ຄະນະບໍລິຫານງານຊາວໜຸ່ມແຂວງສາລະວັນ ໄດ້ຈັດກອງປະຊຸມສຳມະນາວິທະຍາສາດຊາວໜຸ່ມ 4 ແຂວງພາກໃຕ້ໃນຫົວຂໍ້: "ແກ້ໄຂປະກົດການຫຍໍ້ທໍ້ຕິດພັນກັບການແກ້ໄຂ 2 ວາລະແຫ່ງຊາດຊາວໜຸ່ມເຍົາວະຊົນ" ຂຶ້ນໃນວັນທີ14 ທັນວາຜ່ານມາ ທີ່ສະໂມສອນວິທະຍາໄລຄູສາລະວັນ ໂດຍການເປັນປະທານຂອງທ່ານ ນວນທອງ ສຸວັນມີໄຊ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ມີທ່ານ ສຸວຽງທອງ ສຸຂະວົງ ຮັກສາການເລຂາຄະນະບໍລິຫານງານຊາວໜຸ່ມແຂວງ, ມີການນໍາພັກ-ລັດ, ພະແນກການ, ຊາວໜຸ່ມ-ເຍົາວະຊົນ 4 ແຂວງພາກໃຕ້ ຄື: ນະຄອນປາກເຊ, ເຊກອງ ແລະ ອັດຕະປືເຂົ້າຮ່ວມ.

            ທ່ານ ສຸວຽງທອງ ສຸຂະວົງ ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອຫວນຄືນມູນເຊື້ອການສະເຫຼີມສະຫຼອງວັນສະຖາປະນາ ສປປລາວ ຄົບຮອບ 48 ປີ, ວັນເກີດປະທານ ໄກສອນ ພົມວິຫານ ຄົບຮອບ 103 ປີ ແລະ ວັນສ້າງຕັ້ງກອງເຍົາວະຊົນ ຄົບຮອບ 68 ປີຕິດພັນກັບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງ XI ຂອງສູນກາງພັກກໍຄືການຈັດຕັ້ງປະຕິບັດການແກ້ໄຂ 2 ວາລະແຫ່ງຊາດ ຊຶ່ງວຽກງານຊາວໜຸ່ມ-ເຍົາວະຊົນ-ອະນຸຊົນທັນວາ ເປັນວຽກງານຍຸດທະຍາດໜຶ່ງທີ່ສຳຄັນຕິດພັນກັບໜ້າທີ່ການເມືອງຂອງພັກ; ໃນແຕ່ລະໄລຍະພັກ-ລັດໄດ້ຊອກທຸກກາລະໂອກາດສ້າງເງື່ອນໄຂໃຫ້ສະມາຊິກຊາວໜຸ່ມ-ເຍົາວະຊົນທັນວາໄດ້ເຂົ້າສູ່ການຈັດຕັ້ງເພື່ອສຶກສາອົບຮົມໃຫ້ຊາວໜຸ່ມ-ເຍົາວະຊົນຫ່າງໄກຈາກສິ່ງເສບຕິດ. ຈາກນັ້ນ, ຜູ້ເຂົ້າຮ່ວມຍັງໄດ້ຮັບຟັງການນຳສະເໜີຫົວຂໍ້ຈາກຕາງໜ້າແຕ່ລະແຂວງ.

            ກອງປະຊຸມຄັ້ງນີ້ຈັດຂຶ້ນເພື່ອເປັນການພົບປະແລກປ່ຽນບົດຮຽນຊຶ່ງກັນ ແລະກັນ ລະຫວ່າງຄະນະຊາວໜຸ່ມ4 ແຂວງພາກໃຕ້ ຊຶ່ງຈະໄດ້ລົງເລິກແກ້ໄຂບັນຫາປະກົດການຫຍໍ້ທໍ້ຕ່າງໆ ຕິດພັນກັບການແກ້ໄຂ 2 ວາລະແຫ່ງຊາດ

ຂ່າວ-ພາບ: ລັດຕະນາ ແສງສຸວັນ