ໃນວັນທີ 14 ທັນວາຜ່ານມານີ້ ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ໄດ້ຈັດຝຶກອົບຮົມ ການສ້າງຄວາມເຂັ້ມແຂງວຽກງານເລຂານຸການການນຳ ຢູ່ເມືອງວັງວຽງ ແຂວງວຽງຈັນ ພາຍໃຕ້ການເປັນປະທານ ແລະ ໃຫ້ກຽດກ່າວເປີດຂອງທ່ານ ອາລຸນໄຊ ສູນນະລາດ ລັດຖະມົນຕີ ຫົວໜ້າ ຫສນຍ; ມີວິທະຍາກອນຈາກ ຫສນຍ ແລະ ກະຊວງການຕ່າງປະເທດ, ສຳມະນາກອນຈາກ 12 ກະຊວງ-ອົງການ ຂັ້ນສູນກາງເຂົ້າຮ່ວມ ຈຳນວນ 40 ກວ່າທ່ານ.

ຈຸດປະສົງ ໃນການຈັດຝຶກອົບຮົມຄັ້ງນີ້ ແມ່ນເພື່ອຍົກສູງຄວາມສາມາດ ແລະ ປະສິດທິພາບ ໃນການເປັນເສນາທິການ, ການປະສານງານ ແລະ ການບໍລິການຮັບໃຊ້ການນຳ ໃຫ້ແກ່ພະນັກງານ-ລັດຖະກອນ ທີ່ເປັນເລຂານຸການ ການນຳຂັ້ນສູງ ທີ່ມາຈາກ 12 ກະຊວງ-ອົງການຂັ້ນສູນກາງ.

ກອງປະຊຸມຝຶກອົບຮົມຄັ້ງນີ້ ຈະໄດ້ດຳເນີນໃນລະຫວ່າງວັນທີ 14-15 ທັນວາ 2023 ໂດຍມີ 7 ຫົວຂໍ້ ເປັນຕົ້ນ ບົດຮຽນໃນການເປັນເລຂານຸການໆນຳ; ບາງບົດຮຽນໃນການຄົ້ນຄວ້າ-ສັງລວມ; ການກະກຽມກອງປະຊຸມນາຍົກ-ຮອງນາຍົກລັດຖະມົນຕີ ແລະ ກອງປະຊຸມຫົວຂໍ້ສະເພາະໃຫ້ແກ່ການນຳ; ການກະກຽມກອງປະຊຸມລັດຖະບານ, ການສ້າງແຜນເຄື່ອນໄຫວວຽກງານໃຫ້ແກ່ການນຳ; ການກະກຽມໃຫ້ແກ່ການນຳ ໄປເຄື່ອນໄຫວວຽກງານຢູ່ຕ່າງປະເທດ; ການກະກຽມທາງດ້ານບໍລິຫານ-ພິທີການ ໃນການຕ້ອນ ຮັບແຂກພາຍໃນ ແລະ ຕ່າງປະເທດ ທີ່ມາພົບປະການນຳ; ແລະ ການບໍລິຫານເອກະສານ ພາຍໃນ ຫສນຍ.

ໃນໂອກາດກ່າວເປີດກອງປະຊຸມ, ທ່ານ ລັດຖະມົນຕີ, ຫົວໜ້າ ຫສນຍ ໄດ້ຮຽກຮ້ອງບັນດາທ່ານ ວິທະຍາກອນ ແລະ ສຳມະນາກອນ ຈົ່ງພ້ອມກັນສົນທະນາ, ປະກອບຄໍາຄິດເຫັນ ແລະ ແລກປ່ຽນບົດຮຽນເຊິ່ງກັນ ແລະ ກັນ ໂດຍອີງໃສ່ບົດຮຽນ ແລະ ປະສົບການ ຈາກການປະຕິບັດວຽກງານຕົວຈິງ ຂອງແຕ່ລະພາກສ່ວນ ເພື່ອເປັນປະໂຫຍດ ໃນການຄົ້ນຄວ້າປັບປຸງ ແລະ ນຳໃຊ້ເຂົ້າໃນວຽກງານຕົວຈິງ ຢູ່ສູນກາງ ແລະ ທ້ອງຖິ່ນ ເກີດປະສິດທິພາບ ແລະ ປະສິດທິຜົນສູງຂຶ້ນເປັນກ້າວໆ, ທັງເຊື່ອໝັ້ນວ່າ ການຝຶກອົບຮົມຄັ້ງນີ້ ຈະປະກອບສ່ວນທີ່ສຳຄັນ ໃຫ້ແກ່ວຽກງານການເປັນເສນາທິການ, ການປະສານງານ ແລະ ການບໍລິການຮັບໃຊ້ ໃຫ້ແກ່ການນຳ ມີຜົນສຳເລັດຫຼາຍຂຶ້ນກວ່າເກົ່າ ໂດຍສະເພາະ ການປະຕິບັດວຽກຄົ້ນ ຄວ້າ-ສັງລວມ, ການກະກຽມກອງປະຊຸມ, ການຕ້ອນຮັບແຂກພາຍໃນ ແລະ ຕ່າງປະເທດ, ການສ້າງແຜນເຄື່ອນໄຫວຂອງການນຳ ແລະ ວຽກງານປິ່ນອ້ອມທີ່ສຳຄັນອື່ນໆ. ພາຍຫຼັງສຳເລັດການຝຶກອົບຮົມຄັ້ງນີ້, ຫສນຍ ຈະໄດ້ນຳເອົາຄຳຄິດເຫັນ ແລະ ບົດຮຽນຕົວຈິງທີ່ຖອດຖອນໄດ້ ຈາກບັນດາຜູ້ເຂົ້າຮ່ວມ ໄປປັບປຸງປຶ້ມຄູ່ມືວຽກງານທີ່ກ່ຽວຂ້ອງ ໃຫ້ຄົບຖ້ວນສົມບູນຍິ່ງໆຂຶ້ນຕື່ມ. (ຂ່າວ-ພາບ: ກົມປະຊາສຳພັນ ຫສນຍ)