ວັນທີ 10 ພະຈິກ ຜ່ານມາ ທີ່ພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຄຳມ່ວນ ໄດ້ຈັດກອງປະຊຸມເພື່ອປະກອບຄຳເຫັນໃສ່ຮ່າງແຜນດຳເນີນງານ ຈັດປີທ່ອງທ່ຽວລາວ 2024 ແຂວງຄຳມ່ວນ ໂດຍການເປັນປະທານຂອງທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ, ມີບັນດາຄະນະພະແນກການອ້ອມຂ້າງແຂວງ, ຂະແໜງການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມ ບັນດາທ່ານທີ່ເຂົ້າຮ່ວມແມ່ນໄດ້ພ້ອມກັນຄົ້ນຄວ້າ ແລະ ປະກອບຄຳຄິດຄຳເຫັນ ໃສ່ບັນດາເນື້ອໃນເອກະສານຕ່າງໆ ເປັນຕົ້ນແມ່ນເນື້ອໃນຂໍ້ຕົກລົງຂອງທ່ານເຈົ້າແຂວງຄຳມ່ວນ ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນຳລວມ ແລະ ບັນດາອະນຸກຳມະການຕ່າງໆ ໃນການຈັດງານສະເຫຼີມສະຫຼອງປີທ່ອງທ່ຽວລາວ 2024, ຮ່າງແຜນດຳເນີນງານ ແລະ ຮ່າງບົດແນະນຳກ່ຽວກັບການຈັດປີທ່ອງທ່ຽວລາວ ປີ 2024 ຢູ່ແຂວງຄຳມ່ວນ.
ສຳລັບປີທ່ອງທ່ຽວລາວ 2024 ແຂວງຄຳມ່ວນແມ່ນໄດ້ກະກຽມ 3 ກິດຈະກຳໃຫຍ່ ໃນນັ້ນມີກິດຈະກຳລະດັບຊາດ 1 ກິດຈະກຳ ຄື: ງານບຸນນະມັດສະການພຣະທາດສີໂຄດຕະບອງ ຊຶ່ງຈະຈັດຂຶ້ນໃນມື້ຂຶ້ນ 15 ຄໍ່າ ເດືອນກຸມພາ 2024 ໂດຍມີ 8 ກິດຈະກຳຍ່ອຍໃນງານດັ່ງກ່າວ, ສ່ວນກິດຈະກຳລະດັບແຂວງ ມີ 2 ກິດຈະກຳຄື: ກິດຈະກໍາທ່ອງທ່ຽວວົງຈອນ ເດີລູບ ຊຶ່ງຕິດພັນກັບແຫຼ່ງທ່ອງທ່ຽວ 6 ເມືອງຄື: ທ່າແຂກ, ມະຫາໄຊ, ຍົມມະລາດ, ນາກາຍ, ຄູນຄຳ ແລະ ເມືອງຫີນບູນ ປະກອບມີທັງໝົດ 16 ກິດຈະກຳຍ່ອຍ ແລະ ກິດຈະກຳບຸນລະນຶກເຫດການ 21 ມີນາ 1946 ຈັດຂຶ້ນໃນເດືອນມີນາ 2024 ປະກອບມີ 4 ກິດຈະກຳຍ່ອຍ. ນອກຈາກ 3 ກິດຈະກຳໃຫຍ່ນີ້ ບັນດາກິດຈະກຳການທ່ອງທ່ຽວອື່ນໆຂອງແຂວງກໍຈະໄດ້ຈັດຕັ້ງປະຕິບັດໄປພ້ອມໆກັນ. ປັດຈຸບັນແຂວງຄຳມ່ວນມີແຫຼ່ງທ່ອງທ່ຽວທັງໝົດ 209 ແຫ່ງ, ໃນນັ້ນແຫຼ່ງທ່ອງທ່ຽວທາງທໍາມະຊາດ 145 ແຫ່ງ, ປະຫວັດສາດ 31 ແຫ່ງ ແລະ ວັດທະນະທຳ 33 ແຫ່ງ, ເປີດໃຊ້ບໍລິການແລ້ວຈຳນວນ 87 ແຫ່ງ ແລະ ມີເອກະຊົນສຳປະທານເພື່ອພັດທະນາແລ້ວ  8 ແຫ່ງ, ສະຖານທີ່ທ່ອງທ່ຽວໄດ້ຮັບການພັດທະນາແລ້ວ 23 ແຫ່ງ, ທົ່ວແຂວງມີໂຮງແຮມທັງໝົດ 26 ແຫ່ງ, ເຮືອນພັກ 93 ແຫ່ງ, ຣີສອດ 9 ແຫ່ງ, ຮ້ານອາຫານ 103 ແຫ່ງ, ຮ້ານກິນດື່ມ-ບັນເທິງ 63 ແຫ່ງ.
ພິເສດ ໃນປີ 2024 ແຂວງຄຳມ່ວນຈະໄດ້ເປີດແຫຼ່ງທ່ອງທ່ຽວທາງທຳມະຊາດເພີ່ມອີກ 2 ແຫ່ງຄື: ແຫຼ່ງທ່ອງທ່ຽວຂຸນກອງແລງ ເມືອງຫີນບູນ ແລະ ຕາດຊຽງລື ເມືອງບົວລະພາ ຊຶ່ງຈະເປັນອີກໜຶ່ງທ່າແຮງທີ່ສຳຄັນ ໃນການດຶງດູດນັກທ່ອງທ່ຽວ ເຂົ້າມາທ່ຽວແຂວງຄຳມ່ວນຫຼາຍຂຶ້ນ.
ຂ່າວ-ພາບ: ກອງຄໍາ