ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມອື່ນໆທີ່ກ່ຽວຂ້ອງ ປິດລົງດ້ວຍຜົນສຳເລັດເປັນຢ່າງດີ, ພາຍຫຼັງຈັດຂຶ້ນໃນລະຫວ່າງວັນທີ 24-27 ກໍລະກົດ 2024 ທີ່ ນະຄອນຫຼວງວຽງຈັນ (ນວ), ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຖະແຫຼງຂ່າວຜົນສຳເລັດກອງປະຊຸມດັ່ງກ່າວ ທີ່ຕໍ່ສື່ມວນຊົນທັງພາຍໃນ ແລະ ຕ່າງປະເທດໃນຕອນແລງວັນທີ 27 ກໍລະກົດນີ້ ທີ່ ຫໍປະຊຸມແຫ່ງຊາດ ນວ ວ່າ: ກອງປະຊຸມລະດັບລັດຖະມົນຕີຕ່າງປະເທດມີທັງໝົດ 25 ກອງປະຊຸມ. ພ້ອມດຽວກັນນັ້ນ, ໃນໄລຍະກອງປະຊຸມຄັ້ງນີ້ ກໍໄດ້ມີຫຼາຍການພົບປະ ແລະ ປຶກສາຫາລືໃນຂອບສອງຝ່າຍ ຂອງບັນດາປະເທດຕ່າງໆ. ໃນນັ້ນ, ທຸກໆກອງປະຊຸມ ໄດ້ມີການປຶກສາຫາລືແບບກົງໄປກົງມາ ໃນຫຼາຍຫົວຂໍ້ຢ່າງຮອບດ້ານ ແລະ ໄດ້ຮັບໝາກຜົນສູງ ຊຶ່ງເນື້ອໃນສຳຄັນຂອງຜົນກອງປະຊຸມມີດັ່ງນີ້: ໃນໄລຍະກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ນີ້, ໄດ້ມີການປຶກສາຫາລືກ່ຽວກັບຫຼາຍບັນຫາດັ່ງນີ້: ໄດ້ສະແດງຄວາມຍິນດີຕໍ່ຄວາມຄືບໜ້າໃນການຈັດຕັ້ງປະຕິບັດ 9 ບຸລິມະສິດ ຂອງປະທານອາຊຽນ ປີ 2024; ພວກເຮົາມີຄວາມຍິນດີຕໍ່ຄວາມຄືບໜ້າໃນການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ການຮ່າງບັນດາແຜນຍຸດທະສາດ ເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2045 ຊຶ່ງຈະຖືກຮັບຮອງເອົາໃນປີໜ້າ; ກ່ຽວກັບການປົກປັກຮັກສາພາກພື້ນອາຊີຕາເວັນອອກສຽງໃຕ້ໃຫ້ເປັນເຂດປອດອາວຸດນີວເຄລຍ, ໄດ້ຢ້ຳຄືນຄວາມໝາຍໝັ້ນ ທີ່ຈະສືບຕໍ່ພົວພັນກັບບັນດາປະເທດທີ່ມີອາວຸດນິວເຄລຍຄອບຄອງ ເພື່ອຊຸກຍູ້ໃຫ້ບັນດາປະເທດດັ່ງກ່າວ ເຂົ້າຮ່ວມອານຸສັນຍາຂອງສົນທິສັນຍາເຂດປອດອາວຸດນິວເຄລຍ ອາຊີຕາເວັນອອກສຽງໃຕ້ ໂດຍໄວ. ພ້ອມດຽວກັນນັ້ນ, ຍັງໄດ້ຮັບຮອງເອົາການສະໝັກເຂົ້າເປັນພາຄີສົນທິສັນຍາເຂດປອດອາວຸດນິວເຄລຍ ອາຊີຕາເວັນອອກສຽງໃຕ້ຂອງຕີມໍແລັດສະເຕ. ປັດຈຸບັນ, ແມ່ນຢູ່ໃນຂັ້ນຕອນການກະກຽມ ເພື່ອໃຫ້ຕີມໍແລັດສະເຕ ເຂົ້າເປັນພາຄີຂອງສົນທິສັນຍາດັ່ງກ່າວໂດຍໄວ; ໄດ້ຍິນດີຕໍ່ກັບຄວາມຄືບໜ້າໃນການຈັດຕັ້ງປະຕິບັດແຜນງານສໍາລັບການເປັນສະມາຊິກສົມບູນອາຊຽນ ຂອງຕີມໍແລັດສະເຕ. ໃນໄລຍະກອງປະຊຸມຄັ້ງນີ້, ລັດຖະມົນຕີຕ່າງປະເທດຂອງ ຕີມໍແລັດສະເຕ ໄດ້ເຂົ້າຮ່ວມທຸກໆກອງປະຊຸມໃນຖານະປະເທດສັງເກດການ; ພວກເຮົາ ມີຄວາມຍິນດີທີ່ຫຼາຍປະເທດນອກພາກພື້ນສະແດງຄວາມສົນໃຈ ເຂົ້າເປັນພາຄີຂອງສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສຽງໃຕ້ (TAC). ສົນທິສັນຍາດັ່ງກ່າວ ແມ່ນກົດແຫ່ງການປະພຶດອັນສຳຄັນສຳລັບການຮ່ວມມືລະຫວ່າງບັນດາປະເທດໃນພາກພື້ນ. ປັດຈຸບັນ, ສົນທິສັນຍາ TAC ມີພາຄີທັງໝົດ 54 ພາຄີ. ພວກເຮົາ ຫວັງວ່າປະເທດ ອານເຊຣີ, ແຟງລັງ, ລຸກຊຳບວກ, ແອັດສະປາຍ, ແລະ ເມັກຊິກ ຈະເຂົ້າຮ່ວມລົງນາມສົນທິສັນຍາດັ່ງກ່າວໃນໄວໆນີ້; ໄດ້ຢ້ຳຄືນຄວາມສຳຄັນຂອງການຮັດແໜ້ນ ຄວາມເປັນເອກະພາບ ແລະ ຄວາມເປັນແກນກາງຂອງອາຊຽນ ໃນການຮ່ວມມືກັບຄູ່ຮ່ວມພາຍນອກ, ໂດຍຜ່ານກົນໄກທີ່ອາຊຽນເປັນຜູ້ນຳພາເຊັ່ນ: ອາຊຽນບວກໜຶ່ງ, ອາຊຽນບວກສາມ, ກອງປະຊຸມສຸດຍອດອາຊີຕາເວັນອອກ, ກອງປະຊຸມເວທີພາກພື້ນອາຊຽນ ແລະ ກອງປະຊຸມລັດຖະມົນຕີປ້ອງກັນປະເທດອາຊຽນບວກ ເພື່ອສ້າງຄວາມໄວ້ເນື້ອເຊື່ອໃຈ ແລະ ເຊື່ອໝັ້ນ ຊຶ່ງກັນ ແລະ ກັນ ກໍຄືການເສີມສ້າງໂຄ້ງສ້າງພາກພື້ນທີ່ເປີດກວ້າງ, ໂປ່ງໃສ, ເຂັ້ມແຂງ ແລະ ການມີສ່ວນຮ່ວມຂອງທຸກຝ່າຍໂດຍມີ ອາຊຽນເປັນແກນກາງ. ສຳລັບລາຍລະອຽດເພີ່ມເຕີມຂອງຜົນກອງປະຊຸມຄັ້ງທີ່ 57 ນີ້ ທ່ານສາມາດເບິ່ງໄດ້ຢູ່ໃນຖະແຫຼງການຮ່ວມຂອງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ຊຶ່ງຖືກຮັບຮອງ ແລະ ພວກເຮົາໄດ້ເຜີຍແຜ່ຕໍ່ສາທາລະນະແລ້ວ.

ທ່ານ ສະເຫຼີມໄຊ ກົມມະສິດ ລາຍງານຕື່ມວ່າ: ພວກເຮົາໄດ້ຈັດກອງປະຊຸມ ລັດຖະມົນຕີຕ່າງປະເທດອາຊຽນ ກັບລັດຖະມົນຕີຕ່າງປະເທດຂອງປະເທດຄູ່ເຈລະຈາອາຊຽນ ຈຳນວນ 11 ກອງປະຊຸມຄື: ອົສຕຣາລີ, ການາດາ, ຈີນ, ສະຫະພາບເອີຣົບ, ອິນເດຍ, ຍີ່ປຸ່ນ, ນິວຊີແລນ, ສ ເກົາຫຼີ, ສະຫະພັນຣັດເຊຍ, ສະຫະລັດອາເມຣິກາ ແລະ ອັງກິດ; ພວກເຮົາ ໄດ້ທວນຄືນຄວາມຄືບໜ້າໃນການຮ່ວມມືລະຫວ່າງອາຊຽນ ແລະ ແຕ່ລະປະເທດຄູ່ເຈລະຈາ ໃນຊຸມປີທີ່ຜ່ານມາ ແລະ ໄດ້ກຳນົດທິດທາງໃນຕໍ່ໜ້າ. ສຳລັບການຮ່ວມມື ໂດຍມີເປົ້າໝາຍ ເພື່ອເພີ່ມທະວີການຮ່ວມມືຢ່າງໃກ້ຊິດໃນຂົງເຂດທີ່ມີທ່າແຮງເປັນຕົ້ນແມ່ນດ້ານການຄ້າ, ການລົງທຶນ, ການເຊື່ອມຈອດ, ຄວາມໝັ້ນຄົງທາງດ້ານສະບຽງອາຫານ ແລະ ພະລັງງານ, ຊາວໜຸ່ມ, ການທ່ອງທ່ຽວ ແລະ ການໄປມາຫາສູ່ລະຫວ່າງປະຊາຊົນ ແລະ ອື່ນໆ;ພວກເຮົາ ໄດ້ສະແດງຄວາມຊົມເຊີຍຕໍ່ຜົນສໍາເລັດຂອງກອງປະຊຸມສຸດຍອດພິເສດ ເພື່ອສະເຫຼີມສະຫຼອງການພົວພັນຮ່ວມມືອາຊຽນ-ອົສຕຣາລີ ຄົບຮອບ 50 ປີ ຊຶ່ງໄດ້ຈັດຂຶ້ນທີ່ ເມວເບີນ ອົສຕຣາລີ ໃນເດືອນ ມີນາ ທີ່ຜ່ານມາ; ພວກເຮົາ ໄດ້ສະແດງຄວາມຊົມເຊີຍ ການຍົກລະດັບເປັນຄູ່ຮ່ວມມືຍຸດທະສາດຮອບດ້ານ ອາຊຽນ-ຍີ່ປຸ່ນ ແລະ ຄູ່ຮ່ວມຍຸດທະສາດ ອາຊຽນ-ການາດາ ໃນປີທີ່ຜ່ານມາ; ເຫັນດີສະເຫຼີມສະຫຼອງ ຄົບຮອບ 35 ປີ ການພົວພັນຮ່ວມມື ອາຊຽນ-ສ.ເກົາຫຼີ ໃນປີນີ້, ພ້ອມກັບການຍົກລະດັບເປັນຄູ່ມືຮ່ວມຍຸດທະສາດຮອບດ້ານ ໃນກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດອື່ນໆທີ່ກ່ຽວຂ້ອງ; ຍັງໄດ້ເຫັນດີຈັດການສະເຫຼີມສະຫຼອງ ຄົບຮອບ 50 ປີ ແຫ່ງ ການພົວພັນຮ່ວມມືອາຊຽນ-ນິວຊີແລນ ໃນປີໜ້າ, ລວມທັງຈັດກອງປະຊຸມສຸດຍອດ ເພື່ອສະເຫຼີມສະຫຼອງການພົວພັນຮ່ວມມືດັ່ງກ່າວ ໃນປີ 2025. ພ້ອມນນັ້ນ, ກອງປະຊຸມ ຍັງໄດ້ຮັບຮອງເອົາເອກະສານຜົນກອງປະຊຸມຫຼາຍສະບັບ ເປັນຕົ້ນແມ່ນແຜນປະຕິບັດງານເພື່ອຈັດຕັ້ງຜັນຂະຫຍາຍການເປັນຄູ່ຮ່ວມຍຸດທະສາດຮອບດ້ານ ອາຊຽນ-ອົສຕຣາລີ (2025-2029), ຖະແຫຼງການຮ່ວມລັດຖະມົນຕີຕ່າງປະເທດອາຊຽນ-ຈີນ ວ່າດ້ວຍການຮັດແໜ້ນການຮ່ວມມືດ້ານມະນຸດສະທໍາໃນການເກັບກູ້ລະເບີດ, ຖະແຫຼງການຮ່ວມລັດຖະມົນຕີຕ່າງປະເທດອາຊຽນ-ຣັດເຊຍ ເພື່ອສະເຫຼີມສະຫຼອງການເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສຽງໃຕ້ ຂອງລັດເຊຍ ຄົບຮອບ 20 ປີ, ຖະແຫຼງການຮ່ວມອາຊຽນ-ອັງກິດ ວ່າດ້ວຍການເພີ່ມທະວີການເຊື່ອມຈອດ ເພື່ອອະນາຄົດທີ່ໝັ້ນຄົງ ແລະ ຍືນຍົງ, ຖະແຫຼງການຜູ້ນໍາຮ່ວມອາຊຽນ-ສ ເກົາຫຼີ ວ່າດ້ວຍການເປັນຄູ່ຮ່ວມຍຸດທະສາດຮອບດ້ານ. ພ້ອມນີ້, ກໍໄດ້ຈັດກອງປະຊຸມສາມຝ່າຍ ລະຫວ່າງ ສປປ ລາວ ໃນນາມປະທານອາຊຽນ, ກອງເລຂາອາຊຽນ ຮ່ວມກັບ ນອກແວ, ຕວັກກີ ແລະ ສະວິດ ເພື່ອທົບທວນຄືນການພົວພັນຮ່ວມມື.

ບັນດາລັດຖະມົນຕີຕ່າງປະເທດອາຊຽນ ໄດ້ພົບປະກັບບັນດາລັດຖະມົນຕີຕ່າງປະເທດບວກສາມ (ສປ ຈີນ, ຍີ່ປຸ່ນ ແລະ ສ ເກົາຫຼີ) ໃນໂອກາດກອງປະຊຸມລັດຖະມົນຕີຕ່າງປະເທດອາຊຽນບວກສາມ ຄັ້ງທີ 25. ກອງປະຊຸມດັ່ງກ່າວ ໄດ້ທົບທວນຄວາມຄືບໜ້າຂອງການຮ່ວມມື ແລະ ຢໍ້າຄືນຄວາມໝາຍໝັ້ນຮ່ວມກັນ ໃນການຮັດແໜ້ນກົນໄກການຮ່ວມມືອາຊຽນບວກສາມ ໃຫ້ເປັນກໍາລັງຂັບເຄື່ອນອັນສໍາຄັນ ໃນການສ້າງພາກພື້ນອາຊີຕາເວັນອອກ ໃຫ້ມີຄວາມເຂັ້ມແຂງໃນໄລຍະຍາວ. ບົນຈິດໃຈດັ່ງກ່າວ, ກອງປະຊຸມ ໄດ້ສະໜັບສະໜູນຂໍ້ສະເໜີ ຂອງ ສປປ ລາວ ໃນການອອກຖະແຫຼງການຜູ້ນໍາອາຊຽນບວກສາມ ວ່າດ້ວຍການຮັດແໜ້ນການເຊື່ອມຈອດຕໍ່ການຮ່ວມມືລະບົບຕ່ອງໂສ້ການສະໜອງຂອງພາກພື້ນ ໃນກອງປະຊຸມສຸດຍອດອາຊຽນບວກສາມ ຄັ້ງທີ 27 ທີ່ຈະຈັດຂຶ້ນ ໃນເດືອນຕຸລາ 2024 ທີ່ ນະຄອນຫຼວງວຽງຈັນ.

ໃນກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກ ຄັ້ງທີ 14, ໄດ້ຢືນຢັນຄືນຄວາມໝາຍໝັ້ນຮ່ວມກັນ ເພື່ອສືບຕໍ່ຮັດແໜ້ນການຮ່ວມມືພາຍໃຕ້ຂອບກອງປະຊຸມສຸດຍອດອາຊີຕາເວັນອອກ ຫຼື ອີເອເອສ ໃນຖານະເປັນເວທີຂອງຜູ້ນໍາ ເພື່ອສົ່ງເສີມການປຶກສາຫາລື ແລະ ການຮ່ວມມືທີ່ສ້າງສັນ ກ່ຽວກັບບັນຫາທາງດ້ານຍຸດທະສາດ, ການເມືອງ ແລະ ເສດຖະກິດ ທີ່ມີຜົນປະໂຫຍດຮ່ວມກັນ ແນໃສ່ສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກທາງດ້ານເສດຖະກິດໃນຂົງເຂດອາຊີຕາເວັນອອກ. ກອງປະຊຸມ ໄດ້ສະໜັບສະໜູນຂໍ້ສະເໜີໃນການອອກຖະແຫຼງການຂອງຜູ້ນໍາກອງປະຊຸມສຸດຍອດອາຊີຕາເວັນອອກ ວ່າດ້ວຍການເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ໃນໂອກາດກອງປະຊຸມສຸດຍອດອາຊີຕາເວັນອອກ ຄັ້ງທີ 19 ທີ່ຈະຈັດຂຶ້ນໃນເດືອນ ຕຸລາ 2024 ທີ່ ນະຄອນຫຼວງວຽງຈັນນີ້. ນອກຈາກນັ້ນ, ພວກເຮົາ ມີແຜນຈະຈັດກອງປະຊຸມປຶກສາຫາລືແນວຄວາມຄິດອາຊຽນວ່າດ້ວຍອິນໂດ-ປາຊີຟິກ: ກ້າວໄປສູ່ເປົ້າໝາຍການພັດທະນາແບບຍືນຍົງຂອງອົງການສະຫະປະຊາຊາດ (ສປຊ) 2030, ໃນວັນທີ 30 ສິງຫາ 2024 ທີ່ ນະຄອນຫຼວງວຽງຈັນ.

ບັນດາລັດຖະມົນຕີຕ່າງປະເທດ ຂອງເວທີພາກພື້ນອາຊຽນ (ARF) ຈາກ 27 ປະເທດ ໄດ້ພົບກັນໃນກອງປະຊຸມເວທີພາກພື້ນອາຊຽນ ຄັ້ງທີ 31. ພວກເຮົາ ໄດ້ທົບທວນຄືນການຈັດຕັ້ງປະຕິບັດບັນດາກິດຈະກໍາ ກາງສະໄໝ ສໍາລັບສົກປີ 2023-2024 ແລະ ໄດ້ຮັບຮອງເອົາບັນຊີກິດຈະກໍາຂອງເວທີພາກພື້ນອາຊຽນ ທີ່ຈະຈັດຕັ້ງປະຕິບັດໃນສົກປີ 2024-2025. ໃນນີ້, ສະມາຊິກເວທີພາກພື້ນອາຊຽນ ໄດ້ຢໍ້າຄືນຄວາມສໍາຄັນຂອງ ເວທີພາກພື້ນອາຊຽນ ໃນຖານະທີ່ເປັນເວທີທີ່ມີຄວາມກວມລວມ ສໍາລັບການປຶກສາຫາລືແບບສ້າງສັນ. ກອງປະຊຸມ ໄດ້ຮັບຮອງເອົາຖະແຫຼງການເວທີພາກພື້ນອາຊຽນ ວ່າດ້ວຍການຮັດແໜ້ນການຮ່ວມມືພາກພື້ນດ້ານຄວາມປອດໄພຂອງເຮືອກໍາປັ່ນ.

ໃນໂອກາດນີ້, ຍັງໄດ້ຈັດ 3 ກອງປະຊຸມລະດັບລັດຖະມົນຕີ ພາຍໃຕ້ຂອບການຮ່ວມມືແມ່ນໍ້າຂອງ ເປັນຕົ້ນ ກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ຍີ່ປຸ່ນ ຄັ້ງທີ 15, ກອງປະຊຸມລັດຖະມົນຕີີຕ່າງປະເທດແມ່ນໍ້າຂອງ-ສ ເກົາຫຼີ ຄັ້ງທີ 12 ແລະ ກອງປະຊຸມລັດຖະມົນຕີຕ່າງປະເທດຂອບການຮ່ວມມືຄູ່ຮ່ວມແມ່ນໍ້າຂອງ-ສ ອາເມຣິກາ ຄັ້ງທີ 3. ໃນທຸກໆກອງປະຊຸມ ໄດ້ມີການແລກປ່ຽນຄວາມຄິດເຫັນຢ່າງສ້າງສັນ ແລະ ກົງໄປກົງມາກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈ ແລະ ເປັນຫ່ວງຮ່ວມກັນເຊັ່ນ: ສະພາບການຢູ່ມຽນມາ, ແຫຼມເກົາຫຼີ, ທະເລຈີນໃຕ້, ອູແກຣນ ແລະ ຕາເວັນອອກກາງ ເປັນຕົ້ນ. ຊຶ່ງທັງໝົດກອງປະຊຸມຄັ້ງນີ້ ຈະເປັນພື້ນຖານອັນສໍາຄັນ ໃຫ້ແກ່ຜົນສໍາເລັດຂອງກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດອື່ນທີ່ກ່ຽວຂ້ອງ ທີ່ຈະຈັດຂຶ້ນໃນເດືອນ ຕຸລາ ທີ່ ນະຄອນຫຼວງວຽງຈັນ.

(ຂ່າວ: ວັນເພັງ, ຂໍ້ມູນ: ກະຊວງການຕ່າງປະເທດ, ພາບ: ສໍານານ)