ໃນວັນທີ 5ທັນວາ ຜ່ານມາ, ທ່ານ ວັນໄຊ ຟອງສະຫວັນ ເຈົ້າແຂວງຄໍາມ່ວນ ແລະ ທ່ານ ໂພໄຊ ພົມມະທຳ ຮັກສາການຫົວໜ້າໄຟຟ້າສາຂາແຂວງຄຳມ່ວນພ້ອມດ້ວຍການນຳຂັ້ນແຂວງ, ບັນດາພະແນກ ແລະ ຫ້ອງການທີ່ກ່ຽວຂ້ອງ, ໄດ້ຮ່ວມກັນລົງສຳຫຼວດກວດກາໂຄງການປັບປຸງຍົກຍ້າຍເສົາໄຟຟ້າ ແລະ ເສົາໄຟເຍືອງທາງ ໃນເສັ້ນທາງເຂດວົນວຽນຫຼັກ2 ບ້ານສັນຕິສຸກ ເມືອງທ່າແຂກ ແຂວງຄຳມ່ວນ.
ການລົງສຳຫຼວດຄັ້ງນີ້ເພື່ອເປັນການກະກຽມຄວາມພ້ອມໃນປີທ່ອງທ່ຽວລາວ 2024 ກໍຄືການທ່ອງທ່ຽວພາຍໃນສາຂາແຂວງຄໍາມ່ວນ ແລະໃຫ້ເສັ້ນຫຼວງພາຍໃນຕົວເມືອງເທດສະບານແຂວງມີໄຟເຍືອງທາງຮຸ່ງສະຫວ່າງສວຍງາມ, ການຈັດສັນເສົາໄຟຟ້າ, ເສົາສັນຍານໂທລະຄົມມີຄວາມເປັນລະບຽບຮຽບຮ້ອຍ ແລະ ມີຄວາມປອດໄພໄດ້ມາດຕະຖານເຕັກນິກ. ໂດຍລັດວິສາຫະກິດໄຟຟ້າລາວ ສາຂາແຂວງຄຳມ່ວນ ໄດ້ສຳຫຼວດຂຶ້ນແຜນຍົກຍ້າຍເສົາໄຟຟ້າ ຈຳນວນ 1 ຕົ້ນ, ເສົາໄຟຟ້າເຍືອງທາງ ຈຳນວນ 1 ຕົ້ນ ແລະ ເສົາສັນຍານໂທລະຄົມ 1 ຕົ້ນ ໃຫ້ສຳເລັດຄຽງຄູ່ໄປພ້ອມກັບການປັບປຸງຂະຫຍາຍເສັ້ນທາງດັ່ງກ່າວ.
(ຂ່າວ-ພາບ: ແຂວງຄຳມ່ວນ)