ໃນວັນທີ 15 ທັນວາຜ່ານມາ, ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ( ຖວທ ) ແຂວງຄໍາມ່ວນໄດ້ຈັດພິທີເຜີຍແຜ່ກົດໝາຍ,ນິຕິກຳກ່ຽວກັບວຽກງານສື່ມວນຊົນ ໂດຍການເປັນປະທານຂອງທ່ານ ມະໂນທອງ ພົງສະຫວັດ ຮອງຫົວໜ້າພະແນກ ຖວທ ແຂວງ ຜູ້ຊີ້ນຳວຽກງານສື່ມວນຊົນ,ມີບັນດາຂະແໜງ, ກອງວິຊາການຫ້ອງການ ຖວທ ເມືອງ ແລະ ນັກຂ່າວຈາກພາກສ່ວນຕ່າງໆອ້ອມຂ້າງເຂົ້າຮ່ວມ.

ທ່ານ ເພັນດາໄລ ຈັນທະວົງ ຮອງຫົວໜ້າຂະແໜງຖະແຫຼງຂ່າວ ໄດ້ຜ່ານກົດໝາຍສື່ມວນຊົນ ແລະ ຈັນຍາບັນຂອງນັກຂ່າວ ພ້ອມທັງຍົກໃຫ້ເຫັນເຖິງວຽກງານສື່ມວນຊົນຂອງແຂວງໃນໄລຍະຜ່ານມາ. ພ້ອມທັງຜ່ານຂໍ້ຕົກລົງວ່າດ້ວຍຂໍ້ກໍານົດ ແລະ ລະບຽບການນໍາໃຊ້ບັດນັກຂ່າວ.

ໃນພິທີໄດ້ມອບບັດນັກຂ່າວໃຫ້ພາກສ່ວນຕ່າງໆ ຈາກພະແນກການອ້ອມຂ້າງ ແລະ ບັນດາເມືອງຈໍານວນ 42ຄົນ, ຍິງ 17 ຄົນ, ໃຫ້ກຽດມອບໂດຍທ່ານ ມະໂນທອງ ພົງສະຫວັດ ພ້ອມທັງມີຄຳເຫັນເນັ້ນໜັກໃຫ້ຜູ້ທີ່ເຮັດວຽກງານຂ່າວຕ້ອງໄດ້ຄົ້ນຄວ້າເຊື່ອມຊຶມແນວທາງຂອງພັກ-ລັດ, ບັນດານິຕິກຳຕ່າງໆທີ່ວາງອອກໃນແຕ່ລະໄລຍະ ເພື່ອນຳມາເຜີຍແຜ່ໃຫ້ສັງຄົມຮັບຮູ້ຢ່າງທົ່ວເຖິງ, ໃນນາມທີ່ພວກເຮົາເປັນນັກຂ່າວຕ້ອງກຳແໜ້ນສິດ-ໜ້າທີ່ຂອງນັກຂ່າວ ແລະ ຈັນຍາບັນຂອງນັກຂ່າວ, ການຕອບຕ້ານປະກົດການຫຍໍ້ທໍ້ ແລະ ຖ້ອຍທຳນອງບິດເບືອນຄວາມຈິງ ໂດຍສະເພາະສື່ສັງຄົມອອນລາຍໃຫ້ທັນກັບສະພາບການ, ທຸກຄັ້ງທີ່ເຄື່ອນໄຫວເກັບກຳຂ່າວຕ້ອງຖືບັດນັກຂ່າວຕິດຕົວທຸກຄັ້ງ.

ຂ່າວ: ມະນີວັນ