ທ່ານ ໂສມ ບຸດຕະກຸນ ຮອງເຈົ້າແຂວງຈຳປາສັກ ຜູ້ຊີ້ນຳຂົງເຂດວັດທະນະທຳ-ສັງຄົມໄດ້ຖະແຫຼງຂ່າວຕໍ່ສື່ມວນຊົນແຂວງເມື່ອບໍ່ດົນມານີ້ວ່າ: ຄະນະພັກ-ອົງການປົກຄອງແຂວງຈຳປາສັກ, ຄະນະພັກ-ອົງການປົກຄອງເມືອງ-ນະຄອນ ແລະພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງໄດ້ເປັນເອກະພາບກັນກຳນົດບັນດາກິດຈະກຳທີ່ຈະຈັດຕັ້ງປະຕິບັດໃນປີທ່ອງທ່ຽວລາວ 2024ແລະ ໄດ້ສະເໜີກະຊວງ ຖວທ ຊຶ່ງໄດ້ຮັບການເຫັນດີເຫັນພ້ອມກຳນົດເອົາ 12 ກິດຈະກຳເພື່ອຕ້ອນຮັບປີທ່ອງທ່ຽວລາວ 2024, ໃນນີ້, ກິດຈະກໍາລະດັບຊາດ 1 ກິດຈະກຳ, ກິດຈະກຳລະດັບແຂວງ 1 ກິດ ແລະ ກິດຈະກຳລະດັບເມືອງ-ນະຄອນມີ 10 ກິດຈະກຳຈັດເຂົ້າໃນປະຕິທິນການທ່ອງທ່ຽວ ໂດຍຈະຖືເອົາງານບຸນນະມັດສະການຜາສາດຫີນວັດພູຈຳປາສັກ ຊຶ່ງເປັນກິດຈະກຳລະດັບຊາດ ທັງກໍານົດເປັນພິທີເປີດປີທ່ອງທ່ຽວ 2024 ຂອງແຂວງຈຳປາສັກ. ນອກນີ້, ກໍມີງານບຸນມະໂຫລານກາເຟ-ຊາບໍລະເວນເມືອງປາກຊ່ອງ ຊຶ່ງເປັນຕົ້ນກຳເນີດຂອງຜະລິດຕະພັນກາເຟທີ່ມີຊື່ສຽງ ແລະ ໄດ້ຮັບຄວາມນິຍົມໃນເວທີສາກົນ. ມີກິດຈະກຳທີ່ເປັນອັນໂດດເດັ່ນທີ່ຈັດຂຶ້ນໃນແຕ່ລະເມືອງ-ນະຄອນ ທັງເປັນການເປີດປີທ່ອງທ່ຽວໃນແຕ່ລະເມືອງໃຫ້ມີບັນຍາກາດຟົດຟື້ນເພື່ອໃຫ້ນັກທ່ອງທ່ຽວສາມາດເລືອກມາທ່ອງທ່ຽວໄດ້ຕະຫຼອດປີ. ພ້ອມດຽວກັນນີ້, ຍັງໄດ້ຮ່ວມກັບບັນດາຜູ້ປະກອບການທຸລະກິດທ່ອງທ່ຽວ,ໂຮງແຮມ, ແຫຼ່ງທ່ອງທ່ຽວ, ຮ້ານອາຫານ, ສາຍການບິນລາວ ແລະ ຫົວໜ່ວຍທຸລະກິດທີ່ກ່ຽວຂ້ອງຈັດເປັນລາຍການທ່ອງທ່ຽວ. ທັງນີ້, ເພື່ອເຮັດໃຫ້ບັນດາກິດຈະກຳການທ່ອງທ່ຽວ ແລະ ລາຍການທ່ອງທ່ຽວມີຄວາມກົມກຽວ, ເຊື່ອມຈອດລະຫວ່າງແຂວງຕໍ່ແຂວງ, ແຂວງຕໍ່ເມືອງ, ມີຮູບແບບສົ່ງເສີມການຂາຍຕາມລະດູການໃນລາຄາທີ່ເໝາະສົມ.
ທ່ານກ່າວຕື່ມວ່າ: ເພື່ອເຮັດໃຫ້ການຈັດຕັ້ງປະຕິບັດແຜນກິດຈະກຳປີທ່ອງທ່ຽວລາວ 2024 ບັນລຸຕາມລະດັບຄາດໝາຍນັ້ນ, ຄະນະພັກ-ອົງການປົກຄອງແຂວງໄດ້ຊຸກຍູ້ຂະແໜງການທີ່ກ່ຽວຂ້ອງໃຫ້ສຸມໃສ່ບັນດາໜ້າວຽກຕ່າງໆ ຕົ້ນຕໍແມ່ນສືບຕໍ່ປະສານສົມທົບຢ່າງແໜ້ນແຟ້ນກັບບັນດາຂະເເໜງການທີ່ກ່ຽວຂ້ອງຢູ່ສູນກາງ,ແຂວງ ແລະ ເມືອງ-ນະຄອນ ເພື່ອຈັດຕັ້ງຜັນຂະຫຍາຍກິດຈະກຳເຂົ້າສູ່ຊີວິດຕົວຈິງໃຫ້ທັນເວລາ. ສຸມໃສ່ປັບປຸງສິ່ງອໍານວຍຄວາມສະດວກດ້ານການທ່ອງທ່ຽວ, ສ້າງລາຍການທ່ອງທ່ຽວໃຫ້ມີຄວາມຫຼາກຫຼາຍ ສາມາດຕອບສະໜອງຄວາມຕ້ອງການກັບທ່າອ່ຽງການຕະຫຼາດທ່ອງທ່ຽວພາກພື້ນ ແລະ ສາກົນ. ປັບປຸງຄຸນນະພາບການບໍລິການໃນຂະແໜງການທ່ອງທ່ຽວ, ການຕ້ອນຮັບທີ່ອົບອຸ່ນ, ຍິ້ມແຍ້ມແຈ່ມໃສ, ປະທັບໃຈ ແລະ ຮັບປະກັນຄວາມປອດໄພ, ເພີ່ມທະວີການໂຄສະນາປີທ່ອງທ່ຽວລາວຢ່າງແຂງແຮງ ໂດຍນໍາໃຊ້ພາຫະນະສື່ມວນຊົນພາຍໃນ, ສື່ຕ່າງປະເທດ ແລະ ການເຂົ້າຮ່ວມງານວາງສະແດງການຕະຫຼາດທ່ອງທ່ຽວສາກົນ. ໃນປີ 2024 ຄາດຄະເນຈະມີນັກທ່ອງທ່ຽວສາກົນເດີນທາງມາທ່ຽວແຂວງຈຳປາສັກ 330.755 ເທື່ອຄົນ, ສາມາດສ້າງລາຍຮັບຈາກການທ່ອງທ່ຽວໄດ້ປະມານ 64.800.570 ລ້ານໂດລາ ແລະ ໃນປີ 2025 ນັກທ່ອງທ່ຽວສາກົນຈະບັນລຸເຖິງ 350.958 ເທື່ອຄົນ ແລະ ສ້າງລາຍຮັບຈາກການທ່ອງທ່ຽວໄດ້ 68.753.740 ລ້ານໂດລາ. ດັ່ງນັ້ນ, ຂໍເຊີນບັນດາທ່ານແຂກພາຍໃນ ແລະ ຕ່າງປະເທດ, ພະນັກງານ, ທະຫານ, ຕຳຫຼວດ, ນັກທຸລະກິດ, ພໍ່ຄ້າຊາວຂາຍ, ຕະຫຼອດຮອດປະຊາຊົນລາວບັນດາເຜົ່າໃນທົ່ວປະເທດ ພ້ອມດ້ວຍມວນຊົນເຂົ້າຮ່ວມງານບຸນນະມັດສະການຜາສາດຫີນວັດພູຈຳປາສັກມໍລະດົກໂລກແຫ່ງທີ2ຂອງລາວທີ່ຕິດພັນກັບການເປີດປີທ່ອງທ່ຽວລາວ 2024 ຂອງແຂວງຈຳປາສັກ ທີ່ຈະເປີດຂຶ້ນໃນວັນທີ 22-24 ກຸມພາ 2024 ນີ້.ໃຫ້ມີບັນຍາກາດເບີກບານມ່ວນຊື່ນ ແລະ ເປັນຂະບວນຟົດຟື້ນ.
ການທ່ອງທ່ຽວເປັນຂະແໜງການເສດຖະກິດໜຶ່ງທີ່ມີການຂະຫຍາຍຕົວຢ່າງວ່ອງໄວ ແລະ ຕໍ່ເນື່ອງຢູ່ບັນດາປະເທດໃນໂລກ. ໃນຫຼາຍປີທີ່ຜ່ານມາ, ພັກ-ລັດຖະບານລາວ ກໍຄືອົງການປົກຄອງແຂວງຈຳປາສັກຍາມໃດກໍໃຫ້ຄວາມສຳຄັນ ແລະ ເອົາໃຈໃສ່ນຳພາ-ຊີ້ນໍາສ້າງເງື່ອນໄຂອຳນວຍຄວາມສະດວກໃຫ້ແກ່ຂະແໜງການທ່ອງທ່ຽວໂດຍກຳນົດ

ນະໂຍບາຍພັດທະນາ ແລະ ສົ່ງເສີມການທ່ອງທ່ຽວທາງດ້ານວັດທະນະທຳ, ປະຫວັດສາດ, ທຳມະຊາດ ແລະ ກະສິກຳ ເພື່ອເປັນທ່າແຮງດຶງດູດນັກທ່ອງທ່ຽວເຂົ້າມາທ່ຽວແຂວງຈຳປາສັກໃຫ້ນັບມື້ເພີ່ມຂຶ້ນ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ, ສ້າງວຽກເຮັດງານທຳໃຫ້ແກ່ສັງຄົມ, ຊຸກຍູ້ການຜະລິດກະສິກຳ, ຫັດຖະກຳ, ທຸລະກິດປິ່ນອ້ອມຖືເປັນການສົ່ງອອກກັບທີ່ ແລະ ການກະຈາຍລາຍໄດ້ໄປສູ່ທ້ອງຖິ່ນກໍຄືເຂດຊົນນະບົດຫ່າງໄກສອກຫຼີກ.
    ສປປ ລາວ ໄດ້ເປີດປີທ່ອງທ່ຽວລາວມາແລ້ວ 3 ຄັ້ງ, ຄັ້ງທີ 1 ໃນປີ 1999-2000, ຄັ້ງທີ 2 ປີ 2012, ຄັ້ງທີ 3 ປີ 2018, ຄັ້ງທີ 4 ຈັດຂຶ້ນໃນປີ 2024 ໂດຍໄດ້ຮັບການອະນຸມັດເຫັນດີຈາກລັດຖະບານພາຍໃຕ້ຄໍາຂວັນທີ່ວ່າ “ທ່ອງທ່ຽວລາວປອດໄພ, ຊື່ນໃຈໃນວັດທະນະທຳ, ທຳມະຊາດ ແລະ ປະຫວັດສາດ” ແລະ ໄດ້ກໍານົດເອົາຮູບຊ້າງເປັນສັນຍາລັກນຳໂຊກໃຫ້ແກ່ການທ່ອງທ່ຽວລາວ 2024.
ຂ່າວ: ທູນທອງໃຈ, ພາບ: ຄຳຫຼ້າ