ງານບຸນປະເພນີກິນຈຽງປີໃໝ່ຊົນເຜົ່າມົ້ງປະຈໍາປີ 2023 ຂອງເມືອງທຸລະຄົມແຂວງວຽງຈັນໄດ້ເປີດຂຶ້ນໃນວັນທີ 15 ທັນວາຜ່ານມາ,ທີ່ບ້ານສຸກສາລາໂດຍໂຮມເອົາບ້ານຊົນເຜົ່າມົ້ງ 4 ບ້ານຄື: ບ້ານວັງເຮືອ, ບ້ານພູເຂົາຄວາຍໃໝ່, ບ້ານນໍ້າຫຍາມແລະບ້ານສຸກສາລາຈັດຂຶ້ນຢູ່ຈຸດດຽວກັນ. ເປັນກຽດເຂົ້າຮ່ວມມີທ່ານເທບພະໄທແກ້ວເຂັມເພັດປະທານແນວລາວສ້າງຊາດແຂວງ, ມີທ່ານນາງຈັນທະບູນໂພສາລາດຫົວໜ້າຄະນະຈັດຕັ້ງແຂວງ, ທ່ານນາງວົງເດືອນວັດຕະໂສເຈົ້າເມືອງທຸລະຄົມພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານຄໍາພອນຈັນທະວົງສັກຫົວໜ້າຫ້ອງການຖະແຫຼງຂ່າວ, ວັດທະນະທໍາແລະທ່ອງທ່ຽວເມືອງໄດ້ກ່າວຈຸດປະສົງການຈັດງານ,ຈາກນັ້ນທ່ານສີຢ່າງກົງເມັ້ງນາຍບ້ານສຸກສາລາໄດ້ຕາງໜ້າປະຊາຊົນໃນ 4 ບ້ານຜ່ານບົດສະຫຼຸບການເຄື່ອນໄຫວວຽກງານໃນ 1 ປີຜ່ານມາ.ກິດຈະກຳພາຍໃນງານມີການສະແດງສິລະປະ; ການບາສີສູ່ຂັວນ, ອວຍພອນປີໃໝ່ຊຶ່ງກັນແລະກັນ, ການໂຍນໝາກຄອນ, ການວາງສະແດງຂາຍສິນຄ້າແລະຮ່ວມພາເຂົ້າສາມັກຄີ.

ໂອກາດນີ້, ທ່ານເທບພະໄທແກ້ວເຂັມເພັດກ່າວວ່າ: ການຈັດງານໃນຄັ້ງນີ້ເພື່ອອະນຸລັກປົກປັກຮັກສາແລະສົ່ງເສີມວັດທະນະທໍາຮີດຄອງປະເພນີອັນດີງາມຂອງຊາດ, ຂອງຊົນເຜົ່າມົ້ງຕາມຮອຍບັນພະບູລຸດທີ່ເຄີຍປະຕິບັດມາແຕ່ບູຮານນະການທັງເປັນການຊົມເຊີຍຕໍ່ຜົນສໍາເລັດຂອງການຜະລິດເພື່ອແກ້ໄຂຊີວິດການເປັນຢູ່ໃຫ້ດີຂຶ້ນເລື້ອຍໆ, ຊຸກຍູ້ສົ່ງເສີມການທ່ອງທ່ຽວພາຍໃນທ້ອງຖິ່ນແລະຕ້ອນຮັບວັນສຳຄັນຂອງພັກ-ຂອງຊາດ.

ຂ່າວ: ເມືອງທຸລະຄົມ.