ຊີວະປະຫວັດຫຍໍ້ ຂອງ ທ່ານ ນາງ ມາຣີສ ເພນ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 21/02/2022 15:19:13 ຈຳ​ນວນ​ຜູ້​ເຂົ້າ​ຢ້ຽມ​ຊົມ 9261 ຄັ້ງ

ທ່ານ ນາງ ມາ​ຣີ​ສ ເພນ ໄດ້ຮັບການແຕ່ງຕັ້ງເປັນລັດຖະມົນຕີກະ​ຊວງການຕ່າງປະເທດອົສຕຣາລີ ໃນວັນທີ 28 ສິງຫາ 2018 ແລະ ໄດ້ຖືກແຕ່ງຕັ້ງເປັນລັດຖະມົນຕີວຽກງານແມ່ຍິງ ໃນເດືອນພຶດສະພາ ປີ 2019.

ທ່ານໄດ້ເປັນສະມາຊິກສະພາສູງຂອງ ລັດ NSW ຕັ້ງແຕ່ປີ 1997, ທ່ານໄດ້ກາຍເປັນສະມາຊິກສະພາສູງເພດຍິງ ທີ່ຍາວນານທີ່ສຸດ ແລະ ເປັນສະມາຊິກສະພາເພດຍິງທີ່ເຮັດວຽກຢູ່ໃນສະພາຍາວນານຕໍ່ເນື່ອງທີ່ສຸດໃນປະຫວັດ     ສາດຂອງປະເທດອົສຕຣາລີ. ທ່ານເປັນອະດີດລັດຖະມົນຕີກະຊວງບໍລິການປະຊາຊົນ, ໄດ້ເປັນລັດຖະມົນຕີເງົາຂອງຫຼາຍກະຊວງ ແລະ ເປັນຄະນະປະຈຳກຳມາທິການສະພາແຫ່ງຊາດການຕ່າງປະເທດ, ກຳມາທິການປ້ອງກັນປະເທດ ແລະ ກຳມາທິການການຄ້າ ເປັນໄລຍະເວລາ 12 ປີ.

ທ່ານໄດ້ຖືກແຕ່ງຕັ້ງເປັນລັດຖະມົນຕີກະຊວງປ້ອງກັນປະເທດ ໃນເດືອນກັນຍາ 2015 ເຖິງເດືອນສິງຫາ ປີ 2018. ໃນໄລຍະດັ່ງກ່າວ, ທ່ານໄດ້ນຳພາການສ້າງຍຸດທະສາດເອກະສານປົກຂາວດ້ານການປ້ອງກັນປະເທດ ປີ 2016, ສ້າງແຜນການລົງທຶນແບບປະສົມປະສານ ແລະ ນະໂຍບາຍອຸດສາຫະກໍາປ້ອງກັນປະເທດ. ທ່ານ​ໄດ້​ຊີ້ນຳວຽກງານການ​ປ່ຽນ​ໃໝ່​ດ້ານການເສີມສ້າງຄວາມອາດສາມາດ​ຂອງ​ກອງ​ກຳລັງ​ປ້ອງ​ກັນ​ປະ​ເທດ​ອົສຕຣາ​ລີ ​ແລະ ​ໄດ້​ນຳພາ​ການເສີມຂະຫຍາຍໂຄງການ ການຮ່ວມມືສາກົນຕ່າງໆ ກັບ​ບັນດາ​ປະເທດພັນທະ​ມິດ ​ແລະ ບັນດາປະເທດ​ຄູ່​ຮ່ວມ​ມືຕ່າງໆ.

ທ່ານໄດ້ເປັນສະມາຊິກຂອງພັກ Liberal Party ຕັ້ງແຕ່ປີ 1982 ຊຶ່ງຮັບໜ້າທີ່ເປັນຜູ້ບໍລິຫານ ຂອງລັດ NSW ເປັນເວລາ 10 ປີ ແລະ ເປັນປະທານເພດຍິງຄົນທໍາອິດຂອງ ຊາວໜຸ່ມ ພັກ Liberal Party.

ທ່ານ ລັດຖະມົນຕີ ໄດ້ຈົບການສຶກສາລະດັບ ປະລິນຍາຕີ ດ້ານກົດໝາຍ ແລະ ປະລິນຍາຕີ ດ້ານສິລະປະ ສັງຄົມ ຈາກມະຫາວິທະຍາໄລ NSW.

ທ່ານ ລັດຖະມົນຕີ ແລະ ຄອບຄົວ ທ່ານ Stuart Ayres ຊຶ່ງເປັນລັດຖະມົນຕີ ຈຳປະຈຳລັດ NSW ສໍາລັບ ນະຄອນຊີດນີ ຕາເວັນຕົກ, WestConnex ແລະ ກິລາ, ອາໄສຢູ່ນະຄອນຊີດນີ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ

ສະ​ແດງ​ຄວາມ​ຄິດ​ເຫັນ

ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