ໃນວັນທີ 24 ກໍລະກົດຜ່ານມາ ທີ່ຫ້ອງວ່າການແຂວງເຊກອງ ໄດ້ມີກອງປະຊຸມພົບປະແລກປ່ຽນບົດຮຽນ ລະຫວ່າງສະຫະພັນແມ່ຍິງແຂວງເຊກອງ ສປປ ລາວ ແລະ ສະມາຄົມແມ່ຍິງແຂວງກອນຕູມ ສສ ຫວຽດນາມ, ຝ່າຍແຂວງເຊກອງນໍາໂດຍທ່ານນາງ ວິໄລວັນ ດາລາສິນ ປະທານສະຫະພັນແມ່ຍິງແຂວງ ແລະ ຝ່າຍແຂວງກອນຕູມນໍາໂດຍທ່ານນາງ ເຈິນ ທິ ຟອງ ລານ ຮອງປະທານ ຜູ້ປະຈໍາການສະມາຄົມແມ່ຍິງແຂວງ ແລະ ພາກ ສ່ວນກ່ຽວຂ້ອງສອງຝ່າຍເຂົ້າຮ່ວມ.
ໃນກອງປະຊຸມ, ສອງຝ່າຍໄດ້ທົບທວນຄືນການພົວພັນຮ່ວມມືໃນໄລຍະຜ່ານມາ ແລະ ປຶກສາຫາລືທິດທາງແຜນການຮ່ວມມືໃນຕໍ່ໜ້າ. ພ້ອມນັ້ນ, ທັງສອງຝ່າຍໄດ້ແຈ້ງສະພາບການພົ້ນເດັ່ນຂອງແຂວງ ແລະ ການ ເຄື່ອນໄຫວວຽກງານສະຫະພັນແມ່ຍິງພາຍໃນແຂວງຂອງຕົນໃຫ້ກັນຊາບ; ສອງຝ່າຍຈະສືບຕໍ່ປະສານງານໃຫ້ ການຊ່ວຍເຫຼືອຊຶ່ງກັນ ແລະ ກັນ, ສ້າງເງື່ອນໄຂກາລະໂອກາດໃນການພົບປະແລກປ່ຽນ, ຖອດຖອນບົດຮຽນການປະຕິບັດໜ້າທີ່ວຽກງານ; ສ້າງເງື່ອນໄຂຈັດກອງປະຊຸມສໍາມະນາ, ແລກປ່ຽນບົດຮຽນ, ຂໍ້ມູນຂ່າວສານຕ່າງໆ ທີ່ເປັນປະໂຫຍດຕໍ່ການພັດທະນາແມ່ຍິງ, ການສ້າງຄວາມເຂັ້ມແຂງໃຫ້ແມ່ຍິງທາງດ້ານການເມືອງ, ເສດຖະກິດ ໂດຍສະເພາະວິທີທາງໃນການສົ່ງເສີມອາຊີບ, ສີມືແຮງງານ, ສ້າງວຽກເຮັດງານທໍາໃຫ້ແກ່ແມ່ຍິງ ແລະ ສືບຕໍ່ປະ ຕິບັດຕາມບົດບັນທຶກການຮ່ວມມື ກໍຄືແຜນການຮ່ວມມືໃນຕໍ່ໜ້າຢ່າງເປັນເຈົ້າການ ແລະ ມີປະສິດທິຜົນ ເພື່ອປະ ກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ກໍຄືແຂວງເຊກອງ ແລະ ແຂວງກອນຕູມ ເວົ້າລວມ, ເວົ້າສະເພາະສະຫະພັນແມ່ຍິງແຂວງເຊກອງ ກັບສະມາຄົມແມ່ຍິງແຂວງກອນຕູມໃຫ້ນັບມື້ເຂົ້າສູ່ລວງເລິກ ແລະ ແໜ້ນແຟ້ນຍິ່ງຂຶ້ນ.
ໂອກາດນີ້, ທ່ານນາງ ເຈິນ ທິ ຟອງ ລານ ຕາງໜ້າໃຫ້ສະມາຄົມແມ່ຍິງແຂວງກອນຕູມ ໄດ້ມອບຄອມພິວເຕີ 1 ຊຸດ ມູນຄ່າ 10 ລ້ານດົ້ງ (ສະກຸນເງິນຫວຽດນາມ) ໃຫ້ສະຫະພັນແມ່ຍິງແຂວງເຊກອງ ແລະ ມອບເງິນສົດ 10 ລ້ານດົ້ງໃຫ້ຄອບຄົວທຸກຍາກ ເພື່ອສ້າງຕົວແບບການລ້ຽງຊີບໃຫ້ແກ່ແມ່ຍິງທຸກຍາກ.
ຂ່າວ-ພາບ: ສັນຍາ