ໃນອາທິດຜ່ານທີ່ບ້ານຫ້ວຍໂກນເມືອງວຽງຄໍາແຂວງຫຼວງພະບາງໄດ້ມີພີເປີດນໍາໃຊ້ໄຟຟ້າໃນລະບົບໃຫ້ປະຊາຊົນພາຍໃນບ້ານໂດຍມີທ່ານຈັນສອນຈັນມະວົງຫົວໜ້າຫ້ອງການພະລັງງານແລະບໍ່ແຮ່ເມືອງວຽງຄໍາ, ທ່ານບຸນແທນຄໍາພິລາດຕາງໜ້າບໍລິສັດພີເອັດ (PS) ຜູ້ຮັບເໝົາກໍ່ສ້າງຕາຂ່າຍໄຟຟ້າ, ພ້ອມດ້ວຍຂະແໜງການທີ່ກ່ຽວຂ້ອງຂອງເມືອງ, ອົງການປົກຄອງບ້ານຕະຫຼອດປະຊາຊົນພາຍໃນບ້ານເຂົ້າຮ່ວມ. 
ໃນພິທີທ່ານບຸນແທນຄໍາພິລາດໄດ້ຜ່ານບົດສະຫຼຸບວ່າ: ບ້ານຫ້ວຍໂກນຂຶ້ນກັບກຸ່ມເມືອງບ້ານໝ້ວຍຫ່າງຈາກເສັ້ນທາງເລກ1C ປະມານ7ກິໂລແມັດ, ມີ51ຄອບຄົວ, ພົນລະເມືອງ342ຄົນຍິງ231ຄົນ, ບໍລິສັດຮັບເໝົາກໍ່ສ້າງໄດ້ລົງມືກໍ່ສ້າງຕາຂ່າຍໄຟຟ້າເລີ່ມແຕ່ວັນທີ10ເມສາ2023ເປັນຕົ້ນມາມູນຄ່າການກໍ່ສ້າງ3ຕື້2ຮ້ອຍກວ່າລ້ານກີບຊຶ່ງເປັນທຶນຂອງລັດ100%ປັດຈຸບັນແມ່ນກໍ່ສ້າງສໍາເລັດແລະເປີດນໍາໃຊ້ໄຟຟ້າ, ມີຄອບຄົວລົງໝໍ້ນັບໄຟຊົມໃຊ້ໄຟຟ້າຈໍານວນ50ຄອບຄົວກວມເອົາເກືອບ100%ຂອງຈຳນວນຄອບຄົວທັງໝົດ; ໂອກາດນີ້ຜູ້ເຂົ້າຮ່ວມໄດ້ມີຄໍາເຫັນຕໍ່ການຈັດຕັ້ງປະຕິບັດວຽກງານໃນໄລຍະຜ່ານມາຈາກນັ້ນທ່ານສົມລິດຈັນທະມາລີຫົວໜ້າສູນບໍລິການໄຟຟ້າເມືອງວຽງຄໍາໄດ້ແນະນໍາວິທີແລະເຕັກນິກການຊົມໃຊ້ແນໃສ່ເຮັດໃຫ້ການຊົມໃຊ້ຂອງປະຊາຊົນມີຄວາມຖືກຕ້ອງ, ປອດໄພ.
ຕອນທ້າຍ,ທ່ານຈັນສອນຈັນມະວົງໄດ້ມີຄໍາເຫັນຕໍ່ອົງການປົກຄອງບ້ານແລະປະຊາຊົນຕ້ອງເປັນເຈົ້າການປົກປັກຮັກສາ, ມີສະຕິໃນການຊົມໃຊ້ໃຫ້ມີຄວາມປອດໄພແລະຊົມໃຊ້ໃຫ້ເກີດປະໂຫຍດສູງສຸດ.
(ຂ່າວ-ພາບ: ບຸນທັນໄຊຍະວົງເມືອງວຽງຄໍາ)