ສືບຕໍ່ເນັ້ນຢໍ້າການດຳເນີນງານທີ່ຖືກຕ້ອງສອດຄ່ອງ ກັບແນວທາງນະໂຍບາຍຂອງພັກ-ລັດຖະບານ ໂດຍສະເພາະແມ່ນ ກົດໝາຍ ວ່າດ້ວຍແຮ່ທາດ, ບໍລິສັດ ພູເບ້ຍ ມາຍນິງ ຈໍາກັດ ໄດ້ສຳເລັດອີກ 10 ໂຄງການປັບປຸງໂຄງລ່າງພື້ນຖານຊຸມຊົນ ຊຶ່ງໄດ້ມອບຜ່ານອົງການປົກຄອງແຂວງ ໃຫ້ປະຊາຊົນບ້ານນໍ້າໂມ້ ແລະ ບ້ານນໍ້າຍອນ ເມືອງອະນຸວົງ 4 ແລະ 5 ໂຄງການຕາມລຳດັບ; ສ່ວນບ້ານນາໄຊສະຫວ່າງ ເມືອງລ່ອງແຈ້ງ 1 ໂຄງການ ລວມມູນຄ່າທັງໝົດ 387.609 ໂດລາ.

ພິທີມອບ-ຮັບ ບັນດາໂຄງການດັ່ງກ່າວຈັດຂຶ້ນໃນວັນທີ 15 ທັນວາ ນີ້ ທີ່ບ້ານນໍ້າໂມ້ ໂດຍການເຂົ້າຮ່ວມຂອງທ່ານ ຈັນເພັງ ບຸນນະຜົນ ປະທານບໍລິສັດ ພູເບ້ຍ ມາຍນິງ ຈໍາກັດ ແລະ ທ່ານ ສົມບູນ ສອນລິດທິເດດ ຫົວໜ້າຫ້ອງວ່າການແຂວງໄຊສົມບູນ ຊຶ່ງໃນພິທີໄດ້ມີການເຊັນບົດບັນທຶກມອບ-ຮັບ 10 ໂຄງການ ລະຫວ່າງ ທ່ານ ສະຕີບ ຈິມໂປ (Steve Gimpel) ຜູ້ອຳນວຍການ ບໍລິສັດ ພູເບ້ຍ ແລະ ທ່ານ ນະລົງສອນ ຈັນທະບູລີ ຮອງພະແນກພະລັງງານ ແລະ ບໍ່ແຮ່ ແຂວງໄຊສົມບູນ. ຈາກນັ້ນ, ກໍໄດ້ມີການຕັດແຖບຜ້າເພື່ອເປັນຂີດໝາຍແຫ່ງການມອບ-ຮັບຢ່າງເປັນທາງການ ໂດຍຊ້ອງໜ້າບັນດາຜູ້ຕາງໜ້າຈາກພາກສ່ວນກ່ຽວຂ້ອງ ທັງສູນກາງ ແລະ ທ້ອງຖິ່ນ.

