ໂດຍ: ລີຕ່າ ກັດຕິຍະວົງ

ສະຫາຍ ພົນຈັດຕະວາ ສາຍສະໝອນ ໄຊພູບານ ຄະນະປະຈຳພັກກົມໃຫຍ່ຮອງຫົວໜ້າກົມໃຫຍ່ເຕັກນິກກອງທັບຜູ້ຊີ້ນຳວຽກງານພັກ-ວຽກງານການເມືອງ ເປັນນັກປະພັນສະໝັກຫຼິ້ນ ຜູ້ໜຶ່ງທີ່ມີພອນສະຫວັນ ແລະ ມີຄວາມຮູ້-ຄວາມສາມາດໃນການປະດິດຄິດແຕ່ງປະພັນບົດເພງ, ບົດລຳ, ບົດຟ້ອນ ແລະ ບົດລະຄອນຕ່າງໆທີ່ສ່ອງແສງເຖິງມູນເຊື້ອຂອງຊາດ, ຂອງພັກ, ຂອງກອງທັບ ຊຶ່ງໄດ້ສ້າງຜົນງານອັນເປັນເອກກະລັກໃຫ້ຫຼາຍໆຄົນໄດ້ຮັບຊົມ, ຮັບຟັງທັງສ້າງຊື່ສຽງໃຫ້ແກ່ກອງທັບປະຊາຊົນລາວຕະຫຼອດມາ ໄດ້ກາຍເປັນບົດຮຽນອັນລໍ້າຄ່າໃຫ້ນັກປະພັນຮຸ່ນໃໝ່ໄດ້ຮໍ່າຮຽນເອົາເປັນແບບຢ່າງມາໝູນໃຊ້ເຂົ້າໃນການປະດິດຄິດແຕ່ງບົດປະພັນຂອງຕົນໃຫ້ມີຄຸນນະພາບ ແລະ ເຂົ້າກັບຍຸກກັບສະໄໝ.

ສະຫາຍ ພົນຈັດຕະວາ ສາຍສະໝອນ ໄຊພູບານ ເກີດໃນວັນທີ 1 ມັງກອນ 1962 ທີ່ບ້ານວັດທາດ ເມືອງໄຊເສດຖາ ແຂວງອັດຕະປື, ນອກຈາກເຮັດສຳເລັດໜ້າທີ່ວິຊາສະເພາະແລ້ວ ສະຫາຍຍັງມີຜົນງານອັນໂດດເດັ່ນທາງດ້ານສິລະປະ-ວັນນະຄະດີ ຊຶ່ງເປັນຄວາມມັກຮັກມາແຕ່ຍັງນ້ອຍໂດຍບໍ່ໄດ້ຜ່ານການຮໍ່າຮຽນວິຊາສະເພາະຈາກໂຮງຮຽນໃດມາກ່ອນ ແຕ່ຍ້ອນມີພອນສະຫວັນ, ພອນສະແຫວງ ສະຫາຍສາມາດປະດິດຄິດແຕ່ງບົດລຳ, ບົດເພງ, ບົດຟ້ອນ ແລະ ບົດລະຄອນຮັບໃຊ້ກອງທັບ ກໍຄືຮັບໃຊ້ກົມກອງຢ່າງມີຄຸນນະພາບ.

ຕະຫຼອດໄລຍະຜ່ານມາ, ສະຫາຍ ພົນຈັດຕະວາ ສາຍສະໝອນ ໄຊພູບານສາມາດສ້າງຜົນງານການປະພັນບົດເພງອອກສູ່ສັງຄົມ, ໃນນັ້ນບົດເພງທີ່ໄດ້ອັດເປັນອາລະບໍ້າທັງໝົດ 12 ບົດເພງ, ເພງທີ່ບໍ່ໄດ້ອອກເປັນອາລະບ້ຳ 6 ບົດເພງ ແລະ ຍັງມີບົດເພງທີ່ຍັງບໍ່ໄດ້ອັດ 6 ບົດເພງຊຶ່ງເພງທີ່ໄດ້ຮັບຄວາມນິຍົມຊົມຊອບຈົນມາຮອດປັດຈຸບັນນີ້ແມ່ນບົດເພງຫ່ວງຊາດຫ່ວງນາງ ຮ້ອງໂດຍສະຫາຍພັນໂທ ອິນທະຫວາ ບຸດສະດີ ສັງກັດຢູ່ກົມໃຫຍ່ເຕັກນິກກອງທັບ.ໃນໂອກາດຂ່ຳນັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ສະຫາຍຍັງໄດ້ແຕ່ງເພງ 1 ເພງ ເພື່ອສົ່ງເຂົ້າແຂ່ງຂັນງານກວດສອບວັນນະຄະດີທົ່ວກອງທັບຢູ່ແຂວງຊຽງຂວາງ ຊຶ່ງໄດ້ຮັບລາງວັນທີ 2 ໃນບົດເພງ 20 ມັງກອນມີໄຊ ຮ້ອງໂດຍ ສະຫາຍຮ້ອຍໂທນາງ ລີຈ່ອຍ ອິນທະວົງ ສັງກັດຢູ່ໂຮງງານອໍ 410, ສະຫາຍຍັງໄດ້ແຕ່ງເພງສົ່ງເຂົ້າແຂ່ງຂັນໃນໂອກາດປີສາມັກຄີລາວຫວຽດນາມຕື່ມອີກ. ສໍາລັບຜົນງານທີ່ຜ່ານມາໄດ້ຮັບຄໍາຍ້ອງຍໍຊົມເຊີຍຈາກພັກ-ລັດເຊັ່ນ: ໄດ້ຮັບໃບຈາລຶກຜົນງານ ແລະ ໃບຍ້ອງຍໍປະເພດຕ່າງໆຖືເປັນ ຄວາມພາກພູມໃຈທີ່ສຸດໃຫ້ແກ່ຕົນເອງຕະຫຼອດມາ.

ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີທີ່ຈະມາເຖິງນີ້, ສະຫາຍ ພົນຈັດຕະວາ ສາຍສະໝອນ ໄຊພູບານ ໄດ້ຝາກເຖິງນັກປະພັນຮຸ່ນໃຫມ່ຜູ້ສືບທອດ ຈົ່ງພ້ອມກັນເສີມຂະຫຍາຍຫົວຄິດປະດິດສ້າງຂອງຕົນເຂົ້າໃນການປະດິດຄິດແຕ່ງບົດລຳ, ບົດເພງຂອງຕົນໃຫ້ມີລັກສະນະຊາດ, ລັກສະນະມູນເຊື້ອເພື່ອພ້ອມກັນປຸກລະດົມນໍ້າໃຈຮັກຊາດ ເຮັດສຳເລັດໜ້າທີ່ໃນການປົກປັກຮັກສາ ແລະ ສ້າງສາພັດທະນາປະເທດຊາດ ພ້ອມນັ້ນໄດ້ອວຍພອນໄຊອັນປະເສີດແດ່ການນໍາພັກ-ລັດ, ການນໍາກະຊວງປ້ອງກັນປະເທດຈົ່ງມີສຸຂະພາບເຂັ້ມແຂງນໍາພາປະເທດຊາດ ແລະ ກອງທັບກ້າວຂຶ້ນຢ່າງບໍ່ຢຸດຢັ້ງ.