ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ ພ້ອມດ້ວຍຫົວໜ້າພະແນກການ, ພາກສ່ວນທີ່ກ່ຽວຂ້ອງ ໄດ້ລົງຕິດຕາມ, ກວດກາ ສະຖານທີ່ ທີ່ຈະສ້າງໃຫ້ກາຍເປັນຕະຫຼາດກາງຄືນ ໃນວັນທີ 1 ທັນວາ ຜ່ານມາ ຊຶ່ງເລີ່ມແຕ່ ບໍລິເວນ 4 ແຍກໄຟແດງ ພະແນກສຶກສາທິການ ແລະ ກິລາແຂວງ ໄປເຖິງ ໜ້າພະແນກພາຍໃນແຂວງ. 
ໃນບໍລິເວນດັ່ງກ່າວແມ່ນໄດ້ມີການປັບປຸງຂະຫຍາຍທັງສອງຝາກທາງ ເພື່ອກຳນົດໃຫ້ເປັນທາງຍ່າງອອກກຳລັງກາຍໃນເບື້ອງຕົ້ນ ໂດຍໄດ້ເລີ່ມປັບປຸງກໍ່ສ້າງໃນທ້າຍປີ 2022 ມາຮອດປັດຈຸບັນແມ່ນໃກ້ຈະສຳເລັດ 100%ຊຶ່ງພາຍຫຼັງກໍ່ສ້າງສໍາເລັດ ທາງການນໍາຂອງແຂວງຄໍາມ່ວນກໍໄດ້ມີແຜນທີ່ຈະສ້າງໃຫ້ກາຍເປັນຕະຫຼາດກາງຄືນ ໂດຍຈະເນັ້ນໃສ່ໃນການສົ່ງເສີມ ແລະ ວາງຈຳໜ່າຍຜະລິດຕະພັນສິນຄ້າພາຍໃນ, ອາຫານທີ່ເປັນເອກະລັກຂອງທ້ອງຖິ່ນ ແລະ ຈະບໍ່ອະນຸຍາດໃຫ້ຈຳໜ່າຍສິ່ງມຶນເມົາຕ່າງໆ ໂດຍຈະເລີ່ມໃຫ້ປະຊາຊົນໄດ້ນໍາເອົາສິນຄ້າມາວາງຈຳໜ່າຍ ເລີ່ມແຕ່ 18:00 - 24:00 ໂມງ.
ໃນການລົງຕິດຕາມຄັ້ງນີ້ ກໍເພື່ອກວດກາເບິ່ງສະຖານທີ່ຕົວຈິງ ເພື່ອມີການຈັດສັນ, ແບ່ງໂຊນ ໃນການຈໍາໜ່າຍຜະລິດຕະພັນໃຫ້ລະອຽດ, ມີການກຳນົດສະຖານທີ່ຈອດລົດ, ການປະດັບປະດາໄຟແສງສີ ເພື່ອເພີ່ມສີສັນໃຫ້ມີຄວາມສະຫວ່າງ, ສວຍງາມແລະ ອື່ນໆແນໃສ່ສ້າງໃຫ້ກາຍເປັນກິດຈະກຳໜຶ່ງທີ່ສ້າງແຮງຈູງໃຈ ແລະ ດຶງດູດນັກທ່ອງທ່ຽວ ເພື່ອຮອງຮັບໃຫ້ແກ່ການເປີດປີທ່ອງທ່ຽວລາວ 2024 ທີ່ຈະມາເຖິງນີ້.
(ຂ່າວ-ພາບ: ແຂວງຄຳມ່ວນ)