ໂດຍ:ວັນໄຊ ຕະວິນຍານ
ກະຊວງແຮງງານ ແລະ ສະຫວັດດີການສັງຄົມ(ຮສສ) ພັດທະນາສີມືແຮງງານ ເພື່ອໃຫ້ຊາວໜຸ່ມໄດ້ຝຶກວິຊາຊີບ ແລະ ມີວຽກເຮັດງານທຳ.
ອີງໃສ່ຜົນການສຳຫຼວດກຳລັງແຮງງານຄັ້ງທີ 3 ໃນປີ 2022 ຜ່ານມາ, ພົນລະເມືອງມີທັງໝົດປະມານ 7,4 ລ້ານຄົນ,ໃນນັ້ນ ຜູ້ຢູ່ໃນເກນອາຍຸອອກແຮງງານ 15 ປີຂຶ້ນໄປມີ 5,3 ລ້ານຄົນຫຼື 71,6%ຂອງພົນລະເມືອງທັງໝົດ.ພົນລະເມືອງທີ່ເປັນກໍາລັງແຮງງານ ມີປະມານ 2,5 ລ້ານຄົນ ຫຼື ປະມານ 47,1% ຂອງຜູ້ຢູ່ໃນເກນອາຍຸອອກແຮງງານ. ໃນນັ້ນ, ຜູ້ເຮັດວຽກທີ່ເຂົ້າສູ່ຕຳແໜ່ງງານພາຍໃນ ແລະ ຕ່າງປະເທດ (ພາກລັດ ແລະ ວິສາຫະກິດ) ທີ່ມີເງິນເດືອນກວມປະມານ 33,5% ແລະ ຜູ້ທີ່ປະກອບອາຊີບອິດສະຫຼະ ແລະ ເຮັດວຽກໃຫ້ຕົນເອງທີ່ບໍ່ມີເງິນເດືອນກວມເອົາປະມານ 66,5% ຊຶ່ງໄດ້ແຍກກຳລັງແຮງງານຕາມໂຄງປະກອບເສດຖະກິດຄື: ຂະແໜງກະສິກຳ 56,9%, ອຸດສາຫະກຳ  10,2% ແລະ ບໍລິການ  32,9%. ມີຜູ້ວ່າງງານ 61.207 ຄົນ ຫຼື 2,4% ໃນນີ້: ອາຍຸລະຫວ່າງ 15-24 ປີ ຊຶ່ງເປັນຊາວໜຸ່ມທີ່ຈະເຂົ້າສູ່ຕະຫຼາດແຮງງານໃໝ່ຈຳນວນ 24.100 ຄົນ.