ກອງປະຊຸມສະຫຼຸບຜົນການປະເມີນ ແລະປິດໂຄງການສຸຂະພາບຈະເລີນພັນ, ເດັກເກີດໃໝ່, ເດັກນ້ອຍ ແລະໄວໜຸ່ມ ໄດ້ຈັດຂຶ້ນໃນວັນທີ 13 ທັນວາ ຜ່ານມາທີ່ສະໂມສອນເມືອງລະມາມ ແຂວງເຊກອງ, ໂດຍການເຂົ້າຮ່ວມຂອງທ່ານ  ພູຂັນ ຈັນທະວົງ ຮອງຫົວໜ້າພະແນກສາທາລະນະສຸກແຂວງເຊກອງ, ມີທ່ານ ອາຈິດ ປາຣິດາ ຜູ້ອໍານວຍການແຜນງານຂອງອົງການແຄຣ ນານາຊາດປະຈໍາລາວ, ມີບັນດາກະຊວງກ່ຽວຂ້ອງ, ການນໍາຈາກ 3 ເມືອງ ແລະຜູ້ປະສານງານໂຄງການເຂົ້າຮ່ວມ.
    ທ່ານ ໂຢຊາ ເຢ່ຍລໍ ທີ່ປຶກສາດ້ານການຕິດຕາມ ແລະປະເມີນຜົນໂຄງການຂອງອົງການແຄຣ ນານາຊາດ ປະຈໍາລາວລາຍງານໃຫ້ຮູ້ວ່າ: ໂຄງການສຸຂະພາບຈະເລີນພັນ, ເດັກເກີດໃໝ່, ເດັກນ້ອຍ ແລະໄວໜຸ່ມ ໄດ້ເລີ່ມຈັດຕັ້ງປະຕິບັດຢູ່ແຂວງເຊກອງ ໄລຍະ 4 ປີ(2020-2023) ຢູ່ໃນ 3 ເມືອງຄື: ເມືອງລະມາມ, ດາກຈຶງ ແລະເມືອງກະລຶມ ຊຶ່ງໂຄງການນີ້ມີ 4 ຈຸດປະສົງສະເພາະຄື: ປັບປຸງຄຸນນະພາບຂອງການບໍລິການສຸຂະພາບຈະເລີນພັນ  ແມ່, ເດັກເກີດໃໝ່ ແລະເດັກນ້ອຍ, ເສີມສ້າງຄວາມຮູ້ຂອງຊຸມຊົນ ແລະການປ່ຽນແປງພຶດຕິກໍາດ້ານສຸຂະພາບຈະເລີນພັນ ແມ່, ເດັກເກີດໃໝ່ ແລະ ເດັກນ້ອຍ, ປັບປຸງຄວາມເຂັ້ມແຂງດ້ານເສດຖະກິດຂອງແມ່ຍິງ ແລະ ການພັດທະນາເສດຖະກິດ-ສັງຄົມ, ປັບປຸງ ແລະ ເສີມສ້າງຄວາມເຂັ້ມແຂງດ້ານໂພຊະນາການ ແລະການນໍາພາດ້ານສາທາລະນະສຸກໃນທຸກຂັ້ນ, ໃນນັ້ນ ຢູ່ເມືອງລະມາມ ໄດ້ຈັດຕັ້ງປະຕິບັດ ໃນ 5 ບ້ານ, ມີຜູ້ໄດ້ຮັບຜົນປະໂຫຍດ 474 ຄົນຍິງ 253 ຄົົນ, ເມືອງດາກຈຶງ ມີ 30 ບ້ານ, ມີຜູ້ໄດ້ຮັບຜົນປະໂຫຍດ 468 ຄົນຍິງ 231 ຄົົນ, ເມືອງກະລຶມ ມີ 10 ບ້ານ, ມີຜູ້ໄດ້ຮັບຜົນປະໂຫຍດ 224 ຄົນຍິງ 108 ຄົົນ, ໂດຍສັງລວມແລ້ວທົົ່ວແຂວງມີ 45 ບ້ານ, ຜູ້ໄດ້ຮັບຜົນປະໂຫຍດຈາກໂຄງການ 15.496 ຄົນຍິງ 8.078 ຄົນ.
    ທັງນີ້, ເພື່ອປັບປຸງສະຖານະພາບດ້ານສຸຂະພາບ ແລະໂພຊະນາການໃນບັນດາແມ່ຍິງຖືພາໂດຍເນັ້ນໃສ່ແມ່ຍິງຢູ່ບັນດາເມືອງທີ່ຢູ່ເຂດຫ່າງໄກສອດຫຼີກເພື່ອໃຫ້ເຂົາເຈົ້າໄດ້ເຂົ້າເຖິງຂໍ້ມູນຂ່າວສານດ້ານສາທາລະນະສຸກ, ແມ່ຍິງທີ່ລ້ຽງລູກດ້ວຍນົມແມ່ ແລະເດັກອາຍຸ 0-2 ປີ ໂດຍຜ່ານການເຂົ້າເຖິງ ແລະນໍາໃຊ້ການບໍລິການດ້ານສາທາລະນະສຸກ, ພຶດຕິກໍາ ແລະການປະຕິບັດຂອງຊຸມຊົນທີ່ມີຄຸນນະພາບ.
ຂ່າວ-ພາບ: ພຸດທະສອນ