ເມືອງຜາອຸດົມແຂວງບໍ່ແກ້ວໄດ້ສຳເລັດບັ້ນຝຶກອົບຮົບ-ຫັດແອບການເມືອງ, ການທະຫານໄລຍະສັ້ນໃຫ້ກຳລັງສຳຮອງປ້ອງກັນຊາດຊຸດທີ I ຂຶ້ນໃນວັນທີ 14 ທັນວາຜ່ານມາ ພາຍໃຕ້ການເປັນປະທານຂອງສະຫາຍ ພັນເອກ ທອງໄຂ ສີຍາລາດ ຫົວໜ້າການທະຫານກອງບັນຊາການທະຫານແຂວງ,ມີສະຫາຍ ສົມນິດ ໄຊທະວົງສິດ ຮອງເລຂາພັກເມືອງ ຜູ້ຊີ້ນຳຂົງເຂດວັດທະນະທຳ-ສັງຄົມເມືອງ, ມີຄະນະພັກ-ຄະນະບັນຊາກອງບັນຊາການທະຫານເມືອງ, ແຂກຖືກເຊີນ,ນັກຝຶກອົບຮົມເຂົ້າຮ່ວມ.

ສະຫາຍ ພັນໂທ ສຸບິນ ສີຫາລາດ ຮອງຫົວໜ້າຫ້ອງເສນາທິການກອງບັນຊາການທະຫານແຂວງກ່າວວ່າ: ການຝືກອົບຮົມຄັ້ງນີ້ຈັດຂຶ້ນເພື່ອເປັນການກວດກາຄືນດ້ານການຈັດຕັ້ງ ແລະ ຈໍານວນພົນຂອງກໍາລັງທີ່ສ້າງຕັ້ງຂຶ້ນໃນເມື່ອກ່ອນທັງເປັນການກໍ່ສ້າງຂະຫຍາຍກໍາລັງຕາມແນວທາງການທະຫານຂອງພັກໃນໄລຍະໃໝ່, ເປັນການກະກຽມກໍາລັງຢູ່ຮາກຖານໃຫ້ຫຼາຍຂຶ້ນ ເພື່ອຮັບປະກັນຕາມຄວາມຮຽກຮ້ອງຕ້ອງການ ສ້າງເງື່ອນໄຂເອື້ອອຳນວຍໃນການພັດທະນາປະເທດຊາດໃນສະເພາະໜ້າ ແລະຍາວນານ, ກໍາລັງສໍາຮອງທຸກສະຫາຍຕ້ອງໄດ້ປະກອບສ່ວນໃນທຸກເງື່ອນໄຂທີ່ປະເທດຊາດມີຄວາມຮຽກຕ້ອງການ ຄືກັບກໍາລັງປະກອບອື່ນໆ. ຊຸດອົບຮົມຄັ້ງນີ້ຈັດຂຶ້ນເປັນເວລາ 10 ວັນ, ນັບແຕ່ວັນທີ 5-14 ທັນວາ 2023ຈຶ່ງສຳເລັດ, ມີຜູ້ເຂົ້າຮ່ວມທັງໝົດ 57 ສະຫາຍ, ມາຈາກ 14 ບ້ານ.

ໂອກາດນີ້, ສະຫາຍ ພັນເອກ ທອງໄຂ ສີຍາລາດ ໄດ້ໃຫ້ກຽດໂອ້ລົມພ້ອມເນັ້ນໜັກໃຫ້ເອົາໃຈໃສ່ສຶກສາອົບຮົມການເມືອງ-ນຳພາແນວຄິດໃຫ້ກຳລັງກອງຫຼອນ ແລະ ປະຊາຊົນບັນດາເຜົ່າ, ຕ້ອງກໍາແໜ້ນທິດສະດີຫຼັກການບັນດາເນື້ອໃນເພື່ອເປັນພື້ນຖານໃນການຊີ້ນຳໆໃຫ້ແທດເໝາະກັບສະພາບເປັນຈິງຂອງບ້ານ, ຍົກສູງຄວາມຮັບຜິດຊອບຕໍ່ໜ້າທີ່ວຽກງານຂອງຕົນ, ເພີ່ມທະວີຄວາມສາມັກຄີໃຫ້ເປັນປຶກແຜ່ນແໜ້ນໜາ, ປຸກລະດົມປະຊາຊົນບັນດາເຜົ່າໃຫ້ເຊື່ອມຊຶມຢ່າງເລິກເຊີ່ງຕໍ່ບັນດາມູນເຊື້ອຂອງກອງທັບ, ເດັດດ່ຽວ, ຕອບຕ້ານທຸກກົນອຸບາຍຍຸດທະສາດຫັນປ່ຽນໂດຍສັນຕິຂອງສັດຕູຢ່າງເດັດຂາດ, ຍູ້ແຮງແນວທາງ ປກຊ-ປກສ ທົ່ວປວງຊົນຮອບດ້ານຢູ່ຂັ້ນພື້ນຖານຢ່າງລຽນຕິດ ແລະ ຕໍ່ເນື່ອງ, ຮັບປະກັນເຮັດໃຫ້ຮາກຖານມີຄວາມສະຫງົບປອດໄພ 100%.

ຂ່າວ-ພາບ: ວໍລະສິດ ພິດສະຫາຍ