ໃນວັນທີ 24 ກໍລະກົດນີ້ ທີ່ຫ້ອງວ່າການແຂວງເຊກອງ ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ຕ້ອນຮັບທ່ານ ນາງ ເຈິນ ທິ ຟອງ ລານ ຮອງປະທານຜູ້ປະຈໍາການສະມາຄົມແມ່ຍິງແຂວງກອນຕູມ ສສ ຫວຽດນາມ ພ້ອມຄະນະ ເນື່ອງໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ແຂວງເຊກອງ.

ໂອກາດນີ້, ທ່ານ ເຫຼັກໄຫຼ ສີວິໄລ ໄດ້ກ່າວຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ແຂວງເຊກອງຂອງທ່ານນາງ ເຈິນ ທິ ຟອງ ລານ ຮອງປະທານຜູ້ປະຈໍາການສະມາຄົມແມ່ຍິງແຂວງກອນຕູມ ສສ ຫວຽດນາມ ພ້ອມຄະນະໃນຄັ້ງນີ້, ຊຶ່ງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ກໍຄືແຂວງເຊກອງ ແລະ ແຂວງກອນຕູມ ເວົ້າລວມ, ເວົ້າສະເພາະສະຫະພັນແມ່ຍິງແຂວງເຊກອງ ກັບສະມາຄົມແມ່ຍິງແຂວງກອນຕູມໃຫ້ແໜ້ນແຟ້ນຍິ່ງຂຶ້ນ. ພ້ອມນີ້, ທ່ານເຈົ້າແຂວງຍັງໄດ້ອວຍພອນໃຫ້ທ່ານນາງ ເຈິນ ທິ ຟອງ ລານ ພ້ອມຄະນະ ຈົ່ງປະສົບຜົນສໍາເລັດໃນການຢ້ຽມຢາມ ແລະ ເຮັດວຽກຢູ່ແຂວງເຊກອງ ແລະ ຂໍຖືເອົາໂອກາດນີ້, ຕາງໜ້າໃຫ້ຄະນະບໍລິຫານງານພັກແຂວງ, ສະພາປະຊາຊົນແຂວງ, ອົງການປົກ ຄອງແຂວງ ກໍຄືປະຊາຊົນແຂວງເຊກອງ ສະແດງຄວາມເສົ້າສະຫຼົດໃຈ ແລະ ອາໄລອາວອນຢ່າງສຸດຊື້ງຕໍ່ການຈາກໄປຂອງສະຫາຍ ຫງວຽນ ຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຊຶ່ງເປັນການສູນເສຍຜູ້ນໍາປະຕິວັດທີ່ອົງອາດກ້າແກ່ນຂອງພັກ, ລັດ ແລະ ປະຊາຊົນຫວຽດນາມອ້າຍນ້ອງ.

ທ່ານນາງ ເຈິນ ທິ ຟອງ ລານ ກໍໄດ້ສະແດງຄວາມຂອບໃຈຕໍ່ທ່ານເຈົ້າແຂວງ, ຄະນະພັກ-ອົງການປົກຄອງແຂວງ ກໍຄືຄະນະບໍລິຫານງານສະຫະພັນແມ່ຍິງແຂວງເຊກອງ ທີ່ໄດ້ຕ້ອນຮັບຢ່າງອົບອຸ່ນ ພ້ອມທັງແຈ້ງຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ແຂວງເຊກອງໃນຄັ້ງນີ້ ໃຫ້ທ່ານເຈົ້າແຂວງຮັບຊາບ. ຂ່າວ-ພາບ: ສັນຍາ