ໃນພິທີ, ທ່ານ ສະຕີບ ຈິມໂປ ໄດ້ຂຶ້ນກ່າວມອບວ່າ: ໂຄງການປັບປຸງໂຄງລ່າງພື້ນຖານ 10 ໂຄງການ ທີ່ໄດ້ພັດທະນາໃນບ້ານນໍ້າໂມ້, ນໍ້າຍອນ ແລະ ບ້ານນາໄຊສະຫວ່າງ ແມ່ນເປັນໜຶ່ງຂອງຄວາມມຸ່ງໝັ້ນໃນການສືບຕໍ່ປັບປຸງຊີວິດການເປັນຢູ່ຂອງຊົມຊົນອ້ອມຂ້າງຂອງບໍລິສັດ. ຕັ້ງແຕ່ປີ 2005, ບໍລິສັດໄດ້ເລີ່ມດຳເນີນງານຢູ່ແຂວງໄຊສົມບູນ ຊຶ່ງໄດ້ດຳເນີນທຸລະກິດ ແລະ ສືບຕໍ່ຂະຫຍາຍກອງທຶນພັດທະນາຊຸມຊົນ (CDF) ຂອງພວກເຮົາຢ່າງຕໍ່ເນື່ອງ ໄປພ້ອມໆກັນ. ໃນຖານະເປັນຜູ້ປະກອບສ່ວນສຳຄັນ ເຂົ້າໃນເສດຖະກິດລະດັບພາກພື້ນ, ພູເບ້ຍ ມາຍນິງ ໄດ້ສົມທັບກັບອົງການປົກຄອງທ້ອງຖິ່ນ, ຂັ້ນສູນກາງ ແລະ ລັດຖະບານລາວ ເພື່ອພັດທະນາ ແລະ ປັບປຸງຊີວິດການເປັນຢູ່ຂອງປະຊາຊົນແຂວງໄຊສົມບູນ ພ້ອມທັງສ້າງໂອກາດທີ່ຍືນຍົງໃນອະນາຄົດ ຊຶ່ງຂໍ້ລິເລີ່ມເຫຼົ່ານີ້ຖືກອອກແບບໂດຍສະເພາະ ເພື່ອຮັບປະກັນວ່າ ພູເບ້ຍ ມາຍນິງ ໄດ້ປະກອບສ່ວນຢ່າງໃຫຍ່ຫຼວງ ເຂົ້າໃນການພັດທະນາເສຖະກິດ-ສັງຄົມ ແລະ ຫຼຸດຜ່ອນຄວາມທຸກຍາດໃນລາວ. ປັດຈຸບັນ, ໂດຍລວມແລ້ວ ພູເບ້ຍ ມາຍນິງ ໄດ້ສຳເລັດແລ້ວ 436 ໂຄງການພັດທະນາຊຸມຊົນຂະໜາດນ້ອຍ ດ້ວຍຍອດເງິນລົງທຶນກວ່າ 4,9 ລ້ານໂດລາ ຊຶ່ງໂຄງການເຫຼົ່ານັ້ນ ໄດ້ປັບປຸງດ້ານສາທາລະນະສຸກ, ການສຶກສາ, ຄວາມສາມາດດ້ານກະສິກຳ, ການພັດທະນາທຸລະກິດຂະໜາດນ້ອຍ ແລະ ກາງ, ປັບປຸງຄວາມຮູ້ດ້ານການເງິນ ແລະ ໄດ້ຊ່ວຍປັບປຸງໂຄງລ່າງພື້ນຖານໃຫ້ແກ່ຊຸມຊົນທ້ອງຖິ່ນ ທີ່ໃກ້ຄຽງກັບການດຳເນີນງານຂອງບໍລິສັດໃນແຂວງໄຊສົມບູນ. ການຊ່ວຍເຫຼືອຂອງ ພູເບ້ຍ ມາຍນິງ ຕໍ່ກັບ 3 ບ້ານນັ້ນ ແມ່ນສ່ວນໜຶ່ງຂອງການປະຕິບັດຄໍາໝັ້ນສັນຍາຂອງບໍລິສັດ ທີ່ຈະສ້າງມໍລະດົກທີ່ຍືນຍົງ. ປັດຈຸບັນບໍລິສັດ ໄດ້ສະໜອງທຶນໃຫ້ແກ່ CDF ຫຼາຍກວ່າ 380.000 ໂດລາຕໍ່ປີ ຕາມຂໍ້ຕົກລົງໃນ ສັນຍາວ່າດ້ວຍການສຳຫຼວດ ແລະ ການຜະລິດແຮ່ທາດ (MEPA). ພ້ອມນີ້, ກໍຍັງໄດ້ເປີດເຜີຍວ່າ ໄດ້ມີການຕົກລົງດ້ານຫຼັກການ ທີ່ຈະເພີ່ມເງິນທຶນນີ້ ເຖິງ 750.000 ໂດລາຕໍ່ປີ ພາຍຫຼັງທີ່ການລົງນາມໃນຂໍ້ຕົກລົງ MEPA 4 (ຫຼື MEPA ຄັ້ງທີ 4). ຂະນະທີ່, 93% ຂອງພະນັງການທັງໝົດຂອງບໍລິສັດນີ້ ເປັນຄົນສັນຊາດລາວ; ໃນນີ້, 3 ບ້ານດັ່ງກ່າວ ຍັງໄດ້ຮັບການສຸມໃສ່ຮັບສະໝັກພະນັກງານ ຊຶ່ງເປັນຕົວແທນໃຫ້ແກ່ 700 ກວ່າຄົນ.

ທ່ານ ສົມບູນ ສອນລິດທິເດດ ໄດ້ຂຶ້ນກ່າວຮັບວ່າ: ບັນດາໂຄງການດັ່ງກ່າວທີ່ໄດ້ມອບ-ຮັບໃນມື້ນີ້, ເປັນສ່ວນໜຶ່ງທີ່ໄດ້ປະກອບສ່ວນເຂົ້າໃນການພັດທະນາ ຂອງແຜນພັດທະນາເສດຖະກິດ-ສັງຄົມແຂວງໄຊສົມບູນ ແລະ ຕອບສະໜອງຄວາມຮຽກຮ້ອງຕ້ອງການທີ່ຈໍາເປັນຂອງປະຊາຊົນຢູ່ໃນ 3 ບ້ານ ທັງເປັນການປະກອບສ່ວນຊ່ວຍໃນການພັດທະນາຊີວິດການເປັນຢູ່ຂອງປະຊາຊົນທີ່ໄດ້ຕອບສະໜອງສິ່ງອໍານວຍຄວາມ ສະດວກໃຫ້ແກ່ປະຊາຊົນຂອງພວກເຮົາ. ພ້ອມນີ້, ກໍໄດ້ເນັ້ນໃຫ້ຂັ້ນເມືອງ ແລະ ບ້ານ ນໍາໃຊ້ໂຄງການທີ່ຊ່ວຍນີ້ ໃຫ້ເກີດມີປະໂຫຍດສູງສຸດ ໂດຍຊຸມຊົນຕ້ອງມີສ່ວນຮ່ວມ ພ້ອມກັນຈັດຕັ້ງປະຕິບັດ ແລະ ຕ້ອງມີການຄຸ້ມຄອງໃຫ້ມີຄວາມຍືນຍົງ. ໂອກາດດຽວກັນ, ກໍໄດ້ສະເໜີໃຫ້ສຸມໃສ່ໃນເນື້ອທີ່ 26 ເຮັກຕາ ທີ່ ພູເບ້ຍ ມາຍນິງ ກຳລັງດຳເນີນໂຄງການພັດທະນາເປັນເຂດກະສິກຳສະອາດ ແມ່ນໃຫ້ສຸມໃສ່ສ້າງເປັນຕົວແບບໃຫ້ແກ່ແຂວງ ເພື່ອໃຫ້ແຂກທີ່ມາໄຊສົມບູນ ໄດ້ມີກິດຈະກຳທີ່ໜ້າສົນໃຈ ໃນການສົ່ງເສີມດ້ານກະສິກຳ ຊຶ່ງຈະໃຫ້ຄອບຄົວທຸກຍາກມາເຮັດກະສິກຳຢູ່ໃນພື້ນທີ່ນັ້ນ ໃຫ້ປະກົດໃນໄວໆນີ້.

ບັນດາໂຄງການທີ່ມອບ-ຮັບຄັ້ງນີ້, ທີ່ບ້ານນໍ້າໂມ້ ປະກອບມີ 4 ໂຄງການ: ໂຄງການກໍ່ສ້າງຊົນລະປະທານນໍ້າແດງ, ການກໍ່ສ້າງຫ້ອງນໍ້າໃຫ້ໂຮງຮຽນປະຖົມບ້ານນໍ້າໂມ້, ການກໍ່ສ້າງໂຮງໝໍນ້ອຍຊຸມຊົນ ແລະ ການກໍ່ສ້າງຕະຫຼາດສົດ; ທີ່ບ້ານນໍ້າຍອນ ມີ 5 ໂຄງການ: ປັບປຸງໂຮງຮຽນອະນຸບານ, ກໍ່ສ້າງຫ້ອງນໍ້າໂຮງຮຽນປະຖົມ, ເສັ້ນທາງປູຢາງຫາໂຮງຮຽນປະຖົມ, ອາຄານຮຽນຂອງໂຮງຮຽນປະຖົມ 4 ຫ້ອງຮຽນ, ການປັບປຸງຫໍພັກຄູ; ທີ່ບ້ານນາໄຊສະຫວ່າງ ມີ 1 ໂຄງການ ຄືກໍ່ສ້າງຫໍພັກຄູ ແລະ ພະຍາບານ.

(ຂ່າວ-ພາບ: ສຸກສະຫວັນ)