ວິທະຍຸກະຈາຍສຽງຫວຽດນາມລາຍງານ, ໃນວັນທີ 29 ກໍລະກົດ ຜ່ານມາກົມໃຫຍ່ສະຖິຕິ ຫວຽດນາມ ໄດ້ປະກາດວ່າ: ໃນເດືອນກໍລະກົດ ປີ 2024, ວົງເງິນສົ່ງອອກ-ນຳເຂົ້າສິນຄ້າຄາດວ່າຈະບັນລຸກວ່າ 69 ຕື້ໂດລາເພີ່ມຂຶ້ນ 8,7% ເມື່ອທຽບໃສ່ກັບເດືອນມິຖຸນາ ແລະ ເພີ່ມຂຶ້ນ 21,8% ເມື່ອທຽບໃສ່ໄລຍະດຽວກັນຂອງປີ 2023. ໄລ່ລວມ 7 ເດືອນຕົ້ນປີ, ຍອດວົງເງິນການສົ່ງອອກ, ນຳເຂົ້າສິນຄ້າບັນລຸ 440 ຕື້ກວ່າໂດລາເພີ່ມຂຶ້ນ 17% ເມື່ອທຽບໃສ່ໄລຍະດຽວກັນຂອງປີ 2023. ດ້ວຍບັນດາໝາກຜົນດັ່ງກ່າວ, ເດືອນກໍລະກົດ ປີນີ້, ຫວຽດນາມ ຄາດວ່າການສົ່ງອອກຈະເກີນດູນບັນລຸ 2,12 ຕື້ໂດລາ. ໄລ່ລວມ 7 ເດືອນຕົ້ນປີນີ້, ການສົ່ງອອກເກີນດູນຄາດວ່າຈະບັນລຸ 14,08 ຕື້ໂດລາ.

ທ່ານ ເຈິ່ນແທັງຫ໋າຍ ຮອງຫົວໜ້າກົມສົ່ງອອກ - ນຳເຂົ້າກະຊວງອຸດສາຫະກຳ ແລະ ການຄ້າ ຫວຽດນາມ ໄດ້ຢັ້ງຢືນວ່າ: ການສົ່ງອອກ-ນຳເຂົ້າຂອງ ຫວຽດນາມ ໄດ້ມີຫຼາຍສັນຍານທີ່ຕັ້ງໜ້າ. ບັນດາທ້ອງຖິ່ນໄດ້ມີແຜນການລະອຽດເພື່ອໜູນຊ່ວຍ, ຮ່ວມເດີນທາງກັບວິສາຫະກິດໃນການເປີດກວ້າງຕະຫຼາດ.