ສປປ ລາວ ແລະ ສ ອາເມຣິກາ ໄດ້ເປັນເຈົ້າພາບຮ່ວມຈັດກອງປະຊຸມລັດຖະມົນຕີຕ່າງປະເທດຂອບການຮ່ວມມືຄູ່ຮ່ວມແມ່ນໍ້າຂອງ-ສ ອາເມຣິກາ ຄັ້ງທີ 3 ໃນວັນທີ 27 ກໍລະກົດ 2024, ທີ່ ຫໍປະຊຸມແຫ່ງຊາດ ນະຄອນຫຼວງວຽງຈັນ ຊຶ່ງໄດ້ຈັດຂຶ້ນຄຽງຄູ່ກັບກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57. ພາຍໃຕ້ການເປັນປະທານຮ່ວມຂອງ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ Antony J. Blinken, ລັດຖະມົນຕີຕ່າງປະເທດ ແຫ່ງ ສ ອາເມຣິກາ, ມີບັນດາລັດຖະມົນຕີ ແລະ ບັນດາຫົວໜ້າເຈົ້າໜ້າທີ່ອາວຸໂສປະເທດສະມາຊິກແມ່ນໍ້າຂອງຄື: ກຳປູເຈຍ, ມຽນມາ, ໄທ ແລະ ຫວຽດນາມ ເຂົ້າຮ່ວມຢ່າງພ້ອມພຽງ.

ກອງປະຊຸມໃນຄັ້ງນີ້, ໄດ້ຮ່ວມກັນທົບທວນ ຄືນໝາກຜົນຂອງການຮ່ວມມື ລະຫວ່າງບັນດາປະເທດສະມາຊິກແມ່ນ້ຳຂອງ ແລະ ສ ອາເມຣິກາ ໃນໄລຍະຜ່ານມາ ກໍຄືບັນດາແຜນງານ-ໂຄງການ ທີ່ນອນຢູ່ໃນແຜນປະຕິບັດງານຂອບການຮ່ວມມືຄູ່ຮ່ວມແມ່ນໍ້າຂອງ-ສ ອາເມຣິກາ 2024-2026 ແລະ ເພື່ອສົ່ງເສີມການພົວພັນຮ່ວມມື ລະຫວ່າງ ບັນດາປະເທດສະມາຊິກແມ່ນ້ຳຂອງ ແລະ ສ ອາເມຣິກາ, ເພື່ອຮັດແໜ້ນການຮ່ວມມືໃນການເຊື່ອມໂຍງ ແລະ ເຊື່ອມຈອດພາກພື້ນ ແນໃສ່ການພັດທະນາເສດຖະກິດ-ສັງຄົມ ໃນອະນຸພາກພື້ນແມ່ນໍ້າຂອງໂດຍລວມ.

ພ້ອມດຽວກັນນັ້ນ, ກອງປະຊຸມ ຍັງໄດ້ຮ່ວມກັນວາງທິດທາງແຜນການໃນຕໍ່ໜ້າ ໂດຍເນັ້ນໃສ່ການຮ່ວມມືເພື່ອຟື້ນຟູສະພາບເສດຖະກິດໃນພາກພື້ນແມ່ນໍ້າຂອງ ໂດຍສະເພາະ ປິ່ນອ້ອມຂົງເຂດການຮ່ວມມືທີ່ເປັນບູລິມະສິດ ຄື: ການເຊື່ອມໂຍງເສດຖະກິດ, ການປົກປັກຮັກສາ ແລະ ການອະນຸລັກສິ່ງແວດລ້ອມ, ການຄຸ້ມຄອງນ້ຳ ແລະ ການຄຸ້ມຄອງຊັບພະຍາກອນທຳມະ ຊາດແບບຍືນຍົງ ແລະ ດ້ານຄວາມໝັ້ນຄົງທີ່ບໍ່ແມ່ນດ້ານການທະຫານ.

ກອງປະຊຸມຄັ້ງນີ້, ຍັງໄດ້ຮັບຮອງເອົາເອກະສານສໍາຄັນຂອງກອງປະຊຸມ 2 ສະບັບ ຄື: ແຜນປະຕິບັດງານຂອບການຮ່ວມມືຄູ່ຮ່ວມແມ່ນໍ້າຂອງ-ສ ອາເມຣິກາ 2024-2026 ແລະ ຖະແຫຼງການປະທານຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມືຄູ່ຮ່ວມແມ່ນໍ້າຂອງ-ສ ອາເມຣິກາ ຄັ້ງທີ 3 ເພື່ອເປັນບ່ອນອີງໃຫ້ແກ່ການສືບຕໍ່ເພີ່ມທະວີການຮ່ວມມືໃນການພັດທະນາ ເສດຖະກິດ-ສັງຄົມ ລະຫວ່າງບັນດາປະເທດສະມາຊິກແມ່ນໍ້າຂອງ ແລະ ສ ອາເມຣິກາ ໃນຕໍ່ໜ້າ. ພ້ອມນີ້, ກໍໄດ້ສະເໜີມອບ-ຮັບໜ້າທີ່ການເປັນປະທານຮ່ວມຂອງຂອບການຮ່ວມມືດັ່ງກ່າວຈາກ ສປປ ລາວ ເພື່ອສົ່ງຕໍ່ໃຫ້ ໄທ ເປັນປະທານຮ່ວມກັບ ສ ອາເມລິກາ ນັບແຕ່ປີ 2025 ເປັນຕົ້ນໄປ.

ໃນໂອກາດເຂົ້າຮ່ວມກອງປະຊຸມດັ່ງກ່າວ, ທ່ານສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍ ແລະ ຂອບໃຈຕໍ່ ໄທ ທີ່ຮັບໜ້າທີ່ການເປັນປະທານຮ່ວມຕໍ່ຈາກ ສປປ ລາວ ແລະ ໄດ້ສະແດງຄວາມຂອບໃຈຕໍ່ລັດຖະບານ ສ ອາເມຣິກາ ທີ່ໄດ້ສືບຕໍ່ປະກອບສ່ວນໃນການພັດທະນາເສດຖະກິດ-ສັງຄົມ ຢູ່ ໃນພາກພື້ນແມ່ນ້ຳຂອງ, ລວມທັງ ສປປ ລາວ. ພ້ອມທັງສະເໜີ ໃຫ້ ສ ອາເມຣິກາ ສືບຕໍ່ເພີ່ມທະວີ ແລະ ສົ່ງເສີມການຮ່ວມມື ລະຫວ່າງ ສ ອາເມຣິກາ ແລະ ປະເທດສະມາຊິກແມ່ນ້ຳຂອງ.

(ຂ່າວ-ພາບ: ກະຊວງການຕ່າງປະເທດ)