ໃນວັນທີ 15 ພຶດສະພານີ້ທີ່ອົງການໄອຍະການປະຊາຊົນສູງສຸດ(ອອປສ) ໄດ້ຈັດກອງປະຊຸມປາຖະກະຖາເອກະສານ 4 ວັນ ສຳຄັນປະຫວັດສາດຄື: ວັນກຳມະກອນສາກົນ ຄົບຮອບ 138 ປີ (1 ພຶດສະພາ 1886 - 1 ພຶດສະພາ 2024) ແລະ ວັນໄຊຊະນະບັ້ນຮົບດຽນບຽນຝູ້ ຄົບຮອບ 70 ປີ (7/5/1959 – 7/5/2024), ວັນຜ່າວົງປິດລ້ອມຂອງກອງພັນທີ 2 ວິລະຊົນ ທີ່ທົ່ງໄຫຫີນ ຊຽງຂວາງ ຄົບຮອບ 65 ປີ (18 ພຶດສະພາ 1959 - 18 ພຶດສະພາ 2025) ແລະ ວິລະກໍາໂຕນຄຸກ ຢ່າງມະຫັດສະຈັນ ຂອງບັນດາທ່ານຜູ້ນໍາຂອງພັກ ແລະ ແນວລາວຮັກຊາດ ຄົບຮອບ 64 ປີ (24 ພຶດສະພາ 1960 - 24 ພຶດສະພາ 2024). ໃຫ້ກຽດປາຖະກະຖາໂດຍທ່ານ ຄໍາເພັດ ສົມວໍລະຈິດ ຄະນະປະຈໍາພັກ ຮອງຫົວໜ້າ ອອປສ, ມີບັນດາສະຫາຍຄະນະບໍລິຫານງານພັກ, ຄະນະກົມ ແລະ ຄະນະພະແນກ ເຂົ້າຮ່ວມ 140 ສະຫາຍ.
    ໃນວາລະດັ່ງກ່າວ, ທ່ານ ຄໍາເພັດ ສົມວໍລະຈິດ ໄດ້ຍົກໃຫ້ເຫັນຄວາມໝາຍຄວາມສຳຄັນຂອງ 4 ເຫດການດັ່ງກ່າວ ສະແດງໃຫ້ເຫັນເຖິງຄວາມສະຫຼຽວສະຫຼາດຂອງການນຳພັກ ແລະ ແນວລາວຮັກຊາດຊຶ່ງໄດ້ຊີ້ນຳຢ່າງໃກ້ຊິດຕໍ່ກຳລັງປະຕິວັດທີ່ຢູ່ແນວໜ້າ ແລະ ມີໄຫວພິບ ມີຄວາມປີຊາສາມາດຂອງຄະນະພັກ-ຄະນະບັນຊາ, ຄວາມຕັດສິນໃຈຢ່າງເດັດຂາດຂອງພະນັກງານປະຕິວັດ ແລະ ຄວາມເປັນອັນໜຶ່ງອັນດຽວຂອງປະຊາຊົນບັນດາເຜົ່າຈຶ່ງສາມາດເຮັດໃຫ້ກອງພັນທີສອງຜ່າວົງປິດລ້ອມອັນແໜ້ນໜາຂອງສັດຕູໄປໄດ້, ຕໍ່ມາບໍ່ພໍທໍ່ໃດເດືອນເຫດການທີສອງກໍເກີດຂຶ້ນ ຊຶ່ງຜູ້ນຳຝ່າຍແນວລາວຮັກຊາດຂອງພວກເຮົາຈຳນວນ 16 ທ່ານທີ່ຖືກພວກສັດຕູຈັບຕົວໄປຂັງທີ່ຄຸກໂພນເຄັງກໍໄດ້ໂຕນອອກຈາກຄຸກ ພ້ອມກັນມຸ່ງໜ້າໄປສູ່ເຂດທີ່ໝັ້ນໄດ້ຢ່າງປອດໄພ, ສອງເຫດການນີ້ເປັນການສ້າງຄວາມແຕກຕື່ນ ຢ້ານກົວໃຫ້ແກ່ພວກສັດຕູຢ່າງໃຫຍ່ຫຼວງ. ນອກນັ້ນ, ຍັງໄດ້ຮັບຟັງຕົ້ນກຳເນີດຂອງວັນກຳມະກອນສາກົນຊຶ່ງເປັນວັນແຫ່ງການຕໍ່ສູ້ກູ້ຊາດຂອງຊົນຊັ້ນກຳມະກອນ ແລະ ຊາວຜູ້ອອກແຮງງານໃນທົ່ວໂລກທີ່ໄດ້ພ້ອມກັນລຸກຮືຂຶ້ນຕໍ່ສູ້ທວງເອົາສິດສະເໝີພາບອະທິປະໄຕ, ເພື່ອປົກປ້ອງສິດ ແລະ ຜົນປະໂຫຍດຂອງຕົນ, ທວງໃຫ້ນາຍທຶນເພີ່ມເງິນເດືອນ ແລະ ຫຼຸດຜ່ອນຊົ່ວໂມງເຮັດວຽກລົງ, ມື້ໜຶ່ງເຮັດວຽກ 8 ຊົ່ວໂມງ ນັບແຕ່ນັ້ນມາ ວັນທີ 1 ພຶດສະພາ ຂອງທຸກໆປີຈຶ່ງໄດ້ກາຍເປັນວັນທີມີຄວາມໝາຍ-ຄວາມສຳຄັນ, ຄວາມສາມັກຄີຂອງຊົນຊັ້ນກຳມະກອນ ແລະ ຊາວຜູ້ອອກແຮງງານ ແລະ  ມູນເຊື້ອວັນໄຊຊະນະບັ້ນຮົບດຽນບຽນຝູ້ ການຕໍ່ສູ້ຕ້ານການຮຸກຮານຈາກຈັກກະພັດພາຍນອກຂອງປະຊາຊົນຫວຽດນາມຈົນໄດ້ຮັບໄຊຊະນະ ແລະ ມີກຽດສະຫງ່າ, ໄຊຊະນະດຽນບຽນຝູ້ບໍ່ພຽງແຕ່ແມ່ນໄຊຊະນະຂອງປະຊາຊົນຫວຽດນາມ ແຕ່ຍັງແມ່ນໄຊຊະນະຂອງປະຊາຊົນລາວ ແລະ ປະຊາຊົນກຳປູເຈຍ ທີ່ໄດ້ຮ່ວມສຳພັນສູ້ຮົບຮ່ວມຂຸມຄອງຕ້ານສັດຕູຕົວດຽວກັນ ເພື່ອປົດປ່ອຍຕົນເອງ, ທັງເປັນແວ່ນແຍງທີ່ໃສແຈ້ງໃຫ້ແກ່ບັນດາປະຊາຊາດ ແລະ ກາຍເປັນຖານທີ່ໝັ້ນຂອງການປະຕິວັດທີ່ເຂັ້ມແຂງໄຊຊະນະດຽນບຽນຝູ້ເປັນຄວາມເອກອ້າງທະນົງໃຈຂອງປະຊາຊົນຫວຽດນາມ ໃນພາລະກິດສ້າງສາພັດທະນາປະເທດຊາດຊົ່ວກາລະນານ.
 ຈຸດປະສົງໃນການປະຖະກະຖາເລົ່າຄືນມູນເຊື້ອ, ລະນຶກເຖິງຄຸນງາມຄວາມດີ ແລະ ນໍ້າໃຈເສຍສະຫຼະ ຂອງບັນດານັກຮົບທີ່ໄດ້ອຸທິດຕົນ ເພື່ອປະເທດຊາດໃນຂະບວນການປະຕິວັດຜ່ານມາ ແລະ ເພື່ອສືບຕໍ່ເສີມຂະຫຍາຍມູນເຊື້ອ, ທາດແທ້ຂອງພັກເຮົາ ເຂົ້າໃນການຊີ້ນໍາ-ນໍາພາ ຈັດຕັ້ງປະຕິບັດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມທິດສັງຄົມນິຍົມ ເພື່ອເຮັດໃຫ້ພະນັກງານ ອ້ອມຂ້າງອົງການໄອຍະການປະຊາຊົນໄດ້ຮັບຮູ້ ແລະ ເຂົ້າໃຈເຖິງຄວາມໝາຍ ຄວາມສຳຄັນຂອງສາມເຫດການດັ່ງກ່າວ ເພື່ອໃຫ້ສະມາຊິກພັກ-ພະນັກງານ ມາໝູນໃຊ້ເຂົ້າໃນການປະຕິບັດໜ້າທີ່ການເມືອງໃນທົ່ວອົງການໄອຍະການປະຊາຊົນ ເອົາເປັນແບບເປັນຢ່າງໃນການດຳລົງຊີວິດປະຕິບັດໜ້າທີ່ໃຫ້ຖືກຕ້ອງ ແລະ ສອດຄ່ອງກັບລະບຽບຫຼັກການ, ໃຫ້ມີຄວາມໂປ່ງໃສ ແລະ ຍຸຕິທໍາ ໃຫ້ບັນລຸຕາມຄາດໝາຍທີ່ວາງໄວ້.
(ຂ່າວ-ພາບ:ສຸກພາວະດີ)