ພິທີສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ການາດາ ຄົບຮອບ 50 ປີ ຊຶ່ງ ສປປ ລາວ ແລະ ການາດາ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 15 ມິຖຸນາ 1974 ແລະ ວັນຊາດການາດາ ຄົບຮອບ 157 ປີ (1 ກໍລະກົດ 1867-1 ກໍລະກົດ 2024) ພ້ອມທັງສະເຫຼີມສະ ຫຼອງການເປັນປະເທດປະສານງານອາຊຽນ-ການາດາ ຂອງ ສປປ ລາວ ຊຶ່ງຈັດໂດຍ ທ່ານ ນາງ ປິ່ງ ກິດນິກອນ ເອກອັກຄະລັດຖະທູດ ການາດາ ປະຈຳ ສປປ ລາວ ທີ່ມີສໍານັກງານຕັ້ງຢູ່ ບາງກອກ ໄດ້ຈັດຂຶ້ນໃນຕອນຄໍ່າຂອງວັນທີ 25 ກໍລະກົດ ຜ່ານມາ ທີ່ ໂຮງແຮມລາວພລາຊາ ທີ່ ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມຂອງ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ໃນນາມຕາງໜ້າລັດຖະບານ ແຫ່ງ ສປປ ລາວ ແລະ ທ່ານ ນາງ Mélanie Joly ລັດຖະມົນຕີຕ່າງປະເທດ ຕາງໜ້າລັດຖະບານ ການາດາ, ມີບັນດາລັດຖະມົນຕີ-ຮອງລັດຖະມົນຕີ, ເຈົ້າ ໜ້າທີ່ຈາກຂະແໜງການຕ່າງໆ ຂອງ ສປປ ລາວ ພ້ອມດ້ວຍບັນດາທູຕານຸທູດປະເທດຕ່າງໆ ປະຈໍາ ສປປ ລາວ ເຂົ້າຮ່ວມ.

ໃນໂອກາດນີ້, ທ່ານ ສະເຫຼີມໄຊ ກົມມະສິດ ຮ່ວມກັບທ່ານ ນາງ Mélanie Joly ແລະ ທ່ານ ນາງ ປິ່ງ ກິດນິກອນ ໄດ້ກ່າວສະແດງຊົມເຊີຍ ແລະ ຕີລາຄາສູງຕໍ່ຜົນສຳເລັດການພົວພັນຮ່ວມມືອັນດີ ລະຫວ່າງ ສປປ ລາວ ແລະ ການາດາ ຕະຫຼອດໄລຍະ 5 ທົດສະວັດທີ່ຜ່ານມາ ໂດຍສະເພາະສອງຝ່າຍໄດ້ມີການຮ່ວມມືໃນຫຼາຍຂົງເຂດ ເປັນຕົ້ນວຽກງານເກັບກູ້ລະເບີດທີ່ບໍ່ທັນແຕກ, ການສຶກສາ, ສາທາລະນະສຸກ, ມູນຄ່າການຄ້າ ລະຫວ່າງສອງປະເທດ ໄລຍະປີ 2019-2023 ສາມາດບັນລຸໄດ້ 141.486.316 ໂດລາ; ການາດາ ຍັງໄດ້ມາລົງທຶນ ໃນຂະແໜງຄ້າຂາຍຍົກ-ຄ້າຂາຍຍ່ອຍ, ສ້ອມແປງລົດຍົນ-ລົດຈັກ, ອຸດສາຫະກໍາປຸງແຕ່ງ, ກະສິກໍາ-ປ່າໄມ້, ການປະມົງ ແລະ ອື່ນໆ. ນອກຈາກນັ້ນ, ລາວ ແລະ ການາດາ ຍັງໄດ້ຮ່ວມມືພາຍໃຕ້ຂອບອາຊຽນ ໂດຍການາດາ ໄດ້ສະໜັບສະໜູນວຽກງານ IT ແກ່ ສປປ ລາວ ໃນໄລຍະກອງປະຊຸມອາຊຽນ 2024. ນອກນີ້, ສປປ ລາວ ຍັງເຮັດໜ້າທີ່ເປັນປະເທດປະສານງານອາຊຽນ-ການາດາ ເປັນເວລາ 3 ປີ ເລີ່ມແຕ່ເດືອນ ກໍລະກົດ 2024 ເຖິງປີ 2027.

ພິທີສະເຫຼີມສະຫຼອງວັນດັ່ງກ່າວ ຍັງໄດ້ເປັນນິມິດໝາຍອັນດີໃຫ້ແກ່ການເສີມຂະຫຍາຍການພົວພັນຮ່ວມມືທີ່ນັບມື້ນັບເພີ່ມຂຶ້ນ ແລະ ເປັນທິດທາງສໍາລັບການຮ່ວມມືໃນຕໍ່ໜ້າ ລະຫວ່າງ ສອງປະເທດລາວ ແລະ ການາດາ.

(ຂ່າວ: ວັນເພັງ, ຂໍ້ມູນ: ກະຊວງການຕ່າງປະເທດ, ພາບ: ສໍານານ)