ວັນທີ 14 ທັນວາ ຜ່ານມາທີ່ຫ້ອງປະຊຸມພະແນກກະສິກຳ ແລະ ປ່າໄມ້ແຂວງຫຼວງນໍ້າທາໄດ້ຈັດກອງປະຊຸມປະເມີນຜົນການປະຕິບັດວຽກງານຂອງຄະນະນໍາພະແນກ ປະຈໍາປີ2023ໂດຍການເຂົ້າຮ່ວມຂອງ ທ່ານ ອ່ອນຈັນ ຄຳພາວົງ ກຳມະການປະຈຳພັກແຂວງ ຮອງເຈົ້າແຂວງ ຜູ້ຊີ້ນໍາຂົງເຂດເສດຖະກິດ, ມີທ່ານ ພິມແກ້ວ ທຳລະສິນ ກໍາມະການພັກແຂວງ ຫົວໜ້າພະແນກກະສິກຳ ແລະ ປ່າໄມ້ແຂວງ, ຮອງຫົວໜ້າພະແນກ, ບັນດາຫົວໜ້າຂະແໜງ-ຮອງຂະແໜງ, ຫົວໜ້າກອງ-ຮອງຫົວໜ້າກອງເຂົ້າຮ່ວມ.

ກອງປະຊຸມ ໄດ້ຜ່ານ ດໍາລັດ ເລກທີ 300 ວ່າດ້ວຍການປະເມີນຜົນການປະຕິບັດໜ້າທີ່ວຽກງານຂອງພະນັກງານ-ລັດຖະກອນມີ7ໝວດ, 29ມາດຕາ, ມາດຖານຂັ້ນຜູ້ມີຕໍາແໜ່ງບໍລິຫານແມ່ນແບ່ງເປັນສາມພາກຄື: ດ້ານຄຸນທາດການເມືອງ,ຄຸນສົມບັດສິນທໍາປະຕິວັດມີ 10 ມາດຖານ, ດ້ານຄວາມຮູ້, ຄວາມສາມາດ ແລະ ປະສົບການມີ 9 ມາດຖານ, ດ້ານຜົນສໍາເລັດໃນການປະຕິບັດວຽກງານມີ 4 ມາດຖານ, ພ້ອມດຽວກັນ ຄະນະນໍາຂອງພະແນກກະສິກຳ ແລະ ປ່າໄມ້ ແຂວງຫຼວງນໍ້າທາທັງ 4 ທ່ານໄດ້ຜັດປ່ຽນກັນຂຶ້ນຜ່ານໃບເກັບກ່ຽວຜົນງານໃນໄລຍະໜຶ່ງປີຜ່ານມາໃນການຈັດຕັ້ງປະຕິບັດໜ້າທີ່ວຽກງານ ພ້ອມນັ້ນຜູ້ເຂົ້າຮ່ວມແຕ່ລະທ່ານໄດ້ລົງຄະແນນໃຫ້ຄະນະນໍາຂອງພະແນກທັງ 4 ທ່ານຕາມເງື່ອນໄຂທີ່ວາງໄວ້ໃຫ້ເໝາະສົມກັບການຈັດຕັ້ງປະຕິບັດວຽກງານຂອງແຕ່ລະທ່ານ ເພື່ອເຮັດໃຫ້ວຽກງານດັ່ງກ່າວ ດໍາເນີນຢ່າງເປັນລະບົບ, ຖືກຕ້ອງ, ສອດຄ່ອງກັບແນວທາງນະໂຍບາຍຂອງພັກ ແລະ ກົດໝາຍຂອງລັດ, ເພື່ອຮັບປະກັນຄວາມເປັນເອກະພາບ, ໂປ່ງໃສ ແລະ ຖືກຕ້ອງກັບສະພາບຄວາມເປັນຈິງ, ແນໃສ່ເຮັດໃຫ້ວຽກງານການປະເມີນຜົນ ແລະ ຄຸ້ມຄອງຜົນການປະຕິບັດວຽກງານຂອງພະນັກງານ-ລັດຖະກອນທີ່ສັງກັດຢູ່ອົງການຈັດຕັ້ງພັກ-ລັດ ຂັ້ນສູງນກາງ ແລະ ອົງການປົກຄອງທ້ອງຖິ່ນ ໃນຂອບເຂດທົ່ວປະເທດໃຫ້ມີປະສິດທິພາບ ແລະ ປະສິດທິຜົນ, ຕີລາຄາປະເມີນຜົນຕາມມາດຕະຖານວັດແທກການປະເມີນຜົນ ແລະ ຜົນສໍາເລັດໃນການປະຕິບັດໜ້າທີ່ວຽກງານຂອງພະນັກງານ-ລັດຖະກອນຢ່າງເປັນລະບົບ ແລະ ຕໍ່ເນື່ອງ ຖືກຕ້ອງຕາມແຕ່ລະມາດຖານຢ່າງຄົບຖ້ວນ.

ຈາກນັ້ນ, ຜູ້ເຂົ້າຮ່ວມກໍໄດ້ປະກອບຄໍາຄິດຄໍາເຫັນ ໃຫ້ແກ່ຄະນະນຳພະແນກທັງ 4 ທ່ານ ເພື່ອເຮັດໃຫ້ແຕ່ລະທ່ານໄດ້ປັບປຸງຕົນເອງໃຫ້ສອດຄ່ອງກັບການເຄື່ອນໄຫວວຽກງານ ແລະ ການຊີ້ນໍາໆພາອ້າຍນ້ອງພະນັກງານພາຍໃນພະແນກ ໃຫ້ມີຄວາມຫ້າວຫັນ ແລະ ເຮັດສໍາເລັດທຸກວຽກງານຕາມການມອບໝາຍຂອງຂັ້ນເທິງໃຫ້ໄດ້ຮັບຜົນສໍາເລັດເປັນຢ່າງດີ.

(ຂ່າວ-ພາບ: ມຸນຕີ)