ສປປ ລາວ ແລະ ຍີ່ປຸ່ນ ໄດ້ເປັນເຈົ້າພາບຮ່ວມຈັດກອງປະຊຸມລັດຖະມົນຕີຕ່າງປະເທດຂອບການຮ່ວມມືຄູ່ຮ່ວມແມ່ນໍ້າຂອງ-ຍີ່ປຸ່ນ ຄັ້ງທີ 15 ທີ່ ນະຄອນຫຼວງວຽງຈັນ ໃນວັນທີ 26 ກໍລະກົດ ນີ້ ຊຶ່ງໄດ້ຈັດຂຶ້ນຄຽງຄູ່ກັບກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ພາຍໃຕ້ການເປັນປະທານຮ່ວມຂອງທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານນາງ Kamikawa Yoko ລັດຖະມົນຕີກະຊວງການຕ່າງປະເທດແຫ່ງ ຍີ່ປຸ່ນ, ມີບັນດາລັດຖະມົນຕີ ພ້ອມດ້ວຍບັນດາຫົວໜ້າເຈົ້າໜ້າທີ່ອາວຸໂສປະເທດສະມາຊິກແມ່ນໍ້າຂອງຄື: ກຳປູເຈຍ, ມຽນມາ, ໄທ ແລະ ຫວຽດນາມເຂົ້າຮ່ວມ.

ກອງປະຊຸມໃນຄັ້ງນີ້, ໄດ້ຮ່ວມກັນທົບທວນຄືນໝາກຜົນຂອງການຮ່ວມມືລະຫວ່າງບັນດາປະເທດສະມາຊິກແມ່ນ້ຳຂອງ ແລະ ຍີ່ປຸ່ນໃນໄລຍະຜ່ານມາ ໂດຍສະເພາະການຈັດຕັ້ງປະຕິບັດບັນດາແຜນງານ ແລະ ບັນດາໂຄງການຕ່າງໆທີ່ນອນຢູ່ໃນແຜນຍຸດທະສາດໂຕກຽວ 2018 ຊຶ່ງໄດ້ປະກອບສ່ວນເຂົ້າໃນການປັບປຸງຊີວິດການເປັນຢູ່ຂອງປະຊາຊົນ, ການຈັດຕັ້ງປະຕິບັດແຜນແມ່ບົດເຊື່ອມຈອດຂອງອາຊຽນ ແລະ ແລວເສດຖະກິດຕາເວັນອອກ-ຕາເວັນຕົກໄດ້ເປັນຢ່າງດີ. ພ້ອມດຽວກັນນັ້ນ, ກອງປະຊຸມຍັງໄດ້ຮ່ວມກັນວາງທິດທາງແຜນການໃນຕໍ່ໜ້າ ຊຶ່ງໄດ້ກຳນົດເອົາ 3 ເສົາຄໍ້າການຮ່ວມມືໃໝ່ຄື: ການຟື້ນຟູ ແລະ ເຊື່ອມຈອດສັງຄົມພາຍຫຼັງໂຄວິດ-19 ໂດຍແນໃສ່ສ້າງຄວາມເຂັ້ມແຂງດ້ານການພັດທະນາພື້ນຖານໂຄງລ່າງ, ຕ່ອງໂສ້ການສະໜອງ, ການແລກປ່ຽນລະຫວ່າງປະຊາຊົນ ແລະ ວຽກງານສາທາລະນະສຸກ, ການຫັນເປັນດີຈີຕອນ ແລະ ຮັບປະກັບຄວາມໝັ້ນຄົງໃນຮູບແບບໃໝ່ສຸມໃສ່ຄວາມໝັ້ນຄົງດ້ານເສດຖະກິດ ການຄຸ້ມຄອງ ແລະ ບໍລິຫານນ້ຳ, ການຫັນເປັນສີຂຽວ, ການປ່ຽນແປງຂອງສະພາບອາກາດ ແລະ ການຈັດຕັ້ງປະຕິບັດແຜນປະຕິບັດງານຕ່າງໆທີ່ນອນໃນຂອບການຮ່ວມມືພາກພື້ນ ແລະ ສາກົນ.

ກອງປະຊຸມຄັ້ງນີ້, ຍັງໄດ້ຮັບຮອງເອົາເອກະສານສໍາຄັນຂອງກອງປະຊຸມ 1 ສະບັບຄື: ຍຸດທະສາດການຮ່ວມມືແມ່ນ້ຳຂອງ-ຍີ່ປຸ່ນ 2024 ເພື່ອເປັນບ່ອນອີງໃຫ້ແກ່ການສືບຕໍ່ເພີ່ມທະວີການຮ່ວມມືໃນການພັດທະນາເສດຖະກິດ-ສັງຄົມ ລະຫວ່າງບັນດາປະເທດສະມາຊິກແມ່ນໍ້າຂອງ ແລະ ຍີ່ປຸ່ນໃນຕໍ່ໜ້າ. ໃນໂອກາດດັ່ງກ່າວ, ທ່ານ ສະເຫຼີມໄຊ ກົມມະສິດ ໄດ້ຕີລາຄາສູງຕໍ່ໝາກຜົນຂອງການຮ່ວມມືພາຍໃຕ້ຂອບການຮ່ວມມືແມ່ນ້ຳຂອງ-ຍີ່ປຸ່ນຕະຫຼອດໄລຍະຜ່ານມາ ຊຶ່ງໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມໃນພາກພື້ນແມ່ນໍ້າຂອງເວົ້າລວມ, ເວົ້າສະເພາະກໍຄືຂອງ ສປປ ລາວ. ພ້ອມດຽວກັນ, ກໍໄດ້ຍົກໃຫ້ເຫັນເຖິງໜຶ່ງໃນຄວາມຄືບໜ້າສຳຄັນຂອງການພັດທະນາພື້ນຖານໂຄງລ່າງທີ່ມີຄຸນນະພາບ ຊຶ່ງມີຄວາມສຳຄັນຕໍ່ການຫັນ ສປປ ລາວ ຈາກປະເທດທີ່ບໍ່ມີຊາຍແດນອອກສູ່ທະເລໃຫ້ກາຍເປັນປະເທດເຊື່ອມຈອດພາກພື້ນ ທັງເປັນການອຳນວຍຄວາມສະດວກທາງດ້ານການຄ້າການລົງທຶນ ແລະ ການເຂົ້າເຖິງຕະຫຼາດພາກພື້ນ ແລະ ທົ່ວໂລກ.

(ຂ່າວ: ກະຊວງການຕ່າງປະເທດ, ພາບ: ສໍານານ)