ເມື່ອບໍ່ດົນມານີ້, ທີ່ເມືອງວິລະບູລີ ແຂວງສະຫວັນນະເຂດ ໄດ້ຈັດພິທີມອບ-ຮັບ ແລະເປີດນໍາໃຊ້ຖະໜົນໄກສອນ ພົມວິຫານຢ່າງເປັນທາງການ ໂດຍໄດ້ຮັບກຽດເຂົ້າຮ່ວມຈາກທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ, ທ່ານ ແສນສັກ ສຸລິສັກ ຮອງເຈົ້າແຂວງສະຫວັນນະເຂດ, ມີທ່ານ ວາລິຍະ ສີຈັນທອງທິບ ເຈົ້າເມືອງວິລະບູລີ, ທ່ານ ສະໝານ ອາເນກາ ຜູ້ອໍານວຍການໃຫຍ່ບໍລິສັດລ້ານຊ້າງມີເນໂຣນສ໌ ຈໍາກັດ ພ້ອມດ້ວຍແຂກຖຶກເຊີນກ່ຽວຂ້ອງເຂົ້າຮ່ວມ.

ທ່ານ ໄພມະນີ ວົງໄຊຄໍາ ຮອງເຈົ້າເມືອງວິລະບູລີ ຜູ້ຊີ້ນໍາວຽກງານເສດຖະກິດ ກ່າວວ່າ:ເພື່ອເປັນການປູກຈິດສໍານຶກ ແລະຫວນຄືນມູນເຊື້ອໄຊຊະນະທາງປະຫວັດສາດແຫ່ງການຕໍ່ສູ້ປົດປ່ອຍຊາດໃນເມື່ອກ່ອນ ແລະຜົນສໍາເລັດໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ ພາຍໃຕ້ການນໍາພາ-ຊີ້ນໍາຂອງພັກ-ລັດ ກໍຄືປະທານ ໄກສອນ ພົມວິຫານ ແລະ ເພື່ອເປັນການເພີ່ມທະວີການສຶກສາອົບຮົມພະນັກງານ, ສະມາຊິກພັກ, ນັກຮົບ ແລະປະຊາຊົນບັນດາເຜົ່າກ່ຽວກັບນໍ້າໃຈຮັກຊາດ, ມູນເຊື້ອສາມັກຄີປອງດອງ, ນໍ້າໃຈຕໍ່ສູ້ອັນພິລະອາດຫານຂອງປະທານໄກ ສອນ ພົມວິຫານ. ດັ່ງນັ້ນ, ຄະນະກໍາມະການກອງທຶນພັດທະນາທ້ອງຖິ່ນ ເມືອງວິລະບູລີແຂວງສະຫວັນນະເຂດ ຈຶ່ງໄດ້ເຫັນດີເປັນເອກະພາບຕົກລົງອະນຸມັດງົບປະມານຈາກກອງທຶນພັດທະນາທ້ອງຖິ່ນປະຈໍາປີ 2023 ຂອງບໍລິສັດ ລ້ານຊ້າງ ມີເນໂຣນສ໌ ຈໍາກັດໃນມູນຄ່າ 142.487 ໂດລາເຂົ້າໃສ່ການກໍ່ສ້າງ ແລະປັບປຸງເສັ້ນທາງຕໍ່ໜ້າຫ້ອງວ່າການເມືອງຊຶ່ງເຫັນດີໃສ່ຊື່ວ່າຖະໜົນໄກສອນ ພົມວິຫານ.ໂຄງການປັບປຸງກໍ່ສ້າງຖະໜົນໄກສອນ ພົມວິຫານ ໄດ້ເຊັນສັນຍາກັນລະຫວ່າງ ຫ້ອງການໂຍທາທິການ ແລະ ຂົນສົ່ງ ( ຍທຂ ) ເມືອງວິລະບູລີກັບບໍລິສັດ ລາວມຸງຄຸນ ກໍ່ສ້າງຂົວທາງຈໍາກັດຜູ້ດຽວ ຕາມເອກະສານສັນຍາສະບັບເລກທີ 81/ຍທຂ.ວລ, ລົງວັນທີ 26 ພຶດສະພາ 2023 ແລະໄດ້ລົງມືຈັດຕັ້ງປະຕິບັດນັບແຕ່ເດືອນພຶດສະພາ 2023ເປັນຕົ້ນມາ, ເປັນເສັ້ນທາງປູຢາງສອງຊັ້ນ, ໜ້າທາງກ້ວາງ 7 ແມັດ, ຍາວ 382 ແມັດ, ມີຮ່ອງລະບາຍນໍ້າເຮັດດ້ວຍເບຕົງເສີມເຫຼັກ, ທາງຍ່າງປູດ້ວຍເບຕົງພ້ອມຢຽບລາຍກ້ວາງ 1,2 ແມັດ, ຕິດຕັ້ງດອກໄຟເຍືອງທາງໂຊລາເຊວທັງ 2 ຂ້າງທາງ ແລະປູກຕົ້ນຈໍາປາປະດັບທັງສອງຂ້າງທາງ.

ທ່ານ ສະໝານ ອາເນກາ ກ່າວວ່າ: ໂຄງການກອງທຶນພັດທະນາທ້ອງຖິ່ນໄດ້ສະໜອງຜົນປະໂຫຍດຢ່າງຫຼວງຫຼາຍໃຫ້ແກ່ຊຸມຊົນທ້ອງຖິ່ນດໍາລົງຊີວິດຢູ່ພື້ນທີ່ອ້ອມຂ້າງໂຄງການຂຸດຄົ້ນບໍ່ຄຳ-ທອງເຊໂປນຕະຫຼອດ 20 ປີ. ການສະໜອງທຶນ ໄດ້ເພີ່ມຂຶ້ນທຸກໆປີຕາມລໍາດັບຈາກ 96.000 ໂດລາຕໍ່ປີຂຶ້ນເປັນ 750.000 ໂດລາຕໍ່ປີ ແລະ ຍັງຈະສະໜອງທຶນດັ່ງກ່າວສືບຕໍ່ໄປຈົນເຖິງໄລຍະສຸດທ້າຍຂອງການຂຸດຄົ້ນ. ທຶນດັ່ງກ່າວນີ້ໄດ້ສຸມໃສ່ປັບປຸງພື້ນຖານໂຄງລ່າງຂອງຊຸມຊົມ ແລະ ເມືອງໃນດ້ານສາທາລະນະສຸກ, ການສຶກສາ ແລະ ກະສິກໍາ; ສະໜອງສິ່ງອໍານວຍຄວາມສະດວກສາທາລະນະລວມມີ ເສັ້ນທາງ, ການຂະຫຍາຍຕາຄ່າຍພະລັງງານໄຟຟ້າເຂົ້າເຖິງພື້ນທີ່ເຂດຫ່າງໄກສອກຫຼີກຂອງເມືອງ.ຈາກນັ້ນ, ຄະນະປະທານໄດ້ຮ່ວມກັນຕັດແຖບຜ້າ, ລັ່ນຄ້ອງ 9 ບາດ ເພື່ອເປັນສັນຍາລັກໃນການເປີດນໍາໃຊ້ຖະໜົນ ໄກສອນ ພົມວິຫານ ຂອງເມືອງວິລະບູລີຢ່າງເປັນທາງການ.

ຂ່າວ: ເມືອງວິລະບູລີ