ເມື່ອບໍ່ດົນມານີ້, ທ່ານ ແສນສັກ ສຸລິສັກ ຮອງເຈົ້າແຂວງສະຫວັນນະເຂດ ພ້ອມດ້ວຍພາກສ່ວນກ່ຽວຂ້ອງໄດ້ເຄື່ອນໄຫວຕິດຕາມເບິ່ງຄວາມຄືບໜ້າໂຄງການຟື້ນຟູ ແລະສ້ອມແປງເສັ້ນທາງປູຢາງ 2 ຊັ້ນເຊື່ອມຈອດວົງຈອນການທ່ອງທ່ຽວທາງດ້ານວັດທະນະທໍາຂອງແຂວງແຕ່ເສັ້ນທາງອານຸສາວະລີທ່ານ ພູນ ສີປະເສີດ ໄປແຫຼ່ງທ່ອງທ່ຽວບຶງວະຫາບ້ານທາດອີງຮັງ.
ຕາມການໃຫ້ສໍາພາດຂອງທ່ານ ສຸວັນ ແສງຈໍາພອນ ຮອງຫົວໜ້າພະແນກໂຍທາທິການ ແລະຂົນສົ່ງ (ຍທຂ) ແຂວງ ຜູ້ຊີ້ນໍາວຽກງານກໍ່ສ້າງ-ຂົວທາງໃຫ້ຮູ້ວ່າ: ໂຄງການດັ່ງກ່າວແມ່ນປະຕິບັດຕາມການຊີ້ນໍາຂອງແຂວງ ເພື່ອໃຫ້ວົງຈອນທ່ອງທ່ຽວມີຄວາມສະດວກ-ສະບາຍຕໍ່ນັກທ່ອງທ່ຽວ ຊຶ່ງເປັນໂຄງການປູຢາງ 2 ຊັ້ນເພື່ອໃຫ້ທ່ວງທັນກັບໄລຍະງານບຸນນະມັດສະການພະທາດອີງຮັງປະຈໍາປີ 2023 ນີ້ຊຶ່ງໄດ້ແບ່ງເປັນ 3 ສັນຍາກັບ 3 ບໍລິສັດກໍ່ສ້າງຄື: ໄລຍະທີ 1 ແມ່ນບໍລິສັດ ລາວມຸງຄຸນກໍ່ສ້າງຂົວທາງຈໍາກັດ ເປັນຜູ້ຮັບເໝົາກໍ່ສ້າງ ມີລວງຍາວ 3.390 ແມັດ, ໄລຍະທີ 2 ບໍລິສັດ ຄູນຄໍາກໍ່ສ້າງຂົວ-ທາງຊົນລະປະທານ ແລະເຄຫາສະຖານຈໍາກັດ ເປັນຜູ້ຮັບເໝົາກໍ່ສ້າງມີລວງຍາວ 3.890 ແມັດ, ໄລຍະທີ 3 ແມ່ນບໍລິສັດ ໜູຄໍາກໍ່ສ້າງຂົວທາງຈໍາກັດ ເປັນຜູ້ຮັບເໝົາ ມີລວງຍາວ 3.950 ແມັດ ລວມໄລຍະທາງທັງໝົດເກືອບ 12 ກິໂລແມັດ,ລວງກວ້າງ 7 ແມັດ, ສາມາດຮັບນໍ້າໜັກໄດ້ 8,2 ໂຕນຕໍ່ເພົາ, ຈັດເປັນເສັ້ນທາງຊົນນະບົດ, ປັດຈຸບັນຖືວ່າສໍາເລັດແລ້ວ 90% ຄາດຄະເນຈະໃຫ້ສໍາເລັດກ່ອນມື້ເປີດງານນະມັດສະການພະທາດອີງຮັງ ລວມມູນຄ່າການກໍ່ສ້າງທັງໝົດເກືອບ 23 ຕື້ກີບ ເພື່ອຕ້ອນຮັບປີທ່ອງທ່ຽວລາວ 2024 ທີ່ຈະມາເຖິງນີ້.
ຂ່າວ-ພາບ: ສະຫວັນນະເຂດ