ການແຂ່ງຂັນກິລາເຕະບານມິດຕະພາບ ລາວ-ໄທ ລະຫວ່າງທີມ ແກ້ວສີໄຄ ອໍສະຕາ ພົບກັບ ທີມ ສິງ ອໍສະຕາ ແຫ່ງຣາຊະອານາຈັກໄທໄດ້ຈັດຂຶ້ນໃນວັນທີ 27 ກໍລະກົດ 2024 ຢູ່ທີ່ສະໜາມກິລາແຂວງຄໍາມ່ວນໂດຍມີທ່ານ ວັນໄຊ ພອງສະຫວັນ ເຈົ້າແຂວງໆຄໍາມ່ວນ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ທ່ານ ບຸນມີ ພີມມະສອນ ປະທານສະພາປະຊາຊົນແຂວງຄໍາມ່ວນ ປະທານກິດຕິມະສັກໃນການຈັດການແຂ່ງຂັນກິລາມິດຕະພາບ ,ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງ ປະທານສະມາຄົມ,ສະຫະພັນກິລາກາຍະກໍາແຂວງ ຄະນະປະທານກິດຕິມະສັກໃນການຈັດການແຂ່ງຂັນກິລາມິດຕະພາບໃນຄັ້ງນີ້ ,ທ່ານ ປິຕິ ພິລົມພັກດີ ຮອງກໍາມະການຜູ້ຈັດການໃຫຍ່ ບໍລິສັດ ບຸນລອດບິວເວີລີ້ ຈໍາກັດ , ທ່ານ ແກ້ວສີໄຄ ວົງປະເສີດ ປະທານກຸ່ມບໍລິສັດແກ້ວຫັດຖະກໍາ ແລະ ເຄື່ອງທີ່ລະນຶກ ຈໍາກັດ ຜູ້ດຽວໃຫ້ການອຸປະຖໍາຫຼັກ ແລະ ເປັນຜູ້ປະສານງານ ແລະ ທັງເປັນຮອງປະທານຈັດງານ ,ທ່ານ ສົມຊາຍ ເຂັມກັດ ຕົວແທນທີມນັກກິລາເຕະບານ ສິງອໍສະຕາ,ມີບັນດາຕົວແທນບໍລິສັດຫ້າງຮ້ານທີ່ໃຫ້ການອຸປະຖໍາ,ຄະນະຮັບຜິດ
ຊອບຈັດການແຂ່ງຂັນ,ຄະນະນໍາ,ຄູຝຶກ,ນັກກິລາທັງສອງຝ່າຍ,ແຂກຖືກເຊີນຕະຫຼອດເຖິງກອງເຊຍພາຍໃນແຂວງ ແລະ ແຂວງໃກ້ຄຽງເຂົ້າຮ່ວມເປັນຈໍານວນຫຼາຍ .
ທ່ານ ບຸນປອນ ທອງສຸວັນນະລາດ ຮອງຫົວໜ້າພະແນກສຶກສາທິການ ແລະ ກິລາແຂວງຄໍາມ່ວນກໍ່ໄດ້ກ່າວຈຸດປະສົງ ແລະ ລາຍງານຄວາມພ້ອມຂອງການຈັດງານ ຊຶ່ງໃນການແຂ່ງຂັນກິລາໃນຄັ້ງນີ້ໂດຍປະຕິບັດຕາມຂໍ້ຕົກລົງຂອງທ່ານຮອງເຈົ້າແຂວງໆຄຳມ່ວນ ສະບັບເລກທີ 184/ຈຂ, ລົງວັນທີ 18 ກໍລະກົດ 2024 ວ່າດ້ວຍການແຕ່ງຕັ້ງຄະນະຮັບຜິດຊອບກະກຽມຈັດການແຂ່ງຂັນກິລາເຕະບານມິດຕະພາບລະຫວ່າງທີມ ແກ້ວສີໄຄ ອໍສະຕາ ພົບກັບ ທີມ ສິງ ອໍສະຕາແຫ່ງຣາຊາອານາຈັກໄທ ຊຶ່ງເປັນຄັ້ງປະຫວັດສາດ ແລະ ມີຄວາມໝາຍສໍາຄັນເປັນຢ່າງຍິ່ງທີ່ບໍ່ເຄີຍມີມາກ່ອນ ແລະ ພາກພູມໃຈທີ່ຊາວແຂວງຄໍາມ່ວນໄດ້ຮັບຕ້ອນທີມ ສິງ ອໍສະຕາ ແຫ່ງຣາຊາອານາຈັກໄທ ຊຶ່ງເປັນທີມນັກເຕະລວມດາຣາເຊັ່ນ : ນັກຮ້ອງ,ນັກສະແດງ,ນັກມວຍ,ນັກກິລາທີມຊາດທີ່ມີຊື່ສຽງໂດງດັງຂອງຣາຊາອານາຈັກໄທ ແລະ ພິເສດຍັງໄດ້ຮັບຕ້ອນນັກທຸລະກິດບັນດາທ່ານຜູ້ສໍາຄັນຂອງຣາຊະນາຈັກໄທເຂົ້າຮ່ວມງານກິລາດັ່ງກ່າວທັງນີ້ກໍ່ເພື່ອເປັນການສົ່ງເສີມການທ່ອງທ່ຽວ-ກິລາ ແລະ ເພື່ອການກຸສົນຊອກຫາແຫຼ່ງທຶນຊື້ອຸປະກອນການແພດທີ່ຍັງຂາດເຂີນທີ່ຢູ່ເຂດຫ່າງໄກຊອກຫຼີກ . ຈາກນັ້ນຕາງໜ້າບໍລິສັດ ບຸນລອດບິວເວີລີ້ ຈໍາກັດ ແລະ ຕົວແທນທີມນັກເຕະສິງອໍສະຕາກໍ່ໄດ້ກ່າວມີຄໍາເຫັນ ແລະ ສະແດງຄວາມຮູ້ສຶກຕໍ່ພິທີ . ຫຼັງຈາກນັ້ນທ່ານ ບຸນມີ ພີມມະສອນ ປະທານສະພາປະຊາຊົນແຂວງຄໍາມ່ວນປະທານກິດຕິມະສັກໃນການຈັດການແຂ່ງຂັນກິລາມິດຕະ
ພາບກໍ່ໄດ້ມີຄໍາເຫັນ ແລະ ກ່າວເປີດພິທີຢ່າງເປັນທາງການ . ຊຶ່ງກ່ອນຈະລົງສູ່ສະໜາມແຂ່ງຂັນທີມສິງອໍສະຕາກໍ່ໄດ້ມອບອຸປະກອນກິລາຈໍານວນໜຶ່ງເພື່ອເປັນທີ່ລະນຶກໃຫ້ແກ່ແຂວງຄໍາມ່ວນ ຈາກນັ້ນຄະນະນັກກິລາເຕະບານທັງສອງຝ່າຍກໍ່ໄດ້ສໍາຜັດມືກັນ ແລະ ໄດ້ຖ່າຍຮູບຮ່ວມກັນເພື່ອເປັນທີ່ລະນຶກ ໂດຍການແຂ່ງຂັນໄດ້ໃຊ້ເວລາ 90 ນາທີຊຶ່ງໃນຊ່ວງເວລາພັກການແຂ່ງຂັນແຕ່ລະຄັ້ງແມ່ນຈະໄດ້ຮັບຊົມ - ຮັບຟັງການຮ້ອງເພງຂັ້ນລາຍການ,ການມອບເງິນອຸປະຖໍາຈາກພາກສ່ວນບໍລິສັດຕ່າງໆ.ການແຂ່ງຂັນແມ່ນຝ່າຍໄທເປັນຜູ້ຊະນະ . ໃນການແຂ່ງຂັນບານເຕະມິດຕະພາບລາວ-ໄທໃນຄັ້ງນີ້ມັນໄດ້ສ່ອງແສງໃຫ້ເຫັນຄວາມສາມັກຄີຮັກແພງ , ຄວາມມີນໍ້າໃຈນັກກິລາ , ຮູ້ແພ້-ຮູ້ຊະນະ , ເປັນການຮັດແໜ້ນຄວາມຜູກພັນໄມຕີຈິດມິດຕະພາບ , ນໍ້າໃຈຊ່ວຍເຫຼືອເຊິ່ງກັນ ແລະ ກັນຖານປະເທດບ້ານໃກ້ເຮືອນຄຽງ . ໃນຕອນຄໍ່າຂອງວັນດຽວກັນກໍ່ໄດ້ສືບຕໍ່ມອບ-ຮັບເງິນອຸປະຖໍາ ແລະ ໃບຍ້ອງຍໍລະຫວ່າງອົງການປົກຄອງແຂວງ ແລະ ພາກສ່ວນບໍລິສັດຕ່າງໆທີ່ໄດ້ໃຫ້ການອຸປະຖໍາໃນຄັ້ງນີ້ຕື່ມອີກ .(ຂ່າວ-ພາບ : ແດງສະຫວັດ ແສນພານິດ) . 020-55306493