົມ​ກາຍເປັນ​ລະບົບ​ໜຶ່ງ ນັບ​ແຕ່​ເອີ​ຣົບ​ຮອດ​ອາຊີ ແລະ ອາ​ເມ​ຣິ​ກາ​ລາ​ຕິ​ນ. ສະຫະພາບ​ໂຊ​ວຽດ ໄດ້​ໃຫ້ການ​ສະໜັບສະ ໜູນ​ຊ່ວຍເຫຼືອ​ຢ່າງ​ໃຫຍ່​ຫຼວງ ຕໍ່​ຂະບວນ​ການ​ກອມ​ມູ​ນິດ, ກຳມະກອນ ແລະ ຂະບວນການ ​ຕໍ່ສູ້ເພື່ອ​ສັນຕິພາບ, ເພື່ອ​ເອກະລາດ​ແຫ່ງ​ຊາດ, ເພື່ອ​ປະຊາທິປະໄຕ ແລະ ຄວາມ​ກ້າວໜ້າ​ທາງ​ສັງຄົມ​ໃນ​ທົ່ວ​ໂລກ. ສະນັ້ນ, ເປັນ​ເວລາ​ກວ່າ​ເຄິ່ງສະຕະວັດ ສັງຄົມ​ນິຍົມ ແລະ ສະຫະພາບ​ໂຊ​ວຽດ ໄດ້​ກາຍເປັນ​ກຳແພງ​ເພັດ​ແຫ່ງ​ສັນຕິພາບ​ໂລກ.

   ນັບ​ແຕ່​ທ້າຍ​ສະຕະວັດ​ທີ 19 ຫາຕົ້ນ​ສະຕະວັດ​ທີ 20 ເປັນຕົ້ນ​ມາ, ລັດທິ​ລ່າ​ເມືອງ​ຂຶ້ນໄດ້​ມາ​ຮຸກ​ຮານ ຢຶດ​ຄອງ​ອິນ ດູຈີນ, ປະຊາຊົນ​ລາວ​ບັນດາ ເຜົ່າ​ໄດ້​ລຸກ​ຮື້​ຂຶ້ນ​ຕໍ່ສູ້​ຕ້ານ​ລັດທິ​ ຈັກກະພັດ​ຜູ້​ຮຸກ​ຮານ​ຢ່າງ​ອົງ ອາດ​ກ້າຫານ ແຕ່​ບໍ່​ໄດ້​ຮັບ​ໄຊຊະນະ​ຢ່າງ​ເດັດຂາດ, ອັນ​ເນື່ອງ​ມາ​ຈາກ​ຫຼາຍ​ສາເຫດ ແຕ່​ສາເຫດ​ຕົ້ນຕໍ​ແມ່ນ ຍ້ອນ​ບໍ່​ທັນ​ມີ​ທິດ​ສະ​ດີ​ມາກ - ເລ​ນິນ ເຍືອງ​ທາງ, ບໍ່​ທັນ​ມີ​ພັກ​ແບບ​ໃໝ່​ຂອງ​ຊົນ​ຊັ້ນ​ກຳມະກອນ​ນຳພາ ແລະ ບໍ່​ທັນ​ມີ​ແນວທາງ​ທີ່​ຖືກ​ຕ້ອງ. ທ່ານ ປະທານ ໂຮ່​ຈິມິນ ໄດ້​ນຳ​ເອົາ​ລັດທິມາກ - ເລ​ນິນ ເຂົ້າ​ມາ​ເຜີຍແຜ່ ແລະ ໄດ້​ສ້າງຕັ້ງ​ພັກ​ກອມ​ມູ​ນິດ​ອິນດູຈີນ ຂຶ້ນ​ໃນ​ປີ 1930. ພາຍ​ໃຕ້​ການ​ນຳພາ​ຂອງ​ພັກ​ກອມ​ມູ​ນິດ​ອິນດູຈີນ ແລະ ຄະນະ​ພັກ​ແຄວ້​ນ​ລາວ ນຳພາ​ໂດຍ​ກົງ. ປະຊາຊົນ​ລາວ​ບັນດາເຜົ່າ ໄດ້​ດຳເນີນ​ການ​ຕໍ່ສູ້​ຕ້ານ​ລັດທິ​ລ່າ​ເມືອງ​ຂຶ້ນຢ່າງ​ອົງອາດ​ກ້າຫານ ຮອດ​ປີ 1945 ກອງທັບ​ແດງ​ໂຊ​ວຽດ ໄດ້​ຕີ​ຊະນະ​ຟາດ​ຊິດ ແລະ ລັດທິ​ຂຸນ​ເສິກ. ຢູ່​ອິນດູຈີນ ໂດຍ​ໄດ້​ຮັບ​ຜົນ​ສະທ້ອນ​ຈາກ​ການ​ປະຕິວັດ​ເດືອນ​ສິງຫາ ຂອງ​ຫວຽດນາມ​ສຳເລັດ​ຜົນ ແລະ ໄດ້​ປະກາດ​ເອກະລາດ ວັນ​ທີ 2/9/1945 ນີ້​ເປັນ​ກາລະ​ໂອກາດ ພັນ​ປີ​ມີ​ເທື່ອ​ໜຶ່ງ, ປະຊາຊົນ​ລາວ​ໄດ້​ຈັບ​ເອົາ​ໂອກາດ​ທີ່​ຫາ​ຍາກ​ນີ້ລຸກ​ຮື້​ຂຶ້ນ​ຢຶດ​ອຳນາດ ແລະ ປະກາດ​ເອກະລາດ ໃນວັນ​ທີ 12 ຕຸລາ ປີ 1945, ເຮັດ​ໃຫ້​ລາວ​ກາຍເປັນ​ປະເທດ​ເອກະລາດ ອະທິປະ​ໄຕ ແລະ ຜືນ​ແຜ່ນດິນ​ອັນ​ຄົບ​ຖ້ວນ. ແຕ່​ວ່າ​ເອກະລາດ​ຂອງ​ລາວ​ບໍ່​ພໍ​ເທົ່າໃດ​ເດືອນ, ລັດທິ​ລ່າ​ເມືອງ​ຂຶ້ນ​ແບບ​ເກົ່າ ໄດ້​ກັບ​ມາ​ຮຸກ​ຮານ 3 ຊາດ​ອິນດູຈີນ ອີກ​ຄັ້ງ​ທີ​ສອງ. ປະຊາຊົນ​ລາວ ພ້ອມ​ກັບ​ປະຊາຊົນ​ຫວຽດນາມ ແລະ ກຳປູເຈຍ ໄດ້​ສືບຕໍ່​ການ​ຕໍ່ສູ້​ຍືດ​ເຍື້ອ​ຍາວ​ນານ ຈົນ​ເຖິງ​ໄຊຊະນະ​ບັ້ນ​ຮົບ​ດຽນ​ບຽນ​ຟູ້ ຂອງ​ກອງທັບ ແລະ ປະຊາຊົນ​ຫວຽດນາມ ແລະ ນຳໄປ​ສູ່​ສັນ ຍາ​ເຊີ​ແນວ ປີ 1954 ກ່ຽວ​ກັບ​ອິນ​ດູ​ຈີນ. ວັນ​ທີ 22/3/1955 ພັກ​ປະຊາຊົນ​ ປະຕິວັດ​ລາວ​ ໄດ້ຮັບ​ການ​ສ້າງຕັ້ງ​ຂຶ້ນ​ຢ່າງ ​ເປັນ​ທາງ​ການ.

   ພາລະກິດ​ການ​ຕໍ່ສູ້​ຕ້ານ​ການ​ຮຸກ​ຮານ​ຂອງ​ຈັກກະພັດ​ລ່າ​ເມືອງ​ຂຶ້ນ ເພື່ອ​ປົດ​ປ່ອຍ​ຊາດ ຂອງ​ປະຊາຊົນ​ລາວ ໄດ້​ດຳເນີນ​ຢ່າງ​ພິລະ​ອາດ​ຫານ, ທັງ​ຕໍ່ສູ້​ດ້ວຍ​ກຳລັງ​ອາວຸດ, ທັງ​ຕໍ່ສູ້​ດ້ວຍ​ການເມືອງ, ດ້ານ​ກົດໝາຍ ແລະ ການ​ຕ່າງປະເທດ ໄດ້​ຮັບ​ໄຊຊະນະ​ເປັນ​ແຕ່​ລະ​ກ້າວ​ຢ່າງ​ຕໍ່​ເນື່ອງ - ສຸດ​ທ້າຍ​ໂດຍ​ຈັບ​ເອົາ​ກາລະ​ໂອກາດ​ທີ່​ຫວຽດນາມ ແລະ ກຳປູເຈຍ ປົດ​ປ່ອຍປະ​ເທດ​ຊາດ​ຢ່າງ​ສົມບູນ, ພັກ​ປະຊາຊົນ​ ປະຕິວັດ​ລາວ ໄດ້​ນຳ​ ໃຊ້​ຍຸດທະສາດ 3 ບາດ​ຄ້ອນ, ຍາດ​ເອົາ​ໄຊຊະນະ​ຢ່າງ​ສົມບູນ ແບບ " ບົວ​ບໍ່​ຊຳ້​ນຳ້​ບໍ່​ຂຸ່ນ " ກ້າວ​ເຖິງ​ການ​ລຶບ​ລ້າງ​ລະບອບ​ເກົ່າ, ສ້າງຕັ້ງ​ລະບອບ ປະຊາທິປະໄຕ​ປະຊາຊົນ​ລາວ ຂຶ້ນ​ໃນ​ວັນ​ທີ 2 ທັນວາ 1975. ສຳເລັດ​ການ​ປະຕິວັດ​ຊາດ - ປະຊາ​ທິ​ປະ​ໄຕ. ທຸກ​ໄຊຊະນະ​ຂອງ​ການ​ປະຕິວັດ​ປົດ​ປ່ອຍ​ຊາດ​ຂອງ​ປະເທດ​ເຮົາ ລ້ວນ​ແຕ່​ຕິດ​ພັນ​ກັບ​ການ​ຊ່ວຍເຫຼືອ​ອັນ​ໃຫຍ່​ຫຼວງ ຂອງ​ຫວຽດນາມ, ຈີນ, ໂຊ​ວຽດ ແລະ ປະເທດ​ສັງຄົມ​ນິຍົມ​ອື່ນໆ. ພາຍຫຼັງ​ປະເທດ​ເຮົາ​ໄດ້​ຮັບ​ການ​ປົດ​ປ່ອຍ​ຢ່າງ​ສົມບູນ, ໃນ​ພາລະກິດ​ແຫ່ງ​ການ​ປົກ​ປັກ​ຮັກສາ ແລະ ສ້າງສາ​ປະເທດ​ຊາດ, ສະຫະພາບ​ໂຊ​ວຽດ ໄດ້​ຕັ້ງໜ້າ​ໃຫ້ການ​ສະໜັບສະໜູນ​ຊ່ວຍເຫຼືອ​ຕໍ່​ປະເທດ​ເຮົາ​ຢ່າງ​ໃຫຍ່​ຫຼວງ ແລະ ຮອບດ້ານ; ດ້ານ​ການເມືອງ, ດ້ານ​ເສດຖະກິດ, ການ​ສຶກສາ, ສາທາລະນະ​ສຸກ, ວັດທະນະ​ທຳ, ວິທະຍາສາດ​ເຕັກ​ໂນ​ໂລ​ຊີ, ການ​ປ້ອງ​ກັນ​ຊາດ, ປ້ອງ​ກັນ​ຄວາມ​ສະຫງົບ, ດ້ານ​ການ​ຕ່າງປະເທດ ແລະ ການ​ກໍ່ສ້າງ​ພະນັກ​ງານ. ການ​ຮ່ວມ​ມື ແລະ ການ​ຊ່ວຍເຫຼືອ​ຊຶ່ງ​ກັນ ແລະ ກັນ ຂອງ​ສະຫະພາບ​ໂຊ​ວຽດ ມີ​ຫຼາຍ​ກິດຈະການ​ທີ່​ ເປັນ​ພື້ນຖານ​ໃຫ້​ແກ່​ລາວ, ເປັນ ຕົ້ນ​ແມ່ນ​ທາງ​ໝາຍ​ເລກ 9 ຂົວ​ປາກ​ກະດິງ, ໂຮງໝໍ 150 ຕຽງ (ມິດຕະພາບ), ໂຮງ​ກາຍະ​ສິນ​ສູນ​ກາງ, ສະຖານີ​ດາວ​ທຽມ (ສະ​ປຸດ​ນິກ) ຫຼັກ 52 ແລະ ອື່ນໆ.

   ປະເທດ​ເຮົາ ພາຍ​ໃຕ້ການ ​ນຳພາ​ຂອງ​ພັກ​ປະຊາຊົນ​ປະຕິ ວັດ​ລາວ, ໃນ​ພາລະກິດ​ກ້າວ​ເດີນ​ໄປ​ສູ່​ສັງຄົມ​ນິຍົມ​ໄດ້​ມີ​ຄວາມ​ສະດຸ້ງ​ໄວ, ຮູ້ຈັກ​ຈຸດດີ​ທີ່​ຖືກຕ້ອງ ແລະ ຮູ້ຈັກ​ຈຸດ​ອ່ອນ​ທີ່​ຄົງ​ຄ້າງ​ຂອງ​ຕົນ, ທ່ານປະທານ ໄກສອນ ພົມວິຫານ ໄດ້​ມີ​ແນວ​ຄິດ​ລິ​ເລີ່ມ​ປ່ຽນແປງ​ໃໝ່ ແຕ່​ປີ 1979 ແລະ ປີ 1986 ກອງ​ປະຊຸມ​ໃຫຍ່​ຄັ້ງ​ທີ IV ຂອງ​ພັກ ຈຶ່ງ​ໄດ້​ກາຍເປັນ​ແນວທາງ​ປ່ຽນແປງ​ໃໝ່ ຊຶ່ງ​ກ່ອນ​ອື່ນແມ່ນ​ ປ່ຽນແປງ​ໃໝ່​ທາງ​ດ້ານ​ຈິນຕະ ນາການ​ເສດຖະກິດ, ການ​ປ່ຽນ​ໃໝ່​ມີ​ຫຼັກການ, ມີ​ທິດ​ນຳ​ທີ່​ຊັດ​ເຈນ ແລະ ພັກ​ເຮົາ​ກໍຍັງ​ໄດ້​ກຳ​ນົ​ດ-​ຫຼັກການ​ຢຶດ​ໝັ້ນ ລັດທິ​ມາກ - ເລ​ນິນ, ຢຶດ​ໝັ້ນ​ສັງຄົມ​ນິຍົມ​ທີ່​ຈະ​ແຈ້ງ. ກອງ​ປະຊຸມ​ໃຫຍ່​ຄັ້ງ​ທີ VIII ຂອງ​ພັກ ໄດ້​ກຳນົດ​ວ່າ: ລັດທິ​ມາກ - ເລນິນ ແລະ ມູນເຊື້ອ​ອັນ​ດີງາມ​ເປັນ​ ພື້ນຖານ​ແນວ​ຄິດ​ທິດ​ສະ​ດີ​ຂອງ​ພັກ. ຜ່ານ​ໄລຍະ 20 ກວ່າ​ປີ ແຫ່ງ​ການ​ປະຕິບັດ​ແນວທາງ ປ່ຽນແປງ​ໃໝ່ ພວກ​ເຮົາ​ໄດ້​ມີ​ຜົນສຳເລັດ​ອັນ​ໃຫຍ່​ຫຼວງຫຼາຍ​ປະການ ແຕ່​ພວກ​ເຮົາ​ກໍ່​ມີ​ສິ່ງ​ທ້າ​ທາຍ​ທົດ​ສອບ​ອັນ​ໃໝ່ ແລະ ສັບສົນ​ທີ່​ສຸດ​ໃນ "ໂລກາ​ພິ​ວັດ" ແລະ " ການເຊື່ອມ​ໂຍງ​ສາກົນ" ຊຶ່ງ​ມັນ​ຮຽກຮ້ອງ​ໃຫ້​ພວກ​ເຮົາ​ຕ້ອງ​ຢຶດ​ໝັ້ນ​ຄວາມ​ສາມັກຄີ​ເປັນ​ປຶກ​ແຜ່ນ, ສືບຕໍ່​ຈັດ​ຕັ້ງ​ປະຕິບັດ​ມະຕິ​ກອງ​ປະ ຊຸມ​ ໃຫຍ່​ຂອງ​ພັກ​ໃຫ້​ເກີດ​ດອກ​ອອກ​ ຜົນ​ເປັນ​ຈິງ.

   ພວກ​ເຮົາ​ເຫັນ​ວ່າ: ໃນ​ຫຼາຍ​ສິບ​ປີ​ມາ​ນີ້, ລັດທິ​ສັງຄົມ​ນິຍົມ ມີ​ທັງ​ໄລຍະ​ຮຸ່ງເຮືອງ, ໄລຍະ​ໝົ່ນ​ໝອງ ແຕ່​ຄຸນຄ່າ​ການ​ປະຕິວັດ ເດືອນ​ຕຸລາ ຍັງ​ຄົງ​ອະມະຕະ, ຍັງ​ເປັນ​ທ່າ​ອ່ຽງ​ສູ້​ຊົນ​ບຸກ​ບືນ​ຂອງ​ມວນ​ມະ​ນຸດ.