ໃນວັນທີ 20 ພະຈິກນີ້ທີ່ຫ້ອງປະຊຸມເມືອງວຽງຄຳສ່ວຍສາອາກອນປະຈຳແຂວງວຽງຈັນ ໄດ້ຈັດກອງປະຊຸມເຜີຍແຜ່ວຽກງານຄຸ້ມຄອງລາຍຮັບຈາກທີ່ດິນ, ນິຕິກຳທີ່ກ່ຽວຂ້ອງຈຳນວນໜຶ່ງ ແລະ ວຽກງານຄຸ້ມຄອງການເກັບລາຍຮັບຄ່າທຳນຽມທາງ ໂດຍການເຂົ້າຮ່ວມຂອງທ່ານ ວອນ ວໍລະສານ ຫົວໜ້າພະແນກການເງິນແຂວງ, ມີຫົວໜ້າ, ຮອງຫົວໜ້າພະແນກ, ຮອງເຈົ້າເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
        ທ່ານ ວອນ ວໍລະສານ ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອເປັນການຈັດຕັ້ງຜັນຂະຫຍາຍການນຳໃຊ້ລະບົບຄຸ້ມຄອງການຈັດເກັບລາຍຮັບພາສີທີ່ດິນແບບເອເລັກໂຕຣນິກ ແລະ ການຊຳລະຜ່ານລະບົບ TaxRISເພື່ອໃຫ້ທຸກພາກສ່ວນກ່ຽວຂ້ອງມີຄວາມເຂົ້າໃຈໃນການຈັດຕັ້ງປະຕິບັດພັນທະຂອງຕົນ. ພ້ອມນີ້ທ່ານໄດ້ເນັ້ນໃຫ້ຜູ້ເຂົ້າຮ່ວມຈົ່ງເອົາໃຈໃສ່ຕິດຕາມ ຮັບຟັງການເຜີຍແຜ່ຫາກມີບັນຫາທີ່ຍັງບໍ່ທັນຈະແຈ້ງ ຫຼືບໍ່ເຂົ້າໃຈໃຫ້ມີການປຶກສາຫາລືແລກປ່ຽນຄຳຄິດຄຳເຫັນຢ່າງເລິກເຊິ່ງ ເພື່ອຮັບປະກັນໃນການຈັດຕັ້ງປະຕິບັດໃຫ້ມີໝາກຜົນສູງສຸດ.
        ເອກະສານທີ່ນຳມາເຜີຍແຜ່ຄັ້ງນີ້ປະກອບມີ: ແຈ້ງການຂອງຫ້ອງການກະຊວງການເງິນ ວ່າດ້ວຍການເສຍພາສີທີ່ດິນປະຈຳປີ 2023; ຄຳແນະນຳຂອງກົມສ່ວຍສາອາກອນ ວ່າດ້ວຍການເສຍພາສີທີ່ດິນປະຈຳປີ 2023; ກົດໝາຍທີ່ດິນ,ການບັນທຶກຂໍ້ມູນເຂົ້າປຶ້ມສຳມະໂນທີ່ດິນ, ຂໍ້ມູນເຂົ້າຮ່າງເອັກເຊວ, ບັນທຶກເຂົ້າລະບົບ TaxRISແລະ ໃບເກັບເງິນຄ່າພາສີທີ່ດິນ ແລະ ວຽກງານການເສຍຄ່າທຳນຽມທາງປີ 2023 ແລະ ອື່ນໆ. ຂ່າວ-ພາບ: ແກ້ວອຸດົມ